အာဒါဝိတ် ဘော တဝ် လေး ဒီ မိူင် ဂါထ တွိုန်၊ ဘော ဝီ ဟာဝ် ကွယ် ဒီ ကာဒဝ် မာဝ် အီ စိူဝ် အာတူလမ် တွိုန်။ အီကတ် အန် ဂေ ဝေါဝဲ အန် ဘော ယိုဝ် လွင် အန်၊ ဂေ ဘော ဟာဝ် ဒူင် ကွယ် အန်။ 2 ခဲ့ ကွယ် ဂေ ဒူအီ အီ မိုဝ်း နီ အီ ထုက် အီ ဟဝ် ဘော ဂေ အီ မိုဝ်း ဒုက် ဘဲန် မျုဝ် ဘဲန် မျုဝ် ဘော ဂေ ဒူအီ အီ တူ အိုင် ဒါ ကာညာ ဂေ၊ ဂေ ဘောကာဂ့လျီတ် ဘော ဟာဝ် ဒူင် ကွယ် အာဒါဝိတ် တွိုန်၊ ဝီ ဒူပ် အန်။ ဂေ ကွယ် ဖွုန် မာယဝ်း ဝီ။

3 အာဒါဝိတ် ဘော ဝီ ဟာဝ် ဒီ မိူင် မီဇာဖာ ခဲင် ကာဒါယ် မိူင် မုဝ်အာပ်။ အန် ဘော ကာလာင် ဒီ ခုန်ဒီခမ် အီ အိုပ် မိူင် မုဝ်အာပ် တီ တဝ်း၊ “အာတ့် ညှမ် နပ် အုဝ် လွင် ပီ ဒီ ဘူင် ဇဝ်ဖြာ ဒီ အုဝ် နီ၊ အုဝ် မှာန့် တဲး မဲ တဲး ဂုန့် မာ အုဝ် တး ကွယ် ဒူင် ကွယ် မဲ။” 4 အန် ဘော တဲး ဂုန့် မာ အန် တး ကွယ် ဒူပ် ခုန်ဒီခမ် အီ အိုပ် မိူင် မုဝ်အာပ် တွိုန်။ ဂေ ဘော ကွယ် ဒီ တီ ဒေါ ကွယ် အာဒါဝိတ် ခဲင် ဒူင် ချြီင် အန် တွိုန်။

5 ပန် တီ န့ မိုဝ်း ဒူအီ ဘျာန် ဂြုဝ်း ဇဝ်ဖြာ အီ စိူဝ် အာဂတ်။ အန် ဘော ကာလာင် ဒီ အာဒါဝိတ် တဝ်း၊ “မဲ ကွဲ့ ကွယ် ခဲင် ဒူင် ချြီင် မဲ တီ၊ မဲ လေး ဟာဝ် ကွယ် ဒီ မိူင် ယူဒါ။” ခုဝ်၊ အာဒါဝိတ် ဘော ဟာဝ် ဇမ် ခဲင် ပြဲ အီ စိူဝ် ဟာရေတ် တွိုန်။

6 ဒေါ အန် တီ အာဆောလူ ကွယ် ဒီ နွန် အီ ကာတတ် မိူင် ဂီဘီယာ။ အန် ဆီ ဂူင့် ဘ့လာ လျီး အန်၊ ကွယ် ခြိုမ် ဟေ။ ဘော ဂေ အာမူ အာမာတ် အန် ကွယ် ရိုမ် ဒူပ် အန်။ န့ ဘော မိုဝ်း ဒူအီ ကာလာင် ဒီ အန် လွင် ဟဲ့ ဝီ ယိုဝ် ဂေ အာဒါဝိတ် ဘော ဒူအီ အီ ဒူပ် အာဒါဝိတ်။ 7 အာဆောလူ ဘော ကာလာင် ဒီ ဂေ အီ စွင့် ရူပ် အန် တဝ်း၊ “အိုယ် ဘေ ဒူအီ ခဲင် ခြိုဝ် အာဘေန်ယာမ်၊ တဲး ဘေ ထူမ် ဂြုဝ်း အုဝ်။ ဂွန် အာယေဆေ တွိုန် တူ မိုဝ်း ဒီ ကာဆာင် ဒွါ မာန် ဂေ ဒူင် နာ ဘော ကာပိုမ် ဘ့လေ မာငုန် ဒီ ဘေ။ အန် တူ ပွိုန် တဲး ဘေ ဘဲန် ဒါ ဘုဝ် ဝီ အိုပ် ဒါ ဆိုက် ဘဲန် ဟြဲန့် ဘဲန် မာယဝ်း။ 8 ဆေ န့ ပါယ် တီ မှဝ် န့ ပါယ် ပီ ပြာ ဘေ ဒီ ဘူင် နာ တူ မွှိုမ် ဒီ အုဝ်။း ခဲ့ ကွယ် ဘေ၊ အာဝ် မိုဝ်း ခေါ အူ ဝီ အီ ကာလာင် ဒီ အုဝ် လွင် ဂွန် အုဝ် ဟဲ့ လာယ် ကာဆဲန့် ဒီ ဂွန် အာယေဆေ တီ။ ခဲ့ ကွယ် ဘေ၊ အာဝ် မိုဝ်း အီ ကာဝေ အုဝ်၊ အာဝ် မိုဝ်း အာဆေ အီ ကာလာင် လွင် ဂွန် အုဝ် ဟဲ့ ဝီ ကာဆုး ဒီဘဲ အုဝ် အူ ဝီ၊ တဲး အန် ဘ်ု ဒီ ကာဂုဝ်း ဒီ အုဝ်၊ ပီ ပီ ဘူင် အန် အာတိုဝ် နီ။”

