1 ဝါယ် အန် တီ န့ ဟဲ့ ကာတတ် ဒီ ဇမ် ခြာဝ် ဒီ ဒိုဝ်း ဇဝ်ဖြာ အာအေလီယာ၊ တဲး အန် ဟုဝ့် ဒူပ် ခုန် ခဲင် ဂါင်ဟြာဝ်။ အာအေလီယာ ဂါယ် အာအေလီဆာ ကာဒူပ် ဟာဝ် လေး ဒီ မိူင် ဂီလဂါ။ 2 အာအေလီယာ ကာလာင် ဒီ အာအေလီဆာ တဝ်း၊ “တဲး မဲ ဂိူတ် ကွယ် ဒီ နီ။ ဇဝ်ဖြာ ဟဲ့ စ်ု အုဝ် ဟာဝ် ဒီ မိူင် ဘေဒါအေန်။” အာအေလီဆာ ပီ ဝီ တဝ်း၊ “ဇဝ်ဖြာ ဟဲ့ မုး ဟဲ့ မှာန်။ ဘော မဲ ညှမ် ယမ်၊ ဟဲ့ မှာန်။ ပါယ် တီ ဘော ဂြုဝ်း အုဝ် ဟဲ့ မှာန်။ အုဝ် တူ ပွိုန် ကာဂဝ်း ဒီ မဲ။” ပန် တီ ဂါယ် ဘော ကာဒူပ် ဟာဝ် ဒီ မိူင် ဘေဒါအေန်။

3 ဂေ ဒူအီ အီ ဘျာန် ဂြုဝ်း ဇဝ်ဖြာ ခဲင် မိူင် ဘေဒါအေန် တွိုန် ဘော ကာဖြူမ် ဒီ ဟာဝ် ရွုး အာအေလီဆာ၊ ဒီမွှတ် အန် တဝ်း၊ “မဲ နပ်၊ ဇဝ်ဖြာ ဒီ ဒိုဝ်း ဒါ ဆာရာ မဲ ကာဂဝ်း ဒီ မဲ အာတိုဝ် နီ။း” အန် ဝီ တဝ်း၊ “အိုဝ်၊ ဟဲ့ မှာန်။ အုဝ် ဟဲ့ နပ်။ တဲး န့ ယေန် ပါယ် တီ။”

4 ပန် တီ အာအေလီယာ ဝီ ကာလာင် ဒီ အန် တဝ်း၊ “အိုယ် အာအေလီဆာ၊ မဲ ဂိူတ် ကွယ် ဒီ နီ။ ဇဝ်ဖြာ ဟဲ့ ဝီ စ်ု အုဝ် ဟာဝ် ဒီ မိူင် ယေရီခုဝ်။” အန် ပီ ဝီ တဝ်း၊ “ဇဝ်ဖြာ ဟဲ့ မုး ဟဲ့ မှာန်။ ဘော မဲ ဆီ အိမ်၊ ဟဲ့ မုး ဟဲ့ မှာန်။ ပါယ် တီ ဘော ဂြုဝ်း အုဝ် ဟဲ့ မုး ဟဲ့ မှာန်။ အုဝ် တူ ကာဂဝ်း ဒီ မဲ ဆာရာ။” ဂါယ် တွိုန် ဘော ဝီ ကာဒူပ် ဟာဝ် ဒီ မိူင် ယေရီခုဝ်။

5 ဂေ ဒူအီ အီ ဘျာန် ဂြုဝ်း ဇဝ်ဖြာ ခဲင် မိူင် ယေရီခုဝ် တွိုန် ဘော တး ဒီမွှတ် အာအေလီဆာ တဝ်း၊ “မဲ နပ်၊ ဇဝ်ဖြာ ဒီ ဒိုဝ်း ဒါ ဆာရာ မဲ၊ တဲး အန် ကာဂဝ်း ဒီ မဲ အာတိုဝ် နီ။း” အန် ဝီ တဝ်း၊ “အိုဝ် ဟဲ့ မှာန်၊ အုဝ် ဟဲ့ နပ်။ တဲး န့ ယေန် ပါယ် တီ။”

