1 န့ ဘော မိုဝ်း ဒူအီ အူ ဝီ၊ အီ စိူဝ် အာနေမာန်။ အန် မုး ဒါ ဘုဝ် အီ အိုပ် ဒါ ဆိုက် ခုန်ဒီခမ် အာရာမ်။ အန် မုး အီ မိုဝ်း အာဖုင် ဒင်ခုဝ် တာင် ပီ ဒွါ ဒါ ကာညာ အန်။ ဘော ဒွန် အီ ရုဝ်ဆေ အန်။ ခုဝ်၊ ဇဝ်ဖြာ ဟဲ့ စွယ် အန် တဲး ဂေ ဒူအီ မိူင် အာရာမ် တီ ပဲ တူတ့် ရန်ဆူ ဂေ။ အာနေမာန် တွိုန် ဘဲန် ဒါ တာင် အီ မိုဝ်း ပ့လူမ် မိုဝ်း ဟဲန့်။ မာလဲ၊ အန် မိုဝ်း ဆဝ် ဒု။

2 အူ ဆီငဲ၊ ဂေ ဒူအီ အာရာမ် ဘော ဟာဝ် ကာဂုဝ်း ဒီ ရန်ဆူ ဂေ ဘဲန် ဖိုင် ဘဲန် ဖိုင်။ ဂေ ဘော ပွိုန် ဒီ မှေတ့် တး ဂွန် အီဘိုန့် အူ ဝီ အီ မုး ဒူအီ အီဆာရေလ။ ဂွန် အီဘိုန့် တီ ဘော ကွယ် ဘဲန် မှာယ် အီဘိုန့် အာနေမာန် တွိုန်။ 3 အန် ဘော တဝ်း ဒီ ယာ ကာညာ အန်၊ “ဆေ ဒါ ကာညာ အုဝ် ဘော ပွိုန် ဒီ ဟာဝ် ဒူင် ကွယ် ဒူအီ ဘျာန် ဂြုဝ်း ဇဝ်ဖြာ ခဲင် မိူင် ဆာမာရီ၊ ဒူအီ တီ နပ် ဒီ တဲး ဆဝ် ဒု အန် ဟြာယ်။”

4 ပန် တီ အာနေမာန် ဘော ဝီ ဟာဝ် ကာလာင် ဒီ ဒါ ကာညာ အန် တဝ်း၊ “ဂွန် အီဘိုန့် အီ မုး ဒူအီ အီဆာရေလ၊ အန် ဟဲ့ တဝ်း ပါယ် နီ ပါယ် နီ ဒီ အုဝ်။” 5 ခုန်ဒီခမ် အီ အိုပ် မိူင် အာရာမ် ဝီ တဝ်း ဒီ အန်၊ “တဲး မဲ ဟာဝ်။ အုဝ် ဒီ ဒဲမ် ဘော ပဲ့၊ တိုယ် ဒီ ခုန်ဒီခမ် အီဆာရေလ တီ။” အန် ဘော ဟာဝ်၊ ဘော ဒိုဝ်း ဒီ ဂူင့် ရွိုန် ဂိုဝ် ထာလေန်။ ဘော ခြိဝ် ဒဝ် ဟြဲန့် ဘူင့် ဘော ခြိုင် တာ ဂိုဝ် ဇိုမ်။^a 6 အန် ဘော တိုယ် ဟာဝ် ပဲ့ တွိုန် ဒီ ခုန်ဒီခမ် အီ အိုပ် ဒူအီ အီဆာရေလ။ ခဲင် ပဲ့ တီ ဟဲ့ ဒဲမ် တဝ်း၊ “အုဝ် ဟဲ့ စ်ု ဒဲစေန့် အုဝ် အီ စိူဝ် အာနေမာန်၊ တဲး အန် ဂူင့် တး ပဲ့ နီ။ မှာန့် မဲ ခုန်ဒီခမ်၊ တဲး မဲ တဲး ဆဝ် ဒု အန် ဟြာယ်။”

7 ပန် တီ ခုန်ဒီခမ် အီဆာရေလ ဟဲ့ ဟွတ့် တိး ပဲ့ တီ၊ အန် ဘော ကာယာတ့် ခြိုင် အန် တဝ်း၊ “ဒူအီ ဝီ နီ မှဝ် မ့ပါယ် ပီ စ်ု အန် ဒဲစေန့် အန် တး ဒူင် ကွယ် အုဝ်။း အုဝ် ဘော မုး ဇဝ်ဖြာ၊ အီ နပ် ဒီ တဲး ဒူအီ အိမ်၊ ဒူအီ ယမ်။း အန် တဝ်း၊ တဲး အုဝ် ပီကဲန် ဆဝ် ဒု ဒဲစေန့် အန်။ တဲး ဘေ ယွတ် ပီ ဘူင် အန် နီ။ အန် ဟြေတ့် ဒီ ကာလုတ့် ဒီ အုဝ်။”

