1 ပန် တီ ဇဝ်ဖြာ ဝီ ကာလာင် ဒီ အာဆာမူအေန် တဝ်း၊ “ဆိန့် ဒေါ ကာလာင် အုဝ် အာဆောလူ အာဝ် ဟူ ပွိုန် ဘဲန် ခုန်ဒီခမ်၊ နဝ်း မဲ တူ ဒါခိုယ်။ ဟဲ့ လှေန့်၊ မဲ က့လိုဝ် ပါယ် တီ။ တဲး မဲ စူ က့လိုဝ် ဒေါ တီ နီ၊ ဒိုဝ်း နာမန် မဲ၊ ဟပ် ခဲင် ကာပဝ်၊ ဟာဝ် ဒူင် တဝ်း အုဝ်။ အုဝ် ဆီ တဲး မဲ ဟာဝ် ဒူင် ကွယ် အာယေဆေ၊ အီ မုး ဒူအီ မိူင် ဘေတ်လဲမ် တွိုန်။ အုဝ် ဟဲ့ ရဝ်း ဂွန် အီမာယ် အန် အူ ဝီ တဲး အန် ဘဲန် ခုန်ဒီခမ်။”

2 အာဆာမူအေန် မိူဝ် ဝီ တဝ်း၊ “မှဝ် အုဝ် ဒီ ပါယ် ဒီ ဟာဝ်။း ဆေ အာဆောလူ ဟီ ယိုဝ် လွင် အန် တီ၊ အန် ဒီ ငဝ်း ယမ် အုဝ်။”

အန် ဟဲ့ ဟွတ့် တဝ်း ပါယ် တီ ဇဝ်ဖြာ ပီ ဝီ ကာလာင် တဝ်း၊ “မဲ ဒိုဝ်း ဟာဝ် ဘော ဂွန် မက် ဆိူဝ် ဘော တဝ်း၊ ‘အုဝ် တး တဲး အုဝ် ပွိုန် ဒီ လှူ ဒုဝ် တီ ဒီ ဇဝ်ဖြာ။’ 3 မဲ ဘာင် အာယေဆေ တီ၊ တဲး အန် တး ဒီ ဘ့လွယ် လှူ တီ။ ပန် တီ အုဝ် ဒီ နှဲ ပီ ဒီ ပါယ် ဒီ ဘူင် ဒီ မဲ။ မဲ ဒီ ပွိုန် ဒီ ဖဝ်း နာမန် ဒီ ဂိန့် ဝီ ပီ ကာလာင် အုဝ် ဒီ မဲ။”

4 အာဆာမူအေန် ဘော ဘူင် ပီ ကာလာင် ဇဝ်ဖြာ ဒီ အန်။ အန် ဘော ဟာဝ် ဒီ မိူင် ဘေတ်လဲမ် တွိုန်။ ပန် တီ ဂေ ဒါ တာင် ခဲင် မိူင် ဘေတ်လဲမ် တွိုန် ဘော ယုဝ် ကာဆဝ်၊ ဘော ဒီမွှတ် အန် တဝ်း၊ “မဲ ဆာရာ ဟဲ့ တး၊ တဲး န့ ဂျီတ် ယေန် ဂျာမ်ဆာ ဒီ ယေ။း”

5 အန် ဝီ တဝ်း၊ “အိုဝ်၊ ဟဲ့ ဂျီတ် ယေန် ဂျာမ်ဆာ။ အုဝ် တး တဲး အေ ပွိုန် ဒီ လှူ ဒုဝ် တီ ဒီ ဇဝ်ဖြာ။ တဲး ဘေ ရဲန် ဒွန် မျုဝ်၊ တဲး ဘေ ဆီငါ။ ဟဲ့ ဟွတ့်၊ တဲး ဘေ တး လိုပ် ဘ့လွယ် လှူ ဒူပ် အုဝ်။” အန် ဘော ဘာင် ဘော အာယေဆေ၊ ဘော ဂွန် အီမာယ် အန်၊ တဲး ဘော ဂေ ရဲန် ဒုဝ် ဂေ၊ တဲး န့ ဆီငါ ဒူပ် ပီ ဒမ် ဒါရာ၊ တဲး ဘော ဂေ တး လိုပ် ဘ့လွယ် လှူ တီ။

6 ဂေ ဘောကာဂ့လျီတ် ဘော တး ဇမ် ဒီ ဘ့လွယ် လှူ တီ၊ အာဆာမူအေန် ဘော ယိုဝ် အာအေလီအာပ်၊ အန် ကာဖာ တဝ်း၊ “ဟဲ့ မုး ဝီ နီ အာခ်ု မှာန်၊ ပီ တဝ်း ဇဝ်ဖြာ၊ တဲး အုဝ် ဖဝ်း နာမန် ဒီ ဂိန့် အန်။”

