1 အာဒါ အူ ဆီငဲ ခုန်ဒီခမ် အာဒါဝိတ် ဘော ဒဲ့ တး တူတ့် ခဲ့ ကွယ် ဂေ ဒါ ကာညာ အီ အိုပ် ဒူအီ အီဆာရေလ။ ဘော မုး ဒါ တာင် အီ အိုပ် ခြိုဝ် မှဝ် ခြိုဝ် အန်၊ ဘော ဒါ ကာညာ အီ ယွတ် မဲန် လွင် ပီ လုဝ် ခုန်ဒီခမ် ဘဲန် မျုဝ် ဘဲန် မျုဝ်၊ ဘော ဒါ တာင် အီ အိုပ် ဒါ ဆိုက် ဘဲန် မာယဝ်း ဘဲန် မာယဝ်း၊ ဘော ဂေ အီ အိုပ် ကြုဝ်ကြာမ် ဘော ဒုဝ် ဆတ်ဒါဝါ ခုန်ဒီခမ်၊ ဘော ဂေ အီ အိုပ် ကြုဝ်ကြာမ် ဂေ ဂွန် ခုန်ဒီခမ်။ အန် ဒဲ့ ဘော ဂေ အီ အိုပ် ခဲင် ဟုဝ် ခုန်ဒီခမ် ဘော ဒါ ဆိုက် အီ ကျ ဒီ ကာဂုဝ်း၊ တဲး ဂေ တး ကာဇု တူတ့် ခဲင် မိူင် ယေရူဆာလဲမ်။

2 အာဒါဝိတ် မိူဝ် ယိတ့် စွင့် နာ အာတ့် ဂေ ဘော ကာလာင် ဒီ ဂေ တဝ်း၊ “အိုယ် ဘေ ဘီနွင် အီ မုး ဒူအီ ပီ အိုပ် အုဝ်၊ တဲး ဘေ ထူမ် ဂြုဝ်း အုဝ်။ အုဝ် ဟဲ့ မိုဝ်း နဝ်း ဆီ ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ တဲး န့ မိုဝ်း ဒူင် ဒီ အုန် ဇီဒိူက် ဇဝ်ဖြာ ဘော တဲး န့ ပီ ဒူင် ဘ့လေး အန် ဇဝ် ပ့လဝ် အန်။ အုဝ် မိူဝ် ဟဲ့ ဟွတ့် ရဲန် အုန် တူတ့် ဒွန် မျုဝ်။

3 မာလဲ၊ ဇဝ်ဖြာ ယီ ဝီ ခြဲ အုဝ်၊ ကွဲ့ တဲး အုဝ် ဘူင် အုဝ် ဆမ် ကူပ် ဟဲ့ ကာဂုဝ်း ဟဲ့ ငဝ်း ယမ် အုဝ် ဒူအီ ကိူန် ကာဆဝ်။

4 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ရဝ်း အုဝ်၊ တဲး အုဝ် လေး ခဲင် န့ဟူမ် ဂုန့် အုဝ်၊ တဲး အုဝ် ဘဲန် ခုန်ဒီခမ် အီ အိုပ် မိူင် အီဆာရေလ ဆေဆေ။ အန် ဇဝ် ဟဲ့ ရဝ်း ဒူအီ ခဲင် ခြိုဝ် အာယူဒါ တဲး ဂေ ဘဲန် အီ အိုပ် မိူင်။ ခဲင် ခြိုဝ် ဒူအီ အာမျုဝ် အာယူဒါ တီ၊ အန် ဇဝ် ဟဲ့ ရဝ်း န့ဟူမ် ဂုန့် အုဝ်။ ခဲင် န့ဟူမ် ယေ တီ၊ အန် ဇဝ် မိူဝ် ဟဲ့ အိုင် ဒီ တဲး အုဝ် ဘဲန် ခုန်ဒီခမ် အီ အိုပ် မိူင် အီဆာရေလ။

