ခါန် 21
လွင် အာဒါဝိတ် ချြီင် ဒုဝ် အန်
1 ပန် တီ အာဒါဝိတ် ဘော တး ဇမ် ဒီ မိူင် နုဝ်ဘ အီ မုး ဒူင် ကွယ် ဒါ အီ လှူ ဒီ ဇဝ်ဖြာ အီ စိူဝ် အာဟီမာလေက်။ အာဟီမာလေက် ဘော ယုဝ် ကာဆဝ် ဘော ဟာဝ် ရွုး အာဒါဝိတ်။ အန် ဘော ဒီမွှတ် အာဒါဝိတ် တဝ်း၊ “န့ ပါယ် မှဝ်၊ မဲ ပီ တူ ယူင့် တး ဂိုက် မဲ၊ မဲ ပီ ဆော တး မဲ အူ ဝီ။”
2 အာဒါဝိတ် ဝီ ကာလာင် ဒီ အန် တဝ်း၊ “ခုန်ဒီခမ် ဟဲ့ စ်ု အုဝ် ဟာဝ် ပေါ အူ ပ့လုဝ့်။ အန် ပီ ဝီ တဝ်း၊ ‘ကွဲ့ တဲး အာဆေ နပ် လွင် အာမူ တီ ဘော လွင် ပီ ကာလာင် အုဝ် ဒီ မဲ နီ။’ အုဝ် ဟဲ့ တဲး ဒဲစေန့် အုဝ် နှဝ့် အုဝ် ပေါ ပ့လုဝ့်။ 3 ဒေါ တီ နီ၊ မဲ မိုဝ်း မာဆေ။း အုဝ် မှာန့် ခါမုန် ဖန် ဘူင့် ဒီ မဲ။ ဘော မုး ပီ ဒီ ဟူမ် မာဆေ မိူဝ်၊ ဟဲ့ ပွိုန် ဒွါ။”
4 ဒါ အီ လှူ ဒီ ဇဝ်ဖြာ ဝီ ကာလာင် ဒီ အာဒါဝိတ် တဝ်း၊ “ခါမုန် အီ ကွယ် ဒီ အုဝ် နီ၊ အာဝ် မုး ဒွန် အီ ပွိုန် ဟူမ်။ န့ မိုဝ်း မီ ခါမုန် အီ ဟဲ့ ဆီငါ ဘွတ်။ မာလဲ၊ ဆေ ဒဲစေန့် မဲ တူ ကွယ် ရိုမ် ဒူပ် အီဘိုန့် ဂေ၊ အုဝ် ဒီ ဒွါ။”
5 အာဒါဝိတ် ဝီ တဝ်း ဒီ အန်၊ “ဆိန့် ဒေါ လေး တး ယေ၊ အာဝ် မိုဝ်း အာဆေ အီ ကွယ် ကာဒူပ် ဒီ အီဘိုန့် အန်။ ဒွန် ဇေန့်၊ ဆေ ယေ လေး ဟာဝ် ပါယ် တီ ခြိုင် ဒူအီ ယေ တီ ဟဲ့ ဟွတ့် ဆီငါ ဘွတ်။ ခါ နီ၊ ယေ ဟဲ့ ဝဲ ဆာဒိက်။” 6 ပန် တီ ဒါ အီ ဘျာန် ဂြုဝ်း ဇဝ်ဖြာ တွိုန်၊ ဘော ဒိုဝ်း ခါမုန် အီ ဆီငါ တွိုန်၊ ဒွါ ဒီ အန် ကူပ် အာဝ် မိုဝ်း ခါမုန် ပေါ မျုဝ်။ န့ မိုဝ်း မီ ခါမုန် ပီ ဒွိုမ် ဘ့လေး ဂေ ဒီ အာတ့် ဇဝ်ဖြာ၊ ပဲ့ ဟဲ့ ဟွတ့် ကာပ့လု ဂေ ဆိန့်ဝး။
7 ဆီငဲ တီ၊ န့ မိုဝ်း ဒဲစေန့် အာဆောလူ အူ ဝီ၊ အီ ကွယ် ဒူင် ကွယ် ဇဝ်ဖြာ ဒီ တီ။ အန် စိူဝ် အာဒုဝ်က။ အန် မုး ဒူအီ အေဒူမ်၊ အီ အိုပ် ဂေ အီ ဟျီင် မာဘူ အာဆောလူ တွိုန်။