7 ဇဝ်ဖြာ ဝီ ကာလာင် ဒီ အာဆာမူအေန် တဝ်း၊ “အာဝ် လုဝ် ယွတ် အာရိုပ် အန် ဂေ နာ စာ အန်။ အုဝ် တူ လုဝ် ဝီ တီ။ ပီ ယိုဝ် ဇဝ်ဖြာ၊ အာဝ် ပီ ပီ ယိုဝ် ဒူအီ။ ဒူအီ ယွတ် မီ အာရိုပ်။ ဇဝ်ဖြာ ယွတ် ဘော နဝ်း။”

8 ပန် တီ အာယေဆေ တွိုန် ဘော ဒဲ့ အာဖီနာဒါပ်၊ တဲး အန် တး နာ အာတ့် အာဆာမူအေန် တွိုန်။ အာဆာမူအေန် ဝီ တဝ်း၊ “ဇဝ်ဖြာ တူ ရဝ်း ဒိုဝ်း ဝီ နီ။” 9 ပန် တီ အာယေဆေ ပီ ဝီ တဲး အာဆာမာ တး။ အာဆာမူအေန် ပီ ဝီ တဝ်း၊ “ဝီ နီ မိူဝ် ဇဝ်ဖြာ တူ ရဝ်း။” 10 ပန် တီ အာယေဆေ ဘော တဲး ဂွန် အီမာယ် အန် ဘူ ဝီ တွိုန် တး ဇမ် နာ အာတ့် အာဆာမူအေန်။ အာဆာမူအေန် ဝီ ကာလာင် ဒီ အန် တဝ်း၊ “ဂေ နီ မိူဝ်၊ ဇဝ်ဖြာ တူ ရဝ်း၊ တူ ဒိုဝ်း။” 11 အန် ဝီ ဒီမွှတ် အာယေဆေ တဝ်း၊ “ဂွန် အီမာယ် မဲ ဘောကာဂ့လျီတ် ဟဲ့ တး ကွယ် တူတ့် ဒီ နီ။း”

အာယေဆေ ဝီ တဝ်း၊ “န့ ဆီ မိုဝ်း ဝီ တျီ့။ ဝီ တီ၊ အန် ဟျီင် မာဘူ။”

အာဆာမူအေန် ဝီ တဝ်း။ “စ်ု ဒူအီ ဟာဝ် ဒဲ့ အန် တး။ ဆေ အန် တီ ညှမ် တး ဇမ်၊ အေ တူ ပွိုန် ဒီ လိုပ် ဘ့လွယ် နီ။”

12 အန် ဘော စ်ု အီ ဒဲ့ တး ဝီ တွိုန်။ အန် ဟဲ့ ဟွတ့် တး၊ ဟဲ့ ပွိုန် ယိုဝ် အာရိုပ် အန် မိူဝ်၊ န့ စှိတ်။ နာ အန် ဂေ ငါယ် အန်၊ န့ မွှိုမ် ရွက့်။ ဘော ဟိုက် ဂိန့် အန် ဟဲ့ ရေန့်။

ဇဝ်ဖြာ ဝီ တဝ်း၊ “မဲ ဖဝ်း နာမန် ဒီ ဂိန့် အန်။ ဟဲ့ မုး ဝီ နီ။”

13 အာဆာမူအေန် ဘော ဒိုဝ်း ကာပဝ် နာမန်၊ ဘော ဖဝ်း ဒီ ဂိန့် အန် တဲး ဂေ အီကတ် အန် ဘော ယိုဝ်။ ဆိန့် ဒေါ အန် တီ နဝ်း ဖွိုမ် ဇဝ်ဖြာ အီ မိုဝ်း ပွုန် တာင် ဘော တး ကွယ် ခဲင် နဝ်း အာဒါဝိတ်။ ဟဲ့ ဟွတ့် ပန် တီ အာဆာမူအေန် ဘော ဝီ ယိတ့် ဟာဝ် ဝေန့် ဒီ မိူင် ရာမာ။

14 အီ မုး အာဆောလူ တွိုန်၊ နဝ်း ဖွိုမ် ဇဝ်ဖြာ ဟဲ့ ဟွတ့် လေး ဒီ အန်။ ဇဝ်ဖြာ ယီ တဲး ကာနမ် ဟာယ် ဒွါ ဒုက် ဒီ နဝ်း အန်။