9 အာဒုဝ်က အီ မုး ဒူအီ အာမျုဝ် အေဒူမ် တွိုန်၊ အန် ဘော ကွယ် ရိုမ် ဒူပ် ဂေ အာမူ အာမာတ် အာဆောလူ တွိုန်။ အန် ဘော တဝ်း၊ “အုဝ် ဟဲ့ ယိုဝ် ဂွန် အာယေဆေ ဟဲ့ ဇမ် ဒီ မိူင် နုဝ်ဘ၊ ဟဲ့ တး ဒူင် ကွယ် အာဟီမာလေက် အီ မုး ဂွန် အာဟီတူပ် တွိုန်။ 10 အာဟီမာလေက် ဘော ဒီမွှတ် ဇဝ်ဖြာ ဒါင် အန်။ အာဒါဝိတ် ဘော ဒိုဝ်း ပီ ဒီ ဟူမ် ဘော မာ ပွါ့ လာင် ပီ ဒွိုမ် ဂူင့် အာကောလာတ် အီ မုး ဒူအီ ဖီလီထီ တွိုန်။”

11 ခုန်ဒီခမ် ဘော စ်ု အီ ဒဲ့ ဒူအီ လှူ ဒီ ဇဝ်ဖြာ အီ စိူဝ် အာဟီမာလေက်၊ အီ မုး ဂွန် အာဟီတူပ် တွိုန် ဘော န့ဟူမ် ဂုန့် အန်။ ဂေ ဘောကာဂ့လျီတ် ဟဲ့ ဘဲန် ဒူအီ လှူ ဒီ ဇဝ်ဖြာ အီ ကွယ် ဒီ မိူင် နုဝ်ဘ တွိုန်။ ဂေ ဘော ကာဖြူမ် ဒီ တး ဒူင် ကွယ် ခုန်ဒီခမ် တွိုန်။ 12 အာဆောလူ ဘော ကာလာင် တဝ်း၊ “ဂွန် အာဟီတူပ်၊ တဲး မဲ ထူမ်။” အန် မိူဝ် ဝီ တဝ်း၊ “အုဝ် ဟဲ့ ကွယ် ဒီ နီ၊ မဲ ခုန်ဒီခမ်။”

13 အာဆောလူ ဝီ တဝ်း၊ “ကူပ် မ့ပါယ် မှဝ်၊ ဘော မဲ ဘော ဂွန် အာယေဆေ တွိုန် ဟဲ့ ပြာ ဒီ ဘူင် နာ တူ မွှိုမ် ဒီ အုဝ်။း ဘော ခါမုန်၊ ဘော မာ ပွါ့ လာင် မဲ ဟဲ့ ဒွါ ဒီ အန်။ မဲ ဟဲ့ ဒီမွှတ် ဘော ဇဝ်ဖြာ ဒါင် အန်၊ တဲး အန် ပွိုန် ဒီ ဝဲန် အုဝ်၊ ဝီ ဘ်ု ဒီ ဂျာမ် အုဝ်၊ ကော ဇမ် အာတိုဝ် နီ။”

14 အာဟီမာလေက် ဝီ ကာလာင် ဒီ ခုန်ဒီခမ် တဝ်း၊ “ကာတဲ ဒီဘဲ မဲ ဘော ကာတဲ ဒူအီ မဲ ဂေ နီ၊ အာဝ် မိုဝ်း အာဆေ အီ ဒူပ် ဆီချာ မဲ ပီ အျီ့ မဲ၊ အီ မုး အာဒါဝိတ် တီ။ အန် ဒီ လိုပ် လိုပ်၊ လေး လေး၊ ဘူင် ပီ စ်ု မဲ။ ဒွန် အီ ဂူမ် အန် ခဲင် ဟုဝ် မဲ နီ။ 15 အုဝ် မိူဝ် ဟဲ့ ဒွိုမ် ဒီမွှတ် ဇဝ်ဖြာ ဒါင် အန် ဘဲန် ဇေန့် ဘဲန် ဇေန့်။ မဲ ကွဲ့ ထာင်၊ ဘော အုဝ် ဘော ခြိုဝ် အုဝ် ဟဲ့ ဘူင် နာ တူ မွှိုမ်။ လွင် အာမူ ပီ တဝ်း မဲ တီ အုဝ် တူ နပ် မာဆေ။”

