1 ဝါယ် တီ အာအေလီဆာ အီ မုး ဒူအီ ဘျာန် ဂြုဝ်း ဇဝ်ဖြာ တွိုန် အန် ဘော ဝီ ဒဲ့ အူ ဝီ ခဲင် ဖိုင် ဒူအီ ဘျာန် ဂြုဝ်း ဇဝ်ဖြာ ဘော တဝ်း ဒီ အန်၊ “တဲး မဲ ဒိုဝ်း ဟူ မဲ၊ ဒိုဝ်း ကာပဝ် နာမန်၊ ဟာဝ် ဒီ မိူင် ရာမူတ်ဂီလေအာတ်။ 2 မဲ ဟီ ဇမ် ခဲင် မိူင် တီ၊ မဲ ဟြေတ့် အာယေဟူ အီ မုး ဂွန် အာယောဆာဖာတ်၊ အီ မုး ဘော လှာန် အာနိမ်ဆီ။ တဲး မဲ ဒဲ့ အာယေဟူ လေး တ ဖိုင် ဂိုက် အန်။ တဲး မဲ ဒဲ့ အန် လိုပ် ခဲင် ကာင်၊ လိုပ် ခဲင် ဟူင် အီ ကွယ် နာ ခဲင်။ 3 မဲ ဘော ဒိုဝ်း နာမန် နီ၊ ဖဝ်း ဒီ ဂိန့် အန်၊ တဝ်း ဒီ အန်၊ “ဇဝ်ဖြာ တဝ်း ဒီ မဲ၊ ‘အုဝ် ဒီ ဖဝ်း နာမန် ဒီ ဂိန့် မဲ၊ တဲး မဲ ဘဲန် ခုန်ဒီခမ် အီ အိုပ် ဒူအီ အီဆာရေလ။’ ဟဲ့ ဟွတ့် တဲး မဲ ဝီ ဝိုဝ်း မာလုဝ်း၊ လေး တဝ် အူ ဇေန့်။ ကွဲ့ ဘ်ု လှေန့်။”

4 ဒူအီ ပဲ့ ဟဲ့ ရဝ်း အာအေလီဆာ၊ အီ မုး ဒူအီ အီ ဘျာန် ဂြုဝ်း ဇဝ်ဖြာ၊ အန် ယီ ဆီ မုး ကာညူမ်။ အန် ဘော ဟာဝ် ဒီ မိူင် ရာမူတ်ဂီလေအာတ် တီ။ 5 အန် ဘော တး ဇမ် ခဲင် မိူင်၊ အန် ဘော ယိုဝ်၊ ဒါ ဘုဝ် ဂေ ဟဲ့ တုတ့် လာယ် ကာမွုန်၊ အန် ဘော တဝ်း ဒီ ဂေ၊ “အိုယ် ဘေ ဒါ ဘုဝ်၊ အုဝ် မိုဝ်း ပီ ဆီ ကာလာင် ဒီ ဘေ။” အာယေဟူ ဝီ တဝ်း၊ “အီ မှဝ် မဲ ဆီ ကာလာင်။း” အန် ဝီ တဝ်း၊ “အုဝ် ဒီ ကာလာင် ဒီ မဲ၊ အီ မုး ဒါ ဘုဝ် တာင်။”

