1 အာဆောလူ ဘော ဝီ တး ဒူင် ကာဂုဝ်း အန် ဒီ ဒူအီ ဖီလီထီ၊ အီ ဟဝ် ဘော တဝ်း ဒီ အန်၊ “မဲ ယွတ်၊ အာဒါဝိတ် ဟဲ့ ဝီ တး ကွယ် ခဲင် ပြဲ ဒီ မိူင် အေန်ကေဒီ တွိုန်။” 2 အာဆောလူ ဘော ရဝ်း ဒူအီ အီဆာရေလ အူယ် ဟြဲန့် ဝီ၊ တဲး ဂေ ဟာဝ် ခဲင် ပြဲ ဒီ နွန် ဒါအာင် ဒူင် မိုဝ်း မာပဲ ပြဲ၊ တဲး ဂေ ဟြေတ့် အာဒါဝိတ် ဂေ ဒူအီ အန်။

3 ဂေ ဘော ဇမ် ဒူင် မိုဝ်း ကာပိုမ် မာဘူ အီ ကွယ် ခူပ် န့တေန့် ဒူင် မိုဝ်း ကာဒဝ် မာဝ်။ အာဆောလူ ဘော လိုပ် ဟာဝ် ခဲင် ကာဒဝ် မာဝ် တီ၊ တဲး အန် ပွိုန် ဒီ ဝိန် ပြဲ ဒီ တီ။ အီ မုး အာဒါဝိတ် ဂေ ဒူအီ အန်၊ ဂေ ယီ ကွယ် ဒူင် ဆိူတ် ကာဒဝ် မာဝ် တီ။ 4 ဂေ ဒူအီ အာဒါဝိတ် ဘော ကာလာင် ဒီ အန် တဝ်း၊ “မဲ ယွတ်၊ ဒေါ တီ နီ ဟဲ့ ဇမ် ဆီငဲ ပီ ကာလာင် ဇဝ်ဖြာ ဒေါ တဝ်း အန် ဒီ မဲ၊ ‘အုဝ် ဒီ အာပ် ရန်ဆူ မဲ ဒီ မဲ။’ မဲ ဟဲ့ ပွိုန် ဘူင် ခဲ့ ပီ ဆီ ဘူင် မဲ ဒီ အန်။” အာဒါဝိတ် ဘော ကြဲ ဒီ ဟာဝ် ကာချြီ့၊ တူ တဲး န့ ဂြန့်။ အန် ဘော ပြာ ဒီ ဆွာ့ ဆီတုဝ် အာဆောလူ အီ စဲက်။

5 ဝါယ် တီ အန် ဝီ လုတ့် နဝ်း ကူပ် ဟဲ့ ဆွာ့ အန် ဆီတုဝ် အာဆောလူ တွိုန်။ 6 အန် ဝီ ကာလာင် ဒီ ဒူအီ အန် တဝ်း၊ “မှာန့်၊ တဲး ဇဝ်ဖြာ ခြဲ အုဝ်၊ ကွဲ့ တဲး အုဝ် ဘူင် မျုဝ် နီ ဒီ ဒါ ကာညာ အုဝ်၊ အီ မုး ဝီ ပဲ့ ဟဲ့ ဖဝ်း ဇဝ်ဖြာ နာမန် ဒီ ဂိန့် အန်။ ကွဲ့ တဲး အုဝ် ဘူင် နာ တူ မွှိုမ် ဒီ အန်။ ခုဝ်၊ ဇဝ်ဖြာ ဟဲ့ အိုင် ဒီ ဖဝ်း နာမန် ဒီ ဂိန့် အန်။” 7 အာဒါဝိတ် ဘော ကာလာင် ဂြုဝ်း တီ ဘော ခြဲ ဒူအီ အန်၊ တူ တဲး ဂေ ဘူင် မာဆေ ဒီ အာဆောလူ။ အာဆောလူ ဘော လေး ဟာဝ် တ ကာဒဝ် မာဝ် တီ။

