1 ပေါ အူ ဇေန့် ဒူအီ ဖီလီထီ ဝီ လာယ် ဒဲ့ ခဲ့ ကွယ် ဒါ ဆိုက် ဂေ၊ တဲး ဂေ ပွိုန် ဒီ ဟာဝ် ကာဂုဝ်း။ ဂေ ဘော တး ကာဇု ဒီ မိူင် ဆောခေါ အီ မုး ကာဒါယ် ဒူအီ အာယူဒါ တွိုန်။ ဂေ ဘော ချ ဒီ မိူင် အေဖိတ်ဒမ်မိပ် အီ ကွယ် ဒီ ကာတဲ မိူင် ဆောခေါ ဂါယ် မိူင် အာစေကာ တွိုန်။ 2 အာဆောလူ ဘော ဒူအီ အီဆာရေလ၊ ဂေ မိူဝ် ဘော တး ကာဇု၊ ဘော ချ ဒပ် ဂေ၊ တဲး ဂေ လာယ် ဒါမ် ဒူပ် ဒီလယ့် အေလာ တွိုန်၊ တဲး ဂေ ပွိုန် ဒီ ကာဂုဝ်း ဒီ ဒူအီ ဖီလီထီ။ 3 ဂေ ဒူအီ ဖီလီထီ ဘော ကွယ် ဒဲင် နွန် အူ ဘ့လာက်။ ဒူအီ အီဆာရေလ ဘော ကွယ် ဒဲင် နွန် ပေါ အူ ဘ့လာက်။ န့ ဘော မိုဝ်း ဒီလယ့် အီ ကာခန် ဒီ ကာတဲ ဂေ။

4 န့ ဘော မိုဝ်း ဒါ ဆိုက် အီ စိူဝ် အာကောလာတ်၊ အီ မုး ဒူအီ မိူင် ဂါထ။ အန် ဟဲ့ စာ ဒဝ် ကာနိး ဒီ အူ ကာဆာန်။ အန် ဘော လေး တး ခဲင် ဒူင် ချ ဒူအီ ဖီလီထီ တွိုန်။ 5 ဒီ ဂိန့် အန်၊ အန် စှိုပ် မာဂိန့် ဘွင့် ဒေန့်။ အန် ပီ ဝီ တာ ဆီတုဝ် ဘွင့် အီ စန် အူယ် ဂိုဝ် ဆ။ 6 အန် မိူဝ် စှိုပ် ဘွင့် ဒေန့် ဒီ ပ့လဝ် အန်။ ဘော ဘ့လာ လျီး ပီ ငဲ့ အန် ဒီ ယ အန် မုး ဘွင့် ဒေန့်။ 7 အီ မုး ဂ့လွင့် ဘ့လာ လျီး အန်၊ န့ တာင် ဒါန် ကာဘွင့် ဒဝ့် ဂ့လာင်။ အီ မုး ဟိန် ဘ့လာ လျီး အန်၊ န့ စန် အူယ် ဆ ဒီလူယ်။ ဘော ဒူအီ ဂူင့် ခြိုင် ကာဂုဝ်း အန်၊ အန် ဟာဝ် ယဲတ့် နာ အာတ့် အာကောလာတ် တီ။