6 အာအေလီယာ ပီ ဝီ ကာလာင် ဒီ အန် တဝ်း၊ “မဲ ဂိူတ် ကွယ် ဒီ နီ၊ ဇဝ်ဖြာ ဟဲ့ စ်ု အုဝ် ဟာဝ် ဒီ ဘ့လဲင် အိုမ် ယောဒါန် တွိုန်။” အန် ပီ ဝီ တဝ်း၊ “ဇဝ်ဖြာ ဟဲ့ မုး ဟဲ့ မှာန်။ ဘော မဲ ဆီ အိမ်၊ ဟဲ့ မုး ဟဲ့ မှာန်။ ပါယ် တီ ဘော ဂြုဝ်း အုဝ် ဟဲ့ မှာန်။ အုဝ် တူ ကာဂဝ်း ဒီ မဲ ဆာရာ။” ဟဲ့ ဟွတ့်၊ ဂါယ် ပီ ဝီ ကာဒူပ် ဟာဝ်။

7 ဂေ ဒူအီ အီ ဘျာန် ဂြုဝ်း ဇဝ်ဖြာ ဖန် ဂိုဝ် ဝီ ကာဖြူမ် ဒီ ဟာဝ် စွင့် ယွတ်၊ တဲး န့ ရာမ် ကာတူင့်။ ဂါယ် ဒါ ဆာရာ ဘော စွင့် ခူပ် ဘ့လဲင် အိုမ် ယောဒါန် တီ။

8 အာအေလီယာ ဘော ဒိုဝ်း ဟိုပ် အန် ဘန်၊ ဘော မး လူင် ခဲင် အိုမ် တီ။ အိုမ် ဘော ကာယဝ်း ဘဲန် အာ ဘ့လာက်။ ဂါယ် ဘော ပွိုန် ဒီ ကာလုဝ်း ဟာဝ် ဒဲင် ကာဒါယ် ဟေန့်။

9 ဒေါ ဟဲ့ ဟွတ့် ကာလုဝ်း ဂါယ် ဘ့လဲင် အိုမ် တွိုန်၊ အာအေလီယာ ကာလာင် ဒီ အာအေလီဆာ တဝ်း၊ “ဆေ မဲ ဆီ မှာန့် ဒီ အုဝ် ဟဲ့ ပွိုန်။ အာတ့် ကာဂဝ်း အုဝ် ဒီ မဲ၊ အုဝ် ဒီ ဒွါ။” အာအေလီဆာ ဝီ မှာန့် တဝ်း၊ “တဲး နဝ်း ဖွိုမ် မဲ ဆာရာ တီ ကွယ် ခဲင် နဝ်း အုဝ် အာ ဘုန်။”

10 အာအေလီယာ ဝီ တဝ်း၊ “ပီ မှာန့် မဲ တီ န့ ညှာပ် ကာဆဝ်။ မာလဲ၊ ဆေ မဲ ဟီ ယိုဝ် ဒေါ ဟာဝ် အုဝ် တ မဲ၊ မဲ ဒီ ပွိုန်။ ဆေ အာဝ် ပါယ် တီ၊ မဲ တူ ပွိုန်။”

11 ဒေါ လာယ် ကာမွုန် ဂါယ် ဟာဝ် ဒူပ် န့တေန့် တီ၊ န့ ဘော မိုဝ်း လက်လဝ် ပီ ငဝ်၊ ဘော မ့ပြွင့် ပီ ငဝ် တး ကာပ့လုး ဘော ဒိုဝ်း အာအေလီယာ၊ တဲး ဂါယ် လာယ် ကာဂဝ်း။ အာအေလီယာ တွိုန် ဘော ဟုဝ့် ဒူပ် ခုန် ခဲင် ဂါင်ဟြာဝ်။ 12 အာအေလီဆာ တွိုန် ဘော ယိုဝ် ဟဲ့ ပါယ် တီ အန် ဘော ဒဲ့ တဝ်း၊ “အိုယ် ဂုန့် အုဝ်၊ အိုယ် ဂုန့် အုဝ်။ အုဝ် ဘော ယိုဝ် လက်လဝ် ဘော မ့ပြွင့် ဒူအီ အီဆာရေလ။” ဝါယ် တီ၊ အန် မိူဝ် အာဝ် ဟူ ပွိုန် ဒီ ယိုဝ် အာအေလီယာ တွိုန်။ အန် ဘော ဘုတ့် ဝဲန် ဆီတုဝ် အန်၊ ကာယာတ့် တူတ့်။

