ခါန် 7
ပန် တီ အာအေလီဆာ ဘော ဝီ တဝ်း ဒီ ခုန်ဒီခမ်၊ “တဲး မဲ ထူမ် ဂြုဝ်း ဇဝ်ဖြာ။ ဇဝ်ဖြာ ဟဲ့ တဝ်း၊ ခဲညှာ အာခြာဝ် နီ၊ ဒီ မာလုဝ်း မိူင် ဆာမာရီ ဂေ ဒီ ယွင့် ခါမုန် ခဝ်ချုင် ဖွုန် ဘ့လဲ အာဒါ ရွိုန် အူ ဘူင့်၊ ဆီဂူင့်ရာ အူ ခွန် အာဒါ ရွိုန် အူ ဘူင့်။”
2 န့ ယီ မုး အာမာတ် ပီ ဘိုင် ခုန်ဒီခမ်၊ အန် ဝီ ဝျီ့ ဂြုဝ်း အာအေလီဆာ တဝ်း၊ “ဆေ ဇဝ်ဖြာ ပီ ဘော ဝိုဝ်း ဂါင်ဟြာဝ် မိူဝ်၊ အာဝ် နပ် ဒီ ဘဲန် ပါယ် တီ။” အာအေလီဆာ ဝီ တဝ်း၊ “ဘ်ု မဲ ယွတ်၊ မဲ ဒီ ယိုဝ် ဒီ ငါယ် မဲ။ မာလဲ၊ မဲ တူ ပွိုန် ဒီ ဟူမ်။”
လွင် ဂေ ဝီ မိုဝ်း ပီ ဒီ ဟူမ် ကိူန်
3 ဒီ ဘာင် မာလုဝ်း မိူင် တီ၊ န့ ယီ မိုဝ်း ဒူအီ ဒု ဖွုန် ဝီ။ ဂေ လာယ် ကာမွုန် တဝ်း၊ “အာဝ် ခုဝ် ကွယ် အေ ဒီ နီ၊ တဲး အေ ကော ယမ်။ 4 ဆေ အေ တဝ်း ဒီ လိုပ် ဟာဝ် ခဲင် မိူင်၊ အေ ဒီ ဘော ဟာဝ် ယမ် ခဲင် မိူင် တီ ကူပ် အေတ့် ပီ ဒီ ဟူမ်။ ဆေ အေ ကွယ် ဒီ နီ မိူဝ်၊ အေ တူ လွတ် ယမ်။ ဆေ န့ ပါယ် တီ ဟာဝ်၊ တဲး အေ ဟာဝ် နာ ကွယ် ဒါ ဆိုက် အာရာမ် ဂေ။ ဆေ ဂေ တူ ငဝ်း အေ၊ အေ ဒီ လွတ် ယမ်။ ဆေ ဂေ ဒီ ဘော ငဝ်း ယမ် အေ၊ အေ လုဝ် ခမ် ဒီ ယမ်။”
5 ဘာ ဒီ အပ် တီ ဂေ ဘော ဟာဝ် ဒူင် ကွယ် ဒါ ဆိုက် အာရာမ် ဂေ တွိုန်။ ဟဲ့ ဟွတ့်၊ ဂေ ဘော တး ဇမ် ဒီ ခူပ် ဒူင် ကွယ် ဒပ် တွိုန်၊ ဂေ ယီ တူ ယိုဝ် ဒူအီ ခေါ အူ ဝီ။ 6 ခုဝ်၊ ဇဝ်ဖြာ ဟဲ့ ဘူင် တဲး ဒူအီ အာရာမ် ယိုဝ် ဂြုဝ်း ယိုဝ် ဂြန့် ဒါ ဆိုက်၊ ဟဲ့ နှဲန် ဒီ ကိူန် ကာဆဝ် အီ ပဝ့် လက်လဝ် ဂေ မင်ပြွင့် တး။ ဟဲ့ ဟွတ့်၊ ဂေ ဘော လာယ် ကာမွုန် တဝ်း၊ “ခုန်ဒီခမ် အီဆာရေလ ဟဲ့ ဇာင် ခုန်ဒီခမ် ဟေထိတ် ဘော ခုန်ဒီခမ် အဲဂိုပ်၊ တဲး ဂေ တး ကာဂုဝ်း ဒီ အေ။” 7 ခုဝ် အန် တီ၊ ဂေ ဘော တဝ် ဘာ ဒီ အပ် တီ။ ဂေ မိူဝ် ဝဲန် ထိုပ် ဂေ၊ မင်ပြွင့် ဘော မာလုဝ် ဂေ။ ဒူင် ချ ဂေ ဘော ကြုဝ်ကြာမ် ဂေ ဒွန် မျုဝ်၊ ဂေ ဟဲ့ ဝဲန် တူတ့်။ နပ် မီ ဒုဝ် ဂေ၊ တဲး ဂေ လွတ်။
