ခါန် 10
လွင် ဂေ ဝေါဝဲ ခုန်ဒီခမ် အာဟပ် ယမ် ဒွန် အီ
1 ခဲင် မိူင် ဆာမာရီ န့ မိုဝ်း အီမာယ် ဘူ ဂိုဝ် ဝီ အီ မုး လှုက်လှာန် အာမျုဝ် အာဟပ်။ အာယေဟူ ဘော ဒဲမ် ပဲ့ တိုယ် ဟာဝ် ဒီ ဂေ ဒါ တာင် မိူင် ဆာမာရီ။ အန် ဒဲမ် ဒီ ဂေ ဒါ တာင် အီ အိုပ် မိူင် ယေစာရေလ ဘော ဒီ ဂေ အီ ဘဲန် ဂိန့် န့ဟူမ် ခဲင် အာမျုဝ် အာဟပ် တီ၊ အန် တဲး ဂေ ဘောကာဂ့လျီတ် တိး ပဲ့ တီ။ 2 ခဲင် ပဲ့ တီ အန် တဝ်း၊ “အိုယ် ဘေ ဒွန် အီ၊ ဂေ ဂွန် ဒါ ကာညာ ဘေ ကွယ် ရိုမ် ဒူပ် ဘေ။ ဘေ ကွယ် ခဲင် မိူင် အီ မိုဝ်း ရဲင်။ ဘေ မိုဝ်း ဘော လက်လဝ် ဂေ မ့ပြွင့်၊ ဘော ခြိုင် ကာဂုဝ်း ဘဲန် မျုဝ် ဘဲန် မျုဝ်။ 3 ခုဝ် အန် တီ၊ တဲး ဘေ ရဝ်း ဂွန် အီမာယ် ဒါ ကာညာ ဘေ အီ ဟဲ့ မွှိုမ် လွှိုမ် ဒွန် အီ၊ တဲး အန် ဘဲန် ခုန်ဒီခမ်။ ဟဲ့ ဟွတ့်၊ တဲး ဘေ ဝီ ကာဂုဝ်း ဒီ ရန်ဆူ အာဟပ်၊ အီ မုး ဒါ ကာညာ ဘေ။”
4 ဂေ ဒူအီ အီ တိး လွင် အန် တီ ဘော ယုဝ် ကာဆဝ်။ ဂေ ဝီ တဝ်း၊ “အန် ဟဲ့ ဟွတ့် ဝဲန် ခုန်ဒီခမ် အာ ကာဒင်။ အေ တူ နပ် ဒီ ပဲ ဒီ ကာဂုဝ်း ဒီ အန်။” 5 ခုဝ်၊ ဒါ တာင် အီ အိုပ် ဟုဝ် ခုန်ဒီခမ် ဘော ဒါ တာင် အီ အိုပ် မိူင် ဘော ဂေ ဂိန့် န့ဟူမ် အာမျုဝ် အာဟပ် တွိုန်၊ ဂေ ဘော ဝီ တဝ်း ဒီ အာယေဟူ၊ “ယေ မုး ဒဲစေန့် မဲ၊ ယေ ဒီ ဘူင် ခဲ့ ပီ တဝ်း မဲ။ ယေ တူ စုဝ့် အာဆေ ဘဲန် ခုန်ဒီခမ် ယေ။ တဲး မဲ ဘူင်၊ တဲး န့ လဝ့် နဝ်း မဲ။”
6 ဟဲ့ ဟွတ့်၊ အန် ပီ ဝီ ဒဲမ် ပဲ့ ပေါ ဖိူန် တဝ်း၊ “ဆေ ဘေ ဟဲ့ ဖြူမ် ပီ တဝ်း အုဝ်၊ ဟဲ့ ထူမ် ဂြုဝ်း အုဝ်၊ တဲး ဘေ ဒဲပ် ဂိန့် ဂွန် အီမာယ် ခဲင် လှုက်လှာန် ဒါ ကာညာ ဘေ တီ။ ခဲညှာ အာခြာဝ် နီ၊ တဲး ဘေ တး တိုယ် ဒီ အုဝ် ခဲင် မိူင် ယေစာရေလ နီ။” န့ ဘော မိုဝ်း လှုက်လှာန် ခုန်ဒီခမ် တွိုန် ဘူ ဂိုဝ် ဝီ။ ဂေ ဟဲ့ ကွယ် ရိုမ် ဒူပ် ဂေ ဒါ တာင် ဘော ဂေ ဂိန့် န့ဟူမ် ဂေ တွိုန်။ 7 ပဲ့ တွိုန် ဘော တး