8 အာအေလီဆာ အီ မုး ဒူအီ ဘျာန် ဂြုဝ်း ဇဝ်ဖြာ၊ အန် ယီ ယိုဝ် လွင် ခုန်ဒီခမ် ဟဲ့ ကာယာတ့် ခြိုင် တာ အန်၊ အန် စ်ု အီ ဟာဝ် ကာလာင် ဒီ ခုန်ဒီခမ် တဝ်း၊ “ကူပ် မာဆေ ပီ ဆော ကာယာတ့် မဲ ခုန်ဒီခမ် ခြိုင် ပီ တာ မဲ။း ဆေ ဒူအီ ဝီ တီ ဘော တး၊ တဲး မဲ တိုယ် အန် တး ဒူင် ကွယ် အုဝ်၊ တဲး အန် နပ်၊ န့ မိုဝ်း ဒူအီ ဘျာန် ဂြုဝ်း ဇဝ်ဖြာ ကွယ် ခဲင် မိူင် အီဆာရေလ။” 9 ပန် တီ အာနေမာန် ဘော ပဝ့် လက်လဝ်၊ တး ဇမ် ဘာင် မာလုဝ်း ကာင် အာအေလီဆာ တွိုန်။ 10 အာအေလီဆာ ဘော စ်ု အီ ဟဝ် ဟာဝ် တဝ်း ဒီ အန်၊ “တဲး မဲ ဟာဝ် တာ အိုမ် ခဲင် ဘ့လဲင် ယောဒါန် အာဒါ ဘူ စိုပ်။ ဒုဝ် မဲ ဒီ ဝီ ကဲန်။ ဆဝ် ဒု မဲ ဒီ ဟြာယ်။”

11 ပန် တီ အာနေမာန် ဘော ရူ ဘော လေး ဟာဝ် တဝ်း၊ “အုဝ် ထာင်၊ ဒူအီ ဘျာန် ဂြုဝ်း ဇဝ်ဖြာ ဒီ တး ကွယ် ကာတတ် အုဝ်၊ ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အန်၊ ဒိုဝ်း ဘော ဒဲ အန် ဆူင့် ဝိဝ် ဆူင့် ဝေန့် ကာရူယ် ဒူင် မိုဝ်း ဆဝ် တီ၊ တဲး ဒု အုဝ် ဟြာယ်။ 12 အိုမ် ဘ့လဲင် အာဘာနာ ဂေ အိုမ် ဘ့လဲင် ဖဖာ ခဲင် မိူင် ဒါမာခူ ဆီ မွှိုမ် လွှိုမ် အိုမ် ခဲင် မိူင် အီဆာရေလ နီ ဒွန် မျုဝ်။ ဆေ အုဝ် တာ အိုမ် ဂေ တီ၊ အုဝ် ပီ ဒီ ဆီငါ။” အန် ဟဲ့ ဟွတ့် တဝ်း ပါယ် တီ အန် ဘော တဝ်း ဒီ ဝီ ဝိဝ် ကူပ် ရူ အန်။

13 ဒဲစေန့် အန် ဂေ ဘော ဝီ ကာဖြူမ် ဒီ တဝ်း ဒီ အန်၊ “အိုယ် မဲ ဒါ ကာညာ၊ ဆေ ဒူအီ အီ ဘျာန် ဂြုဝ်း ဇဝ်ဖြာ ဒီ ဘော စ်ု မဲ ဘူင် မျုဝ် အီ အာရေ တာင်၊ မဲ ဒီ ဘော ဘူင်။ ခုဝ်၊ ပီ ဝီ တဝ်း အန်၊ ‘တဲး မဲ တာ အိုမ်၊ တဲး မဲ ကဲန်၊’ ဟဲ့ ဝဲ မွှိုမ် ဘူင်။” 14 ဂေ ဟဲ့ ဟွတ့် တဝ်း ပါယ် တီ ဒီ အန်၊ အန် ဘော လိုပ် လူင် ခဲင် အိုမ် ဘ့လဲင် ယောဒါန် တွိုန်။ အန် ဘော တဲး ဒုဝ် အန် မ့ပြုတ် ခဲင် အိုမ် တီ အာဒါ ဘူ ဇေန့်၊ တဲး န့ ဒူပ် ပီ တဝ်း ဒူအီ ဘျာန် ဂြုဝ်း ဇဝ်ဖြာ တွိုန်။ ဟဲ့ ဟွတ့်၊ ဟုန် အန် ဂေ ယင် အန် ဘော ဝီ ကဲန်၊ ဝီ ပီ ယင် ဂွန် င။ ဆဝ် အန် ဘော ဟြာယ် အူ ဇေန့်။

