1 ဝါယ် တီ အာဆာမူအေန် ဘော ယမ်။ ဒူအီ အီဆာရေလ ဘော ကာဖြူမ် ဒီ တး ကာဇု ဘော က့လိုဝ် ဘော ယာမ်။ ဂေ ဘော ကာဖြူမ် ဒီ ဟာဝ် ဒိပ် အန် ဒီ ကာင် အန် ခဲင် မိူင် ရာမာ တွိုန်။

န့ ယီ မုး အာဒါဝိတ်၊ အန် ယိတ့် ဟာဝ် ခဲင် ပြဲ ကာဟဝ်း အီ စိူဝ် မောန။ 2 ဒေါ အန် တီ န့ မိုဝ်း ဒူအီ အူ ဝီ၊ အန် ကွယ် ခဲင် ပြဲ ကာဟဝ်း အီ စိူဝ် မောန တွိုန်။ အန် မိုဝ်း ကြုဝ်ကြာမ် ကိူန်။ အန် ကွယ် ဒီ နွန် ဂါမေလ တွိုန်။ ဒူအီ ဝီ တီ၊ အန် မုး ဒါ အီ ခြမ် တာင်။ အန် မိုဝ်း မာဘူ အူယ် ဟြဲန့် ဒုဝ်၊ မာပဲ အူ ဟြဲန့် ဒုဝ်။ အန် ကပ် ဟိုက် မာဘူ အန်၊ ကွယ် ကာတတ် နွန် ဂါမေလ တွိုန်။ 3 ဒူအီ ဝီ တီ စိူဝ် အာနာဘာလ။ အီဘိုန့် အန် စိူဝ် နာင် အေဖီဂေလာ။ အီဘိုန့် တွိုန် မိုဝ်း အာငျာန် ဘွတ်။ အာရိုပ် အန် မိူဝ် စှိတ်။ အီမာယ် အန် ယီ မိုဝ်း နဝ်း ဒိူဝ်၊ ဘူင် မီ နာ တူ မွှိုမ်။ အန် မုး လှုက်လှာန် အာဂါလိပ်။

4 အာဒါဝိတ် ဘော ကွယ် ခဲင် ပြဲ တွိုန်။ အန် ဘော ယိုဝ် လွင် အာနာဘာလ ကပ် ဟိုက် မာဘူ အန်။ 5 အန် ဘော စ်ု ကာညူမ် ဂိုဝ် ဝီ၊ ကာလာင် ဒီ ဂေ တဝ်း၊ “တဲး ဘေ ဟာဝ် ဒူင် ကွယ် အာနာဘာလ ဒီ နွန် ဂါမေလ တွိုန်။ တဲး ဘေ ကာလာင် ဂြုဝ်း ဒါခိုယ် ဒီ အန် တဝ်း၊ အုဝ် ဟဲ့ တိုယ် ဘေ။ 6 ဘေ လုဝ် တဝ်း၊ ‘တဲး မဲ ကွယ် ဒါခိုယ်။ ဘော န့ဟူမ် မဲ၊ တဲး ဘေ ဒါခိုယ်။ ခဲ့ ကွယ် ဂေ အီ ကွယ် ဒူပ် မဲ၊ တဲး ဘေ ဒါခိုယ် တူတ့် ဒွန် အီ။

7 ဒေါ တီ နီ အာဒါဝိတ် ဟဲ့ ယိုဝ် လွင် မဲ ဟဲ့ ကပ် ဟိုက် မာဘူ မဲ။ အန် တဲး မဲ နပ်၊ ဂေ ဒူအီ အီ ဟျီင် မာဘူ မဲ ဂေ ဟဲ့ ဒွိုမ် ကာတုန့် အန် ဘော ကွယ် ဒူပ် အန်။ အန် မိူဝ် တူ ဘူင် လုတ့် မာဆေ ဒီ ဂေ။ စုဝ် ကွယ် ဂေ ဒီ ကာဒါယ် နွန် ဂါမေလ တီ၊ ကြုဝ် မဲ မိူဝ် တူ ဘျုဝ်း မာဆေ။ 8 ဆေ မဲ ဒီမွှတ် ဒူအီ မဲ တီ၊ ဂေ ဒီ ပွိုန် ကာလာင် ဒီ မဲ။ ခုဝ်၊ တဲး ယေ ယိုဝ် ဂုင် မဲ။ ယေ ဟဲ့ တး ဇမ် ဆီငဲ ဘူင် မဲ ဘ့လွယ်။ မှာန့်၊ တဲး မဲ မိုဝ်း ပီ ဒွါ ဝေန့် ဒီ ယေ ဘော ဒီ ဂွန် မဲ အီ စိူဝ် အာဒါဝိတ် တီ။’”

