1 ခုန်ဒီခမ် အာဆာလုဝ်မုဝ် ဟဲ့ အုန် နဝ်း ဒီ ဆမ် ဟုဝ် ဇဝ်ဖြာ၊ တဲး န့ ဘဲန် ဒူင် ဒီ ကြိုပ် ဂေ ဇဝ်ဖြာ။ အန် ခြာမ် ဒီ ဆမ် ဘော ဟုဝ် ဒူင် ဒီ ကွယ် အန်။ 2 အန် မိူဝ် ခါန် ဂေ ဒူအီ ဘူ မှိုန့် ဝီ၊ တဲး ဂေ ဘဲန် အီ ကာဂွတ် အီ ကာယူင့် ကြုဝ် ဘဲန် မျုဝ် ဘဲန် မျုဝ်။ အန် မိူဝ် ခါန် ဒါ မှိုန့် ဝီ၊ တဲး ဂေ ဘဲန် အီ လိုဝ် မာဝ် ဒဲင် နွန်။ အန် မိူဝ် စ်ု ဂေ ဘော အူယ် ဟြဲန့် ဒီ ဒဝ် မာယဝ်း ဝီ၊ တဲး ဂေ ဘဲန် အီ ယဲတ့် အီ အိုပ် ဒူအီ ဂေ တီ။

3 အာဆာလုဝ်မုဝ် မိူဝ် စ်ု ဒါလာမ် အန် ဟာဝ် ကာလာင် ဒီ ခုန်ဒီခမ် အာဟီရမ် အီ အိုပ် မိူင် ထူရုဝ် တဝ်း၊ “အုဝ် မှာန့်၊ တဲး မဲ ယွင့် ဒွါ ဟေ အာရိတ် မဲ ဒီ အုဝ်၊ တဲး န့ ပီ ပီ ဒွိုမ် ဘူင် မဲ ဒီ အာဒါဝိတ် အီ မုး ဂုန့် အုဝ် ဒေါ ဆမ် အန် ဟုဝ် အန် တွိုန်။ 4 အုဝ် မိူဝ် ဟဲ့ ခြိုင် ဒီ ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။ ဒူင် တီ န့ ဒီ ဘဲန် ဒူင် ဆီငါ ဘွတ် အာဒါ ဇဝ်ဖြာ။ ဂေ ဒီ ဘော ဒိုဝ်း တး န့ကြိုဝ်း အုး ငှုန် ဒုဝ့် လှူ ဒီ အန် ဇဝ်။ ဒူင် တီ ဂေ ဒီ ဘော ဘ့လေး ခါမုန် အီ ဆီငါ ဘွတ် ဒီ အာတ့် အန် ဇဝ် ဆေဆေ။ ဂေ ဒီ လှူ ဘော ပီ ဒီ လှူ အီ ဒုဝ့် ဒီ ငဝ် ဒွန် မှိုဝ် ဒွန် ညှာ။ ဘော ဆီငဲ ဒီလှဝ်၊ ဆီငဲ လိူန်မူန်၊ ဆီငဲ ဘ့လွယ် ဘဲန် မျုဝ် ဘဲန် မျုဝ်၊ တဲး ဂေ ကြိုပ် ဇဝ်ဖြာ အီ မုး ဇဝ်ဖြာ ပီ ကြိုပ် ယေ။ အန် ဇဝ် မိူဝ် ဟဲ့ ဒမ် အုန်၊ တဲး ဂေ ဒူအီ အီဆာရေလ ဘူင် ပါယ် တီ ဆေဆေ။

5 အုဝ် မိူဝ် ဟဲ့ ဆုင်ဖျာတ် ခဲင် နဝ်း အုဝ်၊ အုဝ် ဒီ ဘူင် ဟုဝ် ဇဝ်ဖြာ အီ တာင် ကာဆဝ် ဘော မွှိုမ် အာမ် ကာဆဝ်။ ခုဝ်၊ ဇဝ်ဖြာ ပီ ကြိုပ် အုဝ်၊ အန် မုး ဇဝ်ဖြာ အီ တာင် လွှိုမ် ဇဝ် ဘဲန် ကာဒင် ဘဲန် ကာဒင်။ 6 ကူပ် န့ ပါယ် တီ န့ ယီ တူ မိုဝ်း အာဆေ အီ ပွိုန် ဆမ် ဟုဝ် ဇဝ်ဖြာ။ ဂါင်ဟြာဝ် ပီ ဘော ဟဲ့ စာ ဟဲ့ တာင် ကာဆဝ် မိူဝ်၊ န့ ယီ တူ ဂ့လိုမ် တဲး အန် ဇဝ် ကွယ်။ အုဝ် မိူဝ် တူ ပွိုန် ဆမ် ဟုဝ် တဲး အန် ဇဝ် ကွယ်။ န့ မုး မီ ဒူင် ဒီ တး လှူ န့ကြိုဝ်း အုး ငှုန် ဘော ပီ ဒီ လှူ အီ ဒုဝ့် ဒီ ငဝ် ဘဲန် မျုဝ် ဘဲန် မျုဝ်။

