1 အာဒါဝိတ် ဘော ဝီ တဝ် လေး ဒီ ဒူင် စိူဝ် နာယုတ် အီ မုး ခဲင် ကာဒါယ် မိူင် ရာမာ တွိုန်၊ ဝီ ဟာဝ် ဇမ် ဒူင် ကွယ် အာယုဝ်နာထာန်။ အန် ဒီမွှတ် အာယုဝ်နာထာန် တဝ်း၊ “အုဝ် ဟဲ့ ကာဒုး ဒီ ဘူင် မာဆေ။း အုဝ် မိုဝ်း မှာပ် မာဆေ။း အုဝ် ဟဲ့ ဘူင် အီ တူ မွှိုမ် မာဆေ၊ တဲး ဂုန့် မဲ ဟြေတ့် ဒီ ဂျာမ် အာဆာက် အုဝ်။း”

2 အာယုဝ်နာထာန် မိူဝ် ဝီ တဝ်း ဒီ အန်၊ “မဲ တူ လုဝ် ယမ်၊ အာဝ် ဘဲန် ဒေါ မှဝ်။ ပီ ဒီ ဘူင် ဂုန့် အုဝ် ဒွန် မျုဝ်၊ န့ ဘော မုး အာမူ တျီ့ အာမူ တာင်၊ အန် ဒီ ကာလာင် တဲး အုဝ် နပ် ဒီ အာတ့်။ ဆေ အန် ဒီ ဘော ချြီင် ဒီ အုဝ် မျုဝ် တီ၊ အာဝ် မိုဝ်း ဒီခုဝ်။ ပီ ယုဝ် မဲ အာဝ် မှာန်။”

3 အာဒါဝိတ် မိူဝ် ဘော ဒိူင် တဝ်း၊ “ဂုန့် မဲ ဟဲ့ နပ် ဆီချာ၊ မဲ မုး ဂိုက် အုဝ်။ ခုဝ်၊ အန် ခြာမ် ခဲင် နဝ်း အန် တဝ်း၊ ‘ကွဲ့ တဲး အာယုဝ်နာထာန် နပ် လွင် အန် တီ။ ယုဝ် နဝ်း အန် တူ ဒါခိုယ်။’ ဇဝ်ဖြာ ဟဲ့ နပ်၊ အုဝ် တဝ်း အာခ်ု ဒီ မဲ။ န့ ဟဲ့ ဂိတ် အီ စဲက်၊ အုဝ် ဒီ ဘော ယမ်။”

4 အာယုဝ်နာထာန် ဝီ ကာလာင် ဒီ အာဒါဝိတ် တဝ်း၊ “မဲ ဆီ တဲး အုဝ် ဘူင် မာဆေ၊ အုဝ် ဒီ ဘူင် ဒူပ် ခဲ့ ပီ တဝ်း မဲ။”

5 အာဒါဝိတ် ပီ ဝီ တဝ်း၊ “ခဲညှာ နီ န့ မုး ဘ့လွယ် မာဂျီန် ကာမာယ်။ ဘော အုဝ် လုဝ် တး ဟူမ် ရိုမ် ဒူပ် ခုန်ဒီခမ်။ အုဝ် ယီ ဆီ ဟာဝ် ချြီင် ဒုဝ် အုဝ် ခဲင် ပြဲ၊ တဲး ကော ဇမ် ပါ ဒီ အပ် ဆီငဲ ဟာအူယ်။ 6 ဆေ ဂုန့် မဲ တဝ်း ဒီ မဲ လွင် တူ ယိုဝ် အန် ဒီ အုဝ်၊ တဲး မဲ ကာလာင် ဒီ အန် တဝ်း၊ ‘အာဒါဝိတ် မှာန့်၊ တဲး အုဝ် ခ့ဝါင် အန် ဝေန့် ဒီ မိူင် ဘေတ်လဲမ် အီ မုး ဒူင် ကွယ် ဘြိမ် အန်။ န့ ဟဲ့ ကာတတ် ဒီ ဇမ် ဘ့လွယ် ပီ လှူ ဝေါဝဲ ဂေ ခြိုဝ် အန် ဒွန် ဆီနမ်။’ 7 ဆေ အန် ဘော တဝ်း၊ ‘ဟဲ့ မုး၊’ နဝ်း အုဝ် ဟဲ့ ဂျီတ်။ ဆေ အန် ဘော ရူ ကာဆဝ်၊ မဲ ဒီ ဘော နပ်၊ အန် မိုဝ်း ပီ ဆီ ခြာမ် ဒီ ဘူင် နာ စီစိဝ် ဒီ အုဝ်။ 8 အုဝ် ယီ မှာန့်၊ တဲး မဲ ကာဝေ အုဝ် ကူပ် ဟဲ့ ဟွတ့် မဲ ဒွါ ကာဒိက် ဆတ်ဇာ ဒီ အုဝ် ဒီ အာတ့် ဇဝ်ဖြာ။ ဆေ မှာပ် ဘော ကွယ် ဒီ အုဝ်၊ တဲး မဲ ငဝ်း ယမ် အုဝ်။ အာဝ် ဟူ လုဝ် တိုယ် အုဝ် ဒူင် ကွယ် ဂုန့် မဲ။” 9 အာယုဝ်နာထာန် ဝီ တဝ်း၊ “အာဝ် ဘဲန် ပါယ် တီ ဒေါ မှဝ်။ ဆေ အုဝ် ဘော နပ် အီ စဲက် လွင် ဂုန့် အုဝ် ခြာမ် ဒီ ဘူင် နာ တူ မွှိုမ် ဒီ မဲ၊ အုဝ် ဒီ ဝီ ကာလာင် ဒီ မဲ အူ ဇေန့်။”

