1 ဝါယ် အန် တီ န့ မုး အီဘိုန့် တွိုန်၊ ဝီ ပဲ့ ဟဲ့ ဒွိုမ် ပီအိမ် အာအေလီဆာ ဂွန် အန်။ အာအေလီဆာ ဝီ တဝ်း ဒီ အန်၊ “ဘော မဲ၊ ဘော န့ဟူမ် မဲ၊ တဲး ဘေ ဟာဝ် ကွယ် ပေါ ပ့လုဝ့်။ ခုဝ်၊ ဇဝ်ဖြာ ဟဲ့ တဝ်း၊ ခဲင် မိူင် နီ န့ ဒီ မိုဝ်း အာခြာဝ် ဒီ အေတ့် ပီ ဒီ ဟူမ် အာဒါ ဘူ ဆီနမ်။” 2 အန် ဘော ထူမ် ဂြုဝ်း ဒူအီ ပီ တိုယ် ဇဝ်ဖြာ တွိုန်။ ဘော အန် ဘော ဒူအီ ခဲင် န့ဟူမ် အန်၊ ဂေ ဟာဝ် ကွယ် ခဲင် မိူင် ဖီလီထီ အာဒါ ဘူ ဆီနမ်။

3 ဟဲ့ ဟွတ့် ပွုန် ဘူ ဆီနမ် တွိုန်၊ အန် ဘော ဝီ လေး ခဲင် မိူင် ဖီလီထီ၊ ဝီ တး မှာန့် ကာင် အန် ဂေ မာန် အန် ဒီ ခုန်ဒီခမ်။ 4 ခုန်ဒီခမ် ဟဲ့ ကွယ် ကာမွုန် ဒီ အာကေဟာဇီ အီ မုး ဒီဘဲ ဒူအီ ပီ တိုယ် ဇဝ်ဖြာ။ အန် ဟဲ့ တဝ်း၊ “တဲး မဲ ကာလာင် ဒီ အုဝ် လွင် အီ မွှိုမ် အာမ် ပဲ့ ဟဲ့ ဘူင် အာအေလီဆာ။”

5 ဒေါ ကာလာင် အာကေဟာဇီ ဒီ ခုန်ဒီခမ် လွင် ပဲ့ ဟဲ့ ဘူင် အာအေလီဆာ တဲး ဂွန် အီ ဟဲ့ ယမ် ဝီ ယိတ့် ဝီ အိမ်၊ န့ မုး မာ ဂွန် ဝီ တီ၊ အန် ဘော တး၊ မှာန့် ကာင် ဂေ မာန် အန် ဒီ ခုန်ဒီခမ်။ အာကေဟာဇီ ဝီ တဝ်း ဒီ ခုန်ဒီခမ်၊ “အီဘိုန့် ဝီ နီ၊ အန် မုး မာ ဂွန် တီ။ န့ မုး ဂွန် အီမာယ် အန်၊ ပီ ဘူင် အာအေလီဆာ တဲး အန် ဝီ ယိတ့် ဝီ အိမ်။” 6 ခုန်ဒီခမ် ဘော ဒီမွှတ် အီဘိုန့် လွင် အန် တီ။ အီဘိုန့် တွိုန် ဘော ကာလာင် ဒီ အန်။ ခုန်ဒီခမ် ဘော ဝီ စ်ု ဒဲစေန့် အန် အူ ဝီ တဝ်း၊ “ဒိုဝ်း တူတ့် ကြုဝ်ကြာမ် အန်၊ ဘော အီ လေး တး ခဲင် မာန် အန် ဆိန့် ဒေါ ဟာဝ် အန် ကော ဇမ် အာတိုဝ် နီ၊ ဝီ ဒွါ ဝိဝ် တူတ့် ဒီ အန် ဒွန် မျုဝ်။”

7 ဝါယ် အန် တီ အာအေလီဆာ ဘော ဟာဝ် ဒီ မိူင် ဒါမာခူ။ ဒေါ အန် တီ အာဘေန်ဟာဒါတ် အီ မုး ခုန်ဒီခမ် ခဲင် မိူင် အာရာမ် ဟဲ့ မိုဝ်း ဆဝ်။ အီ ဟဝ် ဘော တဝ်း ဒီ ခုန်ဒီခမ်၊ “ဒူအီ ပီ တိုယ် ဇဝ်ဖြာ ဟဲ့ တး ဇမ် ဒီ နီ။”