7 ခုဝ်၊ တဲး မဲ တိုယ် ဒူအီ အူ ဝီ အီ မိုဝ်း အာငျာန်၊ အီ နပ် ဒီ စိုမ် ခြိဝ် ဂေ ရွိုန်၊ နပ် ဒီ စိုမ် ဘွင့် ဒေန့် ဘော ဟိန်၊ နပ် ဘော ဒီ ဘ့လုဝ်း ရာင် ဘုဝ်း ဘော ဒွက် ဒုဝ် ပဲ့။ ဒူအီ တီ၊ တဲး အန် ဘော လှဲဝ် ဒီ ဒဝ့် ဒီ စိန့် ဘိက် ခွင် ဂေ ဘိက် ရေန့် ဂဲ၊ ဘော ဘိက် ငျီန်။ တဲး အန် တး ဘူင် ရိုမ် ဂါန် ဒူပ် ဂေ ဒါ ဆာရာ အီ ကွယ် ခဲင် မိူင် ယူဒါ ဘော ခဲင် မိူင် ယေရူဆာလဲမ် အီ မုး ဒူအီ ပဲ့ ဟဲ့ ရဝ်း အုန် အာဒါဝိတ် အီ မုး ဂုန့် အုဝ်။

8 အုဝ် ဟဲ့ နပ် ဂေ ဒူအီ မဲ၊ ဂေ ကျ ဒီ ဂ်ု ဟေ။ တဲး ဂေ ဟာဝ် ဂ်ု ဟေ အာရိတ်၊ ဟေ န့ကေ ဘော ဟေ နမ်ဆာ အီ ကွယ် ဒီ နွန် လေဘာနုန်၊ ဝီ တိုယ် တး ဒီ အုဝ်။ အုဝ် မိူဝ် ဒီ စ်ု ဂေ ဒူအီ အုဝ်၊ တဲး ဂေ ဝီ ဟာဝ် စွယ် ဒူအီ မဲ ဂေ တီ။ 9 တဲး ဂေ ပွိုန် ဒီ ရဲန် အုန် ကိူန် ဟေ အာဒါ ပီ ဒီ ဆမ် ဟုဝ် ဇဝ်ဖြာ တီ။ အုဝ် မိူဝ် ဒီ ဆမ် တဲး န့ တာင်၊ တဲး န့ စှိတ်၊ တဲး န့ မွှိုမ် အာမ် ကာဆဝ်။ 10 အုဝ် မိူဝ် ဒီ ဒိုဝ်း ဒီဂါဝ် ခဝ်ချုင် အာ မှိုန့် ကောရ၊ ခဝ်ဘာလီ အာ မှိုန့် ကောရ၊ အိုမ် မာငုန် အာ မှိုန့် ကာပဝ် ဘော နာမန် အာ မှိုန့် ကာပဝ်၊ ဝီ တိုယ် ဟာဝ် တဲး န့ ဘဲန် ပီ ဒီ ဟူမ် ဂေ ဒူအီ မဲ အီ ရန့် ဂါန် တီ။”

11 ဟဲ့ ဟွတ့်၊ ခုန်ဒီခမ် အာဟီရမ် အီ အိုပ် မိူင် ထူရုဝ် မိူဝ် ဝီ ဒဲမ် ပဲ့၊ တိုယ် ဟာဝ် ဒီ အာဆာလုဝ်မုဝ် တဝ်း၊ “ဇဝ်ဖြာ ဟဲ့ ရွက့် ဒူအီ ပီ အိုပ် အန်။ ခုဝ်၊ အန် ဇဝ် မိူဝ် ဟဲ့ စုဝ့် မျုက် မဲ၊ တဲး မဲ ဘဲန် ခုန်ဒီခမ် အီ အိုပ် ဂေ။”

12 အန် ပီ ဝီ တဝ်း၊ “တဲး အေ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် မုး ဇဝ်ဖြာ အီ ဖာန် ဘ့လေး ဂါင်ဟြာဝ် ဘော ကာဒါယ်။ အန် ဇဝ် ဟဲ့ ကာဝေ ဘော ခုန်ဒီခမ် အာဒါဝိတ်၊ ဟဲ့ တဲး အန် မိုဝ်း ဂွန် အီမာယ် အီ လွှက့် လှဲမ်၊ အီ မိုဝ်း အာငျာန် ဘော နပ် ဒီ ခြိုင် ဒီ ဆမ် ဟုဝ် ဇဝ်ဖြာ ဘော ဟုဝ် အာဒါ ဒုဝ် ဘြိမ် အန်။