9 ဂေ ဘော တး ဇမ် ဒူင် ကွယ် အာနာဘာလ တွိုန်၊ ဂေ မိူဝ် ကာလာင် ဒီ အန် ခဲ့ ပီ တဝ်း အာဒါဝိတ် ဒီ ဂေ။

10 အာနာဘာလ ဝီ ကာလာင် ဒီ ဂေ တဝ်း၊ “အာဒါဝိတ် တီ မုး အာဆေ။း ဂွန် အာယေဆေ တီ မုး အာဆေ။း ယာမ် ဒေါ တီ နီ၊ မှာယ် အီ ဟဝ် ဟဲ့ ကိူန် အီ လေး တဝ် တ ဒါ ကာညာ ဂေ။ 11 အုဝ် တူ မိုဝ်း ထုင်ဂျာမ် ဒီ ဒိုဝ်း ခါမုန် အုဝ်၊ အိုမ် အုဝ် ဘော ယင် မာဘူ ပဲ့ ဟဲ့ ငဝ်း ဒူအီ အုဝ်၊ ဝီ ဒွါ ဒီ ဂေ ဒူအီ ပီ တူ နပ် အုဝ် နာ တး။”

12 ကာညူမ် ဂေ တွိုန် ဘော ဝီ ဝေန့် ကာလာင် ဂြုဝ်း တီ ဒီ အာဒါဝိတ်။ 13 အာဒါဝိတ် မိူဝ် ဝီ ကာလာင် ဒီ ဒူအီ အန် တဝ်း၊ “ဘေ ဒိုဝ်း မာပွါ့ လာင် ဘေ၊ ပက် ဒိုက် ဒီ ညွယ် ဘေ ဒွန် အီ။” ပန် တီ ဒူအီ အာဒါဝိတ် ဂေ ဘော ဒိုဝ်း မာပွါ့ လာင်၊ ပက် ဒိုက် ဒီ ညွယ် ဂေ ဒွန် အီ။ ဂေ ကွယ် ဖွုန် မာယဝ်း ဝီ အီ ဟာဝ် ဒူပ် အာဒါဝိတ်။ အာဒါ အာ မာယဝ်း ဝီ ဘော ကွယ် ဘ်ု ကြုဝ်ကြာမ် ဂေ။

14 န့ ယီ မိုဝ်း ဒဲစေန့် အာနာဘာလ အူ ဝီ၊ အန် ဘော ကာလာင် ဒီ နာင် အေဖီဂေလာ အီ မုး အီဘိုန့် အာနာဘာလ တွိုန်။ အန် တဝ်း၊ “မဲ ယွတ်၊ အာဒါဝိတ် ဟဲ့ စ်ု ဒူအီ ခဲင် ပြဲ တး ကာလာင် ဂြုဝ်း ဒါခိုယ် ဒီ ဒါ ကာညာ အေ နီ။ အန် ယီ ဝီ အေး ကာဆဝ် ဂေ။ 15 ဂေ တီ ယီ ဟဲ့ ဒွိုမ် ကာဝေ ကိူန် ယေ။ ယာမ် ဒေါ ကွယ် ကာတတ် ယေ ဒူင် ကွယ် ဂေ၊ ဂေ တဲး ယေ ဘဲန် ဂိုက် ကာဒူပ် ဒီ ဂေ။ ယေ မိူဝ် တူ စှိုမ် မာဆေ။ ကြုဝ်ကြာမ် ယေ မိူဝ် တူ ဟြာယ် ခေါ အူ မျုဝ်။ 16 ယာမ် ဒေါ ဟျီင် ယေ မာဘူ ဘဲန် ဂိုက် ကာဒူပ် ဒီ ဂေ၊ ဘော ကာတဲ ဆီငဲ ဘော ခဲင် မှိုဝ် ဂေ တီ ဟဲ့ ဘဲန် ဒါ အီ ရဲ အီ ဂွင့် ယေ ဆေဆေ။ 17 ခုဝ် န့ ပါယ် တီ မဲ ယာ ကာညာ၊ မဲ ကာဖာ န့ လုဝ် ပါယ် မှဝ် ကွဲ့ တဲး န့ ဘဲန် အီ တူ မွှိုမ် ဒီ ဒါ ကာညာ အေ တီ ဘော ဒီ န့ဟူမ် အန် ဒွန် အီ။ ခုဝ်၊ ဒါ ကာညာ နီ ဟဲ့ ဟာယ် ကာဆဝ်။ အာဝ် မိုဝ်း အာဆေ အီ ပွိုန် ကာလာင် ဂြုဝ်း ဒီ အန်။”

