1 ဂေ ဒူအီ ခြိုဝ် အာလေဝီ အီ မုး ဒူအီ ခဲင် အာမျုဝ် အာခုဝ်ရာ အီ ဘ်ု မာလုဝ်း ဟုဝ် ဇဝ်ဖြာ ဘော မုး အာမာဆေလာမ် အီ မုး ဂွန် အာခုဝ်ရေ ဘော လှာန် အာဆာပ်။

2 အန် ဝီ မိုဝ်း ဂွန် အီမာယ် ဘူ ဝီ။ အာဆာခါရာ မုး ဂွန် ဂိန့် အန်၊ အာယီတာယေန် မုး ဝီ ဟာအာ၊ အာဇေဘာဒီ မုး ဝီ ဟာအူယ်၊ အာယာဆာနေန် မုး ဝီ မ့ဖွုန်။ 3 အာအေလမ် မုး ဝီ မ့ဖန်၊ အာယေဟုဝ်နန် မုး ဝီ န့ဒဝ် ဘော အာအေလီအွန် မုး ဝီ မ့ဘူ။

4 န့ ယီ မုး ဘော အာအုဝ်ဘေန်အေဒူမ်။ ဇဝ်ဖြာ ဟဲ့ မွင့်ကာရာ ဒွါ ဒီ အန်၊ တဲး အန် မိုဝ်း ဂွန် အီမာယ် ဒါ ဝီ။ ဂွန် အီမာယ် ဂေ တီ ဘော စိူဝ် အာဆေမာယာ အီ မုး ဂွန် ဂိန့်၊ အာယေဟုဝ်ဇာဘာတ် အီ မုး ဝီ ဟာအာ၊ အာယုဝ်အာ အီ မုး ဝီ ဟာအူယ်၊ အာဆာခါ အီ မုး ဝီ မ့ဖွုန်၊ အာနေထာနေလာ အီ မုး ဝီ မ့ဖန်၊ 5 အာမေလာ အီ မုး ဝီ န့ဒဝ်၊ အာအီဆာခါ အီ မုး ဝီ မ့ဘူ ဘော အာဘူလာဆေ အီ မုး ဝီ န့ဒါ။

6 အာဆေမာယာ အီ မုး ဂွန် ဂိန့် အာအုဝ်ဘေန်အေဒူမ် တီ၊ အန် ပီ ဝီ မိုဝ်း ဂွန် အီမာယ် ဘော ဘဲန် အီ အိုပ် အီ ယဲတ့် ဒူအီ ခဲင် န့ကြိုဝ်း ဂေ။ ခုဝ်၊ ဂေ မိုဝ်း ပ့လူမ် မိုဝ်း ဟဲန့်။ 7 ဂွန် အာဆေမာယာ တီ ဂေ စိူဝ် အာအောထာနီ၊ အာရေဖာအေန်၊ အာအုဝ်ဘေတ်၊ အာအေစာဘာတ်၊ အာအေလီဟူ အာဆေမာခီ အီ မုး ဝေါဝဲ အန် ဘော ဘဲန် ဒါ တာင် အီ အိုပ် အီ ယဲတ့် ဒူအီ ခဲင် ခြိုဝ် အာမျုဝ် ဂေ။ ခုဝ်၊ ဘော ဂေ မုး ဒူအီ အီ မိုဝ်း ပ့လူမ် ဂေ ဟဲန့် ကိူန်။ 8 ခြိုဝ် အာအုဝ်ဘေန်အေဒူမ် တီ ဂေ အီ မုး ဒူအီ အီ ကျ ဒီ ဘူင် ဂါန် ဇဝ်ဖြာ ဂေ ဘောကာဂ့လျီတ် ကွယ် ဒဝ် ဂိုဝ် ဒီ အာ ဝီ။