8 ဝါယ် တီ အာဒါဝိတ် ဘော ဝီ လေး ခဲင် ကာဒဝ် မာဝ် တွိုန်၊ ဘော ဝီ ဒဲ့ ဒီ ကာလာင် ဒူပ် ဒီ ပန် အာဆောလူ တဝ်း၊ “အိုယ် မဲ ခုန်ဒီခမ် အုဝ်၊ မဲ မုး ဒါ ကာညာ အုဝ်။” အာဆောလူ တွိုန် ဘော ဝီ မာငး ဝိဝ် နာ ပန် အန်။ အာဒါဝိတ် ဘော ဝီ မုတ် ဂိုပ် ဒီ ကာဒါယ် ခြိုပ်ခြဝ်။ 9 အန် ဝီ ကာလာင် ဒီ အာဆောလူ တဝ်း၊ “မှဝ် မ့ပါယ် ပီ ထူမ် မဲ ပီ ကာလာင် မင် အီ ဒီ မဲ တဝ်း၊ ‘အာဒါဝိတ် ဟဲ့ ဟြေတ့် ဒီ ဘူင် နာ တူ မွှိုမ် ဒီ မဲ။း’ 10 မဲ ယွတ်၊ အာတိုဝ် နီ ဇဝ်ဖြာ ဟဲ့ အာပ် မဲ ဒီ အုဝ် ခဲင် ကာဒဝ် မာဝ် နီ။ မင် အီ ပီ ဘော ဟဲ့ ဒဲ့ အုဝ် ငဝ်း မဲ မိူဝ်၊ အုဝ် ယီ ကာဝေ မဲ တဝ်း၊ ‘အုဝ် တူ ဘူင် နာ တူ မွှိုမ် မာဆေ ဒီ ဒါ ကာညာ အုဝ် ကူပ် ဟဲ့ ဖဝ်း ဇဝ်ဖြာ နာမန် ဒီ ဂိန့် အန်။’ 11 ဒဲင် တီ၊ မဲ ဂုန့်၊ တဲး မဲ ယွတ် ဒူန့် ဆီတုဝ် မဲ ပီ ဂူင့် အုဝ် နီ။ ကူပ် တူ ဆီ ငဝ်း ယမ် အုဝ် အာဆာက် မဲ၊ အုဝ် ဆွာ့ မီ ဆီတုဝ် မဲ အီ စဲက် နီ၊ တဲး မဲ နပ်၊ တဲး မဲ ယိုဝ် လွင် တူ မိုဝ်း အုဝ် ဒီ ဘူင် နာ တူ မွှိုမ် ဒီ မဲ။ အုဝ် တူ လုတ့် နဝ်း မာဆေ ဒီ မဲ။ မိုဝ်း အီ မဲ၊ အီ ဟြေတ့် ဒီ ငဝ်း အာဆာက် အုဝ်။ 12 တဲး ဇဝ်ဖြာ ဆုင်ဖျာတ် ဒီ ကာတဲ အာယ် ဘော အာ ဝီ။ တဲး ဇဝ်ဖြာ ဘဲ တဲး ဘဲ ဒွါ မှာပ် ပဲ့ ဟဲ့ လုတ့် အုဝ် ဒီ မဲ တီ။ အုဝ် မိူဝ် တူ ဘူင် မာဆေ ဒီ မဲ။ 13 န့ ပီ ဂြုဝ်း မာကာထ ဒေါ မွိုန် အီ တဝ်း၊ ‘အီ တူ မွှိုမ် န့ တး ဒီ အီ တူ မွှိုမ်။’ ခုဝ်၊ အုဝ် တူ ဘူင် မာဆေ ဒီ မဲ ဒေါ မှဝ်။