8 အန် ဘော ယိတ့် စွင့်။ ဘော ဒဲ့ ဂေ ဒါ ဆိုက် ဒူအီ အီဆာရေလ တဝ်း၊ “ကူပ် န့ ပါယ် မှဝ် ဘေ လေး တး ဒဲ ဒါ ဆိုက် ဘေ ပါယ် တီ။း အုဝ် နီ မုး ဒူအီ ဖီလီထီ။ ဘေ ယီ မုး မှာယ် အာဆောလူ။ တဲး ဘေ ရဝ်း ဒူအီ အူ ဝီ၊ တဲး အန် လေး တး ဒူင် ကွယ် အုဝ်။ 9 ဆေ အန် ဘော ကာဂုဝ်း ပဲ ပီယမ် အုဝ်၊ ယေ ဒီ ခမ် ဒီ ဘဲန် မှာယ် ဘေ။ ဆေ အုဝ် ဘော ကာဂုဝ်း ပဲ ပီယမ် ဝီ တီ၊ ဘေ ဒီ လုဝ် ဘဲန် မှာယ် ယေ၊ ဝီ ဘူင် ပီ စ်ု ယေ။” 10 ပန် တီ ဒူအီ ဖီလီထီ တွိုန် ဝီ တဝ်း၊ “အာတိုဝ် နီ၊ ယေ မှာန့် ဒီ လာယ် တ ဒီ ဘေ။ တဲး ဘေ တဲး တး ဒူအီ အူ ဝီ ဒီ ယေ။ တဲး ယာယ် ပွိုန် ဒီ လာယ် ကာဂုဝ်း။” 11 အာဆောလူ ဘော ဒူအီ အီဆာရေလ ဂေ ဘော ယိုဝ် ဂြုဝ်း ဒူအီ ဖီလီထီ တီ၊ နဝ်း ဂေ ဘော လိုဝ်။ ဂေ ဘော ယုဝ် ကာဆဝ်။

12 အာဒါဝိတ် ယီ မုး ဂွန် ဒူအီ အာမျုဝ် အေဖာရာတ် အီ စိူဝ် အာယေဆေ၊ အီ ကွယ် ခဲင် မိူင် ဘေတ်လဲမ် ခဲင် ကာဒါယ် မိူင် ယူဒါ။ အာယေဆေ တီ၊ အန် မိုဝ်း ဂွန် အီမာယ် ဒါ ဝီ။ ဒေါ မုး စုဝ် ဘာန် အာဆောလူ တွိုန်၊ အာယေဆေ ဟဲ့ ကတ်၊ အာဆာက် အန် ဟဲ့ ကိူန်။ 13 ဂေ ဂွန် အီမာယ် အာယေဆေ တီ၊ အီ ဒီ တာင် အူယ် ဝီ၊ ဂေ ဘဲန် ဒါ ဆိုက် အီ ဒူပ် အာဆောလူ တွိုန်။ ဝီ တာင် အန် စိူဝ် အာအေလီအာပ်။ ဝီ ကာတဲ အန် စိူဝ် အာဖီနာဒါပ်။ ဝီ ဟာအူယ် အန် စိူဝ် အာဆာမာ။ 14 အာဒါဝိတ် တွိုန် ယီ မုး ဝါ တျီ့ ဆိူတ်။ အီ မုး ဂေ အူယ် ဝီ တီ၊ ဂေ ဒူပ် အာဆောလူ။ 15 အီ မုး အာဒါဝိတ် တွိုန်၊ အန် လုဝ် ဝေန့် ဟျီင် ဘော မာဘူ ဂုန့် အန် ဒီ မိူင် ဘေတ်လဲမ် တွိုန်။ ခုဝ်၊ အန် လုဝ် ဟာဝ် ဟာဝ်၊ တး တး ဒူင် ကွယ် အာဆောလူ တွိုန်။

16 ဒူအီ ဖီလီထီ ဝီ တွိုန်၊ အာဒါ ဖွုန် ဂိုဝ် ဆီငဲ၊ ဆိန့်ဝး အူ ဇေန့်၊ ဘာ ဒီ အပ် အူ ဇေန့်၊ အန် တး ချြီ့ ဂေ၊ ဘျ ဒုဝ် အန် ဒီ ဂေ။

