1 ခုန်ဒီခမ် အာဒါဝိတ် အီ မုး ဂုန့် အာဆာလုဝ်မုဝ် ဟဲ့ ဟွတ့် ရဲန် အုန် ဒူင် ဒီ ဆမ် ဟုဝ် ဇဝ်ဖြာ။ ဒူင် တီ ဘော မုး ခဲင် မိူင် ယေရူဆာလဲမ် ဒဲင် နွန် မုဝ်ရီယာ၊ ဒူင် ဒွိုမ် တး ကာပ့လုး ဇဝ်ဖြာ ဒီ အာဒါဝိတ်။ န့ မုး အူင့် ကာင်နဝ်း အာရောနာ အီ မုး ဒူအီ အာယေဘူဆိတ် တွိုန်။ 2 ခုန်ဒီခမ် အာဆာလုဝ်မုဝ် မိူဝ် ကာစုး ဒီ ဆမ် ဟုဝ် ဇဝ်ဖြာ တီ ဒေါ မုး ဆီငဲ ဟာအာ၊ မာဂျီန် ဟာအာ၊ ဆီနမ် မ့ဖွုန် ဝါယ် ဟဲ့ ဘဲန် အန် ခုန်ဒီခမ်။

3 ဒီ ဘိူန် ဒင် ဟုဝ် ဇဝ်ဖြာ ပီ ဆမ် အုန် အာဆာလုဝ်မုဝ် တီ၊ နာ တူင့် အန် ဒဝ် ဂိုဝ် ကာနိး။ နာ ကာဝဝ်း အန် အာ ဂိုဝ် ကာနိး။ ဂေ ဘော ဂဝ် တာ ကာနိး ပီ ဒွိုမ် ဂဝ် ဂေ ဆေဆေ။ 4 ဒီ တိုပ် ဒူင် ဒီ လိုပ် နာ အာတ့် ဟုဝ် ဇဝ်ဖြာ တီ၊ ဘော မိုဝ်း ဟူင် အီ တာင် အာ ဂိုဝ် ကာနိး။ န့ ဘော ကာဝဝ်း ကာရမ် ဟုဝ် ဇဝ်ဖြာ တွိုန်။ နာ စာ အန် အူ မာယဝ်း ဒီ အာ ဂိုဝ် ကာနိး။ အန် ဘော ဒိုဝ်း ခြိဝ် ဇဲတ်၊ ခြိဝ် ဆီငါ ဘွတ်၊ ဝီ ပိတ် ဒိုက် နာ ခဲင်။

5 ခဲင် ဟုဝ် အန် ဘော ဒိုဝ်း ဘဲန် ဟေ န့ကေ ဝီ ဒိုက် ဒီ ရဲင်။ အန် ပီ ဝီ ဒိုဝ်း ခြိဝ် ဇဲတ်၊ ဝီ ပိတ်။ အန် ဝီ ဒွက် ဟပ် ဘော ရာင် ဟေ စိုက် ဘော ရာင် ဝန် ဟိန်၊ တဲး န့ စှိတ်။ 6 အန် ဒိုဝ်း ဘော ဆဲန့် ဘွတ်၊ ဟပ် ဒီ ဟုဝ် ဇဝ်ဖြာ တဲး န့ စှိတ်၊ တဲး န့ မွှိုမ် ယွတ်။ ဘော ခြိဝ် ပီ ပိတ် ဒိုက် အန်၊ ဂေ ဒိုဝ်း တး ခဲင် မိူင် ဖာလာဝိမ် တွိုန်။ 7 အန် ဝီ ဒိုဝ်း ခြိဝ်၊ ပိတ် ဒိုက် ဒီ မာနက် ဟုဝ် ဇဝ်ဖြာ ဘော ဒီ မာ မာလုဝ်း၊ ဒီ ဘ့လ မာလုဝ်း ဘော ဒီ ရဲင်။ အန် ဘူင် ဘော ရာင် အာမူ အာမာတ် ဇဝ်ဖြာ အီ စိူဝ် ခေရုပ်။

8 ဟူင် အီ ဆီငါ ဘွတ် လွှိုမ် တူတ့်၊ နာ တူင့် အန် ဘော နာ ကာဝဝ်း အန် အာ ဂိုဝ် ကာနိး။ န့ ဘော ကာရမ် နာ ကာဝဝ်း ဟုဝ် ဇဝ်ဖြာ။ ဒီ ရဲင် ဟူင် တီ အန် ဒိုဝ်း ခြိဝ် ဒဝ် မာယဝ်း ထာလေန်၊ ပိတ် ဒိုက် နာ ခဲင်။ 9 အန် ဘော ဒိုဝ်း ခြိဝ် ဖန် ဂိုဝ် ဆေခေန်၊ ဘူင် ဘဲန် မာဟိန်။ ဒီ ရဲင် ခြွင့် ဒဲင် မိူဝ်၊ အန် ပိတ် တူတ့် ခြိဝ်။