13 အန် ဘော ဒိုဝ်း ကန် ဟိုပ် အာအေလီယာ အီ ဟဲ့ စုဝ်း တွိုန်။ ပန် တီ အန် ဝီ ဟာဝ် ဒီ ခူပ် ဘ့လဲင် အိုမ် ယောဒါန် တွိုန်။

14 အန် ဘော ဒိုဝ်း ဟိုပ် ပီ ဒွါ အာအေလီယာ ဒီ အန် တွိုန်၊ မး ခဲင် အိုမ် တီ တဝ်း၊ “မဲ ဇဝ်ဖြာ အီ မုး ဇဝ်ဖြာ ပီ ကြိုပ် အာအေလီယာ၊ မဲ ကွယ် ဒီ မှဝ်။း” အန် ဟဲ့ ဟွတ့် မး ခဲင် အိုမ် တီ၊ အိုမ် ဘော ကာယဝ်း ဘဲန် အာ ဘ့လာက်။ အန် ဘော ကာလုဝ်း။

15 ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ဒီ မိူင် ယေရီခုဝ်၊ ဂေ ဘော ဝီ ယိုဝ် အန်၊ ဂေ လာယ် ကာလာင် တဝ်း၊ “နဝ်း ဖွိုမ် အာအေလီယာ ဟဲ့ ကွယ် ရိုမ် ဒူပ် အာအေလီဆာ။” ဂေ ဘော ကာဖြူမ် ဒီ ဟာဝ် ရွုး အန်၊ ဘော ခြိုပ်ခြဝ် ဒဲင် ကာဒါယ် ဒီ အာတ့် အန်။ 16 ဂေ တွိုန် ဝီ ကာလာင် ဒီ အန် တဝ်း၊ “န့ ဆီ မိုဝ်း ဂေ ဖန် ဂိုဝ် ဝီ အီ ပ့လူမ် တာင်၊ မှာန့် မဲ ခ့ဝါင် တဲး ဂေ ပွိုန် ဒီ ဟာဝ် ဟြေတ့် ဒါ ဆာရာ မဲ တွိုန်၊ ယုဝ် နဝ်း ဖွိုမ် ဇဝ်ဖြာ ဟဲ့ စုဝ့် ဟာဝ် အန် ဘ့လေး အုန် ဒဲင် နွန် အူ ပ့လုဝ့် အူ ပ့လုဝ့်။ ဆေ အာဝ် ပါယ် တီ ယုဝ် န့ မုး ဒူပ် ဒီလယ့် အူ ပ့လုဝ့် အူ ပ့လုဝ့်။” အန် ဝီ တဝ်း၊ “အာဝ် လုဝ် စ်ု ဂေ ဟာဝ်။”

17 ဂေ တွိုန် နဲ့ အီ မှာန့် ဒီ အန်၊ တဲး အန် ကော ကာဒုး ဒီ ခ့ဝါင် ဂေ ဟာဝ်။ အန် မိူဝ် ဝီ တဝ်း၊ “စ်ု ဂေ ဟာဝ်။” ပန် တီ ဂေ ဘော စ်ု ဒူအီ ဖန် ဂိုဝ် ဝီ တွိုန် ဟာဝ်။ ဂေ ဘော ကာဖြူမ် ဒီ ဟြေတ့်။ န့ ကော နုဝ့် အူယ် ဆီငဲ၊ ဂေ ယီ တူ ယိုဝ်။