5 အန် ဇဝ် မိူဝ် ဟဲ့ မွင့်ကာရာ ဒွါ တဲး အုဝ် မိုဝ်း ဂွန် အီမာယ် ကိူန် ကာဆဝ်။ ကာတဲ ဂွန် အုဝ် ဂေ တီ၊ အန် ဟဲ့ ဝီ ရဝ်း အာဆာလုဝ်မုဝ်၊ တဲး အန် အိုပ် မိူင် အီဆာရေလ အီ မုး မိူင် ပီ အိုပ် ဇဝ်ဖြာ။ 6 ဇဝ်ဖြာ ဟဲ့ ဝီ ကာလာင် ဒီ အုဝ် တဝ်း၊ ‘ဂွန် အီမာယ် မဲ အီ စိူဝ် အာဆာလုဝ်မုဝ်၊ အန် အီ ဒီ ဆမ် အီ ဒီ ဘူင် ဟုဝ် အာဒါ အုဝ်။ အုဝ် ဟဲ့ ရဝ်း အန်၊ တဲး အန် ဘဲန် ဂွန် အုဝ်။ အုဝ် မိူဝ် ဒီ ဘဲန် ဂုန့် အန်။ 7 ဆေ အန် မိူဝ် ဘူင် ဒူပ် ဒါရာ အုဝ် ဘော ထူမ် ပီ ကာလာင် အုန် အုဝ် တဲး န့ ပီ ပီ ဘူင် အန် ဒေါ တီ နီ၊ အုဝ် မိူဝ် ဒီ တဲး အန် အိုပ် မာန် မိူင် တီ ဆေဆေ။’

8 ခုဝ် အန် တီ၊ ဒေါ တီ နီ အုဝ် စ်ု ဘေ ဒူအီ ပီ အိုပ် အုဝ် နာ အာတ့် ဇဝ်ဖြာ ပီ ကြိုပ် အေ ဘော နာ အာတ့် ဒူအီ ကိူန် အီ မုး ဒူအီ အီဆာရေလ၊ ဒူအီ ပီ အိုပ် ဇဝ်ဖြာ၊ တဲး ဘေ ဘူင် ဒူပ် ဒါရာ ခဲ့ ပီ ကာလာင် အုန် ဇဝ်ဖြာ ပီ ကြိုပ် အေ၊ တဲး ဘေ ဘော ပွိုန် ဒီ ဘိုင် ဆီချာ မိူင် အီ ဟဲ့ မွှိုမ် ကာဆဝ် နီ။ တဲး ဘေ ပီ ဝီ ပွိုန် ဒီ ဒွါ ခါဂုန် တီ ဘော ဒီ လှုက်လှာန် ဘေ ဒွန် စုဝ် ဒွန် ဘာန်။”

9 အန် ဝီ ကာလာင် ဘော ဒီ အာဆာလုဝ်မုဝ် တဝ်း၊ “အိုယ် ဂွန် ကာညူမ် အုဝ်၊ တဲး မဲ ဘော ညှိုမ် ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် မဲ။ တဲး ဘော နဝ်း ဘော ဖွိုမ် မဲ ဘူင် ဂါန် အန် ဇဝ်။ အန် ဇဝ် ဘော နပ် အာကျာမ် အာငျာန် ဘော ပီ ခြာမ် ပီ လုဝ် ဒူအီ ခဲင် နဝ်း ဂေ ဒွန် မျုဝ်။ ဆေ မဲ ကော ဟြေတ့် အန် ဇဝ်၊ အန် ဇဝ် မိူဝ် ဒီ ရပ် ဒီ ရွုး မဲ။ ဆေ မဲ ယီ ဝဲန် အန် ဇဝ်၊ အန် ဇဝ် မိူဝ် ဒီ ဝဲန် မဲ၊ တူ ဝီ လှုဝ်း မဲ ဒေါ မှဝ်။