6 ပါယ် တီ အာယေဟူ ဘော ဝီ လိုပ် ခဲင် ကာင်။ ဒူအီ ဘျာန် ဂြုဝ်း ဇဝ်ဖြာ တွိုန် ဘော ဒိုဝ်း နာမန်၊ ဖဝ်း ဒီ ဂိန့် အန်၊ ဘော တဝ်း ဒီ အန်၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် တဝ်း၊ ‘အုဝ် ဒီ ဖဝ်း နာမန် ဒီ ဂိန့် မဲ၊ တဲး မဲ ဘဲန် ခုန်ဒီခမ် ဒူအီ ပီ အိုပ် ဇဝ်ဖြာ အီ မုး ဒူအီ အီဆာရေလ။ 7 မဲ လုဝ် ငဝ်း ဝဲန် ဒူအီ အာမျုဝ် အာဟပ် အီ မုး ဒါ ကာညာ မဲ။ ပါယ် တီ အုဝ် ဒီ ဒမ် မှာပ် ဒီ နာင် ယေစာဘေန် ကူပ် ဟဲ့ ငဝ်း ဝဲန် အန် ဒူအီ ဘျာန် ဂြုဝ်း ဇဝ်ဖြာ ဘော ကူပ် ဟဲ့ ငဝ်း ယမ် အန် ဒဲစေန့် ဇဝ်ဖြာ ဘောကာဂ့လျီတ်။ 8 ခဲ့ ကွယ် အီမာယ် အာမျုဝ် အာဟပ် ဘောကာဂ့လျီတ်၊ အုဝ် ဒီ တဲး ဂေ စှိုမ်။ န့ ဘော မုး မှာယ် အီ၊ ဘော အီ တူ ဒွိုမ် ဘဲန် မှာယ် အီ၊ အာဝ် လိူက်။ အုဝ် ဒီ ငဝ်း ဝဲန် တူတ့် ဒွန် အီ။

9 အုဝ် ဒီ တဲး လှုက်လှာန် အာဟပ် ပီ လှုက်လှာန် အာယေရုဝ်ဘုဝ် အီ မုး ဂွန် အာနေဘတ်၊ တဲး န့ ပီ ဘော လှုက်လှာန် အာဘာဆာ အီ မုး ဂွန် အာဟီယာ တွိုန်။ 10 န့ ယီ မုး နာင် ယေစာဘေန်၊ မာဆုဝ် ဒီ ဟူမ် ယင် အန် ခဲင် မိူင် ယေစာရေလ။ အာဝ် မိုဝ်း အာဆေ အီ ခမ် ဒီ ဟာဝ် ဒိပ် အန်။’” အန် ဟဲ့ ဟွတ့် ကာလာင် ပါယ် တီ အန် ဘော ဝိုဝ်း မာလုဝ်း လေး တဝ် အူ ဇေန့်။

11 အာယေဟူ ဘော ဝီ တး ဒူင် ကွယ် ဒူအီ အန်၊ ဂေ မင် အီ ဘော ဒီမွှတ် အန် တဝ်း၊ “မာဆေ ပီ လုဝ် ဒူအီ တွိုန် ဒီ မဲ။း အန် ပီ ဒူအီ ယွင်။ ဟဲ့ မုး နာ ဘွတ် နာ မွှိုမ်၊ ပီ လုဝ် အန်။း” အန် ဝီ တဝ်း ဒီ ဂေ၊ “ဘေ နပ် လွင် ဒူအီ တွိုန်။ ဘေ ဘော နပ်၊ အန် နပ် ဒီ ကာလာင် မျုဝ် မှဝ်။”

12 ဂေ ဝီ တဝ်း၊ “ဟီ၊ ဂြုဝ်း မဲ တူ မှာန်။ တဲး မဲ ကာလာင် ဆိူဝ် ဒီ ယေ၊ တဲး ယေ နပ်။” အန် ဝီ တဝ်း၊ ဒူအီ တွိုန် ဟဲ့ တဝ်း ဒီ အုဝ်၊ “ဇဝ်ဖြာ ဟဲ့ တဝ်း၊ ‘အုဝ် ဒီ ဖဝ်း နာမန် ဒီ ဂိန့် မဲ၊ တဲး မဲ ဘဲန် ခုန်ဒီခမ် ဒူအီ အီဆာရေလ။’”

13 ဟဲ့ ဟွတ့် ကာလာင် ဂြုဝ်း တီ၊ ဂေ ဘော ဝီ ပီခြန် ဂေ ဒီ ဒိုဝ်း ခြိုင် တာ ဂေ၊ ဒ ဒီ န့တဲင် တဲး အန် ဟာဝ် နာ ဒဲင်။ ဂေ ဘော ဘုတ် နိုင် ပဲ ဘော ဒတ် တဝ်း၊ “အာယေဟူ ဟဲ့ ဘဲန် ခုန်ဒီခမ်။”

