ခါန် 27
လွင် ဖိုင် ဒါ ဆိုက်
1 အာနီ န့ မုး ဇာရာင် ဂေ ဒူအီ အီဆာရေလ၊ ဂေ အီ မုး ဒါ တာင် အီ အိုပ် အီ ယဲတ့် ဒူအီ ခဲင် န့ဟူမ် ဂေ ဘော ဒါ ဆိုက် အူ ဟြဲန့် ဝီ ဘော အူ မာယဝ်း ဝီ။ န့ မုး ဘော ဇာရာင် ဂေ အီ ဘူင် ဂါန် ခုန်ဒီခမ်။ ဒွန် ဆီနမ် ဒွန် ဆီနမ် ဂေ ဘူင် ဂါန် ဂေ မာဂျီန် မှဝ် မာဂျီန် အန်။ ဒွန် မာဂျီန် န့ ဘော မိုဝ်း ဒူအီ အာ မှိုန့် ဒီ ဖွုန် ဟြဲန့် ဝီ အီ ဘူင် ဂါန် တီ။
2 အာယာဆုဝ်ဘာမ် အီ မုး ဂွန် အာစာဘာဒေလ၊ အန် ဘော အိုပ် ဘော ယဲတ့် ဂေ ဘူင် ဂါန် မာဂျီန် ဒေါ ဂုဝ်။ ဒူအီ ပီ အိုပ် အန် ကွယ် အာ မှိုန့် ဒီ ဖွုန် ဟြဲန့် ဝီ။ 3 ဒူအီ တီ ဘော မုး ဒူအီ အာမျုဝ် ဖေရေတ် ဘော ဘူင် ဂါန် မာဂျီန် ဒေါ ဂုဝ်။
4 မာဂျီန် ဟာအာ ဘော မုး အာဒေါဒါ အီ မုး အာမျုဝ် အာဟုဝ်ဟိတ်။ အန် ဘော ဘဲန် ဒါ တာင် အီ ယဲတ့် ဂေ ဘူင် ဂါန်။ ဘော အာမီကာလူတ် မုး ဒါ အီ ယဲတ့် ဖိုင် တီ။ ဖိုင် ဂေ တီ မိုဝ်း အာ မှိုန့် ဒီ ဖွုန် ဟြဲန့် ဝီ။
5 မာဂျီန် ဟာအူယ် ဘော မုး အာဘီနာယာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ။ အန် အိုပ် ယဲတ့် ဂေ ဒါ ဆိုက် ခဲင် ဖိုင် အန် အီ မိုဝ်း အာ မှိုန့် ဒီ ဖွုန် ဟြဲန့် ဝီ။ 6 အာဘီနာယာ တီ ဘော ဘဲန် ဒါ ဆိုက် ခဲင် ဖိုင် အူယ် ဂိုဝ် ဝီ ဘော ဘဲန် ဂိန့် ဂေ။ ဂွန် အီမာယ် အန် အီ စိူဝ် အာမီစာဘာတ် ဘော ဝီ ပ့လု အန်၊ ဝီ အိုပ် ခဲင် ဖိုင် တီ။
7 မာဂျီန် မ့ဖွုန် ဘော မုး အာဆာဟေလ အီ မုး ဝါ အာယောဖ။ ဂွန် အီမာယ် အန် အီ စိူဝ် အာဇေဘာဒီ ဘော ဝီ ပ့လု အန်။ ဖိုင် ဂေ မိူဝ် မိုဝ်း အာ မှိုန့် ဒီ ဖွုန် ဟြဲန့် ဝီ။
8 မာဂျီန် မ့ဖန် ဘော မုး အာဆာဟူတ် အီ မုး လှုက်လှာန် အာအီစာဟာ။ အန် ယဲတ့် ဖိုင် အန် အီ ကွယ် အာ မှိုန့် ဒီ ဖွုန် ဟြဲန့် ဝီ။
9 မာဂျီန် န့ဒဝ် ဘော မုး အာအီရာ အီ မုး ဂွန် အာအီကေဆာ ဘော အာမျုဝ် အာဒေကော။ ဖိုင် ဂေ တီ မိူဝ် မိုဝ်း အာ မှိုန့် ဒီ ဖွုန် ဟြဲန့် ဝီ။
10 မာဂျီန် မ့ဘူ ဘော မုး အာဟေလေတ် အီ မုး အာမျုဝ် ဘ့လေအနီ ခြိုဝ် အာအေဖာရိမ်။ ဖိုင် ဂေ တီ မိုဝ်း အာ မှိုန့် ဒီ ဖွုန် ဟြဲန့် ဝီ။
11 မာဂျီန် န့ဒါ ဘော မုး အာဆီဘေခေ အီ တး ဒူင် စိူဝ် အာဟူဆာ အီ မုး ဒူအီ အာမျုဝ် အာဇေန်ရာ။ ဖိုင် အန် တီ မိုဝ်း အာ မှိုန့် ဒီ ဖွုန် ဟြဲန့် ဝီ။