10 အာဒါဝိတ် ဝီ တဝ်း၊ “ဆေ ဂုန့် မဲ ဒီ ဘော ကာလာင် စာဝ် ဒီ မဲ လွင် အုဝ်၊ အာဆေ ဒီ ဝီ တး ကာလာင် ဒီ အုဝ်။း”

11 ပန် တီ အာယုဝ်နာထာန် ဝီ တဝ်း၊ “တး၊ တဲး အာယ် ဟာဝ် ခဲင် ပြဲ။” ဂါယ် ဘော ကာဒူပ် ဟာဝ် ခဲင် ပြဲ။

12 အာယုဝ်နာထာန် ဝီ တဝ်း ဒီ အာဒါဝိတ်၊ “ဇဝ်ဖြာ အီ အိမ်၊ ဇဝ်ဖြာ ပီ ကြိုပ် ဒူအီ အီဆာရေလ အန် ဟဲ့ ယိုဝ်၊ တ ညှာ အာခြာဝ် နီ၊ အုဝ် ဒီ ထေဝ် ဒီမွှတ် ဂုန့် အုဝ်။ ဆေ အန် ဘော ခြာမ် ဒီ ဘူင် နာ မွှိုမ် ဒီ မဲ၊ အုဝ် ဒီ ကာလာင် ဒီ မဲ အာခ်ု မှာန်။ 13 ဆေ ဂုန့် အုဝ် ဘော တဝ်း ဒီ ဘူင် နာ တူ မွှိုမ် ဒီ မဲ၊ ဆေ အုဝ် ယီ တူ ဟာဝ် ကာလာင် ဒီ မဲ၊ တူ စွယ် တဲး မဲ လွတ်၊ တဲး ဇဝ်ဖြာ ဘော ဒွါ ဒုက် တာင် ဒီ အုဝ်။ တဲး ဇဝ်ဖြာ ကွယ် ရိုမ် ဒူပ် မဲ၊ တဲး န့ ပီ ဇဝ်ဖြာ ဟဲ့ ဒွိုမ် ကွယ် ရိုမ် ဒူပ် ဂုန့် အုဝ်။ 14 ဒေါ ဆီ အိမ် အုဝ် နီ၊ တဲး ဘော မဲ ကာဝေ အုဝ်၊ တဲး ဘော ဇဝ်ဖြာ ဂေဇူ အုဝ်၊ ကွဲ့ တဲး အုဝ် ကာဒုး ဒီ ယမ်။ 15 ဘော န့ဟူမ် အုဝ်၊ ဘော လှုက်လှာန် အုဝ်၊ တဲး မဲ ကာဝေ ဆေဆေ ပါယ် တီ။ ဆေ ဇဝ်ဖြာ ဟီ ဟွတ့် ဝဲန် ရန်ဆူ မဲ ဒဲင် ကာဒါယ် နီ၊ တဲး နဝ်း မဲ ရွက့် န့ဟူမ် အုဝ် ဆေဆေ။”

