1 န့ မိုဝ်း အူ ဆီငဲ၊ ဂေ ဖိုင် ဒူအီ ဘျာန် ဂြုဝ်း ဇဝ်ဖြာ တဝ်း ဒီ အာအေလီဆာ၊ “မဲ ဆာရာ၊ မဲ ယွတ် ဒူင် ကွယ် အေ နီ ဟဲ့ ကာချီ့ ကာဆဝ်။ 2 တဲး ယေ ဟာဝ် ဒိုဝ်း ဟေ အီ ကွယ် ဒီ ဘ့လဲင် အိုမ် ယောဒါန်၊ အူ ဝီ အူ လုန်၊ တဲး ယေ ဘူင် ဒူင် ဒီ ကွယ် ဒီ တီ။” အန် ဝီ တဝ်း ဒီ ဂေ၊ “အိုဝ်၊ တဲး ဘေ ဟာဝ်။”

3 န့ ဝီ မိုဝ်း အူ ဝီ၊ အန် ဝီ တဝ်း ဒီ အာအေလီဆာ၊ “တဲး ဘော မဲ ဟာဝ် ရိုမ် ဒူပ် ယေ။” ဟဲ့ ဟွတ့်၊ အာအေလီဆာ ဝီ တဝ်း၊ “အိုဝ်၊ ဘော အုဝ် ဒီ ဟာဝ် ရိုမ် ဒူပ် ဘေ။”

4 ဂေ ဘော ဟာဝ် ဇမ် ခူပ် ဘ့လဲင် ယောဒါန် တီ၊ ဂေ ဘော ကာဖြူမ် ဒီ ဂ်ု ဟေ။ 5 ဒေါ ဂ်ု ဂေ ဟေ တီ၊ န့ မိုဝ်း အူ ဝီ၊ မိုယ် အန် ဘော စုဝ်း ခဲင် အိုမ်။ အန် ဘော ဒတ် တဝ်း၊ “အိုယ် ဒါ ဆာရာ၊ အုဝ် ဟဲ့ ဝါယ် တး ကြုဝ် တီ ဒီ အီ ဟဝ်။”

6 ဒူအီ ပီ တိုယ် ဇဝ်ဖြာ ဝီ ဒီမွှတ် အန် တဝ်း၊ “န့ စုဝ်း ဒီ မှဝ်။း” ဒူအီ ဝီ တွိုန် ဘော နှဲ ဒီ အန် ဒူင် စုဝ်း။ အန် ဝီ ဒဲပ် ဟေ အူ ပွတ်၊ ဝီ ဘျွာ လူင် ဒီ တီ။ ဘ့လာ မိုယ် တီ ဘော နပ် ဒီ ဝီ ဘြိုယ် ဟုဝ့်။ 7 အန် ဝီ တဝ်း၊ “ဒိုဝ်း လေး။” ဒူအီ ဝီ တွိုန် ဘော ဒိုဝ်း လေး မိုယ် တီ။

8 ဝါယ် တီ၊ န့ မိုဝ်း ခုန်ဒီခမ် အီ အိုပ် မိူင် အာရာမ်၊ အန် ဟဲ့ တး ကာဂုဝ်း ဒီ မိူင် အီဆာရေလ။ အန် ဘော ဆင်ချာင် ဒီ ဒါ ဆိုက် အန် တဝ်း၊ “တဲး အေ ချ ဒီ နီ၊ ဒီ နီ။”

9 ဒူအီ ပီ တိုယ် ဇဝ်ဖြာ ဘော စ်ု အူ ဝီ ဟာဝ် ဒီ ခုန်ဒီခမ် ဒူအီ အီဆာရေလ တဝ်း၊ “တဲး ဘေ ဆာဒိက်၊ ဘေ ဟီ ဟာဝ် နာ နီ နာ နီ၊ ဒူအီ အာရာမ် ဟဲ့ တး ကွယ် ဒီ တီ။” 10 ပန် တီ ခုန်ဒီခမ် အီဆာရေလ ဝီ စ်ု ဂေ ဟာဝ် ဒူင် တဝ်း ဒူအီ ပီ တိုယ် ဇဝ်ဖြာ တွိုန် အူ ဇေန့်၊ တဲး ဂေ ချွင် ဒီ ယွတ်။ ဘဲန် ဇေန့် ဘဲန် ဇေန့် အာအေလီဆာ ဝီ ကာလာင် ဒူင် ဒီ ဝဝ့် ဂေ၊ တဲး ခုန်ဒီခမ် ဆာဒိက် ဒေါ ဟာဝ် ဒူအီ အန် ဒူင် ကွယ် ဂေ တီ။

