1 ဝါယ် အန် တီ န့ မိုဝ်း အီဘိုန့် အူ ဝီ။ အီမာယ် အန် ဟဲ့ ဒွိုမ် ကွယ် ခဲင် ဖိုင် ဒူအီ အီ ဘျာန် ဂြုဝ်း ဇဝ်ဖြာ။ အန် ဘော တး ဒူင် ကွယ် အာအေလီဆာ တဝ်း ဒီ အန်၊ “ဒဲစေန့် မဲ အီ မုး အီမာယ် အုဝ်၊ အန် ဟဲ့ ဟွတ့် ယမ်။ မဲ မိူဝ် နပ်၊ အန် မုး ဒူအီ အီ ရုဝ်ဆေ ဆီချာ ဇဝ်ဖြာ။ န့ ယီ မိုဝ်း ဒါ အူ ဝီ၊ အီမာယ် အုဝ် ဟဲ့ ဒွိုမ် ကာရဝ်း ရွိုန် အန်။ ဒေါ တီ နီ အန် ဟဲ့ တး၊ တဝ်း ဒီ ဒိုဝ်း ဂွန် အုဝ် အာ ဝီ၊ တဲး ဂါယ် ဘဲန် မှာယ် အန် ကူပ် တူ မိုဝ်း အုဝ် ဒီ ဒွါ ဝိဝ် ရွိုန် အန်။”

2 အာအေလီဆာ ဝီ တဝ်း ဒီ အန်၊ “မှဝ် အုဝ် ဒီ ပါယ် ဒီ စွယ် မဲ။း တဲး မဲ ကာလာင် ဒီ အုဝ်။ ခဲင် ကာင် မဲ၊ မဲ ဆီ မိုဝ်း ကြုဝ်ကြာမ် မာဆေ။း” အန် ဝီ တဝ်း၊ “အာဝ် ဟူ မိုဝ်း မာဆေ။ န့ မိုဝ်း မီ ကာပဝ် နာမန် အူ ကာပဝ်။”

3 အာအေလီဆာ ဝီ တဝ်း ဒီ အန်၊ “တဲး မဲ ဟာဝ် ဝါယ် ဘော ကာပဝ် ဘ့လဝ် ဒီ ဂေ အီ ကွယ် ကာတတ် မဲ။ ဝါယ် ကိူန် ကိူန် ကွဲ့ ဝါယ် အီ စဲက်။ 4 ဟဲ့ ဟွတ့်၊ တဲး မဲ ဝီ လိုပ် ခဲင် ကာင် မဲ တီ၊ ဘော ကာဘိတ် မာလုဝ်း၊ ခြွင့် ဘော မဲ ဘော ဂွန် မဲ ခဲင် ကာင် တီ ဘော ဟုး နာမန် တီ ခဲင် ကာပဝ် ဂေ တီ။ ဟီ နုဝ့်၊ မဲ ဘော ဒိုဝ်း အုန် အူ ပ့လုဝ့်။”

5 ပန် တီ အီဘိုန့် တွိုန် ဝီ ဝေန့် ဒီ ကာင် အန်။ အန် ဘော ခြွင့် ဂေ ဂွန် အန်၊ ကာဘိတ် မာလုဝ်း ကာင် အန်။ ဂွန် အန် ဘော ဒိုဝ်း ကာပဝ်၊ ဒွါ ဒီ အန်။ အန် ဘော ဒိုဝ်း နာမန်၊ ဟုး ခဲင် ကာပဝ် ဘဲန် မျုဝ် ဘဲန် မျုဝ်။ 6 အန် ဟဲ့ ဟွတ့် ဟပ် ခဲင် ကာပဝ် ဒွန် ဘူင့်၊ အန် ဝီ တဝ်း ဒီ ဂွန် အန်၊ “ဒိုဝ်း တး ကာပဝ် ပေါ န့ ပွါ။” ဂွန် အန် ဝီ တဝ်း၊ “အာဝ် ဟူ မိုဝ်း။” အန် ဟဲ့ ဟွတ့် တဝ်း ပါယ် တီ နာမန် တွိုန် ဘော ဂိူတ် အူ ဇေန့်။ အာဝ် ဟူ လှဲ။

