1 ခုန်ဒီခမ် အာဆာလုဝ်မုဝ် ဝီ စ်ု ဂေ ဒိုဝ်း ဘွင့် ဒေန့်၊ ဘူင် ကာစှူင့် လှူ အူ ဘူင့်။ န့ ဘော တာင် အာ ဂိုဝ် ကာနိး၊ ကာရမ် ဒွန် ဘ့လာက်။ နာ စာ အန် ဂိုဝ် ကာနိး။ 2 ဟဲ့ ဟွတ့်၊ အန် ဝီ ဒိုဝ်း ဘွင့် ဒေန့်၊ ဘူင် ဘော မ့ပါန် တာင် အူ ဘူင့် အီ ပီ အိုမ် ဒိုင် ကာလင်။ စုး ဒီ ခူပ် အူ ဘ့လာက် ကော ဝီ ဇမ် ခူပ် ပေါ အူ ဘ့လာက်၊ န့ ကာဝဝ်း ဂိုဝ် ကာနိး။ န့ ဘော စာ ဖန် ကာနိး။ ဆေ အီ ဒိုဝ်း ဝန် ဂဝ် ရူပ် ဒီ ဘာင် အန်၊ န့ ကွယ် အူယ် ဂိုဝ် ကာနိး။ 3 နာ ခြိုမ် ဒီ ဘာင် မ့ပါန် တာင် တီ၊ ဂေ ဝီ ဘူင် ရာင် မက် အာလူင့် အူ ကာနိး ဂိုဝ် ဒုဝ်၊ ဘူင် တဲး န့ ကွယ် အာ မ့ပြဲင်။ ဂေ မိူဝ် လှုဝ် အူ ဇေန့် ဘော မ့ပါန် တာင် တီ ဘော ရာင် မက် တီ။

4 မ့ပါန် တာင် တီ၊ ဂေ ဝီ ဘ့လေး ဒဲင် ရာင် မက် အာလူင့် ဂိုဝ် ဒီ အာ ဒုဝ်။ ဆီပူင့် ဂေ ဟဲ့ လိုပ် တူတ့် နာ ခဲင်။ ဂေ ဘော မာငး လေး ဘ့လာက် နာ ကွာ အူယ် ဒုဝ်၊ ဘ့လာက် နာ ဂေတ့် ဆီငဲ အူယ် ဒုဝ်၊ ဘ့လာက် နာ တေတ့် အူယ် ဒုဝ် ဘော ဘ့လာက် နာ လေး ဆီငဲ အူယ် ဒုဝ်။ 5 နာ ဟေတ့် မ့ပါန် တာင် တီ အူ ကာဘာ ဒဲ။ ဒီ ဘာင် အန် ဘော ပီ ဘုဝ်း ခမ်ဆွန် ဘော ပီ ဘာင် ကွက်။ မ့ပါန် တာင် တီ ဘော ပွိုန် ဟပ် အိုမ် အူယ် ဟြဲန့် ပါတ်။

6 အာဆာလုဝ်မုဝ် ဝီ စ်ု ဂေ ဘူင် ဘော မ့ပါန် ဒီတဲတ် ဂိုဝ် ဘူင့်။ အန် ဘော အုန် ဘ့လာက် နာ တေတ့် ဟုဝ် ဇဝ်ဖြာ ဖန် ဘူင့်၊ ဘ့လာက် နာ ကွာ ဖန် ဘူင့်။ မ့ပါန် အိုမ် ဂေ တီ ဘဲန် ဒူင် ဘာယ် ဂေ ဒုဝ် ဆတ်ဒါဝါ အီ ဘဲန် ပီ လှူ အီ ဒုဝ့် ဒီ ငဝ်။ အိုမ် ခဲင် မ့ပါန် တာင် တွိုန် ဘဲန် ပီ စ်ု ဂေ ဒါ အီ လှူ ဒီ ဇဝ်ဖြာ။

7 ဒင် ငဝ် အွမ် မိူဝ်၊ အန် ဟဲ့ ဘူင် ဂိုဝ် ဘူင့်။ အန် ဘော ဘူင် တဲး န့ ပီ ပဲ့ ဟဲ့ ဒွိုမ် စ်ု ဇဝ်ဖြာ ဂေ ဘူင်။ အန် ဝီ ဘ့လေး အုန် ခဲင် ဟုဝ် ဇဝ်ဖြာ နာ ကွာ ဖန် ဘူင့်၊ နာ တေတ့် ဖန် ဘူင့်။

8 အန် ဝီ ဘူင် ဘော မာတိန့် ဂိုဝ် ဘူင့်၊ အုန် ခဲင် ဟုဝ် ဇဝ်ဖြာ တီ။ အန် ဘော အုန် ဘ့လာက် နာ အာဂ ဖန် ဘူင့်၊ နာ အာအး ဖန် ဘူင့်။ အန် ဝီ ဘူင် အုန် ဘော ဆီလယ့် ခြိဝ် အူ မာယဝ်း ဘ့လ။

9 အန် ပီ ဝီ ဘူင် ဝဲင် ဘ့လာက် နာ ခဲင်၊ တဲး န့ ဘဲန် အာဒါ ဂေ ဒါ အီ လှူ ဒီ ဇဝ်ဖြာ။ အန် ဘူင် ဘော ဝဲင် ဘ့လာက် နာ ရေတ့် အူ ပ့လုဝ့်။ အန် ဘူင် ဘော မာ မာလုဝ်း ဒွန် ဘ့လ၊ ပိတ် တူတ့် ဘွင့် ဒေန့်။ 10 အီ မုး မ့ပါန် တာင် တွိုန်၊ အန် ဘော ဘ့လေး အုန် ဘ့လာက် နာ အာအး ဟုဝ် ဇဝ်ဖြာ ဒီ ကာတုဝ့် ဘ့လာက် နာ တေတ့် နာ လေး ဆီငဲ။

11 အန် မိူဝ် ဟဲ့ ဘူင် ကာလုဝ့်၊ မင် ဆူက် ဘော မ့ပါန် ပီ ဒီ ခြဝ်း နှာမ်။ ပါယ် တီ အာဟူရမ် ဟဲ့ ဘူင် တူတ့် ကြုဝ်ကြာမ် ခြိုင် တာ အာဒါ ဟုဝ် ဇဝ်ဖြာ ပဲ့ ဟဲ့ ကာဆဲန့် အန် ဒီ အာဆာလုဝ်မုဝ် ဒီ ဘူင်။

12 န့ ဘော မုး ရွင့် အာ ညွင့်။ ဒီ ကာဒဲ့ ရွင့် အာ ညွင့် တီ၊ ဝီ မိုဝ်း ရာင် ဆီလယ့် အာ ဘူင့် ဘော ကာဘဲး အာ ဘူင့်။

13 န့ မုး ဘော ရာင် ဘ့လေ မာစက် ဘွင့် ဒေန့် ဖွုန် မာယဝ်း ဘူင့် ပီ ပက် ဒိုက် ဂေ ဒီ ကာဘဲး အာ ဘူင့် တွိုန်။ ဂေ တဲး န့ ဘဲန် အာ မ့ပြဲင် ဒီ ကာဒဲ့ ရွင့် တွိုန်။

14 န့ မုး ဘော ကာစှူင့်၊ တဲး န့ ဘဲန် ဒူင် ဒီ အုန် ဂေ ကာလုဝ့် ဂေ မ့ပါန်။ 15 အန် ဟဲ့ ဘူင် ဘော မ့ပါန် တာင် အူ ဘူင့် ဘော ရာင် မက် ဂိုဝ် ဒီ အာ ဒုဝ် အီ ဝီ ဘိုမ် မ့ပါန် တီ။

16 န့ မုး ဘော ကာလုဝ့်၊ မင် ဆူက်၊ မင် ဇဲ့ ယင် ဘော ကြုဝ် ဘဲန် မျုဝ် ဘဲန် မျုဝ် ပီ လုဝ် တာ ဂေ ခဲင် ဟုဝ် ဇဝ်ဖြာ။ အာဟူရမအာဖီ ဟဲ့ ဒိုဝ်း ဘွင့် ဒေန့်၊ ဘူင် ခြိုင် တာ ဂေ တီ ဒွန် မျုဝ်။ အန် မိူဝ် ဟဲ့ ဖွတ်ဖ၊ တဲး န့ ကော ကာလ မာဘြိဝ်၊ တဲး န့ ဘော ဒူပ် ဂြုဝ်း ပီ စ်ု အာဆာလုဝ်မုဝ် အန် ဘူင် အာဒါ ဟုဝ် ဇဝ်ဖြာ တီ။ 17 ခုန်ဒီခမ် တဲး ဂေ ဒိုဝ်း ကာဒါယ် ကာပိတ်၊ ဘူင် ပိူင် အန်၊ ဝီ လှုဝ် ဘွင့် နာ ခဲင်။ ဒူင် ဘူင် ဂေ ဂါန် တီ၊ န့ မုး ဒီ ကာတဲ မိူင် ဆူခူတ် ဂါယ် မိူင် နာထာန် အီ ကွယ် ဒီ ခူပ် ဘ့လဲင် ယောဒါန်။ 18 အာဆာလုဝ်မုဝ် ဟဲ့ ဒိုဝ်း ဘွင့် ဒေန့် ကိူန် ကာဆဝ်၊ ဘူင် ဘဲန် မျုဝ် ဘဲန် မျုဝ်။ ခုဝ်၊ အာဝ် မိုဝ်း အာဆေ အီ ပဲ ဒီ ဆ။

19 အာဆာလုဝ်မုဝ် ဟဲ့ ဘူင် ခြိုင် ပီ ဒီ တာ ဂေ ခဲင် ဟုဝ် ဇဝ်ဖြာ တီ။ န့ ဘော မုး ကာစှူင့် လှူ အီ မုး ခြိဝ် ဘော ကာစှူင့် ဒူင် ဒါင် ဂေ ခါမုန် ဒီ အာတ့် ဇဝ်ဖြာ။

20 န့ မုး ဘော ဒင် ငဝ် အွမ်၊ ဘော ဆီလယ့် ငဝ် ပီ ဘူင် ဂေ တာ ခြိဝ်၊ တဲး ဂေ ပီဒဝ့် ငဝ် ဒူင် ဆီငါ ဘွတ် လွှိုမ် တူတ့်၊ တဲး န့ ဒူပ် ပီ ဒွိုမ် စ်ု ဇဝ်ဖြာ ဂေ ဘူင်။

21 ဘော ရာင် ဘုဝ်း ဘော ငဝ် အွမ် ဘော န့ကျီပ် ဟဲ့ မုး တူတ့် ခြိဝ် ဇဲတ်။

22 ဘော ကမ်ရဲ ပီ ဒီ တာ ဂေ ကပ် ဆဲ ငဝ် အွမ်၊ ဆီလယ့် ဘော အာဇုဝ် ဂေ ဖာန်၊ န့ ဘော မုး တူတ့် ခြိဝ် ဇဲတ် ဒီလူယ်။ န့ ဘော မိုဝ်း ဘော မာ မာလုဝ်း တာင် အီ ကွယ် ဒူင် ဒီ လိုပ် ဟူင် ဆီငါ ဘွတ် လွှိုမ် တူတ့်၊ ဘော မာလုဝ်း အီ ကွယ် နာ အာတ့် ဟုဝ် ဇဝ်ဖြာ။ ဇိုဝ် တီ ဒွန် မျုဝ် ဟဲ့ မုး တူတ့် ခြိဝ် ဒီလူယ်။