18 ပန် တီ နာင် အေဖီဂေလာ တွိုန် ဘော ပီခြန် အန် ဒီ ရဲန် ပီ ဒီ တိုယ် ဒီ အာဒါဝိတ်။ အန် ဘော ဒိုဝ်း ခါမုန် အာ မာယဝ်း ဘူင့်၊ အိုမ် မာငုန် အာ ပုင်၊ မာဘူ ပဲ့ ဟဲ့ ဟွတ့် ရဲန် အုန် ဂေ ဖန် ဒုဝ်၊ ငှုဝ် မာတုး ဖန် ဘ့လဲ၊ ဘ့လေ မာငုန် ကာဟဝ်း အူ မာယဝ်း ဒီခ့လဲပ်၊ ဘော ဘ့လေ ဒီပူ ကာဟဝ်း အာ မာယဝ်း ဒီခ့လဲပ်။ အန် ဘော ပီခြန် အန် ဒီ ဒိုဝ်း ဟပ် ဒဲင် ဒါင် မာလုဝ်။ 19 အန် ဘော ကာလာင် ဒီ ဒဲစေန့် အန် ဂေ တွိုန် တဝ်း၊ “တဲး ဘေ ယဲတ့် အုဝ် ဟာဝ်။ အုဝ် မိူဝ် ဒီ ဒူပ် ဘေ။” နာင် တွိုန် ယီ တူ ကာလာင် တဲး အီမာယ် အန် အီ စိူဝ် အာနာဘာလ တွိုန် နပ် လွင် အန် တီ။

20 ဒေါ ပဝ့် နာင် အေဖီဂေလာ မာလာ၊ ဟာဝ် ဒူပ် န့တေန့်၊ အန် ဘော ဇမ် ဒီ ရူင် ဒဲင် နွန်၊ န့ မုး အာဒါဝိတ် ဂေ ဒူအီ အန်၊ ဂေ ဘော တး လာယ် ကာတုန့် ဒီ အန်။ 21 အာတ့် ဇမ်၊ အာတ့် လာယ် ကာတုန့် ဂေ တွိုန်၊ အာဒါဝိတ် ဟဲ့ တဝ်း၊ “အုဝ် ဘ်ု ဒီလူယ် ဒီလာယ် ကြုဝ် ဒူအီ ဝီ နီ။ ဒေါ ကွယ် ဂေ ခဲင် ပြဲ ကာဟဝ်း တွိုန်၊ ကြုဝ် အန် ခေါ အူ မျုဝ် မိူဝ် တူ ဟြာယ်။ အီ မွှိုမ် ပီ ဘူင် အုဝ် ဒီ အန်၊ အန် ဝီ ဘူင် ဝျီ့ အီ တူ မွှိုမ် ဒီ အုဝ်။ 22 ခဲညှာ ဆိန့်ဝး ဟီ ဘ့လာင်၊ အုဝ် ဒီ ငဝ်း ဝဲန် တူတ့် ဘော အန် ဘော အီမာယ် ဂေ အီ ဒူပ် အန်။ ဆေ ဟီ ဂိတ် ခေါ အူ ဝီ၊ တဲး ဇဝ်ဖြာ ဝီ ဒွါ ဒုက် ကာဆဝ် ဒီ အုဝ်။”