7 အန် ပီ ဝီ ဟာဝ် ဒူင် ကွယ် ဒူအီ ပီ တိုယ် ဇဝ်ဖြာ။ ဒူအီ ပီ တိုယ် ဇဝ်ဖြာ တွိုန် ဝီ တဝ်း ဒီ အန်၊ “တဲး မဲ ဒိုဝ်း နာမန် တီ၊ ဟာဝ် ယွင့်၊ ဒွါ ဝိဝ် ရွိုန် ပီ ကာရဝ်း မဲ တီ။ အီ ကာလူယ်၊ တဲး န့ ဘဲန် ပီ ဒီ ဟူမ် ဘေ ဂွန် မဲ။”

8 ဝါယ် အန် တီ ပေါ အူ ဆီငဲ၊ အာအေလီဆာ ဘော ဟာဝ် ဒီ မိူင် ဆူနိမ်။ ခဲင် မိူင် တီ မိုဝ်း အီဘိုန့် အူ ဝီ အီ ခြမ် ကာဆဝ်။ အီဘိုန့် တီ ဟဲ့ ဒွိုမ် ဘာင် အာအေလီဆာ တး ဟူမ် ဘူမ်၊ ဒျီင် အိုမ် ခဲင် ကာင် အန်။ ခုဝ်၊ ဒွန် ဟီ ဟာဝ် အာအေလီဆာ၊ အန် ဘော ဝဝ့်၊ ဒျီင် အိုမ်၊ ဟူမ် ဘူမ် ဒီ ကာင် အီဘိုန့် တီ။ 9 အီဘိုန့် တွိုန် ဝီ ကာလာင် ဒီ အီမာယ် အန် တဝ်း၊ “အုဝ် ယွတ်၊ ဒူအီ အီ ဟာဝ် ဆေဆေ ကာလုဝ်း ကာင် အေ နီ၊ အန် မုး ဒူအီ ဘွတ်၊ ဒူအီ ပီ တိုယ် ဇဝ်ဖြာ။ 10 ခဲင် ကာင် အာယ် ခြွင့် ဒဲင် နီ၊ တဲး အာယ် ဘူင် ဟူင် အိတ် ဒီတဲတ် အာဒါ အန်။ တဲး န့ မိုဝ်း ကာစှူင့် အိတ်၊ ကာစှူင့် ဟူမ် ဘူမ်၊ မ့ဘာင် တုတ့် ဘော ငဝ် အွမ်။ ဒေါ တး ဝဝ့် အန် ဒီ ကာင် အာယ်၊ အန် ဒီ ပွိုန် ဒီ တမ် ဒီ တီ။”

11 ဝါယ် အန် တီ ဒူအီ ပီ တိုယ် ဇဝ်ဖြာ တွိုန် ဘော ဟာဝ်။ အန် ဘော တး ဝဝ့် ဒီလှဝ် ဒီ ဟူင် အိတ် နာ ဒဲင် တွိုန်။ 12 အန် ဝီ တဝ်း ဒီ အာကေဟာဇီ၊ အီ မုး ဒီဘဲ အန်၊ “မဲ ဟာဝ် ဒဲ့ တး အီဘိုန့် ဆူနိမ် တွိုန်။” အန် ဘော ဟာဝ် ဒဲ့ အီဘိုန့် တွိုန် ဘော တး ကွယ် နာ အာတ့် အန်။ 13 အန် ဝီ တဝ်း ဒီ ဒီဘဲ အန်၊ “တဲး မဲ တဝ်း ဒီ အီဘိုန့် နီ၊ အန် ဟဲ့ ဘူင် ဘဲန် မျုဝ် ဘဲန် မျုဝ်၊ လိုမ်လာ အုဝ် ပါယ် နီ။ ခုဝ်၊ မာဆေ ပီ ဒီ ပွိုန် အုဝ် ဘူင် ဝျီ့ ဒီ အန်။း န့ မိုဝ်း မာဆေ ပီ ဒီ လုဝ် ကာလာင် ဒီ ခုန်ဒီခမ် ဂေ ဒါ တာင် အီ အိုပ် ဒါ ဆိုက် ဒါင် အန်။း” အီဘိုန့် တွိုန် ဝီ တဝ်း၊ “အုဝ် ဟဲ့ ကွယ် ရိုမ် ဒူပ် ဝေါဝဲ အုဝ်၊ အာဝ် ဟူ လုဝ် မာဆေ။”