10 မဲ လုဝ် ဇေန့်ဇာ လွင် ဂါန် ပဲ့ ဟဲ့ ရဝ်း ဇဝ်ဖြာ တဲး မဲ ဘူင်။ တဲး မဲ မိုဝ်း ပ့လူမ် ဂေ ဟဲန့် ဒီ ဆမ် ဟုဝ် အန် ဇဝ် အီ ဆီငါ ဘွတ်။”

11 ဟဲ့ ဟွတ့်၊ အာဒါဝိတ် ဝီ ဒိုဝ်း အာရိုပ် ဟုဝ် ဇဝ်ဖြာ၊ ဘော အာရိုပ် ဟူင် ဘဲန် ဟူင် ဘဲန် ဟူင်၊ ဘော ဟူင် ဒူင် ဒီ အုန် ကြုဝ်ကြာမ်၊ ဟူင် အီ ကွယ် ခြွင့် ဒဲင်၊ ဟူင် အီ ကွယ် နာ ခဲင် ဘော ဟူင် ဒူင် ဆီငါ ဘွတ် လွှိုမ် တူတ့် အီ မုး ဒူင် ဒီ တဲး ဒူအီ ဂါယ် ဇဝ်ဖြာ လာယ် ကာလဝ့်၊ ဝီ အာပ် ဒွါ တူတ့် ဒီ အာဆာလုဝ်မုဝ်။

12 အန် ဝီ ဒိုဝ်း ဘော အာရိုပ် ပီ ဘျ နဝ်း ဖွိုမ် ဇဝ်ဖြာ ခဲင် နဝ်း အန် ပီ ပါယ် ဝဲင် ဟုဝ် ဇဝ်ဖြာ တီ၊ ဘော ဟူင် အီ ကွယ် ရူပ် ဟုဝ် တီ၊ ဘော ဟူင် ဒူင် ဒီ အုန် ကြုဝ် ပီ တး လှူ ဒူအီ ခဲင် ဟုဝ် ဇဝ်ဖြာ တီ။ အန် ဝီ အာပ် ဒွါ တူတ့် ဒီ အာဆာလုဝ်မုဝ်။

13 အန် ဝီ ကာလာင် ဘော လွင် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ၊ တဲး ဂေ ဘဲန် ဖိုင် ဘဲန် ဖိုင် ဘူင် ဂါန် ခဲင် ဟုဝ် ဇဝ်ဖြာ၊ တဲး ဂေ ယွတ် လိုမ်လာ ခြိုင် တာ အီ ကွယ် ခဲင် ဟုဝ် ဇဝ်ဖြာ တီ ဒွန် မျုဝ်။

14 အန် ပီ ဝီ ကာလာင် အုန် ခဲ့ လုဝ် စန် ခြိဝ် ဂေ ရွိုန် အာဒါ ပီ ဒီ လုဝ် ဘူင် ခြိုင် တာ၊ တဲး ဂေ ဆ ဒူပ် ခဲ့ ပီ ကာလာင် အုန် အန် တီ ဆေဆေ။ 15 ခြိဝ် ပီ ဒီ လုဝ် တာ ဂေ ဘူင် ငဝ် အွမ်၊ ခြိဝ် ဘော ဒင် ငဝ် အွမ် တီ ဘော ရွိုန် ပီ ဒီ လုဝ် တာ ဂေ ဘူင် ငဝ် အွမ် ရွိုန် ဘော ဒင် ဂေ ဟဲ့ မိုဝ်း တူတ့် စန် အန်၊ တဲး န့ ဒူပ် ခဲ့ လုဝ် ဂေ အာဒါ ဒွန် ဘူင့်။ 16 ဘော ခြိဝ် အာဒါ ကာစှူင့် ခြိဝ် ဒူင် ဒီ ဘ့လေး ဂေ ခါမုန် ပီ လှူ ဂေ ဘော ရွိုန် အာဒါ ကာစှူင့် ရွိုန် မိုဝ်း စန် အန်။ 17 ဘော ခြိဝ် အာဒါ မင် ဆူက် ဘော ဆီလယ့် ဂေ ကွက့်၊ ဂေ လုဝ် ဆ တာ ဘ့လေ ဆ တီ။ ဘော ရွိုန် အာဒါ ဆီလယ့် ဘဲန် မျုဝ် ဘဲန် မျုဝ်၊ ဂေ လုဝ် ဆ ပါယ် တီ။ 18 ဘော ခြိဝ် ဇဲတ် အာဒါ ကာစှူင့် လှူ ဒူင် ဒီ ဒုဝ့် န့ကြိုဝ်း အုး ငှုန်၊ ဂေ လုဝ် ဆ ပါယ် တီ။ အာဒါဝိတ် ဝီ ဒွါ ဒီ ဂေ ဘော အာရိုပ် လက်လဝ် ဘော အာရိုပ် အာမူ အာမာတ် ဇဝ်ဖြာ ခြိဝ် အီ စိူဝ် ခေရုပ်၊ အီ ဟဲ့ ဘ့လး ဖျီင် ဂါယ်၊ အီ ဝီ ပ့လိုက် ဇီဒိူက် ဇဝ်ဖြာ။ ကြုဝ် ဇိုဝ် တီ ဒွန် မျုဝ် အန် ဝီ အာပ် ဒွါ တူတ့် ဒီ ဂွန် အန် အီ စိူဝ် အာဆာလုဝ်မုဝ်။