17 ဒေါ အန် တီ အာယေဆေ ဘော ဒမ် ဂွန် အန် အီ စိူဝ် အာဒါဝိတ် တွိုန် တဝ်း၊ “နီ၊ တဲး မဲ ဒိုဝ်း ငှုဝ် မာတုး အူ အေဖာ၊^a တဲး မဲ ဒိုဝ်း ဘော ခါမုန် ဂိုဝ် ဒီက့လွုန်၊ တိုယ် ဒီ အီကတ် မဲ။ တဲး မဲ ဒိုဝ်း ဟာဝ် ပီခြန်၊ တဲး မဲ စေဝ် ဇမ် ဒူင် ကွယ် အီကတ် မဲ ဂေ တီ။ 18 ဘော အိုမ် ပူ မက် အီ ပြာင် ပ့လူမ် အာဒါ ဂိုဝ် ဒီက့လွုန် နီ၊ မဲ ဒိုဝ်း ဟာဝ် ဒွါ ဒီ ဘုဝ် တာင် အီ အိုပ် အူ ဟြဲန့် ဝီ တွိုန်။ မဲ ယွတ် အီကတ် မဲ၊ ယုဝ် ဂေ ဟဲ့ ကွယ် ဒါခိုယ်၊ ယုဝ် ဂေ မိုဝ်း ပီ ဒီ လုဝ်။ တဲး မဲ ဝီ တး ခဲ ဒီ အုဝ် လွင် ပီ ပါယ် ဂေ။ 19 ဒေါ တီ နီ ဂေ ကွယ် ရိုမ် ဒူပ် အာဆောလူ ဘော ဒူအီ အီဆာရေလ ဘောကာဂ့လျီတ်၊ ကာဂုဝ်း ဒီ ဒူအီ ဖီလီထီ။ ဂေ ကွယ် ဒူပ် ဒီလယ့် အေလာ တွိုန်။”

20 ဂုန့် အန် ဟဲ့ ဟွတ့် ကာလာင် ဂြုဝ်း တီ၊ အာဒါဝိတ် ဘော ယိတ့် ဆိန့်ဝး စေဝ် စေဝ်။ မာဘူ အန် အန် ဘော အာပ် ဒီ ဒူအီ အီ ဟျီင် နာ ပန်၊ ဘဲန် ဒါ အီ ယွတ် မဲန်။ အန် ဘော ဒိုဝ်း ကြုဝ် ပီ တဝ်း ဂုန့် အန် တွိုန် ဘော ဇမ် ဒူင် ဒီ လုဝ် လိုပ် ဟာဝ် အန် ဒေါ ဆီငျာ ယွတ် ဒါ ဆိုက် ဂေ တွိုန် ပီ ဒီ ပါယ် ဒပ် ဂေ။ ဂေ ဘော ဒတ် တဲး ဂေ ကာဂုဝ်း။ 21 ဒပ် ဒူအီ အီဆာရေလ ဘော ဒပ် ဒူအီ ဖီလီထီ ဘော ကွယ် ကာဆိူဝ်။ 22 အာဒါဝိတ် ဘော ဒိုဝ်း ပီ ဂူင့် တး အန်၊ အာပ် ဒွါ ဒီ ဒါ အီ ဘ်ု ကြုဝ် ဂေ တွိုန်။ ဟဲ့ ဟွတ့်၊ အန် ကာဘ့လဲပ် ဟာဝ် ကာတဲ ဆိုက် ဒူင် ကာဂုဝ်း ဂေ။ အန် ဘော ဂြုဝ်း ဒီ အီကတ် အန်။ 23 ဒေါ ကာလာင် အန် ဂြုဝ်း တီ၊ ဒါ ဆိုက် ဒူအီ ဖီလီထီ အီ စိူဝ် အာကောလာတ်၊ အီ တး မိူင် ဂါထ၊ အန် ဘော လေး တး ခဲင် ဒူင် ကွယ် ဒူအီ ဖီလီထီ။ အန် ကာလာင် ပီ တဝ်း အန် ဆီငဲ အာတ့် တွိုန်၊ တဲး ဘော အာဒါဝိတ် ယိုဝ် ဂြုဝ်း အန် တီ။ 24 ဒူအီ အီဆာရေလ ဟီ ယိုဝ် ဒူအီ ဝီ တီ၊ ဂေ ယုဝ် ကာဆဝ်။ ဝီ ကာဖြူမ် ဒီ တဝ်။