9 ဂေ ဒူအီ အာမာဆေလာမ် အီ ကျ ဒီ ဘူင် ဂါန် ဇဝ်ဖြာ ဂေ ကွယ် ဂိုဝ် ဒီ ဒါ ဝီ။

10 ဂေ ဒူအီ အာမျုဝ် အာမေန်ရာရီ ဘော မုး အာဟုဝ်ဆာ။ ဂွန် အာဟုဝ်ဆာ ဘော မုး အာဆီမာရီ။ အန် ပီ ဆ မုး ဂွန် ဂိန့် မိူဝ်၊ ဂုန့် အန် ယီ ဟဲ့ အာပ် တဲး အန် ပီ ဂွန် ဂိန့်။ 11 အာဟီလာခီ ဘော မုး ဝီ ဟာအာ၊ အာထာဘာလီ မုး ဝီ ဟာအူယ် ဘော အာဆာခါရာ မုး ဝီ မ့ဖွုန်။ အာဟုဝ်ဆာ ဘော ဝေါဝဲ အန် ဘူင် ဂါန် ခဲင် ဟုဝ် ဇဝ်ဖြာ တီ။ ဂေ ဘောကာဂ့လျီတ် ကွယ် ဂိုဝ် ဒီ အူယ် ဝီ။

12 ဖိုင် ဂေ တီ ဂေ ဘဲန် ဒူအီ ဘ်ု မာလုဝ်း ဟုဝ် ဇဝ်ဖြာ။ ဂေ မိူဝ် ဘူင် ဂါန် ဂေ ခဲင် ဟုဝ် ဇဝ်ဖြာ ဒူပ် ဒါ တာင် အီ ယဲတ့် ဂေ။ ဂါန် ဂေ ဘော ပီ ဂါန် ပီ ဘူင် ဝေါဝဲ ဂေ။ 13 ဘော မုး ဒူအီ နှိုမ် ဒူအီ ကတ် အာဝ် တဝ်း၊ ဒွန် ဖိုင် လုဝ် ကာတာမ် ဒူပ် န့ဟူမ် အန်၊ တဲး အန် နပ် ဒီ လုဝ် ဘူင် ဂါန် ဒီ မှဝ်။

14 ဂေ ကာတာမ် အီ ဒီ ကွယ် ဒီ မာလုဝ်း ဘ့လာက် နာ လေး ဆီငဲ။ န့ ဘော စုဝ်း အာဆေလာမီ။ ဟဲ့ ဟွတ့် ဂေ ဝီ ကာတာမ် ဟပ် စိူဝ် ဂွန် အန် အီ စိူဝ် အာဆာခါရာ အီ နပ် ဒီ ဒွါ အာငျာန်။ အန် ဘော လုဝ် ကွယ် ဒီ ဘာင် မာလုဝ်း ဘ့လာက် နာ ကွာ။ 15 ဒေါ ကာတာမ် ဂေ အီ ဒီ ဘ်ု မာလုဝ်း ဘ့လာက် နာ တေတ့်၊ န့ ဘော စုဝ်း အာအုဝ်ဘေန်အေဒူမ်။ ဂွန် အန်၊ ဂေ လုဝ် ဘ်ု ဒူင် အုန် ဂေ ကြုဝ်ကြာမ် ခဲင် ဟုဝ် ဇဝ်ဖြာ။ 16 ဂေ ဝီ ကာတာမ် လွင် အာဆူဘေမ် ဂါယ် အာဟုဝ်ဆာ။ န့ ဝီ စုဝ်း တဲး ဂါယ် ဘ်ု မာလုဝ်း ဘ့လာက် နာ ဂေတ့် ဆီငဲ ဘော မာလုဝ်း အီ စိူဝ် ဆာလေခေတ် အီ လိုပ် ဒီ န့တေန့် နာ ကွာ။ ဂေ ဒူအီ အီ ဘ်ု တီ ဘဲန် ဖိုင် ဘဲန် ဖိုင် လုဝ် ဘူင် ဂါန် ပါယ် နီ။

17 မာလုဝ်း အီ ကွယ် ဘ့လာက် နာ လေး ဆီငဲ တွိုန်၊ အူ ဆီငဲ လုဝ် ဘ်ု ဒဝ် ဝီ။ မာလုဝ်း ဘ့လာက် နာ ကွာ လုဝ် ဘ်ု အူ ဆီငဲ ဖွုန် ဝီ။ ဘော နာ တေတ့် လုဝ် ဘ်ု အူ ဆီငဲ ဖွုန် ဝီ။ ဘော ဒီ ကာင် အုန် ဂေ ကြုဝ်ကြာမ် တွိုန် မိူဝ် လုဝ် ဘ်ု အာ ဝီ။ 18 ဒီ ဝဲင် အီ ကွယ် ဘ့လာက် နာ ဂေတ့် ဆီငဲ ဒီ န့တေန့် အီ ဟုဝ့် နာ ကွာ၊ ဂေ ဘော လုဝ် ဘ်ု ဖွုန် ဝီ။ ဘော ဒီ ဝဲင် တီ လုဝ် ဘ်ု အာ ဝီ။