ဇမ် ဒူင် ကွယ် ဂေ၊ ဂေ ဘော ကာဖြူမ် ဒီ ငဝ်း ယမ် အီမာယ် အာမျုဝ် ခုန်ဒီခမ် အီ မုး ဘူ ဂိုဝ် ဝီ တွိုန်။ ဂေ ဘော ဒဲပ် ဂိန့် ဂေ ဒွန် ဝီ၊ ဟပ် ခဲင် ကြိုက်၊ ဝီ တိုယ် ဟာဝ် ဒူင် ကွယ် အာယေဟူ ခဲင် မိူင် ယေစာရေလ တွိုန်။ 8 န့ ဝီ မိုဝ်း အူ ဝီ အီ တး ကာလာင် ဒီ အာယေဟူ တဝ်း၊ “ဂေ ဟဲ့ ဟွတ့် ဒိုဝ်း တး ဂိန့် ဂွန် ခုန်ဒီခမ် တွိုန်။” အန် ဝီ တဝ်း၊ “တဲး ဘေ ဟာဝ် ဘ့လေး ဒီ ဘာင် မာလုဝ်း မိူင်၊ ဘ့လေး တဲး န့ ဘဲန် အာ မ့ပိုမ်၊ တဲး န့ ကွယ် ကော ဇမ် ပါ ခဲညှာ ဆိန့်ဝး။”
9 ဘော ဇမ် ပါ ခဲညှာ ဆိန့်ဝး၊ အန် ဘော ယိတ့် ကာလာင် ဒီ ဒူအီ ကိူန် တဝ်း၊ “ဘေ ဟဲ့ မုး ဒူအီ နဝ်း ဆိူဝ် နဝ်း မှာန်။ ဘေ တူ မိုဝ်း မှာပ်။ န့ ယီ မုး အုဝ်၊ အုဝ် ဟဲ့ ခြာမ် ဒီ ငဝ်း ယမ် ဒါ ကာညာ အုဝ်။ အုဝ် ယီ တူ နပ်၊ အာဆေ ဟဲ့ ငဝ်း ယမ် ဂေ တီ။ 10 တဲး ဘေ နုဝ် ဂြုဝ်း ဇဝ်ဖြာ၊ ကွဲ့ တဲး ဘေ ပိဝ်။ ခဲ့ ပီ ကာလာင် ဇဝ်ဖြာ လွင် အာမျုဝ် အာဟပ်၊ န့ ဟဲ့ ဘဲန် တူတ့် ဒွန် မျုဝ်။ ဇဝ်ဖြာ ဟဲ့ ဘူင် ခဲ့ ပီ ကာလာင် အုန် အန် ဒီ ဒဲစေန့် အန် အီ စိူဝ် အာအေလီယာ တွိုန်။” 11 ပါယ် တီ အာယေဟူ ဟဲ့ ငဝ်း ဝဲန် တူတ့် ခဲ့ ကွယ် ဒူအီ အာဟပ် အီ ကွယ် ခဲင် မိူင် ယေစာရေလ ဘော ဂေ ဒါ တာင် အီ မုး အာမူ အာမာတ် အန် ဘော ဂိုက် အန် ဘော ဂေ ဒူအီ လှူ ဒီ ဇဝ် ဘာလ တွိုန်၊ အာယေဟူ ဟဲ့ ငဝ်း ယမ် တူတ့်၊ ကွဲ့ တဲး န့ ဆီ မိုဝ်း ခေါ အူ ဝီ။
12 ဝါယ် အန် တီ အာယေဟူ ဘော ဝီ ဟာဝ် ဒီ မိူင် ဆာမာရီ။ အန် ဘော တး ဇမ် ဒူင် ကပ် ဂေ ဟိုက် မာဘူ အီ ကွယ် ခူပ် န့တေန့်။
13 အန် ဘော ယိုဝ် ဝေါဝဲ အာဟာဇီယာ အီ မုး ခုန်ဒီခမ် အီ အိုပ် ဒူအီ အာယူဒါ တွိုန်။ အန် ဘော တဝ်း ဒီ ဂေ၊ “ဘေ မုး အာဆေ။း” ဂေ ဝီ တဝ်း၊ “ယေ မုး ဝေါဝဲ အာဟာဇီယာ။ ယေ တး တဲး ယေ ဟာဝ် ငွိုပ် ဂွန် ခုန်ဒီခမ် ဘော နာင် ဟောခမ် ခဲင် မိူင် ယေစာရေလ တွိုန်။”