12 မာဂျီန် န့ဒိမ် ဘော မုး အာဘီအေစာ အီ တး ဒူင် စိူဝ် အာနာထူတ် အီ မုး ခြိုဝ် အာဘေန်ယာမ်။ ဖိုင် အန် မိူဝ် မိုဝ်း အာ မှိုန့် ဒီ ဖွုန် ဟြဲန့် ဝီ။
13 မာဂျီန် ဂိုဝ် ဘော မုး အာမာဟာရေ အီ တး ဒူင် စိူဝ် အာနေတောဖာ။ အန် အီ အိုပ် အီ ယဲတ့် ဂေ ဘူင် ဂါန်။ အန် မုး ဒူအီ အာမျုဝ် အာဇေန်ရာ။ ဖိုင် အန် တီ မိုဝ်း အာ မှိုန့် ဒီ ဖွုန် ဟြဲန့် ဝီ။
14 မာဂျီန် ဂိုဝ် ဒီ လှေး ဘော မုး အာဘီနာယာ အီ တး ဒူင် စိူဝ် ဘီရာထူန် အီ မုး ဒူအီ အာမျုဝ် အာအေဖာရိမ်။ ဖိုင် အန် တီ မိုဝ်း အာ မှိုန့် ဒီ ဖွုန် ဟြဲန့် ဝီ။
15 မာဂျီန် ဂိုဝ် ဒီ ဟာအာ ဘော မုး အာဟေလဒေ အီ တး ဒူင် စိူဝ် နေတောဖာ အီ မုး ဒူအီ အာမျုဝ် အာအောဆန်ယေလာ။ ဖိုင် အန် တီ မိုဝ်း အာ မှိုန့် ဒီ ဖွုန် ဟြဲန့် ဝီ။
16 ဂေ ဒါ တာင် အီ အိုပ် ခြိုဝ် ဂေ ဒူအီ အီဆာရေလ ဂေ စိူဝ် ပါယ် နီ။ ခဲင် ခြိုဝ် အာရူဘေန် ဘော မုး အာအေလီအေဇာ အီ မုး ဂွန် အာဇီခါရီ။ ခဲင် ခြိုဝ် အာဆီမေအူန် ဘော မုး အာဆေဖာဒီ အီ မုး ဂွန် အာမာခါ။
17 ခဲင် ခြိုဝ် အာလေဝီ ဘော မုး အာဟာဆာဘီ အီ မုး ဂွန် အာကေမူအေန်။ ခဲင် လှုက်လှာန် အာရူန် ဘော မုး အာဇာဒူက်။
18 ခဲင် ခြိုဝ် အာယူဒါ ဘော မုး အာအေလီဟူ အီ မုး အီကတ် အာဒါဝိတ်။ ခဲင် ခြိုဝ် အာအီဆာခါ ဘော မုး အာအုဝ်မာရီ အီ မုး ဂွန် အာမီခီလာ။
19 ခဲင် ခြိုဝ် အာဇေဘူလူန် ဘော မုး အာအီဆာမာယာ အီ မုး ဂွန် အာအောဘာဒီ။ ခဲင် ခြိုဝ် အာနာပ်ထာလီ ဘော မုး အာယေရီမုတ် အီ မုး ဂွန် အာစာရေလ။
20 ခဲင် ခြိုဝ် အာအေဖာရိမ် ဘော မုး အာဟုဝ်ဆေ အီ မုး ဂွန် အာဇာဇီယာ။ ခဲင် ခြိုဝ် အာမာနာဆေ အီ ကွယ် ဘ့လာက် နာ ဂေတ့် ဆီငဲ ဘော မုး အာယုဝ်အေလ အီ မုး ဂွန် အာဘေတာယာ။
21 ခဲင် ခြိုဝ် အာမာနာဆေ အီ ကွယ် ဘ့လာက် နာ လေး ဆီငဲ ဘော မုး အာအီတော အီ မုး ဂွန် အာဆာခါရာ။ ခဲင် ခြိုဝ် အာဘေန်ယာမ် ဘော မုး အာယာဆေလ အီ မုး ဂွန် အာဘာနာ။
22 ခဲင် ခြိုဝ် အာဒါန် ဘော မုး အာစာရေန် အီ မုး ဂွန် အာယေရုဝ်ဟမ်။ ဒူအီ ဂေ တီ၊ ဂေ မုး ဒါ တာင် အီ အိုပ် အီ ယဲတ့် ခဲင် ခြိုဝ် ဒူအီ အီဆာရေလ။
