ပန် တီ ဂေ ဘော ဝီ ကာလာင် ဒီ အာဒါဝိတ် တဝ်း၊ “မဲ ယွတ်၊ ဒူအီ ဖီလီထီ ဟဲ့ ဝီ ကာဂုဝ်း ဒီ မိူင် ဂီလ။ ဂေ ဟဲ့ ဟာဝ် ဒူင် မး ဂေ ငှုဝ်၊ ဒိုဝ်း ဟာဝ် တူတ့် ငှုဝ်။” 2 အာဒါဝိတ် ဘော ဒီမွှတ် ဇဝ်ဖြာ တဝ်း၊ “န့ ပွိုန် ဟာဝ် ကာဂုဝ်း ဒီ ဒူအီ ဖီလီထီ ဂေ တီ။း”

ဇဝ်ဖြာ ဝီ ကာလာင် ဒီ အာဒါဝိတ် တဝ်း၊ “ဟာဝ်၊ ကာဂုဝ်း ဒီ ဂေ၊ ကွဲ့ တဲး ဂေ ပွိုန် ဒီ အိုပ် မိူင် ဂီလ တီ။”

3 ဒူအီ အာဒါဝိတ် ဝီ ကာလာင် ဒီ အန် တဝ်း၊ “အေ ကွယ် မိူင် ယူဒါ နီ မိူဝ်၊ အေ ဆီ ဘော ယုဝ်။ ဆေ အေ ဟာဝ် ကာဂုဝ်း ဒီ ဒါ ဘုဝ် ဒူအီ ဖီလီထီ ဒီ မိူင် ဂီလ တီ၊ အေ ဒီ ဝဲ ယုဝ် ကာဆဝ်။”

4 ပန် တီ အာဒါဝိတ် ပီ ဝီ ဒီမွှတ် ဇဝ်ဖြာ န့ ပွါ။ ဇဝ်ဖြာ ဝီ တဝ်း၊ “တဲး မဲ ဟာဝ် ဒီ မိူင် ဂီလ တီ။ အုဝ် ဒီ တဲး မဲ ပဲ ဒူအီ ဖီလီထီ။” 5 အာဒါဝိတ် ဘော ဒဲ့ ဒူအီ အန်၊ တဲး ဂေ ဟာဝ် ဒီ မိူင် ဂီလ တီ။ ဂေ ဘော ကာဂုဝ်း ဒီ ဒူအီ ဖီလီထီ ဘော ဒိုဝ်း ဟာဝ် ဘော ဒုဝ် ဆတ်ဒါဝါ ဂေ။ ဂေ ဘော ငဝ်း ယမ် ကိူန် ဒူအီ ဖီလီထီ ဘော ချွတ် ဒူအီ မိူင် ဂီလ တီ။ 6 အာဘာထာ အီ မုး ဂွန် အာဟီမာလေက် တွိုန်၊ ဒေါ တး အန် ဒူင် ကွယ် အာဒါဝိတ် ဒီ မိူင် ဂီလ တွိုန်၊ အန် ဘော ဂူင့် တး ဘော ဆီတုဝ် အေဖူတ် တွိုန်။

7 အီ ဟဝ် ဘော ကာလာင် ဒီ အာဆောလူ လွင် အာဒါဝိတ် ဟဲ့ တး ဇမ် ဒီ မိူင် ဂီလ။ အာဆောလူ ဝီ တဝ်း၊ “ဇဝ်ဖြာ ဒီ တဲး အုဝ် ပွိုန် ဒီ မှေတ့် အန်။ အန် ဟဲ့ လိုပ် ခဲင် မိူင် အီ မိုဝ်း မာလုဝ်း၊ မိုဝ်း ဆဲ။ န့ ပီ အန် ဟဲ့ ခြွင့် အုန် ဒုဝ် အန် ခဲင် ကာပိုမ်။” 8 အာဆောလူ ဘော ဒဲ့ ကာဇု ခဲ့ ကွယ် ဒူအီ အန်၊ ဘော ရဲန် ဆိုက် အန် ဟာဝ် ဒီ မိူင် ဂီလ တီ။