25 ဂေ ဒူအီ အီဆာရေလ လာယ် ကာမွုန် တဝ်း၊ “ဘေ ယိုဝ် ဝီ အီ လေး တး တွိုန်၊ အန် နဲန ဒူအီ အီဆာရေလ။ ဝီ မှဝ် အီ ပဲ ပီယမ် အန်၊ ခုန်ဒီခမ် ဒီ အာပ် ဒွါ ဂွန် အီဘိုန့် အန် အူ ဝီ။ ဘော ကြုဝ်ကြာမ် ကိူန် အီ ငဝ်း တာင်၊ အန် ဒီ ဒွါ။ ဘော ဝေါဝဲ၊ ဂုန့် မာ အန် အာဝ် လုဝ် ဟပ် ရွိုန် စိုင် ခဲင် မိူင် အီဆာရေလ နီ။”

26 အာဒါဝိတ် မိူဝ် ဒီမွှတ် ဂေ အီ ကွယ် ခူပ် အန် တဝ်း၊ “ဆေ န့ မိုဝ်း ဒူအီ အီ ပဲ ပီယမ် ဒူအီ ဖီလီထီ တီ၊ အီ ဒီ ဘူင် ကွဲ့ ဟူ တဲး ဂေ ကာလာင် ဂြုဝ်း အီ မွှိုမ် ကာညး ဒီ အေ၊ အန် ဒီ ပွိုန် အာဂျိုဝ် မာဆေ။း ဂေ မုး ဒူအီ ပီယေန့်၊ အီ တူ ခမ် ဒီ ဆွာ့ ဝဲန် ဟုန် လခါနာ။ အာဝ် ပွိုန် နဲန ဒါ ဆိုက် အေ ဘော ဇဝ်ဖြာ အီ အိုပ် အေ နီ။”

27 ဂေ ဝီ ကာလာင် ပီ ခါ အာတ့် တဝ်း၊ “ဝီ မှဝ် အီ ပဲ ပီယမ် ဒူအီ တွိုန်၊ အာဂျိုဝ် အန်၊ အန် ဒီ ပွိုန် ခဲ့ တဝ်း အေ တွိုန်။”

28 အာအေလီအာပ် အီ မုး အီကတ် တာင် အာဒါဝိတ်၊ အန် ဘော ယိုဝ် ဂြုဝ်း ပီ ကာမွုန် အာဒါဝိတ် ဒီ ဒါ ဆိုက် တွိုန်၊ အန် ဘော ရူ ကာဆဝ် ဒီ ဝါ အန် တဝ်း၊ “န့ ပါယ် မှဝ် မဲ လူင် တး ဒီ နီ။း မဲ တဲး အာဆေ ယွတ် မာဘူ အီ စဲက် ခဲင် ပြဲ တွိုန်။း အုဝ် ဟဲ့ နပ်၊ နဝ်း မဲ ပီခိုက်။ နဝ်း မဲ ဟဲ့ ဟာယ် ကာဆဝ်။ မဲ တး၊ ကူပ် ဆီ ယိုဝ် မဲ ဒူင် ကာဂုဝ်း အီ ဒီ နီ။”

29 အာဒါဝိတ် ဝီ တဝ်း၊ “အုဝ် ဟဲ့ ဘူင် မာဆေ ဒေါ တီ နီ။း အာဝ် ပွိုန် ကာမွုန် ဒီ အီ။း” 30 အန် ပီ ဝီ ဟာဝ် ညိူဝ် ပေါ အူ ဝီ၊ ဒီမွှတ် ပီ ခါ အာတ့် တွိုန်။ ဂေ မိူဝ် ပီ ဝီ ကာလာင် ပီ ခါ အာတ့် ဒီ အန်။ 31 ဒေါ ဝီ ယိုဝ် အီ ဟဝ် ဂြုဝ်း ပီ ကာလာင် အာဒါဝိတ် တွိုန်၊ ဂေ ဘော ဝီ ကာလာင် ဒီ အာဆောလူ။ အာဆောလူ ဘော ဝီ ဒဲ့ အာဒါဝိတ် တး ဒူင် ကွယ် အန်။