23 အန် ဟဲ့ ဟွတ့် ကာလာင် ဂြုဝ်း တီ၊ နာင် အေဖီဂေလာ တွိုန် ဘော ယိုဝ် အာဒါဝိတ်၊ အန် ဘော လေး ဒဲင် ကာတု မာလာ အန်၊ ဝီ မုတ် ဂိုပ် ဒီ အာတ့် အာဒါဝိတ် ဘော ခြိုပ်ခြဝ် ဒီ ကာဒါယ်။ 24 အန် ဘော မုတ် ဂိုပ် ဒီ ပ့လဝ် အာဒါဝိတ် တွိုန် တဝ်း၊ “အိုယ် မဲ ဒါ ကာညာ အုဝ်၊ ပီ လုတ့် ယေ ဟဲ့ ဘဲန် မှာပ် ဒီ အုဝ်။ အုဝ် အီ ဒီ ခမ် တူတ့်။ အုဝ် မှာန့် ဒီ ကာလာင် ဂြုဝ်း တဲး မဲ ထူမ်၊ မှာန့် တဲး မဲ ထူမ် ဂြုဝ်း ဒဲစေန့် မဲ နီ။ 25 မဲ ကွဲ့ ကာဖာ လွင် အာနာဘာလ အီ မုး ဒူအီ နဝ်း ဟာယ် ကာဆဝ် တီ။ စိူဝ် အန် မိူဝ် န့ ကာဒါန် ဒီ အန်။ ဆီဖဝ် အန် န့ ပီ၊ ‘ဒူအီ ရိုဝ်၊ ဒူအီ မိူက်။’ အီ မုး အုဝ်၊ အီဘိုန့် ဒဲစေန့် မဲ နီ၊ အုဝ် တူ ယိုဝ် ဒေါ တး ဒူအီ မဲ ဒူင် ကွယ် ယေ။

26 ဒေါ တီ နီ တဲး ဘော ဇဝ်ဖြာ ဘော မဲ ထူမ် ဂြုဝ်း အုဝ် အီ မှာန် အာခါခ်ု။ ဇဝ်ဖြာ ဟဲ့ ရဲ မဲ၊ ကွဲ့ တဲး မဲ ဘူင် ဝျီ့ နာ တူ မွှိုမ် ဒီ အီ၊ ကွဲ့ တဲး မဲ လုဝ် ငဝ်း အီ။ ခုဝ်၊ ရန်ဆူ မဲ ဘော ဂေ အီ ဆီ ပျာတ့် မဲ၊ တဲး ဂေ ပီ အာနာဘာလ တီ။ 27 ဒေါ တီ နီ အုဝ် မှာန့် မဲ၊ တဲး မဲ ဒိုဝ်း ခေါဆွင် ပီ ဒိုဝ်း တး အုဝ် နီ၊ တဲး မဲ ဒွါ ဒီ ဂေ ဒူအီ အီ ဒူပ် မဲ နီ။ 28 မှာန့် မဲ ဂဝ်း ဝဲန် ပီ လုတ့် အုဝ် တီ။ အုဝ် ဟဲ့ နပ်၊ မဲ ကာဂုဝ်း မီ ပီ စ်ု ဇဝ်ဖြာ ဒီ မဲ။ ခုဝ်၊ ဇဝ်ဖြာ ဒီ ဘူင် တဲး ဘော မဲ ဘော လှုက်လှာန် မဲ ပွိုန် ဒီ အိုပ် မိူင် ယေ ဆေဆေ။ ကူပ် န့ ပါယ် တီ ကွဲ့ တဲး မဲ ဘူင် နာ တူ မွှိုမ် ဒေါ မှဝ်။ 29 ဒူအီ မင် အီ၊ ဟဲ့ ဟြေတ့် ဒီ ငဝ်း ယမ် မဲ။ မာလဲ၊ အာဆာက် မဲ ဒါ ကာညာ အုဝ်၊ ဟဲ့ ကွယ် ဆီချာ။ ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အန် ဒီ ယွတ် မဲန် မဲ။ န့ ယီ မုး ရန်ဆူ မဲ၊ အန် ဇဝ် ဒီ ဝဲန် တဲး န့ ပီ မာဝ် အီ လေး ခဲင် ဝန် ပီ ဝိုန့် အီ။ 30 ဆေ ဇဝ်ဖြာ ဂေဇူ မဲ၊ ဆေ န့ ဟီ ဘဲန် တူတ့် ဒွန် မျုဝ် ပီ ဒွိုမ် ကာလာင် အန် ဒီ မဲ၊ ဆေ မဲ ဟီ ဘဲန် ဒါ အီ အိုပ် ဒူအီ အီဆာရေလ နီ၊ 31 မဲ ဟဲ့ ပွိုန် ကွယ် ဒါခိုယ်။ မဲ အာဝ် လုဝ် ဇေန့်ဇာ ဘဲန် နဝ်း က့လိုဝ် လွင် ပီ ဒွိုမ် ငဝ်း မဲ ဒူအီ၊ အီ တူ မိုဝ်း ဒီခုဝ်။ ဘော ပါယ် တီ မဲ အာဝ် ဟူ မိုဝ်း ဒီ လှုဝ်း လွင် ပဲ့ ဟဲ့ ဒွိုမ် ဘူင် ဝျီ့ မဲ ဒီ အီ။ ဆေ ဇဝ်ဖြာ ဟီ စွယ် မဲ၊ မှာန့်၊ ကွဲ့ တဲး မဲ ပိဝ် ဘော အုဝ်။”