11 ဟဲ့ ဟွတ့် ပါယ် တီ ခုန်ဒီခမ် အာရာမ် တွိုန် ဘော ရူ ကာဆဝ်။ အန် ဘော ဒီမွှတ် ဒါ ဆိုက် အန် တဝ်း၊ “မှဝ် န့ ပါယ် ပီ တူ ကာလာင် ဘေ ဒီ အုဝ်။း ကာတဲ အေ နီ အီ မှဝ် အီ ဘဲန် နဝ်း ခုန်ဒီခမ် ဒူအီ အီဆာရေလ တီ။း”

12 အန် ဟဲ့ ဟွတ့် တဝ်း ပါယ် တီ ဒဲစေန့် အန် အူ ဝီ ဝီ တဝ်း၊ “အိုယ် မဲ ခုန်ဒီခမ်၊ အာဝ် မုး ပါယ် တီ။ ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအေလီဆာ အီ ကွယ် ခဲင် မိူင် အီဆာရေလ တွိုန်၊ အန် ယိုဝ် ဂြုဝ်း ပီ ကာလာင် မဲ ဒူင် အိတ် မဲ။ အန် ဝီ ကာလာင် ဒီ ခုန်ဒီခမ် အီဆာရေလ။”

13 ခုန်ဒီခမ် ဝီ တဝ်း၊ “လုဝ် ဟာဝ် ယွတ် ဒူင် ကွယ် အန်၊ တဲး အေ ပွိုန် ဒီ ပက် တး အန်။” အီ ဟဝ် ဝီ တဝ်း ဒီ အန်၊ “အန် ကွယ် ခဲင် မိူင် ဒုဝ်ထာန်။” 14 အန် ဘော စ်ု ဒါ ဆိုက် အန် ဘော ဒါ ဘုဝ် အန်၊ တဲး ဂေ ပဝ့် လက်လဝ်၊ ဟာဝ် ဒီ မိူင် တီ။ ဂေ ဘော တး ရူပ် မိူင် တီ ခဲင် မှိုဝ်။

15 ဘော ဇမ် ပါ ခဲညှာ ဆိန့်ဝး ဒဲစေန့် ဒူအီ ပီ တိုယ် ဇဝ်ဖြာ ဘော ယိတ့်၊ လေး နာ ရေတ့်။ အန် ဘော ယိုဝ် ဒါ ဆိုက် ဂေ တွိုန် ဟဲ့ ပဝ့် မင်ပြွင့်၊ ပဝ့် လက်လဝ်၊ တး ရူပ် မိူင် တီ၊ အန် ဘော ဝီ ဝေန့် ကာလာင် ဒီ ဒါ ဆာရာ အန် တဝ်း၊ “အာလိုဝ်၊ ဒါ ဆာရာ အိုယ်၊ မှဝ် အေ ဒီ ပါယ် ဒေါ တီ နီ။း”

16 ဒူအီ ပီ တိုယ် ဇဝ်ဖြာ ဝီ တဝ်း၊ “အာဝ် လုဝ် ယုဝ်။ ဂေ အီ ကွယ် ရိုမ် ဒူပ် အေ၊ န့ ဆီ ကိူန် လွှိုမ် ဂေ။”

17 အာအေလီဆာ ဘော ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ မှာန့် တဲး ဒဲစေန့် အုဝ် နီ ပွိုန် ဒီ ယိုဝ်။” ဇဝ်ဖြာ ဘော ဘူင် တဲး ဒဲစေန့် အန် ယိုဝ်။ အန် ဘော ယွတ်၊ န့ မိုဝ်း မင်ပြွင့် ဂေ လက်လဝ် အီ ပီ ငဝ်၊ ဟဲ့ ကွယ် ရူပ် ဂေ၊ ကော နုဝ့် ဒဲင် နွန် ဒွန် ပ့လုဝ့်။ 18 ပါယ် တီ ဒူအီ အာရာမ် ဂေ ဘော လူင် ဒူင် ကွယ် အာအေလီဆာ။ အာအေလီဆာ ဘော ဆာခိုဝ် ဒီ ဇဝ်ဖြာ တဝ်း၊ “မှာန့်၊ တဲး မဲ တဲး ငါယ် ဂေ အပ်။” ဇဝ်ဖြာ ဘော တဲး ငါယ် ဂေ အပ် ဒွန် အီ။ န့ ဘော ဘဲန် ခဲ့ ပီ ဆာခိုဝ် အာအေလီဆာ။