32 အာဒါဝိတ် ဘော ကာလာင် ဒီ အာဆောလူ တဝ်း၊ “ကွဲ့ တဲး အာဆေ မိုဝ်း နဝ်း လိုဝ် ကူပ် ဒူအီ ဝီ တီ။ အုဝ် အီ မုး ဒဲစေန့် မဲ၊ အုဝ် ဒီ ဟာဝ် ကာဂုဝ်း ဒီ ဒူအီ ဖီလီထီ တီ။”

33 အာဆောလူ ကာလာင် ဒီ အာဒါဝိတ် တဝ်း၊ “မဲ တူ ပွိုန် ဟာဝ် ကာဂုဝ်း ဒီ ဒူအီ ဖီလီထီ တီ။ မဲ ဆီ ဒီတဲတ်၊ မဲ ဆီ နှိုမ်။ ဒူအီ ဝီ တီ အန် ဟဲ့ ဘဲန် ဂိန့် ဆိုက် ဆိန့် ဒေါ နှိုမ် အန်။”

34 ပန် တီ အာဒါဝိတ် ဝီ ကာလာင် ဒီ အာဆောလူ တဝ်း၊ “ဒေါ ဟျီင် အုဝ် မာဘူ ဂုန့် အုဝ်၊ န့ ဟဲ့ ဒွိုမ် မိုဝ်း မာခြင်ဆီ ဂါယ် မာဂြေး တး ကဝ့် ကာပ် ဟာဝ် ဂွန် မာဘူ ဒီတဲတ် ခဲင် ဖိုင် အန်။ 35 အုဝ် ဘော ခုင်ခြး ဒူပ်၊ ငဝ်း ယမ် ဘော အာ ဒုဝ်။ အုဝ် ဝီ ဖာတ် ဒိုဝ်း မာဘူ ဒီ မူတ့် မာခြင်ဆီ ဂါယ် မာဂြေး တီ။ ဒေါ ဝီ ဒန့် ပ မာဂြေး တီ ဒီ အုဝ်၊ အုဝ် ဘော ဒိူတ် ဒီ မုဝ်း အန် ဘော မး တဲး အန် ကော ယမ်။ 36 အုဝ် နီ ဟဲ့ ငဝ်း မာခြင်ဆီ ဘော မာဂြေး၊ ဟဲ့ ယမ် အာ ဒုဝ် တီ။ ဒူအီ ဖီလီထီ အီ တူ ခမ် ဒီ ဆွာ့ ဝဲန် ဟုန် လခါနာ ဂေ တီ၊ အန် ဒီ ပီ ဒုဝ် ဆတ်ဒါဝါ တီ။ ခုဝ်၊ အန် ဟဲ့ နဲန ဒါ ဆိုက် ဘော ဇဝ်ဖြာ အေ အီ အိမ်။ 37 ဇဝ်ဖြာ ဟဲ့ စွယ် အုဝ်၊ ကွဲ့ တဲး မာခြင်ဆီ ပွိုန် ဒီ ဘုဝ့် အုဝ်၊ ကွဲ့ တဲး မာဂြေး ပွိုန် ဒီ ကြိး အုဝ်။ ဇဝ်ဖြာ ဒီ ဘော စွယ် အုဝ် ကွဲ့ တဲး ဒူအီ ဖီလီထီ ပွိုန် ဒီ ပါယ် မှဝ် ဒီ အုဝ်။” အန် ဟဲ့ ဟွတ့် တဝ်း ပါယ် တီ။ အာဆောလူ ဝီ တဝ်း ဒီ အန်၊ “အိုဝ်၊ တဲး မဲ ဟာဝ်။ တဲး ဇဝ်ဖြာ ကွယ် ရိုမ် ဒူပ် မဲ။”