19 ဒူအီ ဂေ တီ ဘော မုး ဒူအီ ပီ ရဝ်း ဂေ ခဲင် ခြိုဝ် အာခုဝ်ရာ ဘော ခဲင် ခြိုဝ် အာမေန်ရာရီ၊ တဲး ဂေ ဘ်ု မာလုဝ်း ခဲင် ဟုဝ် ဇဝ်ဖြာ။

20 ကာတဲ ဂေ ဒူအီ အာမျုဝ် အာလေဝီ တီ၊ အာဟီယာ ဘော ဘဲန် ဒါ အီ အိုပ် အီ ယွတ် မဲန် ကြုဝ် ခဲင် ဟုဝ် ဇဝ်ဖြာ ဘော ကာင် ဒူင် အုန် ဂေ ကြုဝ် လှူ။

21 အာလာဒါန် အီ မုး ဒူအီ အာမျုဝ် အာဂေန်ရာဆူန်၊ အီ ဘော မုး ဒါ တာင် ခဲင် ခြိုဝ် ဂေ တီ၊ အန် မိုဝ်း လှုက်လှာန် အီ စိူဝ် အာယေဟီအေလီ။ 22 ဂွန် အာယေဟီအေလီ တီ စိူဝ် အာဇေထာမ် ဘော အာယုဝ်အေလ။ ဂါယ် ဘော ဘဲန် ဒါ တာင် အီ အိုပ် အီ ယွတ် မဲန် ဟုဝ် ဇဝ်ဖြာ။

23 ဒဲင် တီ ဘော လှုက်လှာန် အာမာရမ်၊ အာအီဇာရာ၊ အာဟေဘြုဝ် ဘော အာအောဇေလာ ဟဲ့ ဘဲန် ဒူအီ အီ အိုပ် အီ ယွတ် မဲန် ကြုဝ်ကြာမ် ခဲင် ဟုဝ် ဇဝ်ဖြာ။

24 အာဆေဘူလာ အီ မုး ဂွန် အာဂေဆူမ် အီ ဝီ မုး ဂွန် အာမုဝ်ဆဲ တွိုန်၊ အန် ဘော ဘဲန် ဒါ တာင် အီ အိုပ် ကြုဝ်ကြာမ် ဇဝ်ဖြာ။ 25 ဝေါဝဲ အာဂေဆူမ် အီ စိူဝ် အာအေလီအေဇာ၊ အန် ဘော ဝီ မိုဝ်း ဂွန် အီ စိူဝ် အာရေဟာဘီ။ ဂွန် အာရေဟာဘီ တီ ဘော စိူဝ် အာယေဆာယာ။ ဂွန် အာယေဆာယာ ဘော စိူဝ် အာယုဝ်ရမ်။ ဂွန် အာယုဝ်ရမ် ဘော စိူဝ် အာဇီခါရီ။ ဂွန် အာဇီခါရီ ဘော စိူဝ် အာဆေလောမိတ်။ 26 အာဆေလောမိတ် ဂေ ဘီနွင် ဝေါဝဲ အန်၊ ဂေ ဘော ဘဲန် ဒါ တာင် အီ အိုပ် ကြုဝ်ကြာမ် ဒွန် မျုဝ်။ န့ ဘော မုး ခုန်ဒီခမ် အာဒါဝိတ် ဘော ဂေ ဒါ တာင် အီ အိုပ် အီ ယဲတ့် ဒူအီ ခဲင် ခြိုဝ် ဂေ၊ ဘော ဂေ ဒါ ဘုဝ် ဒါ တာင် အီ အိုပ် ဒါ ဆိုက် ဘဲန် ဟြဲန့်၊ ဘဲန် မာယဝ်း အီ ဟဲ့ လှူ အုန် ကြုဝ်ကြာမ် ဂေ တီ။ 27 ဂေ ဟဲ့ ပွိုန် တး ကြုဝ်ကြာမ် မင် မျုဝ် ဒေါ ကာဂုဝ်း ဂေ ဒီ ရန်ဆူ။ ဂေ ဝီ တး လှူ တဲး န့ ဘဲန် ကြုဝ် ပီ ဒီ စ်ု ပီ ဒီ တာ ခဲင် ဟုဝ် ဇဝ်ဖြာ။ 28 အာဝ် ဝန် မီ ခဲ့ တီ။ န့ ဘော မိုဝ်း ဘော ပီ လှူ ဂေ ဒေါ မုး စုဝ် အာဆာမူအေန် အီ မုး ဒူအီ အီ ဘျာန် ဂြုဝ်း ဇဝ်ဖြာ။ န့ မုး ဘော အာဆောလူ အီ မုး ဂွန် အာကီဆာ၊ ဘော အာဘာနာ အီ မုး ဂွန် အာနေရ၊ အာယောဖ အီ မုး ဂွန် နာင် စေရူယာ ဘော ဂေ အီ ဟဝ် အီ ဟဲ့ ဒွိုမ် လှူ ကြုဝ် တီ။ အာဆေလောမိတ် ဂေ ဘီနွင် အန် ယီ မုး ဒါ အီ ယွတ် မဲန် တူတ့် ဒွန် မျုဝ်။