16 ခုန်ဒီခမ် ဝီ တဝ်း၊ “အိုယ် အာဟီမာလေက်၊ ဘော မဲ ဘော န့ဟူမ် ဂုန့် မဲ၊ ဘေ ဒီ ကာဒုး ဒီ ယမ် အာခ်ု မှာန်။”

17 အန် ဟဲ့ ဟွတ့် တဝ်း ပါယ် တီ၊ ခုန်ဒီခမ် ဝီ ဒမ် ဒီ ဒါ ဆိုက် အီ ကွယ် ဘ်ု ရူပ် အန် တဝ်း၊ “တဲး ဘေ ဒိုဝ်း ဒူအီ အီ လှူ ဒီ ဇဝ်ဖြာ တီ၊ ငဝ်း ယမ်။ ဂေ ဟဲ့ စွယ် အာဒါဝိတ်၊ ဟဲ့ နပ် လွင် အာဒါဝိတ် ဟဲ့ တဝ်၊ ဂေ ယီ တူ ကာလာင် တဲး အုဝ် နပ်။”

အန် ဟဲ့ ဟွတ့် တဝ်း ပါယ် တီ၊ ဂေ အာမူ အာမာတ် အန် ယီ တူ ယ ငဝ်း ဒူအီ အီ လှူ ဒီ ဇဝ်ဖြာ ဂေ တွိုန်။

18 ပန် တီ ခုန်ဒီခမ် ဝီ ကာလာင် ဒီ အာဒုဝ်က တဝ်း၊ “တဲး မဲ ငဝ်း ဒူအီ လှူ ဒီ ဇဝ်ဖြာ ဂေ နီ။” အာဒုဝ်က အီ မုး ဒူအီ အာမျုဝ် အေဒူမ် တွိုန်၊ အန် ဘော ငဝ်း ဝဲန် ဒူအီ အီ လှူ ဒီ ဇဝ်ဖြာ ဂေ တွိုန် ဒါ ဂိုဝ် ဒီ ဖန် ဝီ၊ အီ မုး ဂေ အီ ပွိုန် ဒီ တာ ဆီတုဝ် အေဖူတ် တွိုန်။ 19 ခဲင် မိူင် နုဝ်ဘ အီ မုး မိူင် ဒူင် ကွယ် ဒူအီ အီ လှူ ဒီ ဇဝ်ဖြာ တွိုန်၊ အန် ဘော ငဝ်း ဝဲန် ဘော အီမာယ် အီဘိုန့် ဘော ဂွန် ဒီရွယ် ဘော ဂွန် င အီ ညှမ် ဂဝ်း ပူ။ အန် ဘော ငဝ်း ဝဲန် ဘော မာမက်၊ မာလုဝ်၊ မာဘူ ဂေ၊ တဲး န့ ယမ် တူတ့်။

20 န့ ယီ မိုဝ်း အူ ဝီ အီ စိူဝ် အာဘာထာ အီ မုး ဂွန် အာဟီမာလေက် ဘော လှာန် အာဟီတူပ် တွိုန်၊ အန် ဘော တဝ် ဟာဝ် ဒူင် ကွယ် အာဒါဝိတ်။ အန် ဘော လွတ်။ 21 အာဘာထာ တီ ဘော ကာလာင် ဒီ အာဒါဝိတ် လွင် အာဆောလူ ဟဲ့ ငဝ်း ဝဲန် ဒူအီ လှူ ဒီ ဇဝ်ဖြာ တွိုန်။ 22 အာဒါဝိတ် ဝီ ကာလာင် ဒီ အာဘာထာ တဝ်း၊ “ဆိန့် ဆီငဲ တွိုန်၊ ဒေါ ယိုဝ် အုဝ် အာဒုဝ်က အီ မုး ဒူအီ အေဒူမ် တွိုန်၊ အုဝ် မိူဝ် ဟဲ့ နပ် အူ ဇေန့်၊ အန် ဒီ ကာလာင် ဒီ အာဆောလူ။ ဂေ ဝေါဝဲ ခြိုဝ် ဂုန့် မဲ၊ ဂေ ဟဲ့ ယမ် ကူပ် အုဝ်။

23 ခုဝ်၊ တဲး မဲ ကွယ် ရိုမ် ဒူပ် အုဝ်။ မဲ ကွဲ့ က့လိုဝ်။ ဝီ အီ ဟြေတ့် ဒီ ငဝ်း အုဝ်၊ အန် ဟြေတ့် ဘော ဒီ ငဝ်း မဲ။ ဆေ မဲ ကွယ် ရိုမ် ဒူပ် အုဝ်၊ အာဝ် ဟူ လုဝ် ယုဝ်။” ခဲ့ တီ အန် တဝ်း ဒီ အာဘာထာ တွိုန်။