38 အာဆောလူ ဘော ဒိုဝ်း ခြိုင် အန်၊ ဒွါ ဒီ အာဒါဝိတ် ဘော တဲး အန် စှိုပ် ဘော မာဂိန့် ဘွင့် ဘော ဆီတုဝ် ဟိန်။ 39 အာဒါဝိတ် ဘော ဒိုဝ်း မာပွါ့ လာင် အာဆောလူ၊ ပက် ဒိုက် ဒီ ခြိုင် ပီ တာ အန်။ အန် ဘော ထေဝ် ဒီ ဟာဝ်၊ ကူပ် ညှမ် ဒွိုမ် စှိုပ် အန် ခြိုင် ကာဂုဝ်း တီ။ ဟဲ့ ဟွတ့်၊ အာဒါဝိတ် ဝီ တဝ်း ဒီ အာဆောလူ၊ “အုဝ် တူ ပွိုန် ဂူင့် ဟာဝ် အာဇ နီ။ အုဝ် ညှမ် ဒွိုမ် တာ အာဇ နီ။” ဟဲ့ ဟွတ့်၊ အန် ဘော ဝီ ဘုတ့် အုန် တူတ့်။ 40 ပန် တီ အန် ဘော ဒိုဝ်း န့ကြွုန် အန်။ ဘော ထွန် မာဝ် အီ ဆီချာ ဖန် ဘူင့် ဒူပ် ဒီလယ့် ဘ့လဲင် တွိုန်၊ ဘော ဟပ် ခဲင် ဟူ ပီ ငဲ့ ဟာဝ် အန် ဒေါ ဟျီင် အန် မာဘူ တွိုန်။ အန် ဘော ဒိုဝ်း ဒီ ဂူင့် ဘော ဝန် မင် ဝိုန့် မာဝ် အန်၊ ဘော ဟာဝ် ချြီ့ ဒူအီ ဖီလီထီ တွိုန်။

41 ဒူအီ ဖီလီထီ တွိုန် ဘော ဒူအီ အီ ဂူင့် ခြိုင် ကာဂုဝ်း အန်၊ ဂါယ် ဟာဝ် ကွယ် နာ အာတ့် အန်။ ဂါယ် မိူဝ် ဘော တး ချြီ့ အာဒါဝိတ် တွိုန်။ 42 ဒေါ ယိုဝ် ဒူအီ ဖီလီထီ ဒီ အာဒါဝိတ်၊ အန် နဲန အာဒါဝိတ်။ အန် ယွတ်၊ ယီ ဆီ မုး ဂွန်။ ဟိုက် ဂိန့် အန် မိူဝ် ရေန့် ရေန့်။ ငါယ် ဂေ နာ အန် မိူဝ် စှိတ်။ 43 အန် ဘော တဝ်း၊ “မဲ ထာင် အုဝ် နီ မုး မာဆုဝ်၊ တဲး မဲ ဂူင့် န့ကြွုန် တး ညိူဝ် အုဝ်။း” ဒူအီ ဖီလီထီ တွိုန် ဘော ဂါဝ် ပွုန် ဇဝ်ဖြာ အန်၊ ဒိူင် ဘော အေး အာဒါဝိတ်။ 44 ပန် တီ အန် ကာလာင် ဒီ အာဒါဝိတ် တဝ်း၊ “တး ဒူင် ကွယ် အုဝ် ဒီ နီ။ အုဝ် ဒီ တဲး မာဆိမ် ခဲင် ဂါင်ဟြာဝ် ဘော မာဒုဝ် ပြဲ ဟူမ် ယင် မဲ။”

