ပန် တီ အာဆာမူအေန် ဘော ကာလာင် ဒီ အာဆောလူ တဝ်း၊ “ဇဝ်ဖြာ ဟဲ့ စ်ု အုဝ် တဲး အုဝ် ဖဝ်း နာမန် ဒီ ဂိန့် မဲ၊ တဲး မဲ ဘဲန် ခုန်ဒီခမ် အီ အိုပ် ဒူအီ အီဆာရေလ၊ တဲး မဲ အိုပ် ဂေ ဒူအီ ပီ ရဝ်း ဇဝ်ဖြာ။ ဒေါ တီ နီ၊ တဲး မဲ ထူမ် ဂြုဝ်း ဇဝ်ဖြာ။ 2 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ တဝ်း၊ ‘အုဝ် ဟဲ့ နုဝ် ပီ ဘူင် ဂေ ဒူအီ အာမာလေက် ဒီ ဒူအီ အီဆာရေလ။ ဒေါ လေး ဂေ ခဲင် မိူင် အဲဂိုပ် ဂေ ဒူအီ အာမာလေက် ဟဲ့ ရဲ န့တေန့် ဒူအီ အီဆာရေလ။ 3 ဒေါ တီ နီ၊ တဲး ဘေ ကာဂုဝ်း ပျာတ့် ဝဲန် ဒူအီ အာမာလေက် တီ။ အာဝ် လုဝ် ကာဝေ မာဆေ။ ပျာတ့် ဝဲန် တူတ့် ဒွန် မျုဝ်။ ခဲ့ ပီ မိုဝ်း ဂေ၊ ဘော ဂွန် အီ ဆီ ပူ မိူဝ်၊ ငဝ်း တူတ့်။ ဘော မာဘူ၊ မာမက်၊ မ့ပြွင့် ကာဟာတ့် ဘော မာလာ ဂေ ဒွန် မျုဝ် လုဝ် ငဝ်း ဝဲန် တူတ့်။’”

4 အာဆာမူအေန် ဟဲ့ ဟွတ့် တဝ်း ပါယ် တီ၊ အာဆောလူ ဘော ဒဲ့ ကာဇု ဒူအီ ဂေ တွိုန် ဘော ရဝ်း ဒူအီ အီ ဒီ ဘဲန် ဒါ ဆိုက် အန်။ ဒေါ ကွယ် အန် ဒီ မိူင် တဲလိမ် တွိုန်၊ အန် ရဝ်း ဒါ ဆိုက် အန် တီ။ န့ မုး ဒါ ဆိုက် အီ ဟာဝ် ဒီ ပ့လဝ် အာဒါ အာ ဆဲန် ဝီ ဘော ဒါ ဆိုက် ဒူအီ အာယူဒါ အူ မှိုန့် ဝီ။ 5 အာဆောလူ ဘော ဟာဝ် ဒီ မိူင် အာမာလေက် တွိုန်။ ဂေ ဘော ချြီင် ဂေ ခဲင် ရူင် ဒူပ် နွန်၊ ဘ်ု ဒီ ငဝ်း ဒူအီ အာမာလေက် တွိုန်။ 6 အာဆောလူ ဘော ကာလာင် ဒီ ဒူအီ ခေနိတ် အီ ကွယ် ရိုမ် ဒူပ် ဒူအီ အာမာလေက်။ အန် တဝ်း၊ “ကူပ် ဟဲ့ ဒွိုမ် ဘူင် ဘေ နာ မွှိုမ် ဒီ ဒူအီ အီဆာရေလ ဒေါ လေး ဂေ ခဲင် မိူင် အဲဂိုပ် တွိုန်၊ ဒေါ တီ နီ အုဝ် တဝ်း ဒီ ဘေ၊ တဲး ဘေ လေး ဟာဝ် တ ဒူင် ကွယ် ဂေ ဒူအီ အာမာလေက် တီ။ အုဝ် ယုဝ် အုဝ် ပျာတ့် ဘော ဘေ ဒူပ် ဒူအီ ဂေ တီ။” ပါယ် တီ ဂေ ဒူအီ အာကီနီ တွိုန် ဘော လေး တ ဒူင် ကွယ် ဒူအီ အာမာလေက်။