10 ခုန်ဒီခမ် ဝီ စ်ု ဂေ ဘူင် ရာင် အာမူ အာမာတ် ဇဝ်ဖြာ အာ ကာဒင် အီ စိူဝ် ခေရုပ်။ အန် ဝီ ဒိုဝ်း ခြိဝ်၊ ပိတ် ဒိုက်၊ ဝီ အုန် ခဲင် ဟုဝ် ဒူင် အီ ဆီငါ ဘွတ် လွှိုမ် တူတ့်။

11 ဖျီင် ရာင် ခေရုပ် အာ ကာဒင် တီ ဟဲ့ မ့ဘ့လး တူင့် အာ ဂိုဝ် ကာနိး။ ခေရုပ် အူ ကာဒင် မိုဝ်း ဖျီင် အူ ဘ့လာက် တူင့် ဖန် ကာနိး။ ဖျီင် အူ ဘ့လာက် ဘော ဟာဝ် ထိ ဒီ ရဲင် ဟုဝ် ဇဝ်ဖြာ။ ပေါ အူ ဘ့လာက် ဘော တူင့် ဖန် ကာနိး၊ ဘော ဝီ ဟာဝ် ထိ ဒီ ဖျီင် ပေါ အူ ကာဒင်။ 12 ပေါ အူ ကာဒင် န့ ဘော ပါယ် တီ။ ဖျီင် ဘော မ့ဘ့လး အူ ဘ့လာက် တူင့် ဖန် ကာနိး။ ဖျီင် အာဒါ အူ ဘ့လာက် ဘော ဟာဝ် ထိ ဒီ ရဲင် ဟုဝ် ဇဝ်ဖြာ။ ဖျီင် ပေါ အူ ဘ့လာက် ဘော ဟာဝ် ထိ ဒီ ဖျီင် ကာဒင် ဒေါ ဂုဝ် တွိုန်။ 13 ဖျီင် ဒုဝ် ဂါယ် တီ ဟဲ့ မ့ဘ့လး နုဝ့် ခဲ့ ကာဝဝ်း ဟူင် အာ ဂိုဝ် ကာနိး။ ဂါယ် ဟဲ့ စွင့်၊ ဝီ မာငး ယွတ် ခဲင် ဟုဝ် တာင်။

14 ဘိက် ဂွင့် ဒူင် ဆီငါ ဘွတ် လွှိုမ် တူတ့် တွိုန်၊ အာဆာလုဝ်မုဝ် ဘော ဒိုဝ်း ဆေန့် အီ ငျီန် ဘ့လေန့်၊ အီ ခွင်၊ အီ ရေန့် ဂဲ ဘော ဆေန့် ကာတမ် လုယ်၊ ဝီ ဒဝ့် တဲး န့ လေး ရာင် အာမူ အာမာတ် ဇဝ်ဖြာ အီ စိူဝ် ခေရုပ်။

15 ခုန်ဒီခမ် အာဆာလုဝ်မုဝ် ဝီ ဘူင် ရွင့် အာ ညွင့်။ အူ ညွင့် ဘော စာ အူယ် ဂိုဝ် ဒီ ဖန် ကာနိး။ အန် ဝီ ဆမ် နာ အာတ့် ဟုဝ် ဇဝ်ဖြာ တွိုန်။ ဒီ ကာဒဲ့ ဂိန့် ရွင့် ဒွန် ညွင့်၊ န့ ဘော မိုဝ်း ကာဘဲး အီ စာ ဖန် ကာနိး။ 16 ဒဲင် ဂိန့် ရွင့် ဂေ တီ၊ အန် ဝီ ဒိုဝ်း ဝန်၊ ဘူင် ဘဲန် ကာဝင် ဘဲန် ကာဝင်၊ တဲး န့ လာယ် ဒါန့် ဟာဝ်။ အန် ဝီ ဒိုဝ်း ရာင် ဘ့လေ မာစက် အူ မာယဝ်း ဘူင့် ပဲ့ ဟဲ့ ဘူင် အန် တာ ဘွင့် ဒေန့်၊ ဝီ ဟွယ် ဒူပ် ဝန် တွိုန်။ 17 ရွင့် အာ ညွင့် တီ ဟဲ့ ဆမ် အုန် ဒီ အာတ့် ဟုဝ် ဇဝ်ဖြာ ဘော အာ ဘ့လာက်။ ညွင့် အီ ကွယ် ဘ့လာက် နာ တေတ့်၊ ဂေ ဒါင် တဲး အန် စိူဝ် ယာခိန်။ ညွင့် အီ ကွယ် ဘ့လာက် နာ ကွာ၊ ဂေ ဒါင် တဲး အန် စိူဝ် ပေါစ။