8 ဒူအီ ဒု ဂေ တွိုန် ဘော တး ဇမ် ဒူင် ချ ဂေ တီ၊ ဂေ ဘော လိုပ် ခဲင် ထိုပ် အူ ထိုပ်၊ ဘော ဟူမ် ပီ ဒီ ဟူမ်။ ဂေ ဘော ဒိုဝ်း ခြိုင် တာ ဘော ရွိုန် ဂေ ခြိဝ်၊ ဝီ ဟာဝ် ချြီင် ပေါ ပ့လုဝ့်။ ဂေ ပီ ဝီ တး လိုပ် ပေါ အူ ထိုပ်၊ ပီ ဝီ ဒိုဝ်း ကြုဝ်ကြာမ် ခဲင် ထိုပ် တီ၊ ဝီ ဟာဝ် ချြီင်။
9 ဟဲ့ ဟွတ့်၊ ဂေ ဝီ လာယ် ကာမွုန် တဝ်း၊ “အုဝ်၊ ပီ ဘူင် အေ နီ၊ အာဝ် နှဲန် ဒီ မုး။ အာတိုဝ် နီ၊ န့ မုး ဆီငဲ လုဝ် ကာလာင် လွင် နာ ဘွတ်။ ဆေ အေ တူ ကာလာင်၊ ဆေ အေ ကွယ် ဟီ ဇမ် ပြဲ ဝး၊ အေ ဒီ ဘော ဇမ် ဒုက်။ ခုဝ်၊ တဲး အေ ဟာဝ် ကာလာင် ဒီ ဒူအီ ခဲင် ဟုဝ် ခုန်ဒီခမ်။”
10 ဂေ ဘော ဟာဝ် ဒဲ့ ဒူအီ ဘ်ု မာလုဝ်း မိူင် တဝ်း၊ “ယေ ဟဲ့ ဟွတ့် တး ယွတ် ဒူင် ချ ဒူအီ အာရာမ်။ ယေ တူ ယိုဝ် အာဆေ။ အာဝ် မိုဝ်း ဂြုဝ်း ဂြန့် ဒူအီ ခေါ အူ ဝီ။ န့ မိုဝ်း မီ မာလုဝ် ဂေ မင်ပြွင့် ဂေ။ ထိုပ် ဂေ ယီ ဆီ ကွယ် ပီ ဘြိမ်။” 11 ပန် တီ ဒူအီ အီ ဘ်ု မာလုဝ်း ဘော ကာလာင် ဒီ ဂေ အီ ကွယ် ခဲင် မိူင် ခဲင် ဟုဝ် တွိုန်။
12 ခုန်ဒီခမ် ဘော ယိတ့် ဆိန့် ဆိန့်ဝး ဝွင့်၊ ကာလာင် ဒီ အာမူ အာမာတ် အန် တဝ်း၊ “အုဝ် ဒီ ကာလာင် လွင် ပီ ဒီ ဘူင် ဒူအီ အာရာမ် ဂေ ဒီ အေ။ ကူပ် ဟဲ့ နပ် ဂေ၊ အေ ဟဲ့ အေတ့် ပီ ဒီ ဟူမ်၊ ဂေ ဟာဝ် ချြီင် ဒုဝ် ဂေ ခဲင် ပြဲ အီ ကွယ် နာ ရေတ့် ဒူင် ချ ဂေ။ ဂေ ကာဖာ တဝ်း၊ ‘ဆေ ဒူအီ အီဆာရေလ ဟီ လေး နာ ရေတ့် မိူင်၊ အေ ဝီ မှေတ့် ဒုဝ် အိမ် ဂေ၊ ဟာဝ် လိုပ် ခဲင် မိူင် ဂေ။’”