7 အာဆောလူ ဘော ကာဂုဝ်း ပျာတ့် ဂေ ဒူအီ အာမာလေက်၊ စုး ဒီ မိူင် ဟာဝီလ၊ ဟာဝ် ဇမ် ဒီ န့တေန့် အီ ဟာဝ် ဒီ မိူင် ဆူရာ၊ အီ လာယ် ကာဆိူဝ် ဒီ မိူင် အဲဂိုပ် တွိုန်။ 8 အန် ဘော မှေတ့် ဒုဝ် အိမ် ခုန်ဒီခမ် အာကာတ် အီ အိုပ် ဒူအီ အာမာလေက် ဂေ တွိုန်။ အန် ဘော ငဝ်း ဝဲန် တူတ့် ဂေ၊ တာ မာပွါ့ လာင် အန်။ 9 မာလဲ၊ အာဆောလူ ဘော ဂေ ဒူအီ အန်၊ ဂေ ကာဝေ ခုန်ဒီခမ် အာကာတ် တွိုန်။ ဘော ဒုဝ် ဆတ်ဒါဝါ ဂေ အီ ဂ့လန့်၊ ဘော မာဘူ၊ မာမက်၊ မာဘူ ဒီတဲတ် ဒုဝ် အီ စှိတ် ဂေ တူ ငဝ်း ဝဲန် တဲး န့ တူတ့်။ အီ တူ စှိတ် အီ စီစိဝ်၊ အီ စှေ၊ ဂေ ယီ ငဝ်း ဝဲန် ကော တူတ့်။

10 ပန် တီ ဇဝ်ဖြာ တး ဇမ် ဒူင် ကွယ် အာဆာမူအေန် တွိုန် တဝ်း၊ 11 “အုဝ် ဝီ လှုဝ်း၊ အုဝ် ဟဲ့ ကာလိုပ် ဒီ တဲး အာဆောလူ ဘဲန် ခုန်ဒီခမ်။ အန် ဟဲ့ ဝး အုဝ်၊ အာဝ် ဟူ ဒူပ် ပီ တဝ်း အုဝ်။” ပန် တီ အာဆာမူအေန် ဘော က့လိုဝ် ကာဆဝ်၊ ဘော ဆာခိုဝ် ဒီ ဇဝ်ဖြာ ဒွင် ခိူန်။

12 ဆိန့်ဝး စေဝ် အာဆာမူအေန် ဘော ယိတ့် တဲး အန် ပွိုန် ဒီ ဟာဝ် ကာတုန့် အာဆောလူ ဒူပ် န့တေန့် တွိုန်။ အန် ယီ တူ တး။ အီ ဟဝ် ဝီ တဝ်း “အာဆောလူ ဟဲ့ ဟွတ့် ဟုဝ့် ဒီ နွန် ဂါမေလ၊ ဟဲ့ ဟွတ့် ဆမ် ရွင့်၊ တဲး အီ နပ်၊ အန် ဟဲ့ ဟွတ့် ပဲ၊ တဲး အီ ဝီ အိူပ် အန်။ ပန် တီ အန် ဒီ ဝီ ဝေန့် ဒီ မိူင် ဂီလဂါ တွိုန်။”

13 ဝါယ် အန် တီ အာဆာမူအေန် ဘော ဟာဝ် ဒူင် ကွယ် အာဆောလူ။ အာဆောလူ ဝီ တဝ်း ဒီ အန်၊ “တဲး ဇဝ်ဖြာ မွင့်ကာရာ တဲး ဒီ မဲ။ အုဝ် ဟဲ့ ဘူင် ဒူပ် ခဲ့ ပီ တဝ်း ဇဝ်ဖြာ ဒီ အုဝ်။”

14 အာဆာမူအေန် ဘော ဒီမွှတ် အန် တဝ်း၊ “ဆေ န့ ပါယ် တီ၊ ဟမ် မာဘူ အီ ပွိုန် ယိုဝ် ဘော ဟမ် မ့ပေါ မက် ပီ ယိုဝ် အုဝ် နီ၊ န့ မုး မာဆေ။း”