15 အန် ဟဲ့ ဟွတ့် ဘူင် ပါယ် တီ ဘော အန် ဘော ဂေ အီ ဒူပ် အန်၊ ဂေ ဘော ဝီ တး ဒူင် ကွယ် ဒူအီ ပီ တိုယ် ဇဝ်ဖြာ တွိုန်။ ဂေ ဘော ဝီ တဝ်း ဒီ အန်၊ “ဒေါ တီ နီ၊ ယေ ဟဲ့ နပ်၊ ဒဲင် ကာဒါယ် နီ၊ အာဝ် မိုဝ်း ဇဝ်ဖြာ ပေါ အူ ကာဒင်။ ဇဝ်ဖြာ မိုဝ်း မီ ခဲင် မိူင် အီဆာရေလ နီ။ ကူပ် န့ ပါယ် တီ ယေ မှာန့်၊ တဲး မဲ ဒိုဝ်း လက်ဆွင် ပီ ဒွါ ယေ နီ။”

16 အန် ဝီ တဝ်း ဒီ ဂေ၊ “အုဝ် ကာလာင် ဂြုဝ်း မှာန် ဒီ ဘေ၊ အုဝ် တူ ဒိုဝ်း မာဆေ။” ဂေ ဆီ တဲး အာအေလီဆာ ဒိုဝ်း။ အန် ယီ တူ လုဝ်၊ တူ ဒိုဝ်း မာဆေ။

17 အာနေမာန် ပီ ဝီ တဝ်း၊ “ဆေ န့ ပါယ် တီ အုဝ် မှာန့် ဒီ ဒါင် ဟာဝ် ကာဒါယ် အာဒါ မာလုဝ် အာ ဒုဝ်။ ပူင့် အာတိုဝ် နီ ဟာဝ်၊ အုဝ် ဒီ ကြိုပ် ဒီ လှူ မီ ဒီ ဇဝ်ဖြာ နီ။ အုဝ် မိူဝ် အာဝ် ဟူ ကြိုပ် ဇဝ် ပီ ကြိုပ် အီ ဟဝ်။ 18 ဒဲင် တီ၊ အုဝ် မှာန့်၊ တဲး ဇဝ်ဖြာ ဂဝ်း ဝဲန် မှာပ် အုဝ်၊ ဆေ ဒါ ကာညာ အုဝ် ဘော ဒဲ့ ဘော ဘိုင် အုဝ် လိုပ် ဒူပ် အန် ခဲင် ဇူင် ဇဝ် ရိမ်မူန်။ ဆေ အန် ဒီ ဘော ပါ ဒဲ အုဝ်၊ ဂိုပ် ကြိုပ်၊ ဘော အုဝ် ဒီ ဘော လုဝ် ဂိုပ် ကြိုပ် ဒူပ် အန်၊ အုဝ် မှာန့်၊ ကွဲ့ တဲး န့ ဘဲန် မှာပ် ဒီ အုဝ်။”

19 အာအေလီဆာ ဝီ တဝ်း၊ “တဲး မဲ ဟာဝ် ဒါခိုယ်။” အန် ဘော ဟာဝ် ညှမ် တူင့်၊ 20 န့ မိုဝ်း အာကေဟာဇီ အီ မုး ဒဲစေန့် အာအေလီဆာ။ အန် ဝီ ဇေန့်ဇာ ခဲင် နဝ်း အန် တဝ်း၊ “ဒါ ကာညာ အုဝ် ပီ တူ ခမ် ဒီ ဒိုဝ်း ကြုဝ် ပီ ဒိုဝ်း တး အာနေမာန် အီ မုး ဒူအီ အာရာမ် နီ၊ န့ မွှိုမ် လှယ့် ကာဆဝ်။ အုဝ် ဒီ ကာဘ့လဲပ် ဒူပ် ဒီ ပန် အန်။ အုဝ် ဒီ ဟာဝ် အာခ်ု မှာန်၊ ဒိုဝ်း တး ဒီ အန် ခေါ အီ စဲက်။”