45 အာဒါဝိတ် ဝီ တဝ်း ဒီ ဒူအီ ဖီလီထီ တွိုန်၊ “မဲ တး ဂူင့် ဘော လျီး ဘော မာပွါ့ လာင် ဘော လျီး ဆတ်၊ တး ဒူင် ကွယ် အုဝ်။ မာလဲ အီ မုး အုဝ်၊ အုဝ် ဂူင့် မီ ပွုန် ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဒါ ဘုဝ် အီ အိုပ် ဒါ ဆိုက် ဒူအီ အီဆာရေလ။ အန် ဇဝ် တီ မုး အီ ပဲ့ ဟဲ့ နဲန မဲ။ 46 ဇဝ်ဖြာ တီ အန် ဒီ အာပ် မဲ ဒီ အုဝ် အာတိုဝ် နီ။ အုဝ် ဒီ ငဝ်း ယမ် မဲ ဘော ဒဲပ် ဝဲန် ဂိန့် မဲ။ အုဝ် ဒီ ဒိုဝ်း ဒုဝ် ယမ် ဒူအီ ဖီလီထီ တီ၊ ဒွါ ဒီ မာဆိမ် ခဲင် ဂါင်ဟြာဝ်။ ဘော မာဒုဝ် ပြဲ ဒီ ပွိုန် ဒီ ဟူမ် ယင် မဲ အာတိုဝ် နီ။ ပန် တီ ဒူအီ ဘောကာဂ့လျီတ် ဒီ ဘော နပ် လွင် ဇဝ်ဖြာ ကွယ် ရိုမ် ဒူပ် ဒူအီ အီဆာရေလ။ 47 ခဲ့ ကွယ် ဒူအီ ဘောကာဂ့လျီတ်၊ ဂေ ကော ဒီ နပ်၊ ဇဝ်ဖြာ တူ စွယ် တာ ပွါ့ ဂေ လျီး။ ခုဝ်၊ န့ မုး ဇဝ်ဖြာ အီ ဒီ ကာဂုဝ်း ဒီ ဘေ၊ အန် ဇဝ် ဒီ တဲး ယေ ပဲ ဘေ။”

48 ဒူအီ ဖီလီထီ တွိုန် ဘော ဝဲ တး ချြီ့ အာဒါဝိတ်၊ တဝ်း ဒီ ဒဲပ် အန်။ အာဒါဝိတ် ဘော ကာဘ့လဲပ် ပီခြန် အန် ဟာဝ် ညိူဝ် ဒူအီ ဖီလီထီ တွိုန်။ 49 အန် ဘော စူက် မာဝ် အူ ဘူင့် ခဲင် ဟူ ပီ ငဲ့ အန် တွိုန်၊ ဘော ဟ်ု ခဲင် ဝန် ပီ ဝိုန့် အန်၊ ဘော ဝိုန့် ဒီ ဒူအီ ဖီလီထီ အူ ဇေန့်၊ တဲး မာဝ် တွိုန် ဘော လဝ့် ကာတဝ်း အန်၊ တဲး အန် ဘော ကေး ဆာဂိုပ် ဒဲင် ကာဒါယ်။

50 ပါယ် တီ အာဒါဝိတ် ဟဲ့ ပဲ ဒူအီ ဖီလီထီ တာ ဝန် ပီ ဝိုန့် အန် ဂါယ် မာဝ် အူ ဘူင့် တွိုန်၊ ဘော လဝ့် ဒူအီ ဖီလီထီ တွိုန်၊ တဲး အန် ကော ယမ်။ အန် တူ မိုဝ်း ဒီ ကာဂုဝ်း တာ မာပွါ့ ဂေ ဘ့လာ လျီး။

51 ပန် တီ အာဒါဝိတ် ဘော ဟာဝ် ဒီ ဒူအီ ဖီလီထီ ဘော ထွတ် မာပွါ့ အန် ဒီ ဘြာမ် အန် ဘော ဒဲပ် ကာဒတ် ဂိန့် အန်။