15 အာဆောလူ မိူဝ် ဝီ တဝ်း၊ “ဂေ ဟဲ့ ဒိုဝ်း တး ကြုဝ် ဒူအီ အာမာလေက် ဇိုဝ် တီ။ ဂေ ဝီ ကာဝေ မာဘူ ဂေ မာမက် အီ မုး ဒုဝ် အီ စှိတ် လွှိုမ် ဒုဝ် ဟဝ်။ ဂေ ဒီ တဲး န့ ဘဲန် ပီ ဒီ လှူ ဒီ ဇဝ်ဖြာ၊ အီ မုး ဇဝ်ဖြာ ပီ ကြိုပ် မဲ။ ဒဲင် တီ၊ ဂေ ဟဲ့ ဟွတ့် ငဝ်း ဝဲန် တူတ့်၊ အာဝ် ဟူ မိုဝ်း မာဆေ။”

16 အာဆာမူအေန် ဘော ကာလာင် ဒီ အာဆောလူ တဝ်း၊ “မဲ ထူမ်၊ အုဝ် ဒီ ကာလာင် ဂြုဝ်း ပီ တဝ်း ဇဝ်ဖြာ ဒီ အုဝ် ဟူ မွိုန် နီ။” အာဆောလူ ဝီ တဝ်း၊ “အိုဝ်၊ တဲး မဲ ကာလာင်။”

17 အာဆာမူအေန် မိူဝ် တဝ်း၊ “ခါ အာတ့် မဲ ဟဲ့ ထာင်၊ မဲ မုး ခြိုဝ် ဒူအီ ပြေတ့်။ မဲ ယီ ဝီ ဘဲန် ဂိန့် အီ ယဲတ့် ဒူအီ အီဆာရေလ။ ဇဝ်ဖြာ ဟဲ့ စ်ု အုဝ် ဖဝ်း နာမန် ဒီ ဂိန့် မဲ တဲး မဲ ဝီ ဘဲန် ခုန်ဒီခမ် အီ အိုပ် ဒူအီ အီဆာရေလ။ 18 ဇဝ်ဖြာ ဟဲ့ စ်ု မဲ ဟာဝ် ပေါ ပ့လုဝ့်၊ ဟဲ့ ကာလာင် တဝ်း၊ ‘ဟာဝ် ငဝ်း ဒူအီ အာမာလေက် အီ မိုဝ်း မှာပ် ကိူန် ကာဆဝ် တွိုန်။ တဲး မဲ ကာဂုဝ်း ငဝ်း ဂေ။ ပျာတ့် ဝဲန် တဲး ဂေ ကော စှိုမ် လိုဝ် ဟြာယ် တူတ့်။’ 19 ခုဝ်၊ န့ ပါယ် မှဝ် မဲ တူ ထူမ် ပီ တဝ်း ဇဝ်ဖြာ။း မဲ ဝီ ဒိုဝ်း တး ကြုဝ်ကြာမ် ရန်ဆူ တီ၊ တဲး န့ ဝီ ဘဲန် မှာပ် ဒီ အာတ့် ဇဝ်ဖြာ။”

20 အာဆောလူ ဝီ ကာလာင် ဒီ အာဆာမူအေန် တဝ်း၊ “အုဝ် ဟဲ့ ဟွတ့် ထူမ် ပီ တဝ်း ဇဝ်ဖြာ အာခ်ု မှာန်။ အုဝ် ဟဲ့ ဒူပ် န့တေန့် ပီ စ်ု ဇဝ်ဖြာ အုဝ် ဟာဝ်။ အုဝ် ဘော ဒိုဝ်း တး ခုန်ဒီခမ် အာကာတ်၊ အီ အိုပ် ဒူအီ အာမာလေက် တီ။ ဒဲင် တီ အုဝ် ဟဲ့ ဟွတ့် ငဝ်း ဝဲန် တူတ့် တူတ့်။ 21 မာလဲ၊ ဒါ ဆိုက် အုဝ် ဘော ဝီ ဒိုဝ်း မာဘူ ဂေ မာမက် ဒုဝ် အီ စှိတ် လွှိုမ် ဒုဝ် ဟဝ် အီ လုဝ် ငဝ်း ဝဲန် တီ။ ဂေ ဘော တဝ်း ဒီ တဲး န့ ဘဲန် ပီ ဒီ လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ ခဲင် မိူင် ဂီလဂါ တွိုန်။”