14 ဝါယ် တီ၊ အာယေဟူ အီ မုး ဂွန် အာယောဆာဖာတ်၊ အီ ဘော မုး လှာန် အာနိမ်ဆီ တွိုန်၊ အန် ဘော ဝီ တဝ်း ဒီ ကာဂုဝ်း ဒီ အာယုဝ်ရမ်။ ဒေါ အန် တီ အာယုဝ်ရမ် ဘော ဂေ ဒူအီ အီဆာရေလ၊ ဂေ ကွယ် ဒီ မိူင် ရာမူတ်ဂီလေအာတ်။ ဂေ ကွယ် ဘ်ု အာဟာစေလ အီ မုး ခုန်ဒီခမ် အီ အိုပ် မိူင် အာရာမ် တွိုန်၊ ကွဲ့ တဲး အန် ပျာတ့် မိူင် ဂေ။ 15 မာလဲ၊ အီ မုး ခုန်ဒီခမ် အာယုဝ်ရမ် တွိုန်၊ အန် တူ ကွယ်။ အန် ဟဲ့ ဟွတ့် ဝေန့် ဒီ မိူင် ယေစာရေလ၊ တဝ်း ဒီ ဆီနမ် ဒိမ် အန်။ န့ မုး ဒိမ် ပဲ့ ဟဲ့ တာ ဒိုဝ် ဒူအီ အာရာမ် ဒေါ ကာဂုဝ်း အန် ဒီ အာဟာစေလ၊ အီ မုး ခုန်ဒီခမ် အီ အိုပ် မိူင် အာရာမ် တွိုန်။

အာယေဟူ ဝီ တဝ်း ဒီ ဂေ အီ ကွယ် ရိုမ် ဒူပ် အန်၊ “ဆေ ဘေ ဖြူမ် ပီ တဝ်း အုဝ်၊ ကွဲ့ တဲး ဒူအီ ခဲင် မိူင် နီ လေး ခေါ အူ ဝီ၊ ကွဲ့ တဲး ဂေ ပွိုန် ဒီ ဟာဝ် ကာလာင် ခဲင် မိူင် ယေစာရေလ လွင် အေ နီ။” 16 ဟဲ့ ဟွတ့်၊ အာယေဟူ ဘော ပဝ့် လက်လဝ် အန်၊ ဟာဝ် ဒီ မိူင် ယေစာရေလ။ အာယုဝ်ရမ် ဟဲ့ ကွယ် ခဲင် မိူင် တီ။ ဘော အာဟာဇီယာ အီ မုး ခုန်ဒီခမ် အီ အိုပ် မိူင် ယူဒါ ဟဲ့ တး စ်ု၊ တး ယွတ် အာယုဝ်ရမ်။

17 ဒူအီ အီ ဘ်ု မိူင်၊ အန် ကွယ် ဒဲင် ကာစှူင့် စာ ခဲင် မိူင် ယေစာရေလ တွိုန်။ အန် ဘော တဝ်း၊ “အုဝ် ဟဲ့ ယိုဝ် ဒူအီ အူ ဖိုင်။” အာယုဝ်ရမ် ဝီ တဝ်း၊ “တဲး ဒါ ဆိုက် အီ ပဝ့် လက်လဝ် အူ ဝီ ဟာဝ် ဘ်ု န့တေန့် ဂေ၊ ဒီမွှတ် ဂေ တဝ်း၊ ‘ဘေ တး ဒါခိုယ်။း’”

18 ဒါ ဆိုက် အီ ပဝ့် လက်လဝ် တွိုန် ဘော ဟာဝ် ကာတုန့် ဖိုင် အာယေဟူ တဝ်း၊ “ခုန်ဒီခမ် တဝ်း ဒီ ဘေ၊ ‘ဘေ တး ဒါခိုယ်။း’” အာယေဟူ ဝီ တဝ်း ဒီ အန်၊ “အာဝ် လုဝ် မဲ တး ဒီမွှတ်၊ တဲး မဲ တး လဲ ဒူပ် အုဝ်။” ဒူအီ အီ ဘ်ု မိူင် တွိုန်၊ အန် ပီ ဝီ တဝ်း၊ “ဒါ ဆိုက် ပီ စ်ု မဲ ဟာဝ်၊ အန် ဟဲ့ ဟွတ့် ဇမ် ဒူင် ကွယ် ဂေ၊ အန် တူ ဝီ တး။”