32 နာင် အေဖီဂေလာ ဟဲ့ ဟွတ့် ကာလာင် ဂြုဝ်း တီ၊ အာဒါဝိတ် ဝီ ကာလာင် ဒီ အန် တဝ်း၊ “အုဝ် အိူပ် ဇဝ်ဖြာ အီ အိုပ် ဒူအီ အီဆာရေလ၊ အီ ဟဲ့ စ်ု တဲး မဲ တး လာယ် ကာတုန့် ဒီ အုဝ် အာတိုဝ် နီ။ တဲး အန် ဇဝ် မွင့်ကာရာ တဲး ဒီ မဲ။ 33 မဲ မိုဝ်း အာငျာန် ဘွတ်။ မဲ မိူဝ် ဟဲ့ ခြဲ အုဝ်၊ ကွဲ့ တဲး အုဝ် ဘူင် မှာပ်၊ ကွဲ့ တဲး အုဝ် ဘူင် ဝျီ့ နာ တူ မွှိုမ် ဒီ အီ ဟဝ်၊ ကွဲ့ တဲး အုဝ် ငဝ်း အီ အာတိုဝ် နီ။ ခုဝ် အန် တီ၊ တဲး ဇဝ်ဖြာ မွင့်ကာရာ တဲး ဒီ မဲ။ 34 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ခြဲ အုဝ်၊ ကွဲ့ တဲး အုဝ် ဘူင် နာ တူ မွှိုမ်။ ဆေ မဲ တူ ဒီငန့် ဒီ တး ခြန် ခြန်၊ တဲး မဲ ကာတုန့် အုဝ်၊ ခဲညှာ ဆိန့်ဝး ပြဲ ဟီ ဘ့လာင်၊ အုဝ် ဟဲ့ တဝ်း ဒီ ငဝ်း ဝဲန် မှာန် အီမာယ် မဲ၊ အီ စိူဝ် အာနာဘာလ ဘော ဂေ အီ ကွယ် ဒူပ် အန်။”

35 ပန် တီ အာဒါဝိတ် ဘော ဒိုဝ်း လက်ဆွင် ပီ ဒိုဝ်း တး နာင် အေဖီဂေလာ တွိုန်။ အန် ဘော တဝ်း၊ “မဲ ဝီ ဝေန့် ဒီ ကာင် မဲ။ တဲး မဲ ကွယ် ဒါခိုယ် ကွယ် ဆီချာ။ အုဝ် ဟဲ့ ထူမ် ဒူပ် ဂြုဝ်း ခဲ့ ပီ တဝ်း မဲ။”