13 ဒေါ တီ နီ အုဝ် ဒီ စ်ု အာဟူရမအာဖီ အီ မုး ဒါ ဆာရာ အီ မိုဝ်း အာငျာန် အီ လွှက့် လှဲမ် ကာဆဝ်၊ ဘော လှဲဝ် ဒီ ဘူင် ဘဲန် မျုဝ် ဘဲန် မျုဝ်၊ တဲး အန် ဟာဝ် ဒူင် ကွယ် မဲ။ 14 မာ အန် မုး ဒူအီ ခြိုဝ် အာဒါန်။ ဂုန့် အန် ဘော မုး ဒူအီ အာမျုဝ် ထူရုဝ်။ အန် တီ မုး ဒူအီ အီ မိုဝ်း အာငျာန် အီ နပ် ဒီ စိုမ် ရွိုန်၊ စိုမ် ခြိဝ် ဂေ ဘွင့် ဒေန့်။ အန် နပ် ဘော ဒီ စိုမ် ဟိန် ဘော ဘ့လုဝ်း မာဝ် ဂေ ဟေ။ အန် နပ် ဒီ ဒဝ့် ဒီ စိန့် ဘော ဘိက် ခွင်၊ ဘိက် အီ ရေန့်၊ ဘော အီ ရေန့် ဂဲ ဘော ဘိက် ကာတမ် လုယ်။ အန် ဘော နပ် ဒီ ဘ့လုဝ်း ဒီ ဒွက် ဒွန် မျုဝ်။ အန် မိူဝ် နပ် ဒီ ဘူင် ဒူပ် ရာင် ဘုဝ်း ခဲ့ ပီ ဆီ စ်ု မဲ အန် ဘူင်။ တဲး အန် ဘူင် ရိုမ် ဂါန် ဒူပ် ဂေ ဒါ လာက် မဲ၊ ဘော ဂေ ဒါ လာက် အာဒါဝိတ် အီ မုး ဂုန့် မဲ တွိုန်။

15 ပါယ် တီ ဒေါ တီ နီ တဲး မဲ ဒါ ကာညာ အုဝ် တိုယ် တး ဒီဂါဝ် ခဝ်ချုင်၊ ဒီဂါဝ် ခဝ်ဘာလီ၊ အိုမ် မာငုန် ဘော နာမန် ပဲ့ ဟဲ့ တဝ်း မဲ ဒီ တိုယ် တီ။ 16 ယေ မိူဝ် ဒီ ဟာဝ် ဂ်ု ဟေ အီ ကွယ် ဒီ နွန် လေဘာနုန်၊ တိုယ် ဟာဝ် ခဲ့ ပီ လုဝ် မဲ။ ယေ ဒီ ဘူင် ပဲ၊ တိုယ် ဟာဝ် ဒူပ် အိုမ် နမ်မုက်ဆာရာ၊ တဲး န့ ကော ဇမ် ဒီ မိူင် ယုဝ်ဖာ။ ဟဲ့ ဟွတ့်၊ မဲ ဘော ဝီ တုဝ် ဝေန့် ဒီ မိူင် ယေရူဆာလဲမ်။”

17 ဟဲ့ ဟွတ့် ပါယ် တီ ခုန်ဒီခမ် အာဆာလုဝ်မုဝ် ဝီ ဒိုဝ်း ဇာရာင် ဂေ ဒူအီ အာမျုဝ် ဟဝ် အီ ကွယ် ခဲင် မိူင် အီဆာရေလ။ ခုန်ဒီခမ် အာဒါဝိတ် အီ မုး ဂုန့် အန် ဟဲ့ ဒွိုမ် ဒိုဝ်း ဇာရာင် ဒူအီ ခဲင် မိူင် တီ၊ အန် ပီ ဝီ ဒိုဝ်း ပေါ အူ ဇေန့်။ န့ ဘော မိုဝ်း ဒူအီ အာမျုဝ် ဟဝ် အူ ဆဲန် ဒီ ဖန် မှိုန့် ဒီ အူယ် ဟြဲန့် ဒီ ဒဝ် မာယဝ်း ဝီ။ 18 အန် မိူဝ် ခါန် ဘ့လေး ဒူအီ ဘူ မှိုန့် ဝီ၊ တဲး ဂေ ဘဲန် အီ ကာဂွတ် အီ ကာယူင့် ကြုဝ် ဘဲန် မျုဝ် ဘဲန် မျုဝ်။ အန် မိူဝ် ခါန် ဒါ မှိုန့် ဝီ၊ တဲး ဂေ ဘဲန် အီ လိုဝ် မာဝ် ဒဲင် နွန်။ အန် မိူဝ် စ်ု ဂေ အူယ် ဟြဲန့် ဒီ ဒဝ် မာယဝ်း ဝီ၊ တဲး ဂေ ဘဲန် အီ ယဲတ့် အီ အိုပ် ဒူအီ ဂေ တီ။