15 န့ ယီ မိုဝ်း မှာယ် အာဆောလူ ဝီ တဝ်း ဒီ အန်၊ “မဲ ယွတ်၊ ဇဝ်ဖြာ ဟဲ့ ဝီ တဲး ကာနမ် ဟာယ် ဒွါ ဒုက် ဒီ မဲ။ 16 တဲး မဲ ခုန်ဒီခမ် ကာလာင် ဒီ ဒဲစေန့် မဲ အီ လိုမ်လာ မဲ တွိုန်၊ တဲး ဂေ ဟြေတ့် ဝီ အီ နပ် ဒီ ဘး ဒိင် အီ မဲင် ဒါခိုယ်။ ဆေ ကာနမ် ဟာယ် တွိုန် ဝီ တး၊ တဲး အန် ဘး ဒိင် တီ၊ တဲး မဲ ဝီ ဒါခိုယ်။”

17 အာဆောလူ ဘော ကာလာင် ဒီ ဒဲစေန့် အန် တဝ်း၊ “ဘေ ဟြေတ့် ဝီ အီ နပ် ဒီ ဘး ဒိင် အီ မဲင် ဒါခိုယ်၊ ဝီ တိုယ် ဒီ အုဝ်။”

18 ဒဲစေန့် အန် အူ ဝီ တဝ်း၊ “အာယေဆေ အီ ကွယ် မိူင် ဘေတ်လဲမ် တွိုန်၊ အန် မိုဝ်း ဂွန် အူ ဝီ၊ အီ နပ် ဒီ ဘး ဒိင်။ အန် မိူဝ် ကျ၊ ယ ဘူင် ဒွန် မျုဝ်။ ကာဂုဝ်း ဒီ အီ မိူဝ်၊ အန် ကျ။ အာငျာန် အန် မိူဝ် ဘွတ်။ အာရိုပ် အန် မိူဝ် စှိတ်။ ဇဝ်ဖြာ မိူဝ် ကွယ် ရိုမ် ဒူပ် အန်။”

19 ပန် တီ အာဆောလူ ဘော စ်ု ဒူအီ အန် ဟာဝ် ဒူင် ကွယ် အာယေဆေ၊ တဲး ဂေ တဝ်း၊ “အုဝ် မှာန့် တဲး မဲ တိုယ် ဂွန် အီမာယ် မဲ အီ စိူဝ် အာဒါဝိတ်၊ အီ ဟျီင် မာဘူ တွိုန်၊ တဲး အန် တး ဒူင် ကွယ် အုဝ်။” 20 အာယေဆေ ဘော ဒိုဝ်း မာလာ အူ ဒုဝ်၊ ဒါင် ခါမုန် ဘော အိုမ် မာငုန် ဘော မာပဲ ဒီတဲတ် အူ ဒုဝ်၊ အာပ် ဒွါ ဒီ ဂွန် အန် အီ စိူဝ် အာဒါဝိတ်၊ တဲး အန် ဟာဝ် ဒူင် ကွယ် အာဆောလူ တွိုန်။

21 အာဒါဝိတ် ဟဲ့ ဟွတ့် ဇမ် ဒူင် ကွယ် အာဆောလူ၊ အာဆောလူ မိူဝ် ရွက့် ကာဆဝ် အန်၊ ဘော တဲး အန် ဝီ ဘဲန် ဒူအီ အီ ဂူင့် ခြိုင် ကာဂုဝ်း အန်။ 22 အာဆောလူ ဘော ဝီ စ်ု ဂေ ဟာဝ် ဒူင် ကွယ် အာယေဆေ တွိုန်၊ တဲး ဂေ တဝ်း ဒီ အန်၊ “ကူပ် အာဒါဝိတ် ဟဲ့ လဝ့် နဝ်း အုဝ်၊ အုဝ် မှာန့် တဲး မဲ တဲး အန် ကွယ် ဒူပ် အုဝ် ဒီ နီ။”

23 ဒွန် ဇေန့် ဒွန် ဇေန့်၊ ဆေ ကာနမ် ဟာယ် ပီ တိုယ် ဇဝ်ဖြာ ဝီ တး ဒီ အာဆောလူ တွိုန်၊ အာဒါဝိတ် ဘော ဒိုဝ်း ဒိင် အန်၊ ဝီ ဘး။ ပန် တီ အာဆောလူ ဘော ဒါခိုယ်၊ ဘော ဝီ ကဲန်။ ကာနမ် အီ တူ မွှိုမ် တွိုန် ဘော ဝီ လေး ဟာဝ် တဝ် တ အန်။