19 ခုန်ဒီခမ် အာဒါဝိတ် ဝီ တဝ်း၊ “ဇိုဝ် တီ ဘော ဒွန် မျုဝ် ဟဲ့ ဒူပ် အာရိုပ် ပဲ့ ဟဲ့ ဒဲမ် အုန် ဇဝ်ဖြာ အီ ဟဲ့ တဲး အုဝ် မိုဝ်း အာငျာန်၊ တဲး အုဝ် နပ် လွင် အန် တီ။”

20 ဟဲ့ ဟွတ့်၊ ခုန်ဒီခမ် အာဒါဝိတ် ဝီ ကာလာင် ဒီ ဂွန် အန် အီ စိူဝ် အာဆာလုဝ်မုဝ် တဝ်း၊ “တဲး မဲ မိုဝ်း နဝ်း ပ့လူမ် ဘော မိုဝ်း နဝ်း ယ ဘော ဂျုဝ်ဂျာ ဒီ ဘူင်။ ကွဲ့ တဲး မဲ မိုဝ်း နဝ်း ယုဝ် ဘော နဝ်း လိုဝ်။ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ အန် ဒီ ကွယ် ရိုမ် ဒူပ် မဲ။ အန် ဇဝ် တူ ဘ့လေး တူ ဝဲန် မဲ၊ အန် ဒီ ကွယ် ရိုမ် ဒူပ် မဲ၊ တဲး န့ ကော ဇမ် ပန် ဒီ ဘူင် ဟွတ့် တူတ့် မဲ ဟုဝ် ဇဝ်ဖြာ တီ။ 21 ဂေ ဒါ အီ လှူ ဒီ ဇဝ်ဖြာ၊ ဘော ဂေ ဒူအီ အာမျုဝ် အာလေဝီ ဘဲန် ဖိုင် ဘဲန် ဖိုင်၊ ဂေ ဟဲ့ ခြိုင် ဒီ ဘူင် ဂါန် အာဒါ ဟုဝ် ဇဝ်ဖြာ တီ။ ဂေ ဒူအီ အီ ကျ အီ လှဲဝ် ဒီ ဘူင် ဂါန် ဘဲန် မျုဝ် ဘဲန် မျုဝ် မိူဝ်၊ ဂေ ဘော မိုဝ်း နဝ်း ဆီ စွယ် ဆီ ဘူင် ရိုမ် ဒူပ် မဲ။ ဘော ဂေ ဒါ တာင် ဘော ဒူအီ ခဲင် ရဝ် ခဲင် မိူင်၊ ဂေ ဘောကာဂ့လျီတ် ဒီ ဘော ထူမ် အာမိင် ပီ ဘ့လေး အုန် မဲ ဒွန် မျုဝ်။”