9 အာဒါဝိတ် ဘော ယိုဝ် လွင် အာဆောလူ ဟဲ့ ခြာမ် ဒီ ဘူင် အီ တူ မွှိုမ် ဒီ အန်၊ အန် ဘော ကာလာင် ဒီ အာဘာထာ အီ မုး ဒါ အီ လှူ ဒီ ဇဝ်ဖြာ တဝ်း၊ “မဲ ဒိုဝ်း တး ဆီတုဝ် အေဖူတ် မဲ ဒီ နီ။” 10 ပန် တီ အာဒါဝိတ် ဘော ဝီ တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် ဒူအီ အီဆာရေလ၊ အုဝ် အီ မုး ဒဲစေန့် မဲ ဟဲ့ ယိုဝ်၊ အာဆောလူ ဟဲ့ ခြာမ် ဒီ တး ဒီ မိူင် ဂီလ နီ။ အန် ဆီ တး ပျာတ့် ဝဲန် မိူင် နီ ကူပ် ကွယ် အုဝ် ဒီ နီ။ 11 တဲး မဲ ကာလာင် ဒီ အုဝ်၊ ဂေ ဒူအီ မိူင် ဂီလ နီ ဒီ အာပ် အုဝ် ဒီ အန်။း ယုဝ် အာဆောလူ ဒီ တး မှာန် ဒူပ် ဆာဒါင် ပီ ယိုဝ် အုဝ် တီ။း ဇဝ်ဖြာ၊ မဲ မုး ဇဝ်ဖြာ ဒူအီ အီဆာရေလ။ အုဝ် မှာန့်၊ တဲး မဲ ကာလာင် ဒီ အုဝ်။”

အန် ဟဲ့ ဟွတ့် ဆာခိုဝ် ပါယ် တီ ဇဝ်ဖြာ ဝီ တဝ်း၊ “အာဆောလူ ဒီ တး မှာန်။”

12 အာဒါဝိတ် ပီ ဝီ ဒီမွှတ် တဝ်း၊ “ဒူအီ မိူင် ဂီလ နီ ဒီ အာပ် အုဝ် ဘော ဒူအီ အုဝ် ဒွါ ဒီ အာဆောလူ။း”

ဇဝ်ဖြာ မိူဝ် ဝီ တဝ်း၊ “ဂေ ဒီ အာပ် ဒွါ မဲ ဒီ အန်။”

13 ပန် တီ အာဒါဝိတ် ဂေ ဒူအီ အန် ဒဝ် မာယဝ်း ဝီ တွိုန်၊ ဂေ ဝီ လေး ဒီ မိူင် ဂီလ တီ၊ ဝီ ဟာဝ် ဘဲန် ပ့လုဝ့် ဘဲန် ပ့လုဝ့်၊ ဒူင် ပွိုန် ဂေ ဟာဝ်။ အီ ဟဝ် ပီ ဝီ ကာလာင် လွင် အာဒါဝိတ် ဟဲ့ ဟွတ့် လေး တဝ် ဒီ အာဆောလူ တ မိူင် ဂီလ တီ၊ အာဆောလူ မိူဝ် အာဝ် ဟူ ဟာဝ်။

14 အာဒါဝိတ် ဘော ဟာဝ် ကွယ် ခဲင် ပြဲ အီ မိုဝ်း ဒူင် ပွိုန် ချြီင် ဆီချာ အန်၊ ဒူင် ကွယ် ကာတဲ နွန် ခဲင် ပြဲ စီဖ တွိုန်။ အာဆောလူ ပီ ဘော ဟြေတ့် အန် ဒွန် ဆီငဲ မိူဝ်၊ ဇဝ်ဖြာ တူ အာပ် အန် ဒီ အာဆောလူ။