23 ခုန်ဒီခမ် အာဒါဝိတ် ယီ တူ ဒိုဝ်း ဇာရာင် ဂေ ဒူအီ အာဆာက် အီ ညှမ် နုဝ် အာ ဂိုဝ် ဆီနမ်။ ခုဝ်၊ ဇဝ်ဖြာ ဟဲ့ ကာဆဲန့် ဒီ ဒူအီ အာမျုဝ် အီဆာရေလ ဒီ တဲး ဂေ ဘြဲ ကိူန်၊ တဲး ဂေ ကော ပီ ဆီမန့် အီ ကွယ် ခဲင် ဘ့လေန့်။ 24 အာယောဖ အီ မုး ဂွန် နာင် စေရူယာ တွိုန်၊ အန် ဘဲန် ဒါ အီ ဒဲမ် ဇာရာင် ဂေ အီမာယ် ခဲင် မာန် မိူင်။ မာလဲ၊ အန် ယီ တူ နပ် ဒီ ဘူင် တဲး န့ ဟွတ့် တူတ့်။ ဇဝ်ဖြာ ယီ ရူ ကာဆဝ် ဒီ ဂေ ဒူအီ အီဆာရေလ ကူပ် ဘူင် ဂေ ပါယ် တီ။ ခုဝ်၊ ဇာရာင် ဒူအီ ရဝ် ဒူအီ ကာင် ဂေ တီ၊ န့ တူ ဘာ ခဲင် ဘပ် ပီ ဒဲမ် အုန် ခုန်ဒီခမ် အာဒါဝိတ် တွိုန်။
လွင် ဒါ အီ အိုပ် ကြုဝ်ကြာမ် ခုန်ဒီခမ်
25 အာဇာမာဝိတ် အီ မုး ဂွန် အာဒီအေန်၊ အန် ဘော အိုပ် ကြုဝ်ကြာမ် ပဲ့ ဟဲ့ အုန် ခဲင် ဟုဝ် ခုန်ဒီခမ်။ အာယုဝ်နာထာန် အီ မုး ဂွန် အာအူဇီယာ၊ အန် ဘော အိုပ် ကြုဝ်ကြာမ် အီ ကွယ် ခဲင် မိူင် ပီ အိုပ် ခုန်ဒီခမ် ဒွန် ပ့လုဝ့်။ န့ မုး ကြုဝ် အီ ကွယ် ဘော ခဲင် ရဝ် ဘော ခဲင် ဟုဝ် စာ ဒွန် ပ့လုဝ့်။
26 အာအေစာရီ အီ မုး ဂွန် အာကေလုပ် ဘော အိုပ် ဒူအီ အီ ရန့် မာန် ဂေ ဒူင် နာ ခုန်ဒီခမ်။
27 အာဆီမီ အီ မုး ဒူအီ အာမျုဝ် ရာမာ ဘော ရန့် မာန် မာငုန်။ အာဇာဘာဒီ အီ မုး ဒူအီ အာမျုဝ် ဆီဖာမီ၊ အန် အိုပ် ဒူင် ဒီ ဂဲပ် အုန် ဘ့လေ မာငုန် ဘော ဘူင် အိုမ် မာငုန်။
28 အာဘာလဟာနာန် အီ မုး ဒူအီ အာမျုဝ် ဂေတာ၊ အန် ယွတ် လိုမ်လာ မာန် ဟေ နာမန် ဘော ဟေ ဒီပူ အီ ကွယ် ဒီ ဒင် နွန် နာ ဂေတ့် ဆီငဲ။ အာယုဝ်အာတ် ဘော ယွတ် မဲန် ဒူင် အုန် ဂေ နာမန်။
29 အာဆီတာရေ အီ တး မိူင် ဆာရူန်၊ အန် ယွတ် မဲန် ဖိုင် မာမက် အီ ကွယ် ဒီ ဒီလယ့် ဆာရူန်။ အာဆာဖတ် အီ မုး ဂွန် အာတာလေ၊ အန် ဘော ယွတ် မဲန် ဖိုင် မာမက် အီ ကွယ် ဒူပ် ဒီလယ့် ပေါ အူ ပ့လုဝ့်။
30 အာအုဝ်ဘီလာ အီ မုး ဒူအီ အာမျုဝ် အာဆာမာန်၊ အန် လုဝ် ယွတ် မဲန် ဖိုင် မင်ပြွင့် ကာဟာတ့်။ အာယေဒေယာ အီ တး မိူင် မေရောနွတ် လုဝ် ယွတ် မဲန် ဖိုင် မာလာ။
31 အာယာစီ အီ မုး ဒူအီ အာမျုဝ် အာဟာကာရိတ် လုဝ် ယွတ် မဲန် ဖိုင် မာဘူ ဂါယ် မာပဲ။ ဒူအီ ဂေ တီ ဘောကာဂ့လျီတ် ဂေ မုး တူတ့် ဒူအီ အီ အိုပ် အီ ယွတ် မဲန် ကြုဝ်ကြာမ် ခုန်ဒီခမ် အာဒါဝိတ်။
32 အာယုဝ်နာထာန် အီ မုး ဘိုဝ် အာဒါဝိတ်၊ အန် ဘော ဘဲန် အာမာတ် တာင် အီ ဒွါ အာကျာမ် အာငျာန် ဘော နပ် ဒီ မာနုဝ် နာ ဘွတ် နာ မွှိုမ်။ အန် ဘော မုး ဒူအီ အီ နပ် ပဲ့။ ဘော အာယေဟီလာ အီ မုး ဂွန် အာဟာခါမူန် ဘော ဘဲန် ဆာရာ အီ မာနုဝ် ဂေ ဂွန် ခုန်ဒီခမ်။