21 အာကေဟာဇီ ဘော ကာဘ့လဲပ် ဟာဝ် ဒူပ် အာနေမာန်။ အန် ဘော ယိုဝ်၊ န့ မိုဝ်း ဒူအီ အူ ဝီ ကာဘ့လဲပ် တး။ အန် ဘော လူင် ဒဲင် လက်လဝ် အန်၊ ဘ်ု ဒီ ဒီမွှတ် တဝ်း၊ “မှဝ် န့ ပါယ် ပီ တး မဲ။း ဟဲ့ ဒါခိုယ် တူတ့် ဒွန် မျုဝ်။း”

22 အာကေဟာဇီ ဝီ တဝ်း၊ “အိုဝ်၊ ဟဲ့ မုး၊ ဒါ ကာညာ အုဝ် ဝီ တဝ်း၊ ‘ဒေါ တီ နီ၊ ဟဲ့ မိုဝ်း ကာညူမ် အာ ဝီ ဝီ တး။ ဂါယ် မုး ဒူအီ ဘျာန် ဂြုဝ်း ဇဝ်ဖြာ၊ ဂါယ် တး ဒီ နွန် အာအေဖာရိမ်။ တဲး မဲ ဒွါ ရွိုန် အူ ထာလေန် ဘော ခြိုင် အာ ဇိုမ် ဒီ ဂါယ်။’”

23 အာနေမာန် ဝီ တဝ်း၊ “အုဝ် ဒီ တဲး အာ ထာလေန်။” အန် ဘော စ်ု ဂေ ဒိုဝ်း ရွိုန် အာ ထာလေန် ဟပ် ခဲင် ဟူ အာ ဘူင့်၊ ဘော ခြိုင် အာ ဇိုမ် တွိုန်၊ တဲး ဒဲစေန့် အန် ပး ဟာဝ် ယဲတ့် နာ အာတ့် အာကေဟာဇီ။ 24 ဘော ဇမ် ဒဲင် နွန် အူ ပ့လုဝ့်၊ အာကေဟာဇီ ဘော ဒိုဝ်း ကြုဝ် တွိုန် ဒီ ဂေ၊ တဲး အန် ဝေန့် ချြီင် ခဲင် ကာင် အန်၊ ဘော ဝီ စ်ု ဂေ ဝိဝ်။ 25 ဟဲ့ ဟွတ့်၊ အန် ဘော ဝီ ဟာဝ် ဒူင် ကွယ် ဒါ ကာညာ အန်။ အာအေလီဆာ ဘော ဒီမွှတ် အန် တဝ်း၊ “အိုယ် အာကေဟာဇီ၊ နာ မှဝ် မဲ တး။း” အန် ဝီ တဝ်း၊ “အုဝ် တူ မိုဝ်း ဒီ ဟာဝ် ဒီ မှဝ်။”

26 ပန် တီ အာအေလီဆာ ဝီ တဝ်း ဒီ အန်၊ “ဒေါ လေး လူင် ဒူအီ ဝီ တွိုန် ဒဲင် လက်လဝ် အန်၊ ဝီ ဘ်ု ဒီ ရွုး မဲ၊ မဲ ထာင် နဝ်း ဖွိုမ် အုဝ် တူ နပ် ပီ ဟဲ့ ဘူင် မဲ။း အာဝ် ကာအာပ် မဲ ဒိုဝ်း ရွိုန် ဂေ ခြိဝ်၊ ခြိုင် တာ၊ ဘော ကာပိုမ် ဟေ ဘ့လေ၊ ကာပိုမ် မာငုန်၊ ဘော မာဘူ ဂေ မာမက်၊ ဂေ မှာယ် အီ မုး အီဘိုန့် အီမာယ်။ 27 ကူပ် ဘူင် မဲ ပါယ် တီ၊ ဆဝ် ဒု အီ ဒွိုမ် ဒိုက် ဒီ အာနေမာန်၊ န့ ဒီ ဝီ ဒိုက် ဒီ မဲ ဘော ဒီ ခြိုဝ် မဲ ဆေဆေ။” ပါယ် တီ အာကေဟာဇီ ဘော ဝီ မိုဝ်း ဆဝ် ဒု။ န့ ကော လုယ် နှဲန် ဘျြီ။ အန် မိူဝ် အာဝ် ဟူ ပွိုန် ဒီ ကွယ် ဒူပ် ဒါ ကာညာ အန်။