16 ပန် တီ အာယုဝ်နာထာန် ဂါယ် အာဒါဝိတ် ဘော လာယ် ကာဆဲန့် တဝ်း၊ “ဘော လှုက်လှာန် အာဒါဝိတ်၊ အာဆေ ပျာတ့် ပီ လာယ် ကာဆဲန့် အာယ် နီ၊ တဲး ဇဝ်ဖြာ ဝျီ့ ဒီ ရန်ဆူ အာဒါဝိတ် ခဲ့ ပီ ဘူင် ဂေ ဒီ အန်။” 17 အာယုဝ်နာထာန် ဝီ တဲး အာဒါဝိတ် ကာလာင် ဇိုဝ် တီ၊ ကူပ် လာယ် ရွက့် ဂါယ်။ အာဒါဝိတ် ရွက့် အာယုဝ်နာထာန် ကော ပီ အန် ရွက့် ဒုဝ် ဘြိမ် အန်။

18 ပန် တီ အာယုဝ်နာထာန် ဝီ ကာလာင် ဒီ အာဒါဝိတ် တဝ်း၊ “ခဲညှာ ဟဲ့ မုး မာဂျီန် ကာမာယ်။ ဂေ ဒီ လှုဝ်း မဲ ဒေါ ယိုဝ် ဂေ ဒူင် ကွယ် မဲ ဟဲ့ ဘ့လဝ်၊ မဲ တူ ကွယ်။ 19 မဲ ယီ ကွယ် ချြီင် အာဒါ အူယ် ဆီငဲ။ ဟဲ့ ဟွတ့်၊ ဘာ ဒီ အပ်၊ မဲ လုဝ် ဝီ လူင် ဒူင် ကွယ် ချြီင် မဲ ဒုဝ် မဲ ခါ အာတ့် တွိုန်၊ ဒူင် မုး ခူပ် မာဝ် တာင် အီ စိူဝ် အေစေ။ 20 အုဝ် မိူဝ် ဒီ ဘန့် ဟာဝ် ဘ့လာ အူယ် ညွင့် ဒီ ခူပ် မာဝ် တီ။ 21 အုဝ် ဒီ ဝီ စ်ု ဂွန် ဒီရွယ် ဟာဝ် ဒိုဝ်း။ အုဝ် ဒီ တဝ်း၊ ‘မဲ ဟာဝ် ဟြေတ့် တး ဘ့လာ တွိုန်။’ ဆေ အုဝ် ကာလာင် တဝ်း၊ ‘မဲ ဟာဝ် ယွတ်၊ ဘ့လာ တွိုန် ကွယ် နာ အာတ့် မဲ တီ၊ တဲး မဲ ဒိုဝ်း တး၊’ ဂြုဝ်း တီ တဲး မဲ နပ်၊ ဟဲ့ မှာန် ဟဲ့ မုး၊ မဲ ပွိုန် ဒီ လေး တး။ အာဝ် မိုဝ်း နာ တူ မွှိုမ် မာဆေ။ 22 ဆေ အုဝ် ယီ တဝ်း ဒီ ဂွန် ဒီရွယ်၊ ‘ယွတ်၊ ဘ့လာ ဟဲ့ ဟွတ့် ဟာဝ် ပွုန် မဲ၊’ န့ ဒီ တဲး မဲ နပ်၊ မဲ လုဝ် ဟာဝ် ပေါ ပ့လုဝ့်၊ ဇဝ်ဖြာ ဟဲ့ စ်ု မဲ ဟာဝ်။ 23 လွင် ပီ လာယ် ကာလာင် အာယ် နီ၊ တဲး မဲ လှုဝ်း ဆေဆေ၊ ဘော ဇဝ်ဖြာ ဟဲ့ နပ် တူတ့်။”