15 အာဒါဝိတ် ဟဲ့ နပ် လွင် အာဆောလူ ဟဲ့ ဟာဝ် ဟြေတ့် ဒီ ငဝ်း အန်။ အန် မိူဝ် ယီ ဆီ ကွယ် ခဲင် ပြဲ အီ စိူဝ် စီဖ ခဲင် နင် ဟေ တွိုန်။ 16 အာယုဝ်နာထာန် အီ မုး ဂွန် အာဆောလူ တွိုန်၊ အန် ဘော ဟာဝ် ဒူင် ကွယ် အာဒါဝိတ် ခဲင် နင် ဟေ တီ၊ ဝီ စွယ် တဲး အန် ဝဲ ဘိုင် ဆီချာ ဇဝ်ဖြာ။ 17 အာယုဝ်နာထာန် ကာလာင် ဒီ အာဒါဝိတ် တဝ်း၊ “မဲ ကွဲ့ က့လိုဝ်၊ ဂုန့် အုဝ် အီ မုး အာဆောလူ တူ ပွိုန် ပါယ် မှဝ် ဒီ မဲ။ မဲ ဒီ ဘဲန် ခုန်ဒီခမ် အီ အိုပ် ဒူအီ အီဆာရေလ။ ခြိုမ် မဲ ဟဲ့ မုး အုဝ် အီ ဒီ အိုပ်။ လွင် အန် တီ မိူဝ်၊ ဂုန့် အုဝ် ဟဲ့ ဟွတ့် နပ်။” 18 ဂါယ် ဘော လာယ် ကာဆဲန့် ဘူင် ကာဒိက် ဆတ်ဇာ တဲး ဘော ဇဝ်ဖြာ ထူမ်။ ဟဲ့ ဟွတ့်၊ အာဒါဝိတ် ဘော ဝီ ကွယ် ခဲင် နင် ဟေ တွိုန်။ အာယုဝ်နာထာန် ဘော ဝီ ဝေန့် ဒီ ကာင် အန်။

19 ပန် တီ ဒူအီ အီ ကွယ် ခဲင် မိူင် စီဖ ဂေ ဘော ကာဖြူမ် ဒီ ဟာဝ် ဒူင် ကွယ် အာဆောလူ ဒီ မိူင် ဂီဘီယာ။ ဂေ ဘော တဝ်း၊ “အာဒါဝိတ် ဟဲ့ ဟာဝ် ကွယ် ချြီင် အန် ကာတဲ နွန် ဒူင် ကွယ် ယေ၊ ဒူင် မုး ခဲင် နင် ဟေ ဒီ နွန် ဟာခီလ အီ ကွယ် နာ တေတ့် ဒူင် စိူဝ် ယေဆီမူန်။ 20 ခုဝ်၊ ဆေ မဲ ခုန်ဒီခမ် ဆီ ဟာဝ်၊ မှာန့် တဲး မဲ ဟာဝ်။ ယေ ဒီ အာပ် ဒူအီ ဝီ တီ ဒီ မဲ ခုန်ဒီခမ်။”

21 အာဆောလူ ဝီ တဝ်း၊ “တဲး ဘေ ပွိုန် နာ ဘွတ် ပီ မွင့်ကာရာ ဒွါ ဇဝ်ဖြာ။ ဘေ ဟဲ့ ကာဝေ အုဝ်။ 22 ဒေါ တီ နီ တဲး ဘေ ဟာဝ် ယွတ်၊ တဲး ဘေ နပ် ဆီချာ ဒူင် ချြီင် အန်။ တဲး ဘေ ဟြေတ့် အာဆေ ဟဲ့ ယိုဝ် အန်။ အီ ဟဝ် တဝ်း၊ အန် ဟဲ့ ပီလွှက့် ကိူန် ကာဆဝ် ဒီ အုဝ်။ 23 ခုဝ်၊ န့ လုဝ် ယွတ်၊ တဲး ဘေ နုဝ်၊ တဲး ဘေ နပ် ဒွန် ပ့လုဝ့် ဒူင် ချြီင် ဒူင် ကွယ် အန်။ ဆေ ဘေ ဟီ နပ် ဆီချာ၊ တဲး ဘေ ဝီ တး ကာလာင် ဒီ အုဝ်။ အုဝ် ဒီ ဟာဝ် ရိုမ် ဒူပ် ဘေ။ ဆေ အန် ဘော ဆီ ကွယ် မိူင် တီ၊ ခဲင် ဒူအီ အာယူဒါ ဘဲန် မှိုန့် ဘဲန် ဟြဲန့်၊ အုဝ် ဒီ ဟာဝ် ဟြေတ့်၊ တဲး အုဝ် ကော ယိုဝ် အန်။”