14 အန် ဝီ စ်ု ဒူအီ အန် တဝ်း၊ “မှေတ့် ဒုဝ် အိမ် ဂေ တီ။” ဂေ ဒူအီ အန် ဘော မှေတ့် ဂေ၊ ဘော ငဝ်း ဂေ ခူပ် အိုမ် ခိုမ် အီ ကွယ် ဒူင် ကပ် ဂေ ဟိုက် မာဘူ တွိုန်။ ဂေ ကွယ် ဖွုန် ဂိုဝ် ဒီ အာ ဝီ ဟဲ့ ယမ် တူတ့်။ အူ ဝီ မိူဝ် အာဝ် ဟူ မိုဝ်း။
15 အန် ဘော ဝီ ဟာဝ် ဒူပ် န့တေန့် ဘော ဝီ ကာတုန့် အာယောနာဒါပ် အီ မုး ဂွန် အာရေခါပ်။ အန် ဟဲ့ တး တဝ်း ဒီ တး ယွတ် အာယေဟူ။ အာယေဟူ ဘော ဒီမွှတ် အာယောနာဒါပ် တဝ်း၊ “မဲ ဖြူမ် နဝ်း အုဝ် ပီ အုဝ် ဟဲ့ ဖြူမ် နဝ်း မဲ။း” အာယောနာဒါပ် ဝီ တဝ်း၊ “ဟဲ့ ဖြူမ်။” အန် ပီ ဝီ တဝ်း၊ “ဆေ မဲ ဟဲ့ ဖြူမ် အုဝ်၊ တဲး မဲ ပါ ဒဲ အုဝ်။” အာယောနာဒါပ် ဘော ပါ ဒဲ အန်။ အန် ဘော ဒိူတ် ဟုဝ့် အာယောနာဒါပ် ဒဲင် လက်လဝ် အန်၊ တဲး အာယောနာဒါပ် တုတ့် ခူပ် အန်။ 16 အန် ဝီ တဝ်း၊ “ဟာဝ် ဒူပ် အုဝ်၊ တဲး မဲ ယွတ် ခဲ့ ဂျုဝ်ဂျာ အုဝ် ဒီ ဘူင် ပီ အိုင် ဇဝ်ဖြာ။” ခုဝ်၊ အန် ဘော တဲး အာယောနာဒါပ် ပဝ့် လက်လဝ် ဟာဝ် ဒူပ် အန်။
17 အန် ဘော တး ဇမ် ခဲင် မိူင် ဆာမာရီ၊ အန် ဘော ငဝ်း ဝဲန် တူတ့် ခဲ့ ကွယ် ဒူအီ အာမျုဝ် အာဟပ် အီ ကွယ် ခဲင် မိူင် ဆာမာရီ တွိုန်။ န့ ဘော ဘဲန် ခဲ့ ပီ တဝ်း ဇဝ်ဖြာ ဒီ အာအေလီယာ တွိုန်။
18 ဝါယ် တီ အာယေဟူ ဘော ဒဲ့ ကာဇု ဂေ ဒူအီ ဘောကာဂ့လျီတ် ဘော တဝ်း ဒီ ဂေ၊ “အာဟပ် ဟဲ့ ကြိုပ် ဇဝ် ဘာလ အီ စဲက်။ အုဝ် ယီ ဒီ ဝီ ကြိုပ် ဇဝ် တီ တဲး န့ ကိူန်။ 19 ခုဝ်၊ ဘေ လုဝ် ဒဲ့ တး တူတ့် ခဲ့ ကွယ် ဒူအီ ဘျာန် ဂြုဝ်း ဇဝ် ဘာလ ဘော ဂေ ဒူအီ ကြိုပ်၊ ဒူအီ လှူ၊ တဲး ဂေ တး တူတ့် ဒွန် အီ။ ကွဲ့ တဲး န့ လုတ် ခေါ အူ ဝီ။ အုဝ် ဒီ လှူ ပီ ဒီ လှူ ဒီ ဇဝ် ဘာလ တီ။ အာဆေ တူ တး လုဝ် ယမ်။” အာယေဟူ ယီ ကာလုဝ် ဒီ ဘူင် ပါယ် တီ။ အန် ဘူင် တဲး အန် ပွိုန် ဒီ ငဝ်း ဝဲန် ဂေ အီ ကြိုပ် ဇဝ် ဘာလ ဒွန် အီ။