14 ဟဲ့ ဟွတ့်၊ အန် ပီ ဝီ တဝ်း ဒီ ဒီဘဲ အန်၊ “ဆေ န့ ပါယ် တီ မာဆေ အီ ဒီ မွှိုမ် ပီ ပွိုန် အုဝ် ဘူင် ဒွါ ဒီ အီဘိုန့် တီ။း” အာကေဟာဇီ ဝီ တဝ်း၊ “အိုဝ်၊ အီဘိုန့် တီ တူ မိုဝ်း ဒီ ဟျီင် ဂွန်။ အီမာယ် အန် ဟဲ့ ကတ်။”

15 အန် ပီ ဝီ တဝ်း၊ “ဟာဝ် ပေါ ဇေန့်၊ ဒဲ့ အန် တး။” အီဘိုန့် တွိုန် ဘော တး ကွယ် ဘာင် မာလုဝ်း။ 16 အန် ဝီ တဝ်း ဒီ အီဘိုန့် တွိုန်၊ “ဟီ နုဝ့် ပေါ အူ ဆီနမ်၊ မဲ ဒီ မိုဝ်း ဒီ ဟျီင် ဂွန် အီမာယ်။” အန် ဟဲ့ ဟွတ့် တဝ်း ပါယ် တီ အီဘိုန့် တွိုန် ဝီ တဝ်း၊ “မဲ ဒူအီ ပီ တိုယ် ဇဝ်ဖြာ၊ မဲ ကွဲ့ ကာလုဝ် အုဝ်။ ယုဝ် န့ တူ မှာန် ပီ တဝ်း မဲ တီ။”

17 ဝါယ် အန် တီ အီဘိုန့် တွိုန် ဘော ဒဲ ဘာဒိက် ဆန်ထေ။ ဟဲ့ နုဝ့် အူ ဆီနမ်၊ အန် ဘော မိုဝ်း ဂွန် အီမာယ်။ န့ ဘော မှာန် ခဲ့ ပီ ဒွိုမ် ကာလာင် အာအေလီဆာ ဒီ အန်။

18 ဂွန် အန် တွိုန် ဘော ကြဲ ဒီ တာင်။ အူ ဆီငဲ၊ အန် ဘော ဟာဝ် ဒူပ် ဂုန့် အန် ဒူင် ဆုဝ့် ဂေ ငှုဝ်။ 19 အန် တဝ်း ဒီ ဂုန့် အန်၊ “အာလိုဝ်၊ ဂိန့် အုဝ် ဆဝ်။ ဟဲ့ ဆဝ် ကာဆဝ်။” ဂုန့် အန် ဝီ တဝ်း ဒီ ဒဲစေန့် အန် အူ ဝီ၊ “ဒိုဝ်း ဟာဝ် တိုယ် အန် ဒီ မာ အန်။” 20 ဒဲစေန့် အန် တွိုန် ဘော ဒိုဝ်း တး ဇမ် ဒူင် ကွယ် မာ အန်၊ အန် ဘော ကွယ် ဒဲင် ဘိုမ် မာ အန်။ ဘော ဇမ် ဆီငဲ ကာတဲ၊ အန် ဘော ယမ်။ 21 မာ အန် ဘော ဒိုဝ်း ဟုဝ့် အန် ခြွင့် ဒဲင်၊ ဘ့လေး အုန် အန် ဒဲင် ကာစှူင့် အိတ် ဒူအီ ပီ တိုယ် ဇဝ်ဖြာ တွိုန် ဘော ကာဘိတ် မာလုဝ်း၊ ဝီ လေး ဟာဝ်။

22 အန် ဘော ဝီ ဒဲ့ အီမာယ် အန် တဝ်း၊ “ဒိုဝ်း မာလုဝ် အူ ဒုဝ်၊ တဲး ဘော ဒဲစေန့် အူ ဝီ ဒူပ် အုဝ်၊ တဲး အုဝ် ပွိုန် ဒီ ဟာဝ် ဟဲ ဟဲ၊ ဇမ် ဒူင် ကွယ် ဒူအီ ပီ တိုယ် ဇဝ်ဖြာ၊ ပီ ဝီ တး ခြန် ခြန်။”