29 ဒူအီ အာမျုဝ် အာအီဇာရာ အီ စိူဝ် အာခေနာနီယာ ဘော ဂွန် အန်၊ ဂေ ဟဲ့ ပွိုန် ဒီ ဘဲန် ဒါ ကာညာ အီ အိုပ် မာန် မိူင် ဘော လုဝ် ဆုင်ဖျာတ် အာမူ ဂေ ဒူအီ အီဆာရေလ။

30 ခဲင် ဒူအီ အာမျုဝ် အာဟေဘြုဝ် ဘော မုး အာဟာဆာဘီ ဘော ဂေ ဘီနွင် ဝေါဝဲ အန်။ ဂေ ကွယ် အူ ဟြဲန့် ဒီ ဘူ မာယဝ်း ဝီ။ ဂေ မိုဝ်း ဆာရေ ဒွန် အီ။ ဂေ ဟဲ့ မိုဝ်း ပွုန် မိုဝ်း အာယာ၊ ဘဲန် ဒါ ကာညာ အီ အိုပ် ဒူအီ ရဝ် ဒူအီ ကာင် ဘော ယွတ် မဲန် လွင် ဂါန် ဇဝ်ဖြာ ကာတဲ ဂေ ဒူအီ အီဆာရေလ အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် ယောဒါန်။ 31 ဒူပ် ခဲင် ဇာရာင် ပဲ့ ဟဲ့ ဒဲမ် အုန် ဂေ၊ အာယေရီယာ ဟဲ့ ဘဲန် ဒါ တာင် အီ အိုပ် အီ ယဲတ့် ဒူအီ အာမျုဝ် အာဟေဘြုဝ် တီ။ ဒေါ ဟဲ့ အိုပ် ခုန်ဒီခမ် အာဒါဝိတ် မာန် မိူင် အာဒါ ဖွုန် ဂိုဝ် ဆီနမ်၊ ဂေ ဘော ခြုဝ်း ဒီ ယွတ် ခဲင် ဇာရာင် ဘော ယိုဝ်၊ န့ မိုဝ်း ဒူအီ အီ မိုဝ်း အာငျာန် ဘော နပ် ဒီ ဘူင် ဘဲန် မျုဝ် ဘဲန် မျုဝ် ခဲင် ဒူအီ အာမျုဝ် အာဟေဘြုဝ် တီ။ ဂေ ဘော ယိုဝ် ဒူအီ တီ ကွယ် ခဲင် မိူင် ယေဇီရာ အီ ကွယ် ခဲင် ကာဒါယ် မိူင် ဂီလေအာတ်။ 32 ခုန်ဒီခမ် အာဒါဝိတ် ဘော ရဝ်း ဂေ ဒါ တာင် အီ အိုပ် အီ ယဲတ့် ဂေ ဒူအီ အာမျုဝ် အာယေရီယာ။ ဂေ ကွယ် အာ ဟြဲန့် ဒီ ဘူ မာယဝ်း ဝီ။ အန် မိူဝ် တဲး ဂေ ဘဲန် ဒါ တာင် အီ အိုပ် မာန် မိူင် အန် ဘော အိုပ် ဒွန် မျုဝ်၊ တဲး ဂေ ဒူပ် ဆီချာ ဇဝ်ဖြာ။ ဂေ လုဝ် အိုပ် ဒူအီ အာမျုဝ် အာရူဘေန်၊ အာမျုဝ် အာဂတ် ဘော အာမျုဝ် အာမာနာဆေ အူ ကာတဲ။