19 ခုန်ဒီခမ် ပီ ဝီ စ်ု ဒါ ဆိုက် အီ ပဝ့် လက်လဝ် ပေါ အူ ဝီ ဟာဝ်။ ဝီ တီ ဘော ဟာဝ် ဇမ် ဒူင် ကွယ် ဖိုင် အာယေဟူ တဝ်း၊ “ဘေ တး ဒါခိုယ်။း” အာယေဟူ ပီ ဝီ တဝ်း၊ “အာဝ် လုဝ် မဲ တး ဒီမွှတ်။ တး လဲ ဒူပ် အုဝ်။”

20 ဒူအီ အီ ဘ်ု မိူင် ဝီ တဝ်း၊ “ဒူအီ ပီ တိုယ် အေ၊ အန် ဟဲ့ ဟွတ့် ဟာဝ် ဇမ်။ မာလဲ၊ ဘော အန် တူ ဝီ တး။ ပီ ပါယ် ဒီ ပဝ့် လက်လဝ် ဒီ ဟဲ ဒီခြန်၊ န့ နှဲန် အာယေဟူ အီ မုး ဂွန် အာနိမ်ဆီ တွိုန်။ မီ အန် တီ အီ နပ် ဒီ ဝဲတ် လက်လဝ် ဟာဝ် ပါယ် တီ။”

21 ပန် တီ ခုန်ဒီခမ် အာယုဝ်ရမ် ဝီ တဝ်း၊ “မ့ပြာယ် လက်လဝ် အုဝ်။” ဂေ ဘော ခြိုင် လက်လဝ် ဂေ မ့ပြွင့် ဒွါ ဒီ အန်။ ခုန်ဒီခမ် အာယုဝ်ရမ် အီ မုး ခုန်ဒီခမ် ဒူအီ အီဆာရေလ ဘော ခုန်ဒီခမ် အာဟာဇီယာ အီ မုး ခုန်ဒီခမ် ဒူအီ အာယူဒါ တွိုန်၊ ဂါယ် ဘော ပဝ့် လက်လဝ် အူ ဝီ အူ လှာင်၊ ဟာဝ် ရွုး အာယေဟူ တွိုန်။ ဂေ ဘော လာယ် ကာတုန့် ဒူင် မုး မာန် အာနာဘူတ်၊ အီ ကွယ် ခဲင် မိူင် ယေစာရေလ။ 22 အာယုဝ်ရမ် ဘော ယိုဝ် အာယေဟူ၊ အန် ဘော ဒီမွှတ် တဝ်း၊ “အိုယ် အာယေဟူ မဲ ဟဲ့ ဒါခိုယ်။း” အာယေဟူ ဝီ တဝ်း၊ “မှဝ် ဒီ ပါယ် ဒီ ဒါခိုယ်။း မာ မဲ အီ မုး နာင် ယေစာဘေန် ဟဲ့ ဘူင် နာ တူ မွှိုမ် ဘဲန် မျုဝ် ဘဲန် မျုဝ်။ အန် ဟဲ့ ဘူင် အာဒါတ် ဘော ကြိုပ် အာရိုပ် ကိူန်။”

23 ပါယ် တီ အာယုဝ်ရမ် ဘော ဝီ ကာဘတ် တဝ် အူ ဇေန့်။ အန် ဝီ တဝ်း ဒီ အာဟာဇီယာ၊ “အိုယ် အာဟာဇီယာ၊ အီ ဟဝ် ဟဲ့ ကာဘး ဒီ အာယ်။”