18 ဂေ ဘော ဝီ ကာဖြူမ် ဒီ ဝီ တး။ အာအေလီဆာ မိူဝ် ဆီ ကွယ် ဒီ မိူင် ယေရီခုဝ် တွိုန်။ အန် ဝီ ကာလာင် ဒီ ဂေ တဝ်း၊ “အုဝ် ဟဲ့ တဝ်း ဒီ ဘေ၊ ‘ကွဲ့ ဟာဝ်၊’ အာဝ် မုး။း”

19 ဝါယ် အန် တီ ဂေ ဒူအီ မိူင် တွိုန် ဝီ ကာလာင် ဒီ အာအေလီဆာ တဝ်း၊ “ယွတ် ဒူင် ဒီ ဒဲ အီ မိူင် နီ၊ န့ မုး ဒူင် ဒါခိုယ် ဆီချာ။ မဲ ဟဲ့ ယိုဝ်၊ အာဝ် မုး။း မာလဲ အိုမ် ယီ တူ မွှိုမ်။ ဘော ကာဒါယ် မိူဝ် တူ လတ့် အီ မွှိုမ်။”

20 အန် မိူဝ် ဝီ တဝ်း၊ “ဒိုဝ်း ကာပဝ် အိုမ် အီ ကာမာယ်၊ ဟ်ု ဆယ့် ဒိုဝ်း တး။” ဂေ ဘော ဒိုဝ်း တး ဒွါ ဒီ အန်။

21 အန် ဘော ဒိုဝ်း လေး ဟာဝ် ဒူင် တုဝ်း အိုမ်၊ အန် ဘော ဟ်ု ဆယ့် တွိုန်၊ ဝီ တဝ်း၊ “ဇဝ်ဖြာ ဟဲ့ ကာလာင် တဝ်း၊ အန် ဟဲ့ တဲး အိုမ် နီ ဝီ ဆီငဲး။ ဒိုဝ်း ပူင့် အာတိုဝ် ဟာဝ် နာ အာတ့် နီ၊ အိုမ် တီ အာဝ် ဟူ တဲး အီ လိုဝ် ဘော ယမ်။” 22 ဝါယ် အန် တီ အိုမ် တီ ဘော ဆီငဲး ကော ဇမ် အာတိုဝ် နီ။ န့ ဘော မှာန် ခဲ့ တဝ်း အာအေလီဆာ တွိုန်။

23 ပန် တီ အာအေလီဆာ တွိုန် ဘော ယိတ့် ဒီ မိူင် ယေရီခုဝ် တွိုန်၊ ဝီ ဝေန့် ဒီ မိူင် ဘေဒါအေန်။ ဒေါ ဟာဝ် အန် ဒူပ် န့တေန့်၊ န့ မိုဝ်း ဂွန် ဒီရွယ် ခဲင် မိူင် တွိုန်၊ တး ကာလာင် ဂြုဝ်း ဝါညာက် ဒီ အန်။ ဂေ တဝ်း၊ “အာဂိန့် ဂ့လ ဟုဝ့် ဟုဝ့်၊ အာဂိန့် ဂ့လ ဟုဝ့် ဟုဝ့်။” 24 အန် ဘော ဝီ မာငး ယွတ် ဘော ယိုဝ် ဂေ။ အန် ဘော ဂါဝ် ပွုန် ဇဝ်ဖြာ၊ ဒိူင် ဂေ။ အန် ဟဲ့ ဟွတ့် ဒိူင်၊ န့ ဘော မိုဝ်း မာဂြေး အာ ဒုဝ် တး ခဲင် ပြဲ၊ ကဝ့် ဂွန် ဒီရွယ် ဂေ တွိုန်၊ တဲး ကော ယမ် ဖွုန် ဂိုဝ် ဒီ အာ ဝီ။

25 အန် ဝီ လေး ခဲင် မိူင် တီ၊ ဝီ ဟာဝ် ဒီ နွန် ဂါမေလ။ ဟဲ့ ဟွတ့်၊ အန် ဝီ ဟာဝ် ဒီ မိူင် ဆာမာရီ။