22 အာဆာမူအေန် ဝီ တဝ်း၊ “မဲ ထာင် ဇဝ်ဖြာ အိုင်၊ ဆေ ဘေ လှူ ဒုဝ် ဆတ်ဒါဝါ အီ ဒုဝ့် ကာဆိုမ် ဘော ပီ ဒီ လှူ ဘဲန် မျုဝ် ဘဲန် မျုဝ် တီ လွှိုမ် ဘေ ထူမ် ဂြုဝ်း အန်။း အာဝ် မုး ပါယ် တီ။ ဆေ ဘေ ဟဲ့ ဒူပ် ပီ အိုင် ဇဝ်ဖြာ၊ န့ မွှိုမ် လွှိုမ် ပီ လှူ ဘေ တီ။ ဆေ ဘေ ထူမ် ဂြုဝ်း အန်၊ န့ မွှိုမ် လွှိုမ် ဘျြီင် မာဘူ အာလူင့် တီ။ 23 န့ ပါယ် တီ။ အာဆေ ကာခဲန့် ဒီ ဇဝ်ဖြာ၊ န့ ပီ အန် ဘူင် အာဒါတ်။ အာဆေ ဘော မိုဝ်း နဝ်း ဒိူဝ်၊ န့ ပီ အန် ဘူင် မှာပ် အီ ဟာယ် ကာဆဝ် ဘော ကြိုပ် အာရိုပ်။ ကူပ် ဟဲ့ ဝဲန် မဲ ဂြုဝ်း ဇဝ်ဖြာ၊ ဇဝ်ဖြာ မိူဝ် ဒီ ဘ့လွာ့ လေး မဲ၊ တူ တဲး မဲ ဘဲန် ခုန်ဒီခမ်။”

24 အာဆာမူအေန် ဟဲ့ ဟွတ့် ကာလာင် ဂြုဝ်း တီ၊ အာဆောလူ ဘော ဝီ တဝ်း၊ “အုဝ် ဟဲ့ ဟွတ့် ဘူင် မှာပ်။ အုဝ် ဟဲ့ ဟွတ့် လှိုဝ် ပီ တဝ်း ဇဝ်ဖြာ။ ဘော ဂြုဝ်း မဲ အုဝ် ဟဲ့ ဝဲန်။ ကူပ် ယုဝ် အုဝ် ဂေ ဒူအီ ကိူန်၊ အုဝ် ဟဲ့ ဝီ ခ့ဝါင် ဂေ ဘူင် ပီ အိုင် ဂေ။ 25 ဒေါ တီ နီ၊ အုဝ် မှာန့်၊ တဲး မဲ ဂဝ်း ဝဲန် မှာပ် အုဝ်။ မှာန့်၊ တဲး မဲ ဟာဝ် ဒူပ် အုဝ်၊ တဲး အုဝ် ဝီ ပွိုန် ဒီ ကြိုပ် ဆာခိုဝ် ဒီ ဇဝ်ဖြာ။”

26 အာဆာမူအေန် ဝီ ကာလာင် ဒီ အာဆောလူ တဝ်း၊ “အုဝ် အာဝ် ဟူ ဟာဝ် ဒူပ် မဲ။ ခုဝ်၊ မဲ ဟဲ့ ဝဲန် ဂြုဝ်း ဇဝ်ဖြာ၊ ဇဝ်ဖြာ မိူဝ် ဒီ ဒိုဝ်း ဝဲန် ပွုန် မဲ အီ တဲး မဲ ဘဲန် ခုန်ဒီခမ်။”

27 ဒေါ ဝီ ကာဘတ် အာဆာမူအေန် တဝ်း ဒီ ဟာဝ်၊ အာဆောလူ ဘော ပါ ဒိူတ် ဘြုဝ် ဆီတုဝ် အာဆာမူအေန် တွိုန်၊ တဲး န့ ကော ကာယာတ့်။ 28 အာဆာမူအေန် ဘော ဝီ တဝ်း ဒီ အန်၊ “အာတိုဝ် နီ ဇဝ်ဖြာ ဟဲ့ ဒိုဝ်း မိူင် ဒူအီ အီဆာရေလ လေး တ မဲ၊ ကွဲ့ ဟူ တဲး မဲ အိုပ်။ အန် ဟဲ့ ဝီ ဒွါ မိူင် တီ ဒီ ဒူအီ အူ ဝီ အီ ကွယ် ခူပ် မဲ၊ အီ မွှိုမ် လွှိုမ် မဲ။ 29 ဇဝ်ဖြာ အီ တဲး ပ့လူမ် တဲး ဟဲန့် ဒီ ဒူအီ အီဆာရေလ၊ အန် တူ နပ် ဒီ ကာလုဝ်။ အန် တူ နပ် ဒီ ကာပ့လု နဝ်း။ ခုဝ်၊ ဇဝ်ဖြာ တူ မုး အာမျုဝ် ဒူအီ အီ နပ် ဒီ ကာပ့လု နဝ်း။”