24 ပန် တီ အာဒါဝိတ် ဘော ချြီင် ကွယ် ခဲင် ပြဲ တွိုန်။ ဘော ဇမ် ဆီငဲ မာဂျီန် ကာမာယ် တွိုန်၊ ခုန်ဒီခမ် ဘော တး ကွယ် ဒူင် ဒီ ဟူမ် အန်။ 25 အန် ဘော တုတ့် ဒူင် တုတ့် အန် ဆေဆေ၊ အီ ကွယ် ခူပ် ရဲင် တွိုန်။ အာယုဝ်နာထာန် ဘော ကွယ် ကာဒး အာဆောလူ။ အာဘာနာ ဘော ကွယ် ဒီ ခူပ် အာယုဝ်နာထာန်။ ဒူင် ကွယ် အာဒါဝိတ် မိူဝ်၊ ဟဲ့ ဘ့လဝ် ပါယ် တီ။ 26 မာလဲ၊ ဆီငဲ တီ အာဆောလူ တူ တဝ်း မာဆေ။ အန် ထာင်၊ ဟဲ့ မိုဝ်း အူ မျုဝ် အူ မျုဝ် အီ တဲး အန် အာဝ် ဟူ ဆီငါ ဒူပ် ပီ ဒမ် ဒါရာ၊ ကွဲ့ တဲး အန် ပွိုန် ဟူမ် ရိုမ်။ 27 ပါ ခဲညှာ ဟဲ့ ဝီ ဇမ် မာဂျီန် ကာမာယ် အာ ဆီငဲ။ ဒူင် တုတ့် အာဒါဝိတ် ဟဲ့ ဘ့လဝ် ပေါ အူ ဇေန့်။ အာဆောလူ ဘော ဒီမွှတ် အာယုဝ်နာထာန် တွိုန် တဝ်း၊ “န့ ပါယ် မှဝ်၊ ဂွန် အာယေဆေ တွိုန် ပီ ဟူ တး ဟူမ် ရိုမ် ဒူပ် အေ ဒီ နီ။း ဘော အာမှိုဝ် အာတိုဝ် အန် တူ တး။”

28 အာယုဝ်နာထာန် ဝီ ကာလာင် ဒီ အာဆောလူ တဝ်း၊ “အာဒါဝိတ် ဟဲ့ မှာန့် အုဝ် ခ့ဝါင် အန် ဟာဝ် ဒီ မိူင် ဘေတ်လဲမ်။ 29 အန် တဝ်း၊ ‘တဲး မဲ တဲး အုဝ် ဟာဝ်။ ဝေါဝဲ အုဝ်၊ ဂေ ဟဲ့ ဘူင် ဘ့လွယ် လှူ ဒီ မိူင် ဂေ။ အီကတ် အုဝ် မိူဝ် ဟဲ့ ဒမ် အုဝ် တး။ ဆေ မဲ အိုင်၊ အုဝ် မှာန့်၊ တဲး အုဝ် ပွိုန် ဒီ ဟာဝ် စ်ု အီကတ် အုဝ်။’ အန် မိူဝ် ဟဲ့ ဟာဝ်။ ခုဝ်၊ အန် တူ တး ဒီ နီ။”

30 ပန် တီ အာဆောလူ ဘော ရူ ကာဆဝ် ဒီ အာယုဝ်နာထာန်။ အန် တဝ်း၊ “မဲ မုး ဂွန် ကာတဲ ဂ့လ။ အုဝ် ဟဲ့ နပ် ဆီချာ၊ မဲ ရွက့် ဂွန် အာယေဆေ တီ။ န့ တဲး ဘော မဲ ဘော မာ မဲ စှိုမ် ဆာရေ ဘော မွှိုမ် ဆာယ်။ 31 ဆေ ဂွန် အာယေဆေ တီ တူ ယမ်၊ ဆေ အန် ယီ ဆီ ကွယ် ဒဲင် ကာဒါယ် နီ၊ မဲ တူ ပွိုန် ကွယ်။ မိူင် နီ မိူဝ်၊ မဲ တူ ပွိုန် ဒီ အိုပ်။ မဲ ဟာဝ် ဒေါ တီ နီ၊ ဒဲ့ တး အန် ဒီ အုဝ်။ အုဝ် လုဝ် ငဝ်း ယမ် အန်။”

32 အာယုဝ်နာထာန် ဝီ ကာလာင် ဒီ ဂုန့် အန် တဝ်း၊ “ကူပ် န့ ပါယ် မှဝ် အာဒါဝိတ် လုဝ် ယမ်။း အန် ဟဲ့ ဘူင် လုတ့် မာဆေ။း” 33 အာဆောလူ ဘော ဝီ ဆီနုဝ်း ဘ့လာ လျီး တဝ်း တဲး န့ လဝ့် အာယုဝ်နာထာန်။ ကူပ် ဟဲ့ ပါယ် တီ အာယုဝ်နာထာန် ကော နပ် ဆီချာ ဂုန့် အန် ဟဲ့ ဂျာမ် မှာန် ဒီ ငဝ်း အာဒါဝိတ်၊ တဲး န့ ယမ်။

