1 အာဆောလူ ကာလာင် ဒီ ဂွန် အန် အီ စိူဝ် အာယုဝ်နာထာန် ဘော ဒီ ဒဲစေန့် အန် ဒွန် အီ၊ တဲး ဂေ ငဝ်း ယမ် အာဒါဝိတ်။ 2 အာယုဝ်နာထာန် ယီ ရွက့် ကာဆဝ် အာဒါဝိတ်။ အန် ကာလာင် ဒီ အာဒါဝိတ် တဝ်း၊ “ဂုန့် အုဝ် အာဆောလူ ဂျာမ် ဒီ ငဝ်း ယမ် မဲ။ တဲး မဲ ဆာဒိက် ဒုဝ် မဲ။ ဟီ ဇမ် ခဲညှာ၊ တဲး မဲ ကွယ် ဒူင် တူ လိုဝ်း၊ တဲး မဲ ချြီင် ဒုဝ် မဲ။ 3 အုဝ် ဒီ တး ကာတတ် ဒူင် ကွယ် မဲ တီ၊ ကာမွုန် ဒီ ဂုန့် အုဝ်။ အုဝ် ဒီ ကာလာင် ဂြုဝ်း ဒီ ဂုန့် အုဝ် လွင် မဲ။ ဆေ အုဝ် ဘော ယိုဝ် လွင် မာဆေ၊ အုဝ် ဒီ ဝီ တး ကာလာင် ဒီ မဲ။”

4 အာယုဝ်နာထာန် ဘော ကာလာင် ဆီချာ ဂြုဝ်း ဒီ ဂုန့် အန် လွင် အာဒါဝိတ် တွိုန်။ အန် တဝ်း၊ “ကွဲ့ တဲး မဲ ခုန်ဒီခမ် တာင် လုတ့် နဝ်း ဒီ အာဒါဝိတ် တွိုန်။ ဘော အန် မိူဝ် တူ လုတ့် နဝ်း မာဆေ ဒီ မဲ။ ခဲ့ ပီ ဘူင် အန် ဒီ မဲ၊ န့ မုး တူတ့် အီ ဘွတ် အီ မွှိုမ်။ 5 အန် ယီ တူ ကာဝေ အာဆာက် အန်။ အန် ဟဲ့ ငဝ်း ယမ် ဒူအီ ဖီလီထီ တွိုန်။ ဇဝ်ဖြာ မိူဝ် ဟဲ့ ပဲ ဂေ ရန်ဆူ ဒူအီ အီဆာရေလ ဘောကာဂ့လျီတ်။ ဘော မဲ မိူဝ် ဟဲ့ ယိုဝ်။ ဘော မဲ ဟဲ့ ခူယ် ဒူပ်။ ကူပ် မာဆေ မဲ ဝီ ဆီ ဘူင် မှာပ်။း ကူပ် မာဆေ မဲ ဝီ ဆီ ငဝ်း ဒူအီ မွှိုမ်။း ပီ ဆီ ဘူင် မဲ တူ မိုဝ်း ဒီခုဝ်။”

6 အာဆောလူ ဘော ထူမ် ဂြုဝ်း အာယုဝ်နာထာန် တွိုန်။ အန် ဘော ဒိူင် တဝ်း၊ “ဇဝ်ဖြာ ဟဲ့ နပ်၊ ဂြုဝ်း ပီ ကာလာင် အုဝ် နီ ဟဲ့ မှာန် အာခါခ်ု။ အာဒါဝိတ် တူ လုဝ် ယမ်။”

7 အာယုဝ်နာထာန် ဘော ဒဲ့ အာဒါဝိတ်၊ ဘော ဝီ ကာလာင် လွင် ဒွန် မျုဝ် ဒီ အန် ဘော တိုယ် အာဒါဝိတ် ဝီ ဟာဝ် ဇမ် ဒူင် ကွယ် အာဆောလူ တွိုန်၊ တဲး အန် ဝီ ကွယ် ရိုမ် ဒူပ် အာဆောလူ ပီ အာတ့် နီ။

8 ဝါယ် တီ ပေါ အူ ဇေန့် ဂေ ဒူအီ ဖီလီထီ ဝီ ကာဂုဝ်း ဒီ ဒူအီ အီဆာရေလ။ ဘော အာဒါဝိတ် ဟာဝ် ကာဂုဝ်း ဒီ ဂေ။ အန် ဘော ပွိုန် ဒီ ငဝ်း ယမ် ကိူန် ကာဆဝ် ဂေ။ ဂေ ဘော တဝ် ဟာဝ်။