8 ခုန်ဒီခမ် ဝီ တဝ်း ဒီ အာဟာစေလ၊ “ဒိုဝ်း မဲ ဂူင့် လက်ဆွင် ဟာဝ်၊ ဘ်ု ဒီ ရွုး ဒူအီ ပီ တိုယ် ဇဝ်ဖြာ ဒေါ ဟာဝ် အန် ဒူပ် န့တေန့်၊ ဒီမွှတ် အန် လွင် ဆဝ် အုဝ် နီ၊ ယုဝ် န့ ဒီ နပ် ဒီ ကဲန်။”

9 အာဟာစေလ ဘော ဂူင့် လက်ဆွင် အီ မုး ကြုဝ် ဘွတ် ဘဲန် မျုဝ် ဘဲန် မျုဝ် ခဲင် မိူင် ဒါမာခူ။ အန် ဘော ဒါင် မင်ပြွင့် ကာဟာတ့် အာဒါ ဖွုန် ဂိုဝ် ဒုဝ်၊ ဘော ဟာဝ် ဘ်ု ဒီ ရွုး အာအေလီဆာ။ ဒူအီ ပီ တိုယ် ဇဝ်ဖြာ ဘော တး ဇမ်၊ အန် ဘော တဝ်း၊ “ဂွန် မဲ ဆာရာ အီ မုး ခုန်ဒီခမ် အီ အိုပ် မိူင် အာရာမ်၊ အီ စိူဝ် အာဘေန်ဟာဒါတ်၊ အန် ဟဲ့ စ်ု အုဝ် တး။ အန် ဒီမွှတ် မဲ တဝ်း၊ ‘ဆဝ် အုဝ် နီ၊ န့ ဒီ နပ် ဒီ ကဲန်။း’”

10 အာအေလီဆာ ဝီ တဝ်း၊ “မဲ ဝီ ဝေန့် ကာလာင် ဒီ ခုန်ဒီခမ် တဝ်း၊ ‘ဆဝ် မဲ တီ၊ န့ ဒီ ကဲန်။’ မာလဲ၊ ဇဝ်ဖြာ ပီ ဝီ ဘျ ဒီ အုဝ် လွင် ဒီ ယမ် အန်။” 11 ဒူအီ ပီ တိုယ် ဇဝ်ဖြာ ဘော ဝီ ယွတ် တွင့် ဒူအီ တွိုန်၊ တဲး အန် ကော ဆာယ်။ ဟဲ့ ဟွတ့်၊ ဒူအီ ပီ တိုယ် ဇဝ်ဖြာ ဘော ဝီ ယာမ်။

12 အာဟာစေလ ဝီ တဝ်း၊ “မှဝ် န့ ပါယ် ပီ ယာမ် မဲ ဆာရာ။း” အန် ဝီ တဝ်း၊ “ခုဝ်၊ အုဝ် ဟဲ့ နပ် မဲ ဒီ ဘူင် နာ တူ မွှိုမ် ဒီ ဂေ ဒူအီ အီဆာရေလ။ မဲ ဒီ ဒိုဝ်း ငဝ် ဒုဝ့် မိူင် ဂေ အီ မိုဝ်း ရဲင်။ မဲ ဒီ ငဝ်း ယမ် ဒူအီ နှိုမ် ဂေ။ မဲ ဒီ ဒိုဝ်း ဂွန် ဂေ ဆတ့် ဒီ ကာဒါယ်။ မဲ ဒီ ပြေး ဘော ဝတ့် အီဘိုန့် အီ ဟဲ့ မိုဝ်း ဂွန် ခဲင် ဝတ့်။ အုဝ် ယာမ် ကူပ် ပါယ် တီ။”

13 အာဟာစေလ ဝီ တဝ်း၊ “အုဝ် ဒဲစေန့် မဲ ဆာရာ နီ၊ အုဝ် ပီ မာဆုဝ်။ မှဝ် အုဝ် ဒီ ပါယ် ဒီ ဘူင် အီ ညှာပ် ခဲ့ တီ။း” အာအေလီဆာ ဝီ တဝ်း၊ “ဇဝ်ဖြာ ဟဲ့ ဟွတ့် ဘျ ဒီ အုဝ် လွင် မဲ ဒီ ဘဲန် ခုန်ဒီခမ် အီ အိုပ် မိူင် အာရာမ်။”

