1 ဒေါ မုး အာယောဆာဖာတ် ခုန်ဒီခမ် အီ အိုပ် မိူင် ယူဒါ အာဒါ ဂိုဝ် ဒီ ဒါ ဆီနမ်၊ အာယေဟုဝ်ရမ် အီ မုး ဂွန် အာဟပ် တွိုန်၊ အန် ဝီ ဘဲန် ခုန်ဒီခမ် အီ အိုပ် မိူင် အီဆာရေလ၊ ကွယ် ခဲင် မိူင် ဆာမာရီ။ အန် ဝီ အိုပ် ဘိုင် မိူင် ဂိုဝ် ဒီ အာ ဆီနမ်။ 2 အာယေဟုဝ်ရမ် တွိုန် ဘူင် ပီ တူ အိုင် ဇဝ်ဖြာ။ မာလဲ၊ အန် တူ ဘူင် ခဲ့ ပီ ဘူင် ဂုန့် မာ အန်။ အန် ဘော ပျာတ့် ဝဲန် အာရိုပ် ဇဝ် ဘာလ ပီ ဘူင် ဂုန့် အန် တွိုန်။ 3 အန် ယီ ဆီ ဘူင် မှာပ် ပီ အာယေရုဝ်ဘုဝ် အီ မုး ဂွန် အာနေဘတ် တွိုန်၊ ဝီ တဲး ဘော ဂေ ဒူအီ အီဆာရေလ ဘူင် မှာပ် တီ။ အန် မိူဝ် တူ ဝဲန် မှာပ် တီ။

4 န့ ယီ မုး ခုန်ဒီခမ် အာမေဆာ အီ အိုပ် ဒူအီ မုဝ်အာပ် တွိုန်၊ အန် မုး ဒူအီ ဟျီင် မာဘူ။ အန် ဘော ဒိုဝ်း ဂွန် မာဘူ အူ ဆဲန် ဒုဝ် ဘော ဟိုက် မာဘူ အာလူင့် အူ ဆဲန် ဒုဝ်၊ အာပ် ဒီ ခုန်ဒီခမ် အီဆာရေလ၊ ဘော ဒွါ ဘော ဒုဝ် ဘော ဟိုက်။ 5 ခုန်ဒီခမ် အာဟပ် ဟဲ့ ဟွတ့် ယမ်၊ ခုန်ဒီခမ် အီ အိုပ် ဒူအီ မုဝ်အာပ် တီ တူ ဝီ ယုဝ် ခုန်ဒီခမ် အီဆာရေလ။ စိုင် ပီ လုဝ် ဟပ် အန်၊ အန် ဟူ ဟပ်။ 6 ပန် တီ ခုန်ဒီခမ် အာယုဝ်ရမ် ဘော လေး ခဲင် မိူင် ဆာမာရီ၊ ဝီ ဒဲ့ ကာဇု ခဲ့ ကွယ် ဂေ ဒါ ဆိုက် ခဲင် မိူင် အီဆာရေလ။ 7 အန် ဘော စ်ု ဒါလာမ် အန် ဟာဝ် ဒူင် ကွယ် အာယောဆာဖာတ် အီ မုး ခုန်ဒီခမ် ခဲင် မိူင် ယူဒါ။ အန် ဘော တဝ်း၊ “ခုန်ဒီခမ် မုဝ်အာပ် အာဝ် ဟူ ဒွါ စိုင် ဒီ အုဝ်။ မဲ ဒီ ခမ် ဒီ ဒူပ် အုဝ်၊ ဟာဝ် ကာဂုဝ်း မိူင် တီ။း” ပန် တီ အာယောဆာဖာတ် ဝီ တဝ်း၊ “အုဝ် ဒီ ဟာဝ်။ ဘော မဲ ဘော အုဝ် ဟဲ့ မုး အူ မျုဝ်။ ဂေ ဒူအီ အုဝ် ဟဲ့ ပီ ဒူအီ မဲ။ မ့ပြွင့် အုဝ်၊ ဟဲ့ ပီ မ့ပြွင့် မဲ။”