36 ပန် တီ နာင် အေဖီဂေလာ တွိုန် ဘော ဝီ ဝေန့် ဒူင် ကွယ် အီမာယ် အန် အီ စိူဝ် အာနာဘာလ တွိုန်။ အာနာဘာလ ဟဲ့ ငျာ ဟူမ် ဘ့လွယ် ဒီ ကာင် အန် တွိုန်။ အန် ဟျီင် ပီ ဘ့လွယ် ခုန်ဒီခမ်။ ခဲင် နဝ်း အန် ဟဲ့ ဘျုဝ် ကာဆဝ် ကူပ် ဟဲ့ ယိုတ့် အန် ပဝ်း။ ခုဝ်၊ အာတ့် ဘ့လာင် ပြဲ၊ အီဘိုန့် အန် တွိုန် တူ ပွိုန် ဒီ ကာလာင် မာဆေ ဒီ အန်။ 37 ပန် တီ ပြဲ မိူဝ် ဘော ဘ့လာင်၊ ယိုတ့် ပဝ်း အန် ဟဲ့ ဟြာယ်၊ အီဘိုန့် အန် ဘော ကာလာင် တူတ့် ဒွန် မျုဝ် လွင် အာဒါဝိတ် တွိုန် ဒီ အန်။ ဒေါ အန် တီ ဖွိုမ် အန် အာဝ် ဟူ ဆီချာ။ ဒုဝ် အန် ဘော ပ့လူမ် နှဲန် မာဝ်။ 38 ဝါယ် အန် တီ ကာဘက် ဂိုဝ် ဆီငဲ၊ ဇဝ်ဖြာ ဘော တဲး အန် ယမ်။

39 အာဒါဝိတ် ဘော ယိုဝ် လွင် အာနာဘာလ ဟဲ့ ဟွတ့် ယမ်၊ အန် ဘော တဝ်း၊ “အုဝ် အိူပ် မဲ ဇဝ်ဖြာ၊ အီ နပ် လွင် ပဲ့ ဟဲ့ နဲန အာနာဘာလ တွိုန် ဒီ အုဝ်။ မဲ ဇဝ်ဖြာ ဟဲ့ ခြဲ အုဝ်၊ ကွဲ့ တဲး အုဝ် ဘူင် နာ တူ မွှိုမ် ဒီ အန်။ ဒေါ တီ နီ မဲ ဇဝ်ဖြာ ဟဲ့ ဝီ ဘူင်၊ တဲး အန် ခမ် မှာပ် အန်။”

ပန် တီ အာဒါဝိတ် ဘော စ်ု ဂေ ဟာဝ် ဒီမွှတ် နာင် အေဖီဂေလာ တွိုန်၊ တဲး အန် ဘဲန် အီဘိုန့် အန်။ 40 ဒဲစေန့် အာဒါဝိတ် ဘော တး ဇမ် ဒူင် ကွယ် နာင် အေဖီဂေလာ ဒီ နွန် ဂါမေလ တွိုန်။ ဂေ ဘော ကာလာင် ဒီ အန် တဝ်း၊ “အာဒါဝိတ် ဟဲ့ စ်ု ယေ တး ဒီမွှတ် မဲ ဘဲန် အီဘိုန့် အန်။”

41 နာင် တွိုန် ဘော ဝီ မုတ် ဂိုပ် ဒီ ကာဒါယ် ဝီ တဝ်း၊ “အုဝ် မုး ဒဲစေန့် အန်၊ တဲး အုဝ် ပွိုန် ဒီ ဘဲန် အီ ဘာယ် ပ့လဝ် အန်။” 42 ပန် တီ အန် ဘော ပီခြန် အန် ဒီ ဟာဝ်။ အန် ဘော ဒဲ့ နာင် ဂေ အီ မုး ဒဲစေန့် အန်၊ ဂေ ဖန် ဝီ၊ တဲး ဂေ ပဝ့် မာလာ ဟာဝ် ဒူပ် ဒူအီ အာဒါဝိတ် ဂေ အီ တး ဒဲ့ ဂေ တွိုန်၊ တဲး အန် ပွိုန် ဒီ ဘဲန် အီဘိုန့် အာဒါဝိတ်။ 43 အာဒါဝိတ် ဘော ဒိုဝ်း ဘော နာင် အေဟီနွင် အီ တး ခဲင် မိူင် ယေစာရေလ တွိုန်၊ တဲး ဂါယ် ဘဲန် အီဘိုန့် အန်။ 44 အာဆောလူ ဘော ဒိုဝ်း အီ မုး ဂွန် အန် အီ စိူဝ် နာင် မီခါလ တွိုန်၊ အီ မုး အီဘိုန့် အာဒါဝိတ်၊ ဝီ အာပ် အန် ဒီ အာဖာလ အီ မုး ဂွန် အာလေဆာ၊ အီ မုး ဒူအီ မိူင် ကာလိမ် တွိုန်။ အန် ဘော တဲး ဂွန် အီဘိုန့် အန် တီ ဝီ ဘဲန် အီဘိုန့် ဝီ တီ။