14 မဲ ခုန်ဒီခမ် အီ အိုပ် ဒူအီ အီဆာရေလ၊ မဲ လေး ဟြေတ့် အာဆေ။း န့ ပီ မဲ ဟြေတ့် မာဆုဝ် အီ ဟဲ့ ဟွတ့် ယမ်။ န့ ပီ မဲ ဟြေတ့် မာဆီဒျီန် အူ ဒုဝ်။ 15 ခုဝ်၊ တဲး ဇဝ်ဖြာ ဆုင်ဖျာတ် အာမူ နီ။ တဲး အန် ယွတ် ဘော မဲ ဘော အုဝ်။ တဲး အန် ဇဝ် စွယ် အုဝ်၊ တဲး အန် ချွတ် အုဝ်၊ တူ တဲး မဲ ပွိုန် ဒီ ဒွါ ဒုက် ဒီ အုဝ်။”

16 အာဒါဝိတ် ဟဲ့ ဟွတ့် ကာလာင် ဂြုဝ်း တီ၊ အာဆောလူ ဘော ဝီ ဒီမွှတ် တဝ်း၊ “အိုယ် အာဒါဝိတ်၊ မဲ မုး ဂွန် အုဝ်။ အာနီ မုး ဂြုဝ်း မဲ၊ ဟဲ့ မုး။း” ဒေါ ကာလာင် အန် ဂြုဝ်း တီ၊ အန် ဘော ဝီ ယာမ် တာင်။ 17 အန် ပီ ဝီ ကာလာင် ဒီ အာဒါဝိတ် တဝ်း၊ “နဝ်း မဲ ဟဲ့ ဆိူဝ် လွှိုမ် အုဝ်။ အုဝ် ဟဲ့ ဘူင် အီ တူ မွှိုမ် ဒီ မဲ။ မဲ ဝီ ဘူင် နာ မွှိုမ် ဒီ အုဝ်။ 18 အာတိုဝ် နီ၊ မဲ ဟဲ့ နှဲ ဒီ အုဝ်၊ မဲ ဟဲ့ ဂေဇူ အုဝ်။ ဇဝ်ဖြာ ပီ ဘော ဟဲ့ တဲး မဲ ပွိုန် ဒီ ငဝ်း ယမ် အုဝ်၊ မဲ ယီ တူ ဘူင် မာဆေ ဒီ အုဝ်။ 19 ဆေ ဒူအီ ကာတုန့် ရန်ဆူ ဂေ၊ အာဝ် မိုဝ်း အီ တဲး ရန်ဆူ အန် လွတ်။ ဇဝ်ဖြာ ဒီ ဝီ ဂေဇူ မဲ။ ကူပ် ပဲ့ ဟဲ့ ဘူင် မဲ ဒီ အုဝ် အာတိုဝ် နီ။ 20 ဒေါ တီ နီ အုဝ် ဟဲ့ နပ် ဆီချာ၊ မဲ ဒီ ဘဲန် ခုန်ဒီခမ်။ ဘော မာန် မိူင် အီဆာရေလ ဟဲ့ မုး မဲ အီ ဒီ အိုပ် တူတ့်။ 21 ခုဝ်၊ မဲ လုဝ် ဒွါ ကာဒိက် ဆတ်ဇာ ဒီ အုဝ်၊ ဒိူင် တဲး ဘော ဇဝ်ဖြာ ထူမ်။ ဝါယ် စုဝ် အုဝ် နီ၊ ကွဲ့ တဲး မဲ ဝဲန် ဘော ဂွန် အုဝ် ဂေ လှာန် အုဝ်။ မဲ မိူဝ် ဟူ ဘူင် နာ တူ မွှိုမ် ဒီ လှုက်လှာန် အုဝ်၊ ဘော ဒီ န့ကြိုဝ်း ဂုန့် အုဝ် ဂေ ဘောကာဂ့လျီတ်။” 22 အာဒါဝိတ် ဘော ဒွါ ကာဒိက် ဆတ်ဇာ ဒီ အာဆောလူ။ အာဆောလူ ဘော ဝီ ဝေန့် ဒူင် ကွယ် ဟုဝ် အန်။ အာဒါဝိတ် ဘော ဒူအီ အန် ဝီ ဝေန့် ဒူင် ကွယ် ဒူင် ချြီင် ဂေ တွိုန်။