19 အန် ဘော ကာလာင် ဒီ ဂေ တဝ်း၊ “အာဝ် မုး န့တေန့် နီ၊ အာဝ် မုး မိူင် နီ။ တး ဒူပ် အုဝ်၊ အုဝ် ဒီ ဟာဝ် တိုယ် ဘေ ဒီ ဒူအီ ပီ ဟြေတ့် ဘေ တီ။” ပန် တီ အန် ဘော ယူင့် ဟာဝ် ဂေ ဒီ မိူင် ဆာမာရီ။

20 ဂေ ဟဲ့ ဟွတ့် လိုပ် ခဲင် မိူင် ဆာမာရီ၊ အာအေလီဆာ ဘော ဝီ ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ တဲး ငါယ် ဂေ ဝီ ယိုဝ်။” ဇဝ်ဖြာ ဘော ဘူင် တဲး ငါယ် ဂေ ဝီ ယိုဝ် အူ ဇေန့်။ ပန် တီ ဂေ ဘော ဝီ နပ်၊ ဂေ ဟဲ့ ဟွတ့် ကွယ် ခဲင် မိူင် ဆာမာရီ။

21 ဝါယ် တီ၊ ခုန်ဒီခမ် အီဆာရေလ ဘော ယိုဝ် ဂေ ဘော ဝီ ဒီမွှတ် အာအေလီဆာ တဝ်း၊ “အိုယ် ဂုန့်၊ အေ ဒီ ပါယ် မှဝ်။း အေ ဒီ ငဝ်း ယမ် ဂေ။း”

22 အာအေလီဆာ ဝီ တဝ်း၊ “အာဝ် လုဝ် ငဝ်း တဲး ဂေ ယမ်။ မဲ မိူဝ် တူ ငဝ်း ဒူအီ ပဲ့ ဟဲ့ မှေတ့် မဲ တာ မာပွါ့ လာင် ဂေ အ မဲ။ ဒိုဝ်း အိုမ် ဂေ ခါမုန်၊ တဲး ဂေ ဟူမ်။ ဂေ ဟီ ဟွတ့် ဟူမ်၊ ဝီ တိုယ် တဲး ဂေ ဝိဝ် ဒူင် ကွယ် ဒါ ကာညာ ဂေ။” 23 အန် ဘော ရဲန် ကိူန် ပီ ဒီ ဟူမ်၊ န့ ကော ဒါန် ဘ့လွယ်။ ဂေ ဟဲ့ ဟွတ့် ဟူမ်၊ အန် ဘော တိုယ် ဂေ၊ တဲး ဂေ ဝေန့် ဒူင် ကွယ် ဒါ ကာညာ ဂေ။ ပန် တီ ဒူအီ မိူင် အာရာမ်၊ ဂေ အာဝ် ဟူ တး ကာဂုဝ်း ဒီ ဒူအီ အီဆာရေလ ပေါ အူ ဇေန့်။

24 ဝါယ် အန် တီ ခုန်ဒီခမ် အာဘေန်ဟာဒါတ် အီ အိုပ် မိူင် အာရာမ်၊ အန် ဘော ဒဲ့ ကာဇု ဒါ ဘုဝ် အန် ဂေ ဒါ ဆိုက် အန်၊ တဝ်း တဲး ဂေ ဟာဝ် ရူပ် မိူင် ဆာမာရီ။ 25 ခဲင် မိူင် ဆာမာရီ တီ၊ ပီ ဒီ ဟူမ် ပီ ဒီ ဟာပ်၊ န့ ငဝ်း ကာဆဝ် ကူပ် ကွယ် ရူပ် လှေန့် ဂေ မိူင် တီ။ ဂေ ကာဒုး ဒီ စိုဝ်း ဂိန့် မာလုဝ် အူ ဘူင့် အာဒါ ရွိုန် ဒါ ဂိုဝ် ဘူင့်။ ဘော ငှုဝ် အီ စိူဝ် အျီင် မာဘ့လူယ် ဂေ ဘော လုဝ် စိုဝ်း အူ ဘ့လဲ အာဒါ ရွိုန် ဖန် ဘူင့်။ 26 ဒေါ ဟာဝ် ခုန်ဒီခမ် အီဆာရေလ ဒဲင် ရဲင် မိူင် တွိုန်၊ န့ မိုဝ်း အီဘိုန့် အူ ဝီ ဒဲ့ အန် တဝ်း၊ “အိုယ် မဲ ခုန်ဒီခမ် အီ အိုပ် အုဝ်၊ မှာန့်၊ တဲး မဲ စွယ်။”