23 အီမာယ် အန် ဝီ တဝ်း၊ “ကူပ် မာဆေ ပီ ဆီ ဟာဝ် မဲ ဒူင် ကွယ် ဒူအီ ပီ တိုယ် ဇဝ်ဖြာ အာတိုဝ် နီ။း အာဝ် မုး ဆီငဲ လိူန်မူန်။ အာဝ် မုး ဆီငဲ ဒီလှဝ်။” အန် ဝီ တဝ်း၊ “အာဝ် လိူက်၊ တဲး အုဝ် ဟာဝ်။”

24 ပန် တီ နာင် တွိုန် ဘော ခြိုင် ကွပ် မာလာ အန်။ အန် ဝီ ကာလာင် ဒီ ဒဲစေန့် အန် တဝ်း၊ “တဲး မဲ ဟာဝ် ယဲတ့် ဒီ အာတ့် ဟဲ ဟဲ။ ဆေ အုဝ် တူ ဒဲ့ မဲ၊ မဲ ကွဲ့ ဘ်ု အုဝ်။” 25 နာင် ဘော ဟာဝ် ဇမ် ဒူင် ကွယ် ဒူအီ ပီ တိုယ် ဇဝ်ဖြာ ဒေါ ကွယ် အန် ဒီ နွန် ဂါမေလ တွိုန်။ ဒူအီ ပီ တိုယ် ဇဝ်ဖြာ ဘော ယိုဝ် နာင် ဒေါ ဆီ ကွယ် တူင့် အန်။ အန် ဝီ တဝ်း ဒီ အာကေဟာဇီ အီ မုး ဒီဘဲ အန်၊ “ယွတ်၊ အီဘိုန့် ဆူနိမ် ဟဲ့ တး။” 26 တဲး မဲ ကာဘ့လဲပ် ဟာဝ် ရွုး အန်၊ ဒီမွှတ် အန် တဝ်း၊ “မဲ ဟဲ့ ကွယ် ဒါခိုယ်။း အီမာယ် မဲ ဟဲ့ ကွယ် ဒါခိုယ်။း ဘော ဂွန် မဲ ဟဲ့ ကွယ် ဒါခိုယ်။း” နာင် ဝီ တဝ်း၊ “ဟဲ့ ဒါခိုယ်။”

27 နာင် ဘော တး ဇမ် ဒူင် ကွယ် အာအေလီဆာ အီ ကွယ် ဒီ နွန် တွိုန်၊ အန် ဘော တး တဝ်း ဒီ ငျီမ် ပ့လဝ် အာအေလီဆာ။ အာကေဟာဇီ ဘော တး ခြဲ အန်။ အာအေလီဆာ ဝီ တဝ်း၊ “ကွဲ့ ခြဲ အန်။ ခုဝ်၊ န့ မိုဝ်း ဒုက် ဒီ နဝ်း အန်။ လွင် အန် တီ၊ ဇဝ်ဖြာ ယီ ဟဲ့ ချြီင်၊ တူ ဘျ ဒီ အုဝ်။”

28 နာင် ဝီ တဝ်း၊ “အုဝ် တူ ဒွိုမ် မှာန့် မဲ ဒွါ ဂွန် အီမာယ် ဒီ အုဝ်။ အုဝ် ဟဲ့ တဝ်း၊ ကွဲ့ ကာလုဝ် အုဝ်။”

29 ဒူအီ ပီ တိုယ် ဇဝ်ဖြာ ဝီ တဝ်း ဒီ အာကေဟာဇီ၊ “တဲး မဲ ရိတ် ဆဲ့ ဒီ ညွယ် မဲ၊ ဂူင့် ဟာဝ် ဘော န့ကြွုန် အုဝ် နီ။ ဆေ မဲ ဘော ကာတုန့် အီ ဟဝ်၊ ကွဲ့ ဂြုဝ်း ဒီ အန်။ ဆေ အန် ဘော ဂြုဝ်း ဒီ မဲ၊ မဲ ကွဲ့ ဝျီ့ ဂြုဝ်း အန်။ တဲး မဲ ဒိုဝ်း န့ကြွုန် အုဝ် နီ၊ ဒါင် ဒဲင် နာ ဂွန် တီ။”