30 ပန် တီ အာဆောလူ ဘော ဝီ တဝ်း၊ “အုဝ် ဟဲ့ ဟွတ့် လုတ့်။ ဒေါ တီ နီ၊ အုဝ် ယီ မှာန့်၊ တဲး မဲ ဝီ တး ဒူပ် အုဝ်။ တဲး အုဝ် ပွိုန် ဒီ ဝီ ကြိုပ် ဇဝ်ဖြာ အီ မုး ဇဝ်ဖြာ ပီ ကြိုပ် မဲ တီ။ ပါယ် တီ တဲး မဲ စွယ် အုဝ် မိုဝ်း ဆာရေ ဒီ အာတ့် ဂေ အီ ဘဲန် ဒါ တာင်၊ ဂေ အီ ယဲတ့် ဒူအီ အုဝ် ဘော ဒီ အာတ့် ဂေ ဒူအီ အီဆာရေလ။” 31 အာဆာမူအေန် ဘော ဝီ ဒူပ် တး ဒီ ပန် အာဆောလူ၊ တဲး အန် ဝီ ပွိုန် ဒီ ကြိုပ် ဇဝ်ဖြာ။

32 ပန် တီ အာဆာမူအေန် ဝီ တဝ်း၊ “ဒဲ့ ခုန်ဒီခမ် အာကာတ် အီ အိုပ် ဒူအီ အာမာလေက် တွိုန်၊ တဲး အန် တး ဒူင် ကွယ် အုဝ်။”

ခုန်ဒီခမ် အာကာတ် တွိုန် မိူဝ် ဘော ဇွန်ဇူမ် ဘော ခူယ် ဒီ တး။ အန် ထာင် ခဲင် နဝ်း အန်၊ “အုဝ် ဟဲ့ ဟွတ့် လွတ် ယမ်၊ အာခ်ု မှာန်။ အာဝ် ဟူ လုဝ် ယုဝ် ဒီ ယမ်။”

33 အာဆာမူအေန် ဝီ တဝ်း၊ “မာပွါ့ လာင် မဲ ဟဲ့ ဘူင် တဲး အီဘိုန့် စှိုမ် ဂွန် ဂေ။ ပါယ် တီ ဘော မာ မဲ ဒီ ဝီ စှိုမ် ဂွန် အန်။” အန် ဟဲ့ ဟွတ့် တဝ်း ပါယ် တီ၊ အန် ဘော ငဝ်း ယမ် ခုန်ဒီခမ် အာကာတ် တွိုန်။ အန် ဘူင် ပါယ် တီ ဒီ ဒူင် ကြိုပ် ဂေ ဇဝ်ဖြာ ဒီ မိူင် ဂီလဂါ တွိုန်။

34 ပန် တီ အာဆာမူအေန် ဘော ဝီ ဟာဝ် ဒီ မိူင် ရာမာ။ အာဆောလူ မိူဝ် ဘော ဝီ ဝေန့် ဒီ မိူင် ဂီဘီယာ အီ မုး ဒူင် ကွယ် အန်။ 35 ဝါယ် အန် တီ အာဆာမူအေန် အာဝ် ဟူ တး စ်ု၊ တး ယွတ် အာဆောလူ ကော ဇမ် ပန် ယမ် အန်။ မာလဲ၊ အာဆာမူအေန် ယီ ဘဲန် နဝ်း က့လိုဝ် ကူပ် အာဆောလူ တွိုန်။ ဘော ဇဝ်ဖြာ အာဝ် ဒါခိုယ် ကူပ် ဟဲ့ တဲး အန် အာဆောလူ ဘဲန် ခုန်ဒီခမ်။