24 ဂေ ဘော ဟာဝ် ခဲင် ပြဲ စီဖ တွိုန် ဒီ အာတ့် အာဆောလူ။ အာဒါဝိတ် ဂေ ဒူအီ အန်၊ ဂေ ယီ ဆီ ကွယ် ခဲင် ပြဲ မောန ခဲင် ဂ့လင် အာရာဖ နာ တေတ့် မိူင် ယေဆီမူန် တွိုန်။ 25 အာဆောလူ ဘော ဒူအီ အီ ဒူပ် အန်၊ ဂေ ဘောကာဂ့လျီတ် ဘော ဟာဝ် ဟြေတ့် အာဒါဝိတ်။ န့ ဘော မိုဝ်း အီ ကာလာင် ဒီ အာဒါဝိတ်။ ခုဝ်၊ အန် ဝီ လူင် ဒီ နွန် မာဝ် ဒါအာင် တာင်၊ ဝီ ဟာဝ် ကွယ် ခဲင် ပြဲ မောန။ အာဆောလူ ဘော ယိုဝ် လွင် အန် တီ၊ အန် ဘော ဝီ ဟာဝ် ဟြေတ့် အာဒါဝိတ် ခဲင် ပြဲ မောန တွိုန်။

26 အာဆောလူ ဘော ဟာဝ် ဒီ နွန် အူ ဘ့လာက်၊ အာဒါဝိတ် ဂေ ဒူအီ အန် ဘော ကွယ် ပေါ ဘ့လာက်၊ ဂျုဝ်ဂျာ တဲး ဂေ ပွိုန် ဒီ လေး ဟာဝ်။ အာဆောလူ ဂေ ဒူအီ အန် ဟဲ့ ရူပ် အာဒါဝိတ် ဂေ ဒူအီ အန်၊ ဟဲ့ ရိန် ဒီ ပွိုန် ဒီ မှေတ့် ဂေ။ 27 ဒေါ အန် တီ န့ ဘော မိုဝ်း ဒါလာမ် အူ ဝီ တး ဇမ် ဒူင် ကွယ် အာဆောလူ။ အန် တဝ်း၊ “တဲး မဲ ဝီ တး ခြန် ခြန်၊ ဒူအီ ဖီလီထီ ဂေ ဟဲ့ တး လိုပ် ခဲင် မိူင် မဲ၊ ဟဲ့ ပြာ ကြုဝ် အေ။” 28 ပန် တီ အာဆောလူ ဘော စူ ဟြေတ့် အာဒါဝိတ်။ အန် ဘော ဝီ ဟာဝ် ဒူင် ကွယ် ဒူအီ ဖီလီထီ တွိုန်။ ကူပ် န့ ပါယ် တီ ဒီ တီ ဂေ တဲး အန် စိူဝ် ဆီလဟမ်မာဒုတ်။ 29 အာဒါဝိတ် ဘော လေး ဒူင် ကွယ် အန် တီ၊ ဝီ ဝေန့် ဒူင် ပွိုန် ဒီ ချြီင် ဆီချာ အီ မုး ခဲင် ကာဒါယ် အေန်ကေဒီ တွိုန်။