ခုန်ဒီခမ် အာဆာလုဝ်မုဝ် ဟဲ့ ဟွတ့် ဘူင် တူတ့် ဒွန် မျုဝ် အာဒါ ဟုဝ် ဇဝ်ဖြာ တွိုန်၊ အန် ဝီ ဒိုဝ်း ဘော ကြုဝ် ပဲ့ ဟဲ့ ဒွိုမ် လှူ အုန် ဂုန့် အန် အီ မုး အာဒါဝိတ် ဒီ ဇဝ်ဖြာ။ ဘော မုး ခြိဝ်၊ ရွိုန် ဘော ခြိုင် တာ ဘဲန် မျုဝ် ဘဲန် မျုဝ် အန် ဝီ ဟပ် တူတ့် ခဲင် ဟူင် ပီ အုန် ဂေ ကြုဝ်ကြာမ် ခဲင် ဟုဝ် ဇဝ်ဖြာ။

2 ပန် တီ ခုန်ဒီခမ် အာဆာလုဝ်မုဝ် ဝီ ဒဲ့ ခဲ့ ကွယ် ဂေ ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ၊ အီ မုး ဒါ တာင် အီ အိုပ် ခဲင် န့ကြိုဝ်း ဂေ။ အန် မိူဝ် ဒဲ့ ဘော ဂေ အီ မုး ဂိန့် န့ဟူမ် တဲး ဂေ တး ကာဇု ဒူင် ကွယ် အန် ခဲင် မိူင် ယေရူဆာလဲမ်၊ တဲး ဂေ ဟာဝ် ဒိုဝ်း ဇီဒိူက် ဇဝ်ဖြာ အီ ကွယ် ဒီ မိူင် အာဒါဝိတ် အီ ဘော စိူဝ် မိူင် ဇီအူန်။ အန် ဆီ တဲး ဂေ ဝီ တး အုန် ဇီဒိူက် တီ ခဲင် ဟုဝ် ဇဝ်ဖြာ။ 3 ဂေ ဒူအီ အီဆာရေလ ဘောကာဂ့လျီတ် မိူဝ် တး ကာဇု ဒူင် ကွယ် ခုန်ဒီခမ် အာဆာလုဝ်မုဝ်။ ဒေါ အန် တီ န့ မုး မာဂျီန် မ့ဘူ၊ အာခြာဝ် ဘူင် ဂေ ဘ့လွယ်။

4 ဂေ ဒါ တာင် ဟဲ့ ဟွတ့် တး ကာဇု တူတ့်၊ ဂေ အီ မုး ဒူအီ အာမျုဝ် အာလေဝီ၊ ဂေ ဘော စုဝ့် ကာယူင့် ဇီဒိူက် ဇဝ်ဖြာ တီ။ 5 ဂေ ဝီ ဟာဝ် ဒူင် ကွယ် ဟုဝ် ဇဝ်ဖြာ တွိုန်။ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ ဂေ ဘော ဒိုဝ်း ဘော ထိုပ် ဘိက် ဘွတ် ဘော ကြုဝ်ကြာမ် ဒွန် မျုဝ် အီ ဘွတ် အီ ကွယ် ခဲင် ထိုပ် ဘိက် ဘွတ် တီ။ 6 ခုန်ဒီခမ် အာဆာလုဝ်မုဝ် ဘော ဂေ ဒူအီ အီဆာရေလ အီ တး ကာဇု ဒူင် ကွယ် အန် တွိုန်၊ ဂေ ဘောကာဂ့လျီတ် မိူဝ် တး ကွယ် နာ အာတ့် ဇီဒိူက် ဇဝ်ဖြာ တီ။ ဂေ ဘော လှူ မာဘူ ဂေ မာမက် ကိူန် ကာဆဝ်၊ ကော ဟူ ပဲ ဒီ တိး။

7 ဟဲ့ ဟွတ့်၊ ဂေ ဒါ အီ လှူ ဒီ ဇဝ်ဖြာ၊ ဂေ ဘော ဒိုဝ်း ဇီဒိူက် ဇဝ်ဖြာ တီ၊ ဟာဝ် အုန် ခဲင် ဟူင် အီ ကွယ် နာ ခဲင် ဟုဝ် ဇဝ်ဖြာ အီ မုး ဒူင် ဆီငါ ဘွတ် လွှိုမ် တူတ့်။ ဂေ ဘော ဘ့လေး အုန် ဇီဒိူက် တီ၊ တဲး အန် ကွယ် ခြိုမ် ဖျီင် ရာင် အာမူ အာမာတ် ဇဝ်ဖြာ အီ စိူဝ် ခေရုပ် တွိုန်။ 8 အာရိုပ် ခေရုပ် အာ ကာဒင် တီ ဂါယ် ဟဲ့ ဘ့လး ဖျီင် ဂါယ် နာ ဒဲင် ဇီဒိူက် တွိုန်၊ တဲး န့ ဆီဘ့လိုက် တူတ့် ဇီဒိူက် ဘော မင် ဂွတ် အန်။ 9 မင် ဂွတ် တီ ဟဲ့ တူင့် ကာဆဝ်။ ဆေ ဟီ ကွယ် ဆိူဝ် နာ အာတ့် ဒူင် ဘွတ် လွှိုမ် တူတ့်၊ ဟဲ့ ပွိုန် ယိုဝ်။ ဆေ ယီ ကွယ် နာ ရေတ့်၊ အာဝ် ပွိုန် ယိုဝ်။ မင် ဂွတ် ဂေ တီ၊ ဂေ ဘော အုန် ပါယ် တီ ကော ဇမ် အာတိုဝ် နီ။ 10 ခဲင် ဇီဒိူက် တီ၊ န့ မိုဝ်း မီ မာဝ် အာ ဒီဖ့လ ပီ ဟပ် အုန် အာမုဝ်ဆဲ ဒေါ ကွယ် အန် ဒဲင် နွန် ဆီနာယ် တွိုန်။ ဝါယ် ဟဲ့ လေး ဂေ ခဲင် မိူင် အဲဂိုပ်၊ ဒေါ အန် တီ ဇဝ်ဖြာ ဘော ဂေ ဒူအီ အီဆာရေလ ဟဲ့ လာယ် ကာဆဲန့်။ ဒဲင် တီ၊ အာဝ် မိုဝ်း မာဆေ အီ ကွယ် နာ ခဲင်။

11 ဂေ ဟဲ့ ဟွတ့် ဘ့လေး အုန် ဇီဒိူက် တီ ခဲင် ဟူင် တွိုန်၊ ဂေ ဒါ အီ လှူ ဒီ ဇဝ်ဖြာ ဝီ လေး ခဲင် ဒူင် ဆီငါ ဘွတ် တီ။ ခဲ့ ကွယ် ဂေ ဒါ အီ လှူ ဒီ ဇဝ်ဖြာ အီ တး ကာဇု ဒီ တီ၊ ဂေ ဘောကာဂ့လျီတ် ဟဲ့ ဟွတ့် ဘူင် တဲး ဒုဝ် ဂေ ဆီငါ။ ဂေ မိူဝ် တူ ကာဖာ ယုဝ် န့ မုး ဖိုင် ဂေ တူ မုး ဖိုင် ဂေ အီ လုဝ် ဘူင် ဂါန်။ 12 ခဲ့ ကွယ် ဂေ ဒူအီ အာမျုဝ် အာလေဝီ အီ နပ် ဒီ တဝ်း မှုဝ် ဘောကာဂ့လျီတ် ဘော မုး အာဆာပ်၊ အာဟေမာန်၊ အာယေဒူထုန် ဘော လှုက်လှာန် ဂေ ဘော ဘီနွင် ဝေါဝဲ ဂေ ဘောကာဂ့လျီတ်၊ ဂေ ဟဲ့ စှိုပ် ဒီ တာ ဘိက် ကာတမ် လုယ်။ ဂေ ဝီ စွင့် နာ လေး ဆီငဲ ကာစှူင့် လှူ ဘော ဘး ဒိင်၊ စှုဝ်း စှဲန့်၊ ကြိတ် ဒိင် ဒီရဝ်။ ဂေ ကွယ် ခူပ် ဂေ ဒါ အီ လှူ ဒီ ဇဝ်ဖြာ အူ မာယဝ်း ဒီ အာ ဂိုဝ် ဝီ အီ ဟဲ့ ဘုတ် ဝဝ် နိုင် ပဲ တွိုန်။ 13 ဂေ အီ ဘုတ် ဝဝ် ဘော ဂေ အီ တဝ်း မှုဝ်၊ ဂေ မိူဝ် တဝ်း ဖြူမ် ရိုမ်၊ တဲး မဲင် ဂေ မုး အူ မျုဝ်။ ဂေ အီ ဘုတ် ဝဝ် ဘော ဂေ အီ စှုဝ်း စှဲန့် ဘော ဘး ဒိင် ဘဲန် မျုဝ် ဘဲန် မျုဝ်၊ ဂေ အိူပ် မျုက် ဇဝ်ဖြာ။ ဂေ မိူဝ် ကာဖြူမ် ဒီ တဝ်း မှုဝ် တာင် တာင်။ ဂေ တဝ်း၊ “တဲး အေ အိူပ် မျုက် ဇဝ်ဖြာ ကူပ် ဟဲ့ ဘွတ် မျာတ် ကာဆဝ် အန် ဇဝ်။ အန် ဇဝ် မိူဝ် မိုဝ်း နဝ်း ရွက့် ကာဝေ ဆေဆေ။” ဟဲ့ ဟွတ့် ပါယ် တီ န့အု မိူဝ် တး နုဝ့် ခဲင် ဟုဝ် ဇဝ်ဖြာ တီ။ 14 ကူပ် န့အု တီ ဂေ ဒါ အီ လှူ ဒီ ဇဝ်ဖြာ ကော ဟူ ပွိုန် ဒီ လှူ ဒီ ကြိုပ် ဇဝ်ဖြာ။ ခုဝ်၊ အာဖုင် ဒင်ခုဝ် ဇဝ်ဖြာ ဟဲ့ နုဝ့် ခဲင် ဟုဝ် ဇဝ်ဖြာ တီ။