8 အန် ပီ ဝီ ဒီမွှတ်၊ “အေ ဒီ ဝဝ့် န့တေန့် မှဝ်။း” အာယုဝ်ရမ် ဝီ တဝ်း၊ “တဲး အေ ဝဝ့် န့တေန့် ခဲင် ပြဲ ကာဟဝ်း အီ စိူဝ် အေဒူမ် တွိုန်။”

9 ပန် တီ ခုန်ဒီခမ် အီဆာရေလ ဘော ခုန်ဒီခမ် ယူဒါ ဘော ခုန်ဒီခမ် အေဒူမ်၊ ဂေ ဘော လဲပ် ဟာဝ် ဒူပ် န့တေန့် အာဒါ ဘူ ဆီငဲ။ ဒါ ဆိုက် ဂေ ဒုဝ် ဆတ်ဒါဝါ အာဝ် ဟူ မိုဝ်း ဒီ ဒျီင် အိုမ်။

10 ခုန်ဒီခမ် အီဆာရေလ ဘော တဝ်း၊ “အာဝ် မွှိုမ် ညှိုမ်၊ ဇဝ်ဖြာ ဆော တဲး အေ ခုန်ဒီခမ် အူယ် ကာဒင် နီ တး ကာဇု၊ တဲး အန် အာပ် အေ ဒီ ဒူအီ မုဝ်အာပ် ဂေ နီ။”

11 အာယောဆာဖာတ် ဝီ တဝ်း၊ “န့ လုဝ် မိုဝ်း ဒူအီ ဘျာန် ဂြုဝ်း ဇဝ်ဖြာ ဒီ နီ၊ တဲး အေ ပွိုန် ဒီ ဒီမွှတ်။” ဒဲစေန့် ခုန်ဒီခမ် အီဆာရေလ အူ ဝီ ဝီ တဝ်း၊ “န့ မိုဝ်း အာအေလီဆာ အီ မုး ဂွန် အာဆာဖတ်၊ အီ ဒွိုမ် ဘဲန် ဒဲစေန့် အာအေလီယာ တွိုန်၊ အန် ကွယ် ဒီ နီ။”

12 အာယောဆာဖာတ် ဝီ တဝ်း၊ “အန် မုး ဒူအီ ကာလာင် မှာန် ဂြုဝ်း ဇဝ်ဖြာ။” ပန် တီ ခုန်ဒီခမ် အီ အိုပ် ဒူအီ အီဆာရေလ ဘော အာယောဆာဖာတ် ဘော ခုန်ဒီခမ် အီ အိုပ် မိူင် အေဒူမ် တွိုန်၊ ဂေ ဘော ဟာဝ် ဒူင် ကွယ် အန်။

13 အာအေလီဆာ ဝီ ကာလာင် ဒီ ခုန်ဒီခမ် အီ အိုပ် ဒူအီ အီဆာရေလ တဝ်း၊ “အာရေ မဲ အာဝ် ဘာ့ အာရေ အုဝ်။ အာဝ် လုဝ် ဒီမွှတ် အုဝ်။ တဲး မဲ ဟာဝ် ဒီမွှတ် အီ မုး ဒူအီ အီ ဘျာန် ဂြုဝ်း ဇဝ် ပီ ကြိုပ် ဂုန့် မာ မဲ တွိုန်။” ခုန်ဒီခမ် ဝီ တဝ်း၊ “မဲ ကွဲ့ တဝ်း ပါယ် တီ။ ခုဝ်၊ ဇဝ်ဖြာ ဟဲ့ ဒဲ့ ယေ ခုန်ဒီခမ် အူယ် ကာဒင် နီ၊ တဲး အန် ပွိုန် ဒီ အာပ် ယေ ဒီ ဒူအီ မုဝ်အာပ် ဂေ နီ။”