8 အာဒါဝိတ် ဝီ ကာလာင် ဒီ အာဟီမာလေက် တွိုန် တဝ်း၊ “ဒူင် ကွယ် မဲ နီ၊ န့ မိုဝ်း မာပွါ့ လာင်။း ကူပ် န့ မိုဝ်း အာမူ လွင် ခုန်ဒီခမ်၊ အုဝ် မိူဝ် ကာတဝ်၊ အာဝ် ဒန် ဒိုဝ်း မာပွါ့ လာင် ဂေ ခြိုင် ကာဂုဝ်း ခေါ အူ မျုဝ်။”
9 ဒူအီ လှူ ဒီ ဇဝ်ဖြာ တွိုန် ဝီ တဝ်း၊ “ဟဲ့ မိုဝ်း မာပွါ့ လာင် အာကောလာတ်၊ အီ မုး ဒူအီ ဖီလီထီ ပီ ငဝ်း ယမ် မဲ ဒီ ဘ့လဲင် အေလာ တွိုန်၊ အန် ဟဲ့ ကာဘန် အုန် ကွယ် နာ ပန် ဆီတုဝ် အေဖူတ် အုဝ် တီ။ မဲ ဆီ ဒိုဝ်း ဟာဝ်၊ ဟဲ့ ပွိုန်။ န့ မိုဝ်း မီ ဘ့လ တီ၊ အာဝ် မိုဝ်း ပေါ အူ ဘ့လ။” အာဒါဝိတ် ဝီ တဝ်း၊ “အာဝ် မိုဝ်း မာပွါ့ လာင် ပေါ အူ ဘ့လ အီ မွှိုမ် ပီ အာနီ။ တဲး မဲ ဒွါ ဒီ အုဝ်။”
10 ဆီငဲ တီ အာဒါဝိတ် ဘော လေး တဝ် အာဆောလူ။ ကူပ် ယုဝ် အန် အာဆောလူ၊ အန် ဘော ဟာဝ် ဒူင် ကွယ် ခုန်ဒီခမ် အာခိတ် အီ အိုပ် ဒူအီ ခဲင် မိူင် ဂါထ တွိုန်။
11 ဂေ ဒဲစေန့် ခုန်ဒီခမ် အာခိတ် ဝီ လာယ် ကာလာင် တဝ်း၊ “ယေ ထာင်၊ ဝီ နီ မုး အာဒါဝိတ်၊ ခုန်ဒီခမ် ခဲင် မိူင် တ ဒွယ်။ အန် အီ မုး ပီ ကာဖြူမ် ဂေ ဒီ ဂါ တဝ်း မှုဝ် ဘဲန် ဇေန့် ဘဲန် ဇေန့် တဝ်း၊
‘အာဆောလူ ဟဲ့ ငဝ်း ယမ် ဒူအီ ဘဲန် ဟြဲန့် ဘဲန် ဟြဲန့်။ အာဒါဝိတ် ယီ ငဝ်း ဒူအီ ဘဲန် မှိုန့် ဘဲန် မှိုန့်။’”
12 အာဒါဝိတ် တွိုန် ဘော နုဝ် ဂြုဝ်း ဂေ၊ အန် ဘော ဝီ ယုဝ် ခုန်ဒီခမ် အာခိတ် အီ အိုပ် မိူင် ဂါထ တွိုန်။ 13 အန် ဘော ဝီ ညိုင်ရာင် ပီရိုဝ် အန် ဒေါ ယိုဝ် ဂေ ဒီ အန်။ အန် တဲး အန် ပီ ဒူအီ ရိုဝ် ဒေါ ကွယ် ရိုမ် အန် ဒူပ် ဂေ။ အန် ညိုင်ရာင် ဆိး ဒဲမ် ဒီ မာလုဝ်း ဘော တဲး ဘော အိုမ် အာင် အန် ဟွယ် ဒီ မူတ့်၊ ဟွယ် ဒီ ဒီမုဝ်း အန်။