1 အာဒါဝိတ် ဟဲ့ ဟွတ့် ကာလာင် ဒီ အာဆောလူ တွိုန်၊ နဝ်း အာယုဝ်နာထာန် အီ မုး ဂွန် အာဆောလူ တွိုန် ဘော ဒိုက် ဒီ အာဒါဝိတ်။ အန် ဘော ရွက့် ကာဆဝ် အာဒါဝိတ်၊ ကော နှဲန် အန် ရွက့် ဒုဝ် ဘြိမ် အန်။ 2-4 ကူပ် ရွက့် အာယုဝ်နာထာန် ဒီ အာဒါဝိတ် ပီ အန် ရွက့် ဒုဝ် ဘြိမ် အန်၊ အန် ဒွါ ကာဒိက် ဆတ်ဇာ ဒီ အာဒါဝိတ်။ အန် ဘော ဘုတ့် ဆီတုဝ် ပီ တာ အန်၊ ဝီ ဒွါ ဒီ အာဒါဝိတ်။ ဘော ခြိုင် ပီ တာ အန် ဒွန် မျုဝ်၊ မာပွါ့ လာင် အန်၊ အ အန်၊ ဘော ဆဲ့ အန်၊ အန် ဒွါ တူတ့် ဒီ အာဒါဝိတ်။ အူ ဆိန့် ဒေါ ပဲ အာဒါဝိတ် ဒူအီ ဖီလီထီ တွိုန်၊ အာဆောလူ ဘော တဲး အာဒါဝိတ် ကွယ် ဒူပ် အန်။ ဝါယ် အန် တီ အန် အာဝ် ဟူ တဲး အာဒါဝိတ် ပွိုန် ဒီ ဝေန့် ဒီ ကာင် ဂုန့် အန်။

5 အာဒါဝိတ် ဘော ဘူင် ပီ စ်ု အာဆောလူ အန် ဘူင်။ အန် ဘူင် တူတ့် ဒွန် မျုဝ်၊ တဲး န့ မွှိုမ်။ ခုဝ်၊ အာဆောလူ ဘော တဲး အန် အိုပ် ဒါ ဆိုက် ဘောကာဂ့လျီတ်။ ဂေ ဒူအီ ဘောကာဂ့လျီတ် ဘော အာမူ အာမာတ် အာဆောလူ ဂေ ဘော ရုဝ်ဆေ အန်။

6 ဝါယ် ဟဲ့ ဟွတ့် ငဝ်း ယမ် အာဒါဝိတ် ဒီ ဒူအီ ဖီလီထီ တွိုန်၊ ဒေါ ဝီ ဝေန့် အာဆောလူ ဂေ ဒါ ဆိုက် အန် ဒူပ် န့တေန့်၊ န့ မိုဝ်း ဂေ အီဘိုန့် ခဲင် ရဝ် ခဲင် မိူင် အီဆာရေလ တွိုန်၊ ဂေ ဘော လေး တး၊ ဘော တဝ်း မှုဝ် ဘော ဂါ ဒူပ်၊ ဂူင့် ဘော ဂြိုင် ဘော ခြိုင် ပီ ဒွယ် ပီ ဘး။ နဝ်း ဂေ မိူဝ် ဟဲ့ ဘျုဝ် ဒါခိုယ်။ ဂေ ဟာဝ် ဘ်ု ဒီ ရွုး ခုန်ဒီခမ် အာဆောလူ ဘော ဂေ အီ ဒူပ် အန်။ 7 အီဘိုန့် ဂေ တွိုန် ဘော ဂါ၊ တဝ်း ဘော မှုဝ်။ ဂေ တဝ်း၊

“အာဆောလူ ငဝ်း ယမ် ဒူအီ ဘဲန် ဟြဲန့် ဘဲန် ဟြဲန့်။ အာဒါဝိတ် ယီ ငဝ်း ဒူအီ ဘဲန် မှိုန့် ဘဲန် မှိုန့်။”