14 အာအေလီဆာ ဝီ တဝ်း၊ “ဇဝ်ဖြာ ပီ ကြိုပ် အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ နပ်၊ ဂြုဝ်း အုဝ် ဟဲ့ မှာန်။ ဆေ အုဝ် တူ ကာဝေ အာယောဆာဖာတ် အီ အိုပ် ဒူအီ အာယူဒါ၊ အုဝ် တူ ငှိုယ် ငှာယ် ဒီ ယွတ် မဲ။ 15 မာလဲ၊ ဒေါ တီ နီ၊ တဲး မဲ ဟာဝ် ဒဲ့ ဒူအီ အီ နပ် ဒီ ဘး ဒိင်၊ တဲး အန် တး ဒူင် ကွယ် အုဝ်။” ဒူအီ ဘး ဒိင် ဘော တး ဘး ဒိင် အန်၊ ပွုန် ဇဝ်ဖြာ ဘော တး ပ့လိုက် အာအေလီဆာ။

16 အန် ဘော တဝ်း၊ “ဇဝ်ဖြာ တဝ်း ပါယ် နီ၊ ‘ခူပ် ဒီလယ့် နီ၊ တဲး ဘေ ဂိုဝ်း ကာဒဝ် ကိူန် ကိူန်။’ 17 ခုဝ်၊ ဇဝ်ဖြာ တဝ်း၊ ‘ဘေ တူ ပွိုန် ယိုဝ် ခုန် ဂေ ဂ့လာယ်။ အိုမ် ယီ ဒီ နုဝ့် ခဲင် ဒီလယ့် နီ။ ဘော ဘေ၊ ဘော မာမက် ဘေ၊ ဘော ဒုဝ် ဆတ်ဒါဝါ ဘေ ဒွန် မျုဝ်၊ ဘေ ဒီ ပွိုန် ဒီ ဒျီင်။’ 18 လွင် ပီ ဒီ ဘူင် ဇဝ်ဖြာ တီ၊ န့ ငှိုယ် ဒီ အန်။ ဘော ဂေ ဒူအီ မုဝ်အာပ် ဇဝ်ဖြာ ဒီ ဘော အာပ် ဒီ ဘေ။ 19 ဘေ ဒီ ပွိုန် ဒီ ပျာတ့် ဝဲန် မိူင် အီ မိုဝ်း ရဲင် ဆီချာ ဘော မိူင် တာင် ဒွန် မိူင်။ ဘေ ဒီ ပွိုန် ဒီ ဂ်ု ဝဲန် ဟေ အီ စှိတ် ဒွန် ကာဒင်၊ ပွိုန် ဒီ ပုန် ဝဲန် ဘော အိုမ် ခိုမ်၊ ပွိုန် ဒီ ဒိုဝ်း မာဝ် ဝဲန် ခဲင် ဒူင် နာ အီ ဘွတ်၊ ကွဲ့ တဲး န့ ဝီ လတ့် မာဆေ။”

20 အာအေလီဆာ ဟဲ့ ဟွတ့် ကာလာင် ဂြုဝ်း တီ၊ ဘော ဇမ် ပါ ခဲညှာ ဆိန့်ဝး ဒေါ လှူ ဂေ ပီ လုဝ် လှူ တွိုန်၊ အိုမ် ဘော တး နာ မိူင် အေဒူမ် ဘော နုဝ့် ခဲင် မိူင် ဒူင် ကွယ် ဂေ တီ။