14 ဟဲ့ ဟွတ့် အာဟာစေလ ဘော ဝီ ဝိဝ် ဇမ် ဒူင် ကွယ် ဒါ ကာညာ အန်။ ခုန်ဒီခမ် ဘော ဒီမွှတ် အန် တဝ်း၊ “အာအေလီဆာ တဝ်း မာဆေ ဒီ မဲ။း” အန် ဝီ တဝ်း၊ “အန် ဟဲ့ တဝ်း ဒီ အုဝ်၊ ဆဝ် မဲ ဒါ ကာညာ၊ န့ ဒီ ကဲန် အာခ်ု မှာန်။” 15 ဘော ဇမ် ပါ ခဲညှာ အန် ဝီ ဒိုဝ်း ဟိုပ် စိုပ် ခဲင် အိုမ်၊ ကာဘိတ် နာ ခုန်ဒီခမ်၊ တဲး အန် ကော ယမ်။ အာဟာစေလ တွိုန် ဘော ဝီ ဘဲန် ခုန်ဒီခမ်၊ ဝီ ပ့လု အာဘေန်ဟာဒတ်။

16 အာယုဝ်ရမ် အီ မုး ဂွန် ခုန်ဒီခမ် အာဟပ် တွိုန် ဟဲ့ ဘဲန် ခုန်ဒီခမ် အီ အိုပ် ဒူအီ အီဆာရေလ အာဒါ ဖန် ဆီနမ်၊ အာယေဟုဝ်ရမ် ဝီ စုး ဒီ အိုပ် မိူင် ယူဒါ။ ဒေါ အန် တီ ဘော ဂုန့် အန် အီ မုး အာယောဆာဖာတ် ဆီ ကွယ် ခဲင် မိူင် ယူဒါ။ 17 ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ နုဝ့် အူယ် ဂိုဝ် ဒီ အာ ဆီနမ်။ အန် ဘော ဝီ အိုပ် မိူင်၊ ကွယ် ခဲင် မိူင် ယေရူဆာလဲမ် အာဒါ ဒါ ဆီနမ်။ 18 အန် ဘူင် ဒူပ် ပီ ပါယ် ခုန်ဒီခမ် အီဆာရေလ။ ခုဝ်၊ အန် ခတ် ဒိုဝ်း ဂွန် အီဘိုန့် ခုန်ဒီခမ် အာဟပ်။ အန် ဘူင် နာ တူ မွှိုမ် ပီ တူ အိုင် ဇဝ်ဖြာ အီ ပီ ပီ ဘူင် ဒူအီ အာဟပ် တွိုန်။

19 ဇဝ်ဖြာ ယီ လှုဝ်း အာဒါဝိတ်။ ခုဝ်၊ အန် တူ ဆီ ဘူင် တဲး မိူင် ယူဒါ လိုဝ်။ အန် ဟဲ့ ဒွိုမ် ဒွါ ကာဒိက် ဆတ်ဇာ ဒီ အာဒါဝိတ်၊ တဝ်း ဒီ တဲး န့ မိုဝ်း လှုက်လှာန် အန် အီ အိုပ် မိူင် ယူဒါ ဆေဆေ။

20 ဒေါ မုး စုဝ် အာယေဟုဝ်ရမ် တီ၊ ဒူအီ ခဲင် မိူင် အေဒူမ် အာဝ် ဟူ ဒူပ် ခုန်ဒီခမ် အီ အိုပ် မိူင် ယူဒါ။ ဂေ ဘော ဝီ စုဝ့် ဒူအီ ဂေ အူ ဝီ၊ တဲး အန် ဘဲန် ခုန်ဒီခမ် ဂေ။

21 အာယေဟုဝ်ရမ် တွိုန် ဘော ဒဲ့ ခဲ့ ကွယ် ဒါ ဆိုက် ဂေ ဒါ ဘုဝ် အန်၊ တဲး ဂေ ပဝ့် လက်လဝ် ဟာဝ် ဒီ မိူင် စာအီရ၊ တဲး ဂေ ပွိုန် ဒီ ကာဂုဝ်း ဒီ ဒူအီ မိူင် အေဒူမ် တွိုန်။ ဂေ ဒါ ဘုဝ် အီ ပဝ့် လက်လဝ် တွိုန် ဘော ကာဂုဝ်း ဒီ ဒူအီ အေဒူမ် အီ ကွယ် ရူပ် ဂေ တွိုန်။ ဂေ ဒူအီ အေဒူမ် ဘော ကာဒုး ဒီ တဝ် ဒူင် ကွယ် ဘြိမ် ဂေ။ 22 ကော ဇမ် အာတိုဝ် နီ ဒူအီ မိူင် အေဒူမ် အာဝ် ဟူ ဒူပ် ခုန်ဒီခမ် အီ အိုပ် မိူင် ယူဒါ။ ဒေါ အန် တီ ဘော မိူင် လီပါနာ အာဝ် ဟူ ဒူပ် ခုန်ဒီခမ် အီ အိုပ် မိူင် ယူဒါ။