30 မာ ဂွန် တွိုန် ဝီ တဝ်း၊ “ဟဲ့ မုး၊ ဟဲ့ မှာန်၊ ဘော ဇဝ်ဖြာ ဘော မဲ ဟဲ့ ကွယ် ဆီချာ။ ပါယ် တီ န့ ဘော မှာန် အာခါခ်ု၊ အုဝ် တူ ကာဂဝ်း ဒီ မဲ ဒေါ မှဝ်။” ပန် တီ အာအေလီဆာ ဘော ဟာဝ် ဒူပ် အီဘိုန့် တွိုန်။

31 အာကေဟာဇီ တွိုန် ဟဲ့ ဟွတ့် ဟာဝ် ယဲတ့် ဒီ အာတ့်၊ တဲး အန် ပွိုန် ဒီ ဒါင် န့ကြွုန် ဒဲင် နာ ဂွန် တွိုန်။ မာလဲ၊ ဂွန် တွိုန် ညှမ် ဂြုဝ်း၊ ညှမ် လှုဝ်း ဒုဝ်။ ခုဝ်၊ အန် ဘော ဝီ ဝိဝ်၊ ကာလာင် ဒီ အာအေလီဆာ ဒေါ ဟာဝ် အန် ဒူပ် န့တေန့် တွိုန်။ အန် တဝ်း၊ “ဂွန် တီ ညှမ် န့ဆိုဝ်း။”

32 အာအေလီဆာ ဘော တး ဇမ် ကာင် တီ၊ ဂွန် အီ ဟဲ့ ဟွတ့် ယမ်၊ အန် ဆီ ကွယ် ဒဲင် ကာစှူင့် အိတ် တွိုန်။ 33 အာအေလီဆာ ဘော လိုပ် ဟာဝ် ခဲင် ဟူင် တွိုန်၊ ကာဘိတ် မာလုဝ်း၊ တဲး န့ ဂိတ် မီ ဂါယ် အာ ဝီ။ ဟဲ့ ဟွတ့်၊ အန် ဝီ ဆာခိုဝ် ဒီ ဇဝ်ဖြာ။ 34 အန် ဘော ကွယ် ဒျီ့ ဂွန် တီ၊ အိတ် ဒဲင် ဂွန် တီ။ အန် ဘော တဲး မူတ့် အန် ကာဆိူဝ် မူတ့် ဂွန်၊ ငါယ် အန် မိူဝ် ကာဆိူဝ် ငါယ် ဂွန်။ အန် ဘော အိတ် ကာတပ် ဒဲင် ဂွန်၊ တဲး ဒုဝ် ဂွန် ဘော ကြဲ ဒီ ဆီအုန့်။ 35 ဟဲ့ ဟွတ့်၊ အန် ဘော လဲ ဝိဝ် လဲ ဝေန့် ခဲင် ဟူင် တွိုန်။ အန် ပီ ဝီ အိတ် ကာတပ် ဒဲင် ဂွန် ပေါ အူ ဇေန့်။ ဂွန် ဘော အာစှိး ဘူ ဇေန့်၊ ဘော ဘ့လာင် ငါယ် အန်။

36 အန် ဝီ ဒဲ့ အာကေဟာဇီ တဝ်း၊ “ဒဲ့ အီဘိုန့် ဆူနိမ် တး။” အာကေဟာဇီ ဘော ဟာဝ်၊ ဒဲ့ တး အီဘိုန့် တီ။ နာင် ဘော တး ဇမ် ဒူင် ကွယ် ဂွန် အန်၊ အာအေလီဆာ ဝီ ဒွါ ဂွန် တီ ဒီ မာ အန်၊ ဝီ တဝ်း၊ “ဒိုဝ်း ဂွန် မဲ နီ။”

37 အီဘိုန့် တွိုန် ဘော လိုပ် ဟာဝ် ခဲင် ဟူင် တွိုန်၊ အန် ဘော မုတ် ဂိုပ် အီ ခြိုမ်။ ဟဲ့ ဟွတ့်၊ အန် ဘော ဒိုဝ်း ဂွန် အန်၊ ဝီ လေး ဟာဝ်။