34 အာယုဝ်နာထာန် ဘော ယိတ့် ဒီ ဒူင် ဟူမ် ဂေ တွိုန်၊ အန် ဘော ရူ ကာဆဝ်။ ဆီငဲ တီ အန် မိူဝ် အာဝ် ဟူ ဟူမ် မာဆေ။ ကူပ် ဂုန့် အန် ဟဲ့ ဘူင် နာ မွှိုမ် ဆာယ် ဒီ အာဒါဝိတ်၊ အန် ဘော က့လိုဝ် ခဲင် နဝ်း အန်။

35 ပါ ခဲညှာ ဆိန့်ဝး၊ အာယုဝ်နာထာန် ဘော ဒဲ့ ဂွန် ဒီရွယ်၊ ဟာဝ် ခဲင် ပြဲ အီ မုး ဒူင် လာယ် ကာဆဲန့် ဂါယ် အာဒါဝိတ် တွိုန်။ 36 အန် ဘော ကာလာင် ဒီ ဂွန် တွိုန် တဝ်း၊ “မဲ ကာဘ့လဲပ် ဟာဝ် ဟြေတ့် ဘ့လာ ပီ ဘန့် အုဝ် တွိုန်၊ ဝီ ဒိုဝ်း တး။” ဒေါ ကာဘ့လဲပ် ဟာဝ် ဂွန် တွိုန်၊ အန် ဘော ဘန့် ဘ့လာ အူ ညွင့်၊ တဲး န့ ကာလုဝ်း ပွုန် ဂွန် တွိုန်။ 37 ဂွန် တွိုန် ဘော ဇမ် ဒူင် စုဝ်း ဘ့လာ ပီ ဘန့် အာယုဝ်နာထာန်၊ အန် ဝီ ဒဲ့ တဝ်း၊ “ဘ့လာ ဟဲ့ ကာလုဝ်း ဟာဝ် နာ အာတ့် မဲ တီ။” 38 အာယုဝ်နာထာန် ပီ ဝီ ဒဲ့ ဒူပ် ဒီ ပန် ဂွန် တွိုန် တဝ်း၊ “ပီခြန် မဲ ကာဘ့လဲပ် ဟဲ ဟဲ၊ ကွဲ့ ဂိူတ်။” အန် ဘော ဂဲပ် တး ဘ့လာ ဒူင် ကွယ် အာယုဝ်နာထာန်။ 39 ဂွန် တွိုန် ယီ တူ နပ် မာဆေ လွင် ဒါင် အာတီ။ မီ အာယုဝ်နာထာန် ဂါယ် အာဒါဝိတ် အီ နပ်။ 40 အာယုဝ်နာထာန် ဘော ဒိုဝ်း ခြိုင် ကာဂုဝ်း အန်၊ ဒွါ ဒီ ဂွန် ဒီရွယ် တွိုန်၊ တဝ်း ဒီ အန်၊ “မဲ ဒိုဝ်း ကြုဝ် နီ၊ ဝီ ဝေန့် ခဲင် မိူင်။”

41 ဂွန် တွိုန် ဟဲ့ ဟွတ့် ဟာဝ်၊ အာဒါဝိတ် ဝီ တး နာ တေတ့် မာဝ် တွိုန်၊ ဝီ ခြိုပ်ခြဝ် ဒီ ကာဒါယ် ဝီ မုတ် ဂိုပ် ဒီ အာတ့် အာယုဝ်နာထာန် အူယ် ဇေန့်။ ဂါယ် ဘော လာယ် အုး ဘော ယာမ်။ အာဒါဝိတ် ယီ ယာမ် တာင် ကာဆဝ်။

42 အာယုဝ်နာထာန် ဘော ကာလာင် ဒီ အာဒါဝိတ် တဝ်း၊ “တဲး မဲ ဟာဝ် ဒါခိုယ်။ အာယ် ဟဲ့ ဟွတ့် လာယ် ကာဆဲန့် ဒီ အာတ့် ဇဝ်ဖြာ၊ ဟဲ့ ဒိူင် တဝ်း၊ ‘ဇဝ်ဖြာ ဟဲ့ ယိုဝ် ဘော မဲ ဘော အုဝ်၊ အန် ဒီ ဘော ယိုဝ် ဘော ဝေါဝဲ အာယ်၊ တဲး အာယ် လာယ် ရွက့် ဆေဆေ။’” အန် ဟဲ့ ဟွတ့် တဝ်း ပါယ် တီ အာဒါဝိတ် ဘော ယိတ့် ဟာဝ် အူ ဘ့လာက်။ အာယုဝ်နာထာန် ဘော ဝီ ဝေန့် ခဲင် မိူင် တွိုန်။