20 အာယေဟူ ပီ ဝီ တဝ်း၊ “တဲး အေ ရဲန် ဘူင် ဘ့လွယ် ကြိုပ် ဇဝ် ဘာလ။” ဂေ ဘော ကာလာင် ဒွန် နာ ဒွန် ပ့လုဝ့် တဲး ဒွန် အီ နပ် လွင် အန် တီ။ 21 အာယေဟူ ဘော စ်ု ဂေ ဟာဝ် ဒွန် ပ့လုဝ့် ခဲင် မိူင် အီဆာရေလ။ ခဲ့ ကွယ် ဒူအီ အီ ကြိုပ် ဇဝ် ဘာလ ဘော တး တူတ့် ဒွန် အီ။ ဂေ ဘော တး၊ တဲး ကော နုဝ့် ဒွန် ပ့လုဝ့် ခဲင် ဟုဝ် ပီ ကြိုပ် ဂေ ဇဝ် ဘာလ တွိုန်။ 22 အန် ဘော ကာလာင် ဒီ ဒါ အီ ဘ်ု ခြိုင် ပီ ဒီ တာ ခဲင် ဟုဝ် တွိုန်။ အန် တဝ်း၊ “ဒိုဝ်း လေး တူတ့် ခဲ့ ကွယ် ခြိုင် တာ၊ တဲး ဂေ အီ လှူ ဒီ ဇဝ် ဘာလ ပွိုန် ဒီ စှိုပ်။” ဒါ အီ ဘ်ု ခြိုင် တာ ဘော ဒိုဝ်း လေး တူတ့် ခြိုင် တာ၊ ဒွါ ဒီ ဂေ။
23 အာယေဟူ ဂါယ် အာယောနာဒါပ် အီ မုး ဂွန် အာရေခါပ် တွိုန် ဂါယ် ဘော လိုပ် ခဲင် ဟုဝ် ဇဝ် ဘာလ တီ ဘော ကာလာင် ဒီ ဂေ အီ ကြိုပ် ဇဝ် ဘာလ တဝ်း၊ “တဲး ဘေ ယွတ် ဆီချာ အီ မုး ဒဲစေန့် ဇဝ်ဖြာ။ အူ ဝီ မိူဝ် ကွဲ့ တဲး န့ မိုဝ်း။ တဲး န့ မိုဝ်း မီ ဂေ အီ ကြိုပ် ဇဝ် ဘာလ ဒီလူယ်။” 24 အန် ဟဲ့ ဟွတ့် တဝ်း ပါယ် တီ ဂေ ဘော လိုပ် ခဲင် ဟုဝ် တီ၊ ဘော လှူ ဒုဝ် ဆတ်ဒါဝါ ဘော လှူ အီ ဒုဝ့် ဒီ ငဝ် ဒွန် မျုဝ်။ အာယေဟူ ဟဲ့ အုန် ဒါ ဆိုက် ဒါ ဂိုဝ် ဝီ၊ တဲး ဂေ ကွယ် နာ ရေတ့်။ အန် ဟဲ့ တဝ်း ဒီ ဂေ၊ “အုဝ် ဟဲ့ အာပ် ဒွါ ဒူအီ ဂေ နီ ဒီ ဘေ။ အာဆေ ဟီ တဲး ဒူအီ အူ ဝီ လွတ်၊ အန် လုဝ် ဝီ ယမ် ကာဒါင် ဒူအီ ဝီ တီ။”
25 အာယေဟူ ဟဲ့ ဟွတ့် တဲး ဂေ လှူ ပီ လှူ ဂေ၊ အန် ဝီ တဝ်း ဒီ ဒါ ဆိုက် အန် ဘော ဂေ အီ ဘ်ု ဒွန် အီ၊ “တဲး ဘေ လိုပ်၊ ငဝ်း ယမ် တူတ့် ဂေ။ အူ ဝီ မိူဝ်၊ ကွဲ့ တဲး န့ လွတ်။” ဒါ ဆိုက် အန်၊ ဂေ ဘော ဒိုဝ်း မာပွါ့ လာင် ဂေ၊ ငဝ်း ယမ် ဂေ အီ ကြိုပ် ဇဝ် ဘာလ တီ။ ဂေ ဘော ဒိုဝ်း ဒုဝ် ယမ် ဝီ ဝဲန် နာ ရေတ့်။ ဂေ ဘော လိုပ် ဘော ခဲင် ဟူင် နာ ခဲင်။ 26 ဂေ ဘော ဒိုဝ်း ဒုဝ့် ဘော အာရိုပ် ပီ ကြိုပ် ဂေ အီ ကွယ် ခဲင် ဇူင် ဇဝ် ဘာလ တီ။ 27 ဂေ ဘော ကာဖြူမ် ဒီ ပျာတ့် ဝဲန် ဇူင် ဇဝ် ဘာလ ဘော အာရိုပ် ပီ ကြိုပ် ဂေ တီ၊ တဲး န့ ဘဲန် ဟူဝိတ် ကော ဇမ် အာတိုဝ် နီ။