13 အာမူ အာမာတ် အန် အူ ဝီ ဝီ တဝ်း၊ “ဟာဝ် တဲး အေ တိုယ် ဒူအီ ဖန် ဝီ ဒိုဝ်း ပဝ့် မင်ပြွင့် အီ ဆီ ကွယ် ခဲင် မိူင် နီ၊ တဲး ဂေ ဟာဝ် ယွတ်။ အေ ပီ ဘော ကွယ် ဒီ နီ၊ အေ ဒီ ယမ်။ ခုဝ်၊ အာဝ် လိူက်၊ ဆေ အေ ဟာဝ် ထေဝ် ဒီ ယွတ်။”
14 ဟဲ့ ဟွတ့်၊ ခုန်ဒီခမ် ဘော စ်ု ဂေ ရဲန် လက်လဝ် အာ လှာင် ဘော မ့ပြွင့် အာ ဒုဝ်။ အန် ဘော တဝ်း ဒီ ဂေ အီ ပဝ့် လက်လဝ် တီ၊ “တဲး ဘေ ဟာဝ် ယွတ်။” 15 ဂေ ဘော ဟာဝ် ဒူပ် န့တေန့် ပီ တဝ် ဒူအီ အာရာမ်၊ ကော ဇမ် ဒီ ဘ့လဲင် ယောဒါန်။ ဒွန် ပ့လုဝ့် ဂေ ဘော ယိုဝ် ကြုဝ်ကြာမ် ဂေ ခြိုင် တာ ဒူအီ အာရာမ် ပဲ့ ဟဲ့ ဝဲန် ဂေ ဒူပ် န့တေန့် တီ ကူပ် ဟဲ့ ကာမှဲ ဂေ ဒီ တဝ်။ ဟဲ့ ဟွတ့် ဂေ ဘော ဝီ ဝေန့် ကာလာင် ဒီ ခုန်ဒီခမ်။ 16 ပန် တီ ဒူအီ ခဲင် မိူင် တွိုန် ဘော ဝီ ဟာဝ် ဒိုဝ်း ကြုဝ်ကြာမ် ဒူအီ အာရာမ် ဂေ တီ။ ဂေ ဘော ယွင့် ကာပဲ့ ခဝ်ချုင် ဖွုန် ဘ့လဲ အာဒါ ရွိုန် အူ ဘူင့်၊ ဒီဂါဝ် ဆီဂူင့်ရာ အူ ခွန် အာဒါ ရွိုန် အူ ဘူင့်။ န့ ဘော ဘဲန် ခဲ့ ပီ တဝ်း ဒူအီ ပီ တိုယ် ဇဝ်ဖြာ တွိုန်။ 17 ခုန်ဒီခမ် ဟဲ့ စ်ု အာမာတ် အန် ဝီ ပီ ဘိုင် အန် တွိုန်၊ တဲး အန် ဘဲန် ဒါ အီ ဘ်ု မာလုဝ်း မိူင်။ ဒူအီ ဘော ညဲတ့် ဟာဝ် ဒဲင် အန်၊ တဲး အန် ကော ယမ် ဘာင် မာလုဝ်း မိူင် တီ။ ပါယ် တီ န့ ဘော ဘဲန် ခဲ့ ပီ ဒွိုမ် တဝ်း ဒူအီ ပီ တိုယ် ဇဝ်ဖြာ ဒေါ တး ခုန်ဒီခမ် ဒူင် ကွယ် အန် တွိုန်။ 18 န့ ဘော ဘဲန် ခဲ့ ပီ ကာလာင် ဒူအီ ပီ တိုယ် ဇဝ်ဖြာ ဒီ ခုန်ဒီခမ် တွိုန်၊ ဒေါ တဝ်း အန်၊ “ခဲညှာ အာခြာဝ် နီ၊ ဒီ ဘာင် မာလုဝ်း မိူင် ဆာမာရီ၊ ဂေ ဒီ ယွင့် ခါမုန် ခဝ်ချုင် ဖွုန် ဘ့လဲ အာဒါ ရွိုန် အူ ဘူင့်၊ ဘော ဆီဂူင့်ရာ အူ ခွန် အာဒါ ရွိုန် အူ ဘူင့်။”