24 အာယေဟူ ဘော ဝိတ့် အ အန် ဘော ဘန့်၊ လဝ့် ယ အာယုဝ်ရမ်။ ဘ့လာ အ တီ ဘော ကာလှန် ဇမ် လှဝ့် နဝ်း အန်။ ပါယ် တီ အာယုဝ်ရမ် ဘော ဒီလှး စုဝ်း လူင် ဒီ လက်လဝ် အန်။ 25 အာယေဟူ ဝီ တဝ်း ဒီ အာဘီခါ အီ မုး ဒူအီ အီ အိုပ် လက်လဝ် အန်၊ “ဒိုဝ်း ဒုဝ် အန် တီ၊ ဟာဝ် ဝဲန် ခဲင် မာန် အာနာဘူတ် အီ တး မိူင် ယေစာရေလ တွိုန်။ မဲ နုဝ် ပီ ဒွိုမ် ကာလာင် ဇဝ်ဖြာ လွင် အန်၊ ဒေါ ပဝ့် အာယ် မင်ပြွင့် ဒူပ် အာဟပ် အီ မုး ဂုန့် အန် တွိုန်။ 26 ဒေါ အန် တွိုန် ဇဝ်ဖြာ ဟဲ့ တဝ်း၊ ‘အာမှိုဝ် အုဝ် ဟဲ့ ယိုဝ် နှာမ် အာနာဘူတ် ဘော နှာမ် ဂွန် အန် အီ ဟဲ့ စုဝ်း ဒဲင် ကာဒါယ် ဆိူဝ် နီ။ အုဝ် ဇဝ်ဖြာ ပီ ဝီ တဝ်း၊ အုဝ် ဒီ ဒမ် ဘော မှာပ် မဲ ခဲင် ကာဒါယ် နီ။’ ကူပ် န့ ပါယ် တီ၊ လုဝ် ဒိုဝ်း ဒုဝ် ယမ် အန်၊ ဟာဝ် ဝဲန် ဒီ တီ၊ တဲး န့ ဒူပ် ခဲ့ ပီ ဒွိုမ် ကာလာင် ဇဝ်ဖြာ။”

27 ပန် တီ အာဟာဇီယာ အီ မုး ခုန်ဒီခမ် ဒူအီ အာယူဒါ၊ အန် ဘော ယိုဝ် လွင် အန် တီ၊ အန် ဘော ဝီ တဝ် ဟာဝ် နာ မိူင် ဟာကာန်။ အာယေဟူ ဘော ခုင်ခြး ဒူပ် အန် တဝ်း၊ “ဘန့် ဘော အန်၊ တဲး အန် ယမ်။” ဂေ ဘော ဘန့် အန်၊ ဒေါ ဟာဝ် အန် ဒူပ် န့တေန့် အီ ဟာဝ် နာ မိူင် ကူရ အီ ကွယ် ကာတတ် မိူင် အီပါလမ် တွိုန်။ အန် ဘော တဝ် ဟာဝ် ဒီ မိူင် မီကီတော၊ ဘော ဟာဝ် ယမ် ဒီ တီ။ 28 ဒဲစေန့် အန် ဘော ဝီ ဒိုဝ်း ဒုဝ် အန် ဒါင် ဒဲင် လက်လဝ်၊ ဟာဝ် ဒီ မိူင် ယေရူဆာလဲမ်။ ဂေ ဘော ဒိပ် အန် ခဲင် ဘာရေဝ် ဒါ ဒါ အန် အီ ကွယ် ခဲင် မိူင် အာဒါဝိတ် တွိုန်။ 29 အာယုဝ်ရမ် အီ မုး ဂွန် အာဟပ်၊ အန် ဟဲ့ ဘဲန် ခုန်ဒီခမ် အာဒါ ဂိုဝ် ဒီ အူ ဆီနမ်။ ဒေါ အန် တီ အာဟာဇီယာ ဟဲ့ ဘဲန် ခုန်ဒီခမ် အီ အိုပ် မိူင် ယူဒါ။