27 အန် ဝီ တဝ်း၊ “ဆေ ဇဝ်ဖြာ တူ စွယ်၊ မှဝ် အုဝ် ဒီ ပါယ် ဒီ စွယ်။း အာဝ် ပွိုန် ဒိုဝ်း ဒီ အူင့် ကာင်နဝ်း ဂေ ဒူင် ကြိတ် ဘ့လေ မာငုန်။” 28 ခုန်ဒီခမ် ပီ ဝီ တဝ်း ဒီ အန်၊ “မာဆေ ပီ လုဝ် မဲ။း” အန် ဝီ တဝ်း၊ “နီ၊ အီဘိုန့် ဝီ နီ၊ အန် ဟဲ့ တဝ်း၊ ‘အာတိုဝ်၊ တဲး အာယ် ဟူမ် ဂွန် မဲ၊ ခဲညှာ အာယ် ဘော ဝီ ဟူမ် ဂွန် အုဝ်။’ 29 ပါယ် တီ ယာယ် ဟဲ့ ကွင့် ဂွန် အုဝ် တဲး ယာယ် ဟူမ်။ ဘော ဇမ် ပါ ခဲညှာ၊ အုဝ် ဝီ တဝ်း ဒီ အန်၊ ‘ဒိုဝ်း တး ဂွန် မဲ၊ တဲး အာယ် ဟူမ်။’ အန် ဘော ဝီ ဟာဝ် ချြီင် ဂွန် အန်။”

30 ခုန်ဒီခမ် ဘော ယိုဝ် ဂြုဝ်း ပီ ကာလာင် အီဘိုန့် တီ၊ အန် ဘော ကာယာတ့် ခြိုင် တာ အန်။ အန် ပီ ဝီ ဟာဝ် ဒဲင် ရဲင် မိူင် တွိုန်၊ ဂေ ဒူအီ ဟဝ် ဘော ဝီ ယိုဝ်၊ အန် ဟဲ့ စှိုပ် ဒီ တာ ခြိုင် စာန် နာ ခဲင်။ 31 အန် ဝီ တဝ်း၊ “တဲး ဇဝ်ဖြာ ဒွါ ဒုက် ကာဆဝ် ဒီ အုဝ်၊ ဆေ အုဝ် တူ ပွိုန် ဒီ ငဝ်း အာအေလီဆာ အီ မုး ဂွန် အာဆာဖာတ် အာတိုဝ် နီ။”

32 ဒေါ အန် တီ အာအေလီဆာ ဘော ဂေ အီ မုး ဒါ တာင် ကွယ် ရိုမ် ခဲင် ကာင် အန်။ ခုန်ဒီခမ် ဝီ စ်ု ဒူအီ အူ ဝီ ဟာဝ် ဒူင် ကွယ် ဂေ။ အာအေလီဆာ ဝီ တဝ်း ဒီ ဂေ အီ ကွယ် ဒူပ် အန်၊ “ဘေ ယိုဝ်၊ ဒါ အီ ငဝ်း ဒူအီ ဟဲ့ စ်ု မှာယ် အန် တး ဒဲပ် ဂိန့် အုဝ်။ ဆေ မှာယ် အန် တီ ဟီ တး ဇမ်၊ တဲး ဘေ ကာဘိတ် မာလုဝ်း၊ ကွဲ့ တဲး အန် ပွိုန် ဒီ လိုပ်။ ဒါ ကာညာ အန် ဒီ ဝီ ဒူပ် တး နာ ပန်။”

33 ဒေါ ကာလာင် အာအေလီဆာ ဂြုဝ်း တီ၊ ဒူအီ ပီ စ်ု ခုန်ဒီခမ် တွိုန် ဘော တး။ ခုန်ဒီခမ် မိူဝ် ဘော တး တဝ်း၊ “ဒုက် နီ၊ ဇဝ်ဖြာ ဟဲ့ ဘူင်။ အုဝ် အာဝ် ဟူ လုဝ် ဘ်ု ဇဝ်ဖြာ။”