28 အာယေဟူ ဘော ဒိုဝ်း ဝဲန် တူတ့် န့ကြိုဝ်း ဇဝ် ဘာလ၊ ကွဲ့ ဟူ တဲး ဒူအီ အီဆာရေလ ဆီ ပွိုန် ဒီ ကြိုပ်။ 29 န့ ယီ ဆီ မိုဝ်း အာရိုပ် မာမက် ခြိဝ် အာ ဒုဝ်၊ ပဲ့ ဟဲ့ ဘူင် အာယေရုဝ်ဘုဝ် အီ မုး ဂွန် အာနေဘတ် တွိုန်။ အာရိုပ် တီ ဟဲ့ ကွယ် ခဲင် မိူင် ဘေဒါအေန် ဂါယ် မိူင် ဒါန် တဲး ဒူအီ အီဆာရေလ ဘူင် မှာပ် ဆေဆေ။ အာယေဟူ ယီ တူ ပျာတ့် ဝဲန် အာရိုပ် တီ။
30 ဇဝ်ဖြာ ဝီ တဝ်း ဒီ အာယေဟူ၊ “ကူပ် ဟဲ့ ဘူင် မဲ နာ မွှိုမ် အီ လဝ့် နဝ်း အုဝ်၊ ကူပ် ဟဲ့ ဘူင် မဲ ဘော ဒီ ဒူအီ အာဟပ် တွိုန် ခဲ့ လဝ့် နဝ်း အုဝ်၊ အုဝ် ဒီ တဲး လှုက်လှာန် မဲ ဘဲန် ခုန်ဒီခမ် အီ အိုပ် မိူင် အီဆာရေလ အာဒါ ဖွုန် စုဝ်။” 31 အာယေဟူ ယီ တူ ဂျုဝ်ဂျာ တဲး ပီ ဘူင် အန် တူတ့် ဒွန် မျုဝ် ဒူပ် ပီ အိုင် ဇဝ်ဖြာ၊ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အန် တူ ဝဲန် မှာပ် ပီ ဘူင် အာယေရုဝ်ဘုဝ် ဘော မှာပ် ပဲ့ ဟဲ့ ဘူင် ဒူအီ အီဆာရေလ ကူပ် အာယေရုဝ်ဘုဝ် တွိုန်။
32 ဒေါ အန် တီ ဇဝ်ဖြာ ဘော တဲး မိူင် အီဆာရေလ ယူမ် လူင်။ ခုန်ဒီခမ် အာဟာစေလ ဟဲ့ ကာဂုဝ်း ပဲ ဂေ ဒူအီ အီဆာရေလ အီ ကွယ် ဒီ ကာအုန် မိူင် ဘဲန် ပ့လုဝ့် ဘဲန် ပ့လုဝ့်။ 33 န့ မုး မိူင် အီ ကွယ် နာ လေး ဆီငဲ ဒီ ဘ့လဲင် ယောဒါန်၊ မိူင် ဂီလေအာတ် ဘောကာဂ့လျီတ် အီ မုး ဒူင် ကွယ် ဒူအီ ခြိုဝ် အာဂတ်၊ ဒူအီ ခြိုဝ် အာရူဘေန် ဘော ဒူအီ ခြိုဝ် အာမာနာဆေ။ န့ စုး ဒီ မိူင် အာရော အီ ကွယ် ဒူပ် ဒီလယ့် အာရာနုန်၊ ဟာဝ် ဇမ် မိူင် ဂီလေအာတ် ဘော မိူင် ဘာဆန်၊ အန် ဟဲ့ ဟွတ့် ပွိုန် တူတ့်။
34 လွင် ပီ ဘူင် အာယေဟူ အီ ညှမ် ဒွိုမ် ကာလာင်၊ ဘော ပီ ဘူင် အန် ဘော အာဖုင် ဒင်ခုဝ် အန်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။