38 ဝါယ် အန် တီ အာအေလီဆာ ဝီ ဟာဝ် ဒီ မိူင် ဂီလဂါ။ ခဲင် မိူင် တီ ဂေ အေတ့် ပီ ဒီ ဟူမ်။ ဒေါ အန် တီ န့ မိုဝ်း ဖိုင် ဂေ ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ရိုမ် ဒူပ် အာအေလီဆာ။ အန် ဘော စ်ု ဒီဘဲ အန် တဝ်း၊ “ဒိုဝ်း ကာလုဝ့် တာင် တီ၊ ကူယ်၊ ဘူင် ဘူမ် ည အာဒါ ဒူအီ အီ ဘျာန် ဂြုဝ်း ဇဝ်ဖြာ ဂေ နီ။”

39 န့ မိုဝ်း ဒါ အူ ဝီ၊ အန် ဘော လေး ဟာဝ် နာ ရေတ့်၊ ဟြေတ့် ဒီ ဘေတ့် ဒဝ် ပြဲ။ အန် ဘော ယိုဝ် ဒဝ် ကာပဝ် ပြဲ အူ မျုဝ်၊ အန် ဘော ဂြူပ် တး။ အန် ယီ တူ နပ် မျုဝ် အန်၊ ဘော ပွတ် ဟပ် ခဲင် ကာလုဝ့် တွိုန်။ 40 ဂေ ဘော အဝ်း၊ တဝ်း ဒီ ဟူမ်။ ဒေါ ဟူမ် ဂေ တီ၊ ဂေ ဘော ကာဖြူမ် ဒီ တဝ်း၊ “အိုယ် ဒူအီ ပီ တိုယ် ဇဝ်ဖြာ၊ ခဲင် ကာလုဝ့် နီ ဟဲ့ မိုဝ်း ဒဝ် ကာပူ ယမ်။” အာဝ် ဟူ ပွိုန် ဟူမ်။

41 အန် ဝီ တဝ်း၊ “ဒိုဝ်း တး ကာပဲ့ ခါမုန် အီ စဲက်။” ဂေ ဘော ဒိုဝ်း တး၊ အန် ဝီ ဟပ် ခဲင် ကာလုဝ့် တွိုန်။ အန် ဝီ တဝ်း၊ “အဝ်း၊ တဲး ဂေ ဟူမ်။” ဒေါ ဝီ ဟူမ် ဂေ၊ အာဝ် ဟူ မိုဝ်း မာဆေ အီ ဘဲန် ကာပူ ခဲင် ကာလုဝ့် တွိုန်။

42 ဝါယ် အန် တီ န့ ဝီ မိုဝ်း ဒူအီ အူ ဝီ၊ အန် တး မိူင် ဘာလဆာလီဆာ။ အန် ဂူင့် ခါမုန် ဆီဂူင့်ရာ အာ ဂိုဝ် ဘူင့်။ န့ မုး ပီ ဒိုဝ်း ဂေ ဘ့လေ ဒင် အန် ဘူင်။ ဂေ ဘော ဒိုဝ်း ငှုဝ် ပီ ဆုဝ့် ဂေ ဒီ အာတ့်၊ ဒွါ ဒီ အာအေလီဆာ။ အာအေလီဆာ ဝီ တဝ်း၊ “တဲး ဒူအီ ဂေ တီ ဟူမ်။”

43 ဒီဘဲ အန် ဝီ တဝ်း၊ “ခဲ့ နီ၊ ဒီ ကူပ် ဘ့လေး ဒူအီ ဘဲန် မာယဝ်း ဟူမ်။း” အန် ဝီ တဝ်း၊ “ဒိုဝ်း၊ တဲး ဒူအီ ဂေ တီ ဟူမ်။ ဇဝ်ဖြာ ဟဲ့ တဝ်း၊ ‘ဂေ ဒီ ဟူမ် ဖဲ၊ န့ ကော ဒီ ဝီ ကာလူယ်။’”

44 ဟဲ့ ဟွတ့်၊ ဒီဘဲ အန် ဘော ဒိုဝ်း ဘ့လေး၊ တဲး ဂေ ဟူမ်။ ဂေ ဘော ဟူမ် ဖဲ ဒွန် အီ။ န့ ကော ဝီ ကာလူယ်၊ ဘော မှာန် ခဲ့ ကာလာင် ဇဝ်ဖြာ တီ။