21 ဒူအီ မုဝ်အာပ်၊ ဂေ ဘော ယိုဝ် လွင် ခုန်ဒီခမ် အူယ် ကာဒင် ဟဲ့ တဝ်း ဒီ တး ကာဂုဝ်း ဒီ ဂေ၊ ဂေ ဘော ဒဲ့ ကာဇု ဒူအီ ဒွန် အီ အီ ဟဲ့ နပ် ဒီ တာ ခြိုင် ကာဂုဝ်း ဘော အီ တျီ့ အီ တာင်၊ တဲး ဂေ ဘ်ု ခူပ် ကာအုန် ကာဒါယ် မိူင် ဂေ။ 22 ဂေ ဘော ယိတ့် ဆိန့်ဝး စေဝ်၊ ဘော ယိုဝ် အာရူင် ဆီငဲ၊ အီ ထွင် ခဲင် အိုမ် တွိုန်။ ဂေ ဘော ယိုဝ် အိုမ် ကာဆိူဝ် ငွိုပ် ဂေ တွိုန်၊ န့ ရေန့်၊ နှဲန် နှာမ်။ 23 ဂေ ဘော လာယ် ကာလာင် တဝ်း၊ “အာဒွယ် ဟဲ့ မုး နှာမ်။ န့ နှဲန် ခုန်ဒီခမ် ဂေ တွိုန်၊ ဂေ ဟဲ့ လာယ် ကာငဝ်း ယမ် ရာင် ဂေ။ အိုယ် ဘေ ဒူအီ မုဝ်အာပ်၊ တဲး အေ ကာဖြူမ် ဒီ ဟာဝ် ဒိုဝ်း ကြုဝ် ဂေ ဒေါ တီ နီ။”

24 ဂေ ဘော တး ဇမ် ဒူင် ချ ဒူအီ အီဆာရေလ၊ ဂေ ဒူအီ အီဆာရေလ ဘော ကာဖြူမ် ဒီ ကာဂုဝ်း ဒီ ဂေ ဘော ငဝ်း ယမ် ဒူအီ မုဝ်အာပ် ဂေ တီ၊ တဲး ဂေ ကော တဝ်။ ဟဲ့ ဟွတ့်၊ ဂေ ဘော ခုင်ခြး ဒီ ငဝ်း ဒူအီ မုဝ်အာပ်၊ ဘော လိုပ် ခဲင် မိူင် ဂေ။ 25 ဂေ ဘော ကာဖြူမ် ဒီ ပျာတ့် ဝဲန် ဘဲန် မိူင် ဘဲန် မိူင်။ ဒွန် အီ ဘော ဒိုဝ်း မာဝ် ဝိုန့် ဒဲင် ကာဒါယ် ဘွတ် ဒွန် ပ့လုဝ့်၊ တဲး န့ ကော နုဝ့်။ ဂေ ဘော ဒိုဝ်း ကာဒါယ် ပုန် တုဝ်း အိုမ် ဒွန် ပ့လုဝ့်။ ဂေ ဘော ဂ်ု ဝဲန် ဟေ အီ ဆီချာ ဒွန် ကာဒင်၊ တဲး န့ ကေး။ န့ မိုဝ်း မီ မိူင် ကီရဟာရိတ်၊ ဂေ တူ ပျာတ့် ဝဲန် မာဝ် ဒီ ရဲင်၊ ဂေ ယီ တဲး ဒူအီ အီ နပ် ဒီ ပိူ့ မာကူင် ဝီ ရူပ် ဝီ ကာဂုဝ်း မိူင် တီ။

26 ခုန်ဒီခမ် မုဝ်အာပ် ဘော ယွတ်၊ အာဝ် ဟူ နှဲန် ဒီ ပွိုန် ခမ်။ အန် ဘော ဒဲ့ ဂေ ဒူအီ အီ ဂူင့် ဘ့လာ လျီး ဘူ မာယဝ်း ဝီ။ အန် ဘော တဲး ဂေ ထေဝ် ဒီ လေး တဝ် ဒူင် ကွယ် ခုန်ဒီခမ် အီ အိုပ် မိူင် အေဒူမ်။ ဂေ ယီ တူ ပွိုန် ဒီ လေး။

27 ပန် တီ အန် ဘော ဒိုဝ်း ဂွန် ဂိန့် အန်၊ အီ မုး ဝီ အီ ဒီ ပ့လု အန်၊ ဝီ ငဝ်း လှူ ဒုဝ် အန် ဒဲင် ရဲင် မိူင် တွိုန်။ ခဲ့ ကွယ် ဂေ ခုန်ဒီခမ် အူယ် ကာဒင် တွိုန် ဘော ယုဝ် ကာဆဝ်။ ဂေ ဘော အုန် မိူင် တီ၊ ဝီ ဝေန့် မိူင် ဘြိမ် ဂေ။