30 ဝါယ် အန် တီ အာယေဟူ ဟဲ့ ဝီ တး ဇမ် ခဲင် မိူင် ယေစာရေလ။ အီ မုး နာင် ယေစာဘေန်၊ အန် ဘော ယိုဝ် လွင် အန် တီ၊ အန် ဘော ပီစှိတ် အန်၊ ဖဝ်း ဟိုက် ငါယ် အန်၊ စး ဂိန့် အန်၊ ဆီဂ့လူတ့် ဂိန့် အန်၊ ဝီ ကွယ် ဘာင် ကာဒဝ် ပါတဲင်။ 31 အာယေဟူ ဘော တး လိုပ် ဘာင် မာလုဝ်း ဝဲင် ဟုဝ်၊ နာင် ယေစာဘေန် ဝီ တဝ်း၊ “အိုယ် အာဇီမာရီ၊ မဲ ဟဲ့ ငဝ်း ယမ် ဒါ ကာညာ မဲ၊ မဲ ဟဲ့ ဒါခိုယ်။း”

32 အာယေဟူ ဘော ဝီ ယွတ် ဟုဝ့် ဘာင် ကာဒဝ် ပါတဲင် တီ၊ ဝီ ဒတ် တဝ်း ဒီ အီ ကွယ် ဒီ တီ၊ “အာဆေ ဒီ ကွယ် ဘ့လာက် အုဝ်၊ အာဆေ ဒီ ထူမ် အုဝ်။း” န့ ဝီ မိုဝ်း အီမာယ် ဆး အာ အူယ် ဝီ၊ ဝီ ငွိုပ် လူင်။ 33 အာယေဟူ ဝီ တဝ်း ဒီ ဂေ၊ “ဘျွာ လူင် အီဘိုန့် တီ။” ဂေ ဘော ဘျွာ စုဝ်း နာင် ယေစာဘေန် တီ။ နှာမ် အန် ဘော ကာစှတ့် ဒိုက် ဒီ ရဲင် ဘော ဒီ မင်ပြွင့် အီ ညဲတ့် အန်။

34 အာယေဟူ ဘော ဝီ လိုပ် နာ ခဲင် ဟုဝ် ဘော ဟူမ် ဘော ဒျီင် ပီ ဆီ ဒျီင် အန်။ ဟဲ့ ဟွတ့်၊ အန် ဘော ဝီ တဝ်း ဒီ အီ၊ “ဇဝ်ဖြာ ဟဲ့ ဟွတ့် ဒိူင် အီဘိုန့် တီ။ မာလဲ၊ ကူပ် မုး အန် ဂွန် ခုန်ဒီခမ်၊ တဲး ဘေ ဟာဝ် ဒိပ် အန်။” 35 ဂေ ဘော တဝ်း ဒီ ဟာဝ် ဒိပ် အန်၊ ဂေ ဘော ယိုဝ်၊ ဟဲ့ ဂိတ် မီ ကာအာင် ဂိန့် အန် ဘော ပ့လဝ် ဂေ ဒဲ အန်။ 36 ဂေ ဝီ တး ကာလာင် လွင် အန် တီ ဒီ ခုန်ဒီခမ် အာယေဟူ။ အန် ဝီ တဝ်း၊ “ဇဝ်ဖြာ ဟဲ့ ဒွိုမ် ကာလာင် ဒီ ဒဲစေန့် အန် အီ စိူဝ် အာအေလီယာ အီ မုး ဒူအီ ထီဆာဘီ တွိုန် တဝ်း၊ မာဆုဝ် ဒီ ဟူမ် ယင် နာင် ယေစာဘေန် ခဲင် မိူင် ယေစာရေလ။ ဒေါ တီ နီ န့ ဟဲ့ ဘဲန် ပါယ် တီ။ 37 အာအေလီယာ မိူဝ် ဟဲ့ တဝ်း၊ ဒုဝ် ယမ် အန် ဒီ ဘဲန် အီ မွှိုမ် ကာအိး ဒဲင် ကာဒါယ်။ ခုဝ်၊ ကွဲ့ တဲး န့ မိုဝ်း အာဆေ အီ ပွိုန် တဝ်း၊ ‘ဒုဝ် နာင် ယေစာဘေန် ဟဲ့ ကွယ် ဒီ နီ ဒီ နီ။’”