23 လွင် ပဲ့ ဟဲ့ ဘူင် အာယေဟုဝ်ရမ် အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 24 အာယေဟုဝ်ရမ် တီ၊ အန် ဘော ယမ် ပီ ဒါ ဒါ အန်။ ဂေ ဘော ဒိပ် အန် ခဲင် မိူင် အာဒါဝိတ်။ ဂွန် အီမာယ် အန် အီ စိူဝ် အာဟာဇီယာ ဘော ဝီ ပ့လု အန်၊ ဘဲန် ခုန်ဒီခမ်။

25 ခုန်ဒီခမ် အာယုဝ်ရမ် အီ မုး ဂွန် ခုန်ဒီခမ် အာဟပ် အီ အိုပ် ဒူအီ အီဆာရေလ၊ အန် ဟဲ့ အိုပ် ဘိုင် မိူင် အာဒါ ဂိုဝ် ဒီ အာ ဆီနမ်။ ဒေါ အန် တီ အာဟာဇီယာ အီ မုး ဂွန် ခုန်ဒီခမ် အာယေဟုဝ်ရမ်၊ အန် ဘော ဝီ ဘဲန် ခုန်ဒီခမ်၊ ဝီ အိုပ် မိူင် ယူဒါ။

26 ဒေါ ဘဲန် အာဟာဇီယာ ခုန်ဒီခမ်၊ အာဆာက် အန် ဟဲ့ ပွိုန် အာ ဂိုဝ် ဒီ အာ ဆီနမ်။ အန် ဘော အိုပ် ဘိုင် မိူင် ယူဒါ၊ ကွယ် ခဲင် မိူင် ယေရူဆာလဲမ် အာဒါ အူ ဆီနမ်။ မာ အန် စိူဝ် နာင် အေထာလီ။ အန် မုး လှာန် အာအုဝ်မာရီ အီ မုး ခုန်ဒီခမ် ဒူအီ အီဆာရေလ တွိုန်။ 27 ကူပ် မုး အန် အျီ့ ခုန်ဒီခမ် အာဟပ်၊ အန် မိူဝ် ဘူင် နာ တူ မွှိုမ်၊ ဘူင် ပီ တူ အိုင် ဇဝ်ဖြာ၊ တဲး န့ ပီ ပီ ဒွိုမ် ဘူင် ခြိုဝ် အာဟပ် တွိုန်။

28 အန် ဘော ဒူပ် အာယုဝ်ရမ် အီ မုး ဂွန် အာဟပ် တွိုန်၊ တဲး ဒါ ဆိုက် ဂါယ် ဟာဝ် ကာဂုဝ်း ဒီ မိူင် ရာမူတ်ဂီလေအာတ် အီ မုး ဒူင် အိုပ် ခုန်ဒီခမ် အာဟာစေလ အီ အိုပ် မိူင် အာရာမ် တွိုန်။ အာယုဝ်ရမ် ဘော ကာဒုး ဆဝ် ဒေါ ကာဂုဝ်း ဂေ ဒီ ဒူအီ အာရာမ် တီ။ 29 ခုန်ဒီခမ် အာယုဝ်ရမ် တီ၊ အန် ဘော ဝီ ဝေန့် ဒီ မိူင် ယေစာရေလ၊ တဲး အန် ပွိုန် ဒီ ဆီနမ် ဒိမ် အန်၊ တဲး န့ ကဲန်။ န့ မုး ဒိမ် ပဲ့ ဟဲ့ တာ ဒိုဝ် ဂေ ဒူအီ အာရာမ် ဒီ အန် ဒေါ ကာဂုဝ်း ဂေ ဒီ ခုန်ဒီခမ် အာဟာစေလ အီ အိုပ် မိူင် အာရာမ် ဒေါ ကွယ် ဂေ ဒီ မိူင် ရာမူတ်ဂီလေအာတ် တွိုန်။ ဒေါ မိုဝ်း အန် ဆဝ် တီ၊ အာဟာဇီယာ အီ မုး ဂွန် အာယေဟုဝ်ရမ် အီ အိုပ် ဒူအီ အာယူဒါ၊ အန် ဘော တး စ်ု၊ တး ယွတ် အာယုဝ်ရမ် ဒီ မိူင် ယေစာရေလ တီ။