9 ဒေါ ကွယ် အာဆောလူ ခဲင် ဟုဝ်၊ အန် ဂူင့် ဘ့လာ လျီး အန်။ ကာနမ် ဟာယ် တွိုန် ဝီ တး ပျာတ့် နဝ်း အန်။ အာဒါဝိတ် ဘော ဝီ ဘး ဒိင် အန် တွိုန်။ 10 ဒေါ အန် တီ အာဆောလူ ဒိုဝ်း ဘ့လာ လျီး အန်၊ တဝ်း ဒီ ဆီနုဝ်း အာဒါဝိတ် ဒိုက် ဒီ ရဲင်။ အာဒါဝိတ် ယီ ဝး တဲး ဘ့လာ လျီး ဝီ ဒီဆိန့် ဒိုက် ဒီ ရဲင် တွိုန်။ အာဒါဝိတ် ဘော တဝ် တ အာဆောလူ ခဲင် မှိုဝ် တီ။

11 အာဆောလူ ဘော စ်ု ဒူအီ ဟာဝ် ဒီ ကာင် အာဒါဝိတ်၊ တဲး ဂေ ဘ်ု အန်၊ တဲး အန် ပွိုန် ဒီ ငဝ်း အာဒါဝိတ် ဆိန့်ဝး တွိုန်။ နာင် မီခါလ အီ မုး အီဘိုန့် အာဒါဝိတ် အန် ဘော ကာလာင် ဒီ အာဒါဝိတ် တဝ်း၊ “ဆေ မဲ တူ တဝ် ခဲင် မှိုဝ် နီ၊ ခဲညှာ မဲ ဒီ ယမ်။” 12 အန် ဘော စွယ် အာဒါဝိတ်၊ ဘျွာ လူင် အန် ခဲင် ကာဒဝ် ပါတဲင်၊ တဲး အန် ပွိုန် ဒီ တဝ်၊ တဲး အန် လွတ်။ 13 ပန် တီ အန် ဘော ဒိုဝ်း အာရိုပ် ဇဝ် ပီ ကြိုပ် အန် အူ ကာဒင်၊ တး ဘ့လေး ဒဲင် ကာစှူင့် အိတ် အာဒါဝိတ်၊ ဘော ဒိုဝ်း ဘော ခြိုင် ဘော ဟိုက် မာပဲ၊ ဘ့လေး ဘဲန် မွှန်၊ ဝီ ဒိုဝ်း ဟိုပ် ပ့လိုက်။

14 အာဆောလူ ဘော စ်ု ဒဲစေန့် အန်၊ တဲး ဂေ ဟာဝ် မှေတ့် အာဒါဝိတ်။ အီဘိုန့် အန် ဝီ တဝ်း၊ “အာဒါဝိတ် ဆဝ်ဖိုဝ်။”

15 အာဆောလူ ပီ ဝီ စ်ု ဒဲစေန့် အန် ဟာဝ်၊ တဲး ဂေ ပွိုန် ဒီ ယွတ် အာဒါဝိတ်။ အန် တဝ်း၊ “ဒိုဝ်း တး အန်၊ ဘော ကာစှူင့် အိတ် အန် တီ။ တဲး အုဝ် ပွိုန် ဒီ ငဝ်း ယမ် အန်။” 16 ဂေ ဘော လိုပ် ဟာဝ် ခဲင် အိတ် တွိုန်၊ ဂေ ဘော ယိုဝ် အာရိုပ် ရာင် အီ ကွယ် ဒဲင် ကာစှူင့် အိတ် တီ။ ဘော ခြိုင် ဟိုက် မာပဲ အီ ဘဲန် မွှန် ဟဲ့ ကွယ် ဒဲင် ဂိန့် တွိုန်။

17 အာဆောလူ ဘော ဒီမွှတ် နာင် မီခါလ တဝ်း၊ “မှဝ် န့ ပါယ် ပီ ကာလုဝ် မဲ ဒီ အုဝ်။း မဲ ဟဲ့ ဘ့လေး ရန်ဆူ အုဝ် တဲး အန် လွတ် ဟာဝ် ပါယ် နီ။”

နာင် မီခါလ ဝီ တဝ်း ဒီ အာဆောလူ၊ “အန် တဝ်း ဒီ အုဝ်၊ ‘ဆေ မဲ တူ ဘ့လေး အုဝ်၊ အုဝ် ဒီ ငဝ်း ယမ် မဲ။’”

18 အာဒါဝိတ် ဘော လေး တဝ် တဲး အန် လွတ်။ အန် ဘော ဟာဝ် ဇမ် ဒူင် ကွယ် အာဆာမူအေန် ဒီ မိူင် ရာမာ တွိုန်။ အန် ဘော ကာလာင် တူတ့် ဒွန် မျုဝ် လွင် ပီ ဘူင် အာဆောလူ ဒီ အန်။ ဂါယ် အာဆာမူအေန် ဘော ဝီ ကာဒူပ် ဟာဝ် ဒီ ရဝ် နာယုတ်၊ ကွယ် ဒီ တီ။ 19 အီ ဟဝ် ဘော ဝီ ကာလာင် ဒီ အာဆောလူ လွင် အာဒါဝိတ် ဟဲ့ ဟာဝ် ကွယ် ဒီ ရဝ် နာယုတ် ခဲင် ကာဒါယ် မိူင် ရာမာ တွိုန်။ 20 အာဆောလူ ပီ ဝီ စ်ု ဒဲစေန့် အန်၊ တဲး ဂေ ဟာဝ် မှေတ့် အာဒါဝိတ်။ ဂေ ဘော ဟာဝ် ယိုဝ် ဖိုင် ဒူအီ ဘျာန် ဂြုဝ်း ဇဝ်ဖြာ။ ဘော အာဆာမူအေန် ကွယ် ဒူပ် ဂေ၊ ဘဲန် ဒါ အီ ယဲတ့် ဂေ။ ဒေါ အန် တီ နဝ်း ဖွိုမ် ဇဝ်ဖြာ ဘော စုဝ်း ဘော ဒီ ဂေ ဒဲစေန့် အာဆောလူ၊ တဲး ဘော ဂေ ဘျာန် ဂြုဝ်း ဇဝ်ဖြာ။ 21 အီ ဟဝ် ဝီ ကာလာင် ဒီ အာဆောလူ လွင် အန် တီ၊ အန် ပီ ဝီ စ်ု ဒဲစေန့် အန် ပေါ အူ ဖိုင် ဝီ ဟာဝ်။ ဂေ တီ မိူဝ် ဘော ဘျာန် ဂြုဝ်း ဇဝ်ဖြာ။ ဟဲ့ မုး အူယ် ဇေန့်၊ အာဆောလူ ဟဲ့ စ်ု ဒဲစေန့် အန် ဟာဝ်။ ဒွန် ဇေန့် န့ ယီ ပါယ် တီ။ 22 ပန် တီ အာဆောလူ ဘော ဟာဝ် ဒုဝ် အန်၊ တဝ်း ဒီ ဟာဝ် ဒီ မိူင် ရာမာ တွိုန်။ အန် ဘော ဟာဝ် ဇမ် ဒူင် မိုဝ်း အိုမ် ခိုမ် တာင် ဒီ ရဝ် စေခု။ အန် ဘော ဒီမွှတ် ဂေ တဝ်း၊ “အာဆာမူအေန် ဂါယ် အာဒါဝိတ် ကွယ် ဒီ မှဝ်။း” ဒူအီ အူ ဝီ ဝီ ကာလာင် ဒီ အန် တဝ်း၊ “အန် ကွယ် ဒီ ရဝ် နာယုတ် ခဲင် ကာဒါယ် မိူင် ရာမာ တွိုန်။”

23 အန် ဘော ဟာဝ် ဒီ ရဝ် နာယုတ် ခဲင် ကာဒါယ် မိူင် ရာမာ တီ။ ဒေါ အန် တီ နဝ်း ဖွိုမ် ဇဝ်ဖြာ ဘော ကွယ် ရိုမ် ဒူပ် အန်၊ တဲး ဘော အန် ဝီ ကာလာင် ဘျာန် ဂြုဝ်း ဇဝ်ဖြာ ဒေါ ဟာဝ် အန် ဒူပ် န့တေန့်။ 24 အန် ဘော ဘုတ့် ဝဲန် ဘော ခြိုင် ပီ တာ အန်၊ ဘော ဘျာန် ဂြုဝ်း ဇဝ်ဖြာ ဒီ အာတ့် အာဆာမူအေန် တွိုန်။ အန် ဘော ကွယ် ပါယ် တီ အူ မှိုဝ် ဒီ အူ ဆီငဲ။ ကူပ် မ့ပါယ် တီ၊ ဂေ ဘော တဝ်း၊ “န့ နှဲန် အာဆောလူ မိူဝ် ဟဲ့ ဝီ ဘဲန် ဒါ အီ ဘျာန် ဂြုဝ်း ဇဝ်ဖြာ။”