ဒူအီ ဖီလီထီ ဂေ ဘော ယိုဝ်၊ ဒါ ဆိုက် အီ ဒွိုမ် အိုပ် ဂေ၊ အန် ဟဲ့ ဟွတ့် ယမ်၊ ဂေ ဘော ကာဖြူမ် ဒီ တဝ် အူ ဇေန့်။ 52 ပန် တီ ဒူအီ အီဆာရေလ ဘော ဒူအီ အာယူဒါ ဘောကာဂ့လျီတ်၊ ဂေ ဘော ယိတ့် ဒတ် ဆီနန် ဆီနိူင်၊ ဘော ကာဖြူမ် ဒီ ခုင်ခြး ညွန် ဒူအီ ဖီလီထီ ဂေ တွိုန်၊ တဲး ကော ဇမ် မိူင် ဂါထ ဘော မာလုဝ်း မိူင် အေခြူန်။ န့ ယီ မိုဝ်း ဒူအီ ဖီလီထီ အီ ဟဲ့ ကေး၊ ဟဲ့ ယမ်၊ ဂေ ကွယ် ဒူပ် န့တေန့် ဟာဝ် မိူင် ဆာရိမ်၊ ကော ဇမ် မိူင် ဂါထ ဘော မိူင် အေခြူန်။ 53 ဒူအီ အီဆာရေလ ဘော ဝီ တး ဒူင် ခုင်ခြး ဂေ ဒူအီ ဖီလီထီ တွိုန်၊ ဝီ တး ဖာတ် ဘော ဒူင် ချ ဂေ။ 54 အာဒါဝိတ် ဘော ဒိုဝ်း ဟာဝ် ဂိန့် ဒူအီ ဖီလီထီ တွိုန်၊ ဂူင့် ဟာဝ် ကော ဇမ် မိူင် ယေရူဆာလဲမ်။ အန် ဘော ဒိုဝ်း ဘော ခြိုင် ကာဂုဝ်း ဂေ၊ ဝီ အုန် ခဲင် ထိုပ် အန်။

55 ယီ မုး အာဆောလူ၊ ဒေါ ယိုဝ် အန် အာဒါဝိတ် ဟဲ့ ဟာဝ် ကာဂုဝ်း ဒီ ဒူအီ ဖီလီထီ တွိုန်၊ အန် ဘော ဒီမွှတ် ဒါ ဘုဝ် အန် အီ စိူဝ် အာဘာနာ တွိုန် တဝ်း၊ “အိုယ် အာဘာနာ၊ ဂွန် အီမာယ် နီ၊ အန် မုး ဂွန် အာဆေ။း” အာဘာနာ ဝီ တဝ်း၊ “မဲ ခုန်ဒီခမ်၊ ဟဲ့ မုး ဟဲ့ မှာန်၊ အုဝ် မိူဝ် တူ နပ်။”

56 ခုန်ဒီခမ် မိူဝ် ဝီ တဝ်း၊ “ဒီမွှတ် ဒီ ယွတ်၊ အန် မုး ဂွန် အာဆေ။”

57 ဒေါ ဝီ တး အာဒါဝိတ် ဒူင် ယမ် ဒူအီ ဖီလီထီ တွိုန်၊ အာဘာနာ ဘော ဒဲ့ အာဒါဝိတ်၊ တဲး အန် ဟာဝ် ဇမ် ဒူင် ကွယ် အာဆောလူ။ ဒေါ အန် တီ အန် ယီ ဆီ ဂူင့် ဘော ဂိန့် ဒူအီ ဖီလီထီ တွိုန်။

58 အာဆောလူ ဘော ဒီမွှတ် အာဒါဝိတ် တဝ်း၊ “အိုယ် ဂွန် အီမာယ်၊ မဲ မုး ဂွန် အာဆေ။း” အာဒါဝိတ် ဝီ ကာလာင် တဝ်း၊ “အုဝ် မုး ဂွန် အာယေဆေ၊ အီ ကွယ် ခဲင် မိူင် ဘေတ်လဲမ် တွိုန်။”