8 အာဆောလူ ဟဲ့ ယိုဝ် ဂြုဝ်း တီ၊ အန် ဘော ရူ ကာဆဝ်။ အာဝ် ဟူ လဝ့် နဝ်း အန်။ အန် ဝီ တဝ်း၊ “ဂေ တဝ်း၊ အာဒါဝိတ် ဟဲ့ ငဝ်း ဒူအီ ဘဲန် မှိုန့်၊ ဘဲန် မှိုန့်။ အီ မုး အုဝ် ဂေ တဝ်း၊ ဘဲန် ဟြဲန့် ဘဲန် ဟြဲန့်။ အာဝ် လှေန့်၊ အန် ဒီ အိုပ် တူတ့် ဘော မိူင်။” 9 ဆိန့် ဆီငဲ တီ၊ အာဆောလူ အုန် နဝ်း၊ ဝီ ဘ်ု ဒီ ယွတ် အာဒါဝိတ် ဆေဆေ။

10 ပါ ခဲညှာ ကာနမ် ဟာယ် ပီ တိုယ် ဇဝ်ဖြာ ဝီ တး ဒွါ ဒုက် ကာဆဝ် ဒီ အာဆောလူ။ အန် ဘော ကာလာင် ဂြုဝ်း ကာနမ် တီ။ အာဒါဝိတ် ဝီ ဘး ဒိင် အန်၊ တဲး န့ ပီ ဆီငဲ အာတ့် တွိုန်။ အာဆောလူ ဟဲ့ ပါ ကာနျီမ် ဘ့လာ လျီး အန်။ 11 အန် ဘော ဒိုဝ်း ဘ့လာ လျီး တွိုန်၊ ဆီနုဝ်း။ အန် ဘော တဝ်း၊ “တဲး န့ လဝ့် အာဒါဝိတ်၊ တဲး အန် ဒိုက် ဒီ ရဲင်။” အာဒါဝိတ် ဘော ဝး တဝ်၊ ဟဲ့ မုး အာ ဇေန့်။

12 ကူပ် အာဝ် ဟူ ကွယ် ဇဝ်ဖြာ ရိုမ် ဒူပ် အာဆောလူ၊ ဟဲ့ ဝီ ဟာဝ် ကွယ် ဒူပ် အာဒါဝိတ်၊ အာဆောလူ ဘော ယုဝ် အာဒါဝိတ်။

13 အာဆောလူ ဘော တဲး အာဒါဝိတ် ကာထုဝ့် ဒူင် ကွယ် အန်၊ တဲး အန် အိုပ် ဒူအီ အူ ဟြဲန့် ဝီ။ အန် ဘော ကာဒုး ဒီ ယဲတ့် ဒါ ဆိုက် ဒေါ ကာဂုဝ်း ဂေ။ 14 အာဒါဝိတ် ဘော မိုဝ်း အာငျာန် ဒီ ဘူင် ဒွန် မျုဝ် ကူပ် ဇဝ်ဖြာ ကွယ် ရိုမ် ဒူပ် အန်။ 15 ဒေါ ယိုဝ် အာဆောလူ လွင် အာဒါဝိတ် နပ် ဒီ ဘူင် ဆီချာ ဒွန် မျုဝ်၊ အန် ဘော ဝဲ ယုဝ်။ 16 ဂေ ဒူအီ အီဆာရေလ ဘော ဂေ ဒူအီ အာယူဒါ ဘောကာဂ့လျီတ် ယီ ရွက့် အာဒါဝိတ် ကူပ် နပ် အန် ဒီ ယဲတ့် ဂေ။

17 အူ ဆီငဲ၊ အာဆောလူ ကာလာင် ဒီ အာဒါဝိတ် တဝ်း၊ “မဲ ယွတ်၊ အုဝ် ဒိုဝ်း ဂွန် အီဘိုန့် အုဝ်၊ ဝီ တာင် အီ စိူဝ် နာင် မေရာပ်၊ ဒွါ ဒီ မဲ။ မာလဲ၊ တဲး မဲ ယ ကျ ဒီ ကာဂုဝ်း ဒီ အီ ဟဝ် ဒါင် အုဝ်၊ ဘော အာဒါ ဇဝ်ဖြာ။” အန် တဝ်း ပါယ် တီ ကူပ် ထာင် အန် ခဲင် နဝ်း၊ “ကွဲ့ တဲး န့ မုး အုဝ်၊ အီ ကာဒုး ဒီ ဘူင် အီ တူ မွှိုမ် ဒီ အန်။ တဲး န့ မုး ဒူအီ ဖီလီထီ အီ ဘူင်။”

18 အာဒါဝိတ် ဝီ ကာလာင် ဒီ အာဆောလူ တဝ်း၊ “အုဝ် ဘော ဂုန့် အုဝ် ဘော ခြိုဝ် အုဝ် အာဝ် မုး ဒူအီ တာင် ခဲင် ဒူအီ အီဆာရေလ။ အုဝ် အာဝ် ပွိုန် ဘဲန် အျီ့ မဲ ခုန်ဒီခမ်။” 19 ဂေ ဘော တဝ်း ဒီ ဒွါ နာင် မေရာပ် အီ မုး ဂွန် အာဆောလူ၊ တဲး အန် ဘဲန် အီဘိုန့် အာဒါဝိတ်။ ဒေါ ဇမ် ဆီငဲ ပီ တဝ်း ဂေ တီ၊ ဂေ ယီ တူ ဝီ ဒွါ အန် ဒီ အာဒါဝိတ်။ ဂေ ဝီ အာပ် ဒွါ ဒီ အာဒါရေလ အီ မုး ဒူအီ အာမျုဝ် မေဟုဝ်လ တွိုန်၊ တဲး ဂါယ် ခတ်။

20 ပန် တီ န့ မုး ဂွန် အီဘိုန့် အာဆောလူ အီ စိူဝ် နာင် မီခါလ တွိုန်၊ အန် ဘော ရွက့် အာဒါဝိတ်။ ဒေါ ကာလာင် ဂေ လွင် အန် တီ ဒီ အာဆောလူ၊ န့ ဝီ လဝ့် နဝ်း အန်။ 21 အာဆောလူ ခြာမ် ခဲင် နဝ်း အန် တဝ်း၊ “အုဝ် ဒီ အာပ် ဒွါ ဂွန် တီ ဒီ အန်၊ တဲး န့ ဘဲန် ယွတ့် ဒီ အန်။ အုဝ် ဒီ ဘူင် တဲး ဒူအီ ဖီလီထီ ဘဲန် ရန်ဆူ ဒီ အန်။” ဟဲ့ ဟွတ့်၊ အာဆောလူ ဝီ တဝ်း ဒီ အာဒါဝိတ်၊ “အာတိုဝ် နီ ဟဲ့ မုး ပေါ အူ ဇေန့်၊ အုဝ် ဒီ တဲး မဲ ဝီ ပွိုန် ဒီ ဘဲန် အျီ့ အုဝ်။”

22 အန် ဝီ ကာလာင် အုန် ဒီ ဒူအီ ခဲင် ဟုဝ် အန် မင် အီ တဝ်း၊ “ဘေ ပြာ ဒီ ကာလာင် ဒီ အာဒါဝိတ် တဝ်း၊ ‘မဲ ဘူင် ဆေဆေ တဲး န့ လဝ့် နဝ်း ခုန်ဒီခမ်။ ဘော ဂေ ဒဲစေန့် ခုန်ဒီခမ် ဘောကာဂ့လျီတ် မိူဝ် အိုင် မဲ။ ကူပ် န့ ပါယ် တီ မဲ ကာဒုး ဒီ ဘဲန် အျီ့ ခုန်ဒီခမ်။’”

23 ဒဲစေန့် အာဆောလူ ဘော ဒိုဝ်း ဂြုဝ်း တွိုန် ဝီ ကာလာင် ဒီ အာဒါဝိတ်။ အာဒါဝိတ် ဝီ တဝ်း၊ “အုဝ် နီ မုး ဒူအီ ဖ့လာန်၊ တူ မိုဝ်း ဆာရေ။ န့ တူ ငှိုယ် ဘဲန် အျီ့ ခုန်ဒီခမ်။”

24 ဒဲစေန့် အာဆောလူ ပီ ဝီ ကာလာင် ဒီ ဒါ ကာညာ ဂေ တဝ်း၊ “အာဒါဝိတ် ဟဲ့ တဝ်း ပါယ် နီ။” 25 အာဆောလူ ပီ ဝီ ကာလာင် ဒီ ဂေ န့ ပွါ တဝ်း၊ “ဘေ တဝ်း ဒီ အာဒါဝိတ်၊ ‘ဆေ မဲ ဆီ ပွိုန် ဂွန် ခုန်ဒီခမ်၊ မဲ လုဝ် ဒိုဝ်း ဒွါ ဟုန် လခါနာ အီမာယ် ဒီ ဒူအီ ဖီလီထီ အူ မာယဝ်း ဝီ။ ဒဲင် တီ၊ အန် တူ လုဝ် မာဆေ။ ပါယ် တီ အန် ဆီ ဘူင် ဝျီ့ နာ စီစိဝ် ပီ ဘူင် ဂေ ဒီ အန်။’” ပါယ် တီ အာဆောလူ ခြာမ် ဒီ တဲး အာဒါဝိတ် စှိုမ် ဒီ ဒူအီ ဖီလီထီ။

26 ပန် တီ ဒဲစေန့် အန် ဘော ဝီ ကာလာင် ဒီ အာဒါဝိတ်။ န့ ဘော လဝ့် နဝ်း အာဒါဝိတ်။ အန် ဒီ ပွိုန် ဒီ ဘဲန် အျီ့ ခုန်ဒီခမ်။ ဂေ ဘော ကာဆဲန့်၊ ကွဲ့ တဲး န့ ပွုန် ဆီငဲ ပီ တဝ်း ခုန်ဒီခမ်။ 27 အာတ့် တူတ့် ဆီငဲ ဂေ တီ၊ အာဒါဝိတ် ဘော ဒိုဝ်း ဒူအီ အီ ဒူပ် အန်၊ ဟာဝ်။ အန် ဘော ငဝ်း ယမ် ဒူအီ ဖီလီထီ ဂေ အာ မာယဝ်း ဝီ၊ ဘော ဒိုဝ်း တး ဟုန် လခါနာ ဂေ တွိုန်၊ တး ဒွါ တူတ့် ဒီ ခုန်ဒီခမ်၊ တဲး အန် ပွိုန် ဒီ ဘဲန် အျီ့ ခုန်ဒီခမ်။ အာဆောလူ ဘော အာပ် ဒွါ ဂွန် အန် အီ စိူဝ် နာင် မီခါလ ဒီ အာဒါဝိတ်။

28 အာဆောလူ ဘော နပ် ဘော ယိုဝ် လွင် ဇဝ်ဖြာ ကွယ် ရိုမ် ကွယ် ဒူပ် အာဒါဝိတ်။ အန် ဘော နပ် လွင် ဂွန် အန် အီ စိူဝ် နာင် မီခါလ ဟဲ့ ရွက့် အာဒါဝိတ်။ 29 အာဆောလူ ဘော ဝဲ မိုဝ်း နဝ်း ယုဝ် အာဒါဝိတ်။ အန် ဘော ဘဲန် ရန်ဆူ အာဒါဝိတ် ဘော စုဝ် အန်။

30 ပန် တီ ဒူအီ ဖီလီထီ တဝ်း ဒီ ကာဂုဝ်း ဒီ ဒူအီ အီဆာရေလ ဘဲန် ဇေန့် ဘဲန် ဇေန့်။ ဒွန် ဇေန့် အာဒါဝိတ် ဘော ဝဲ မိုဝ်း အာငျာန် လွှိုမ် အာမူ အာမာတ် အာဆောလူ ဘောကာဂ့လျီတ်၊ တဲး အီ ရုဝ်ဆေ ရီမာတ် အန်၊ တဲး ဒွန် အီ ကော နပ် လွင် အန်။