1 ဟဲ့ ဟွတ့်၊ အာဆာလုဝ်မုဝ် ဝီ ဆာခိုဝ် တဝ်း၊ “မဲ ဇဝ်ဖြာ ဟဲ့ တဝ်း၊ မဲ ဒီ ကွယ် ခဲင် န့အု ဟေတ့် အီ အပ် ဝွင့် ဒီတိန့်။ 2 ဒေါ တီ နီ အုဝ် ဟဲ့ ဘူင် ကာင် ဒူင် ဒီ ကွယ် မဲ ဇဝ် အီ မုး ဒူင် ဒီ ကွယ် မဲ ဇဝ် ဆေဆေ။”

3 ဂေ ဒူအီ အီဆာရေလ ဘောကာဂ့လျီတ်၊ ဒေါ ကွယ် ဂေ ဒီ တီ၊ ဒူင် ဒီ ကွယ် ခုန်ဒီခမ် မိူဝ် ဝီ မာငး နာ ကွယ် ဂေ ဒူအီ ကိူန် တီ၊ ဝီ မွင့်ကာရာ ဒွါ ဒီ ဂေ။ 4 အန် ဝီ တဝ်း ဒီ ဂေ၊ “တဲး အေ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် အေ ဒူအီ အီဆာရေလ။ အန် ဇဝ် ဟဲ့ ဘူင် ဒူပ် ဂြုဝ်း ပဲ့ ဟဲ့ ကာဆဲန့် အန် ဒီ အာဒါဝိတ် အီ မုး ဂုန့် အုဝ်။ 5 အန် ဟဲ့ တဝ်း၊ ‘အူ ဆိန့် ဆီငဲ ဒေါ ထုတ် လေး အုဝ် ဂေ ဒူအီ ပီ အိုပ် အုဝ် ခဲင် မိူင် အဲဂိုပ် ကော ဇမ် ဒေါ တီ နီ အုဝ် တူ ရဝ်း ဒူင် ဒီ ကွယ် အုဝ် ခဲင် မိူင် အီဆာရေလ၊ တဲး ဂေ ပွိုန် ဒီ ဘူင် ကာင် ဒူင် ဒီ ကွယ် အုဝ်၊ တဲး ဂေ ပွိုန် ဒီ ကြိုပ် အုဝ်။ အုဝ် မိူဝ် တူ ဒွိုမ် ရဝ်း ဝီ အီ ဒီ အိုပ် ဂေ ဒူအီ ပီ အိုပ် အုဝ်၊ အီ မုး ဒူအီ အီဆာရေလ တီ။ 6 မာလဲ ဒေါ တီ နီ အုဝ် ဟဲ့ ဝီ ရဝ်း ဒီ ကွယ် ခဲင် မိူင် ယေရူဆာလဲမ်၊ တဲး န့ ဘဲန် ဒူင် ဒီ တး ကြိုပ် အီ ဒီ အုဝ်။ အုဝ် မိူဝ် ဟဲ့ ရဝ်း အာဒါဝိတ်၊ တဲး အန် အိုပ် ဂေ ဒူအီ ပီ အိုပ် အုဝ် အီ မုး ဂေ ဒူအီ အီဆာရေလ။’”

7 ဟဲ့ ဟွတ့် အာဆာလုဝ်မုဝ် ဝီ တဝ်း၊ “အာဒါဝိတ် အီ မုး ဂုန့် အုဝ် တီ ဟဲ့ ခြာမ် ဒီ ဆမ် ဟုဝ် ဇဝ်ဖြာ၊ တဲး န့ ဘဲန် ဒူင် ဒီ ကြိုပ် ဂေ ဒူအီ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အေ ဒူအီ အီဆာရေလ။ 8 ဇဝ်ဖြာ ယီ ဟဲ့ ဝီ တဝ်း ဒီ အန်၊ ‘ပဲ့ ဟဲ့ ခြာမ် မဲ ဒီ ဆမ် ဒီ ဘူင် ဟုဝ် အာဒါ အုဝ် တီ ဟဲ့ မုး နာ ဘွတ် နာ မွှိုမ်။ 9 မာလဲ၊ မဲ ယီ တူ ပွိုန် ဘူင် ဒေါ မှဝ်။ ဂွန် အာရာင် မဲ အီ ဒီ ဆမ် ဟုဝ် တီ အာဒါ အုဝ်။’

10 ဒေါ တီ နီ၊ ဇဝ်ဖြာ ဟဲ့ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ အန် တီ။ အုဝ် မိူဝ် ဟဲ့ ဟွတ့် ပ့လု ဂုန့် အုဝ်၊ ဝီ ကွယ် ခဲင် ဟုဝ် အန်။ ဇဝ်ဖြာ ဟဲ့ တဲး အုဝ် ဘဲန် ခုန်ဒီခမ် အီ အိုပ် ဒူအီ အီဆာရေလ။ အုဝ် မိူဝ် ဟဲ့ ပွိုန် ဒီ ဆမ် ဟုဝ် ဇဝ်ဖြာ၊ တဲး န့ ဘဲန် ဒူင် ကြိုပ် ဂေ ဒူအီ ဒီ ဇဝ်ဖြာ အီ မုး ဇဝ်ဖြာ အီ အိုပ် ဂေ ဒူအီ အီဆာရေလ။ 11 ခဲင် ဟုဝ် ဇဝ်ဖြာ တီ၊ အုဝ် ဟဲ့ ဝီ ဟပ် အုန် ဘော ဇီဒိူက် ဇဝ်ဖြာ အီ မိုဝ်း ဒီခ့လဲပ် မာဝ် အီ ဟဲ့ ဒဲမ် အုန် ဂြုဝ်း ပဲ့ ဟဲ့ လာယ် ကာဆဲန့် ဇဝ်ဖြာ ဘော ဂေ ဒူအီ အီဆာရေလ။”

12 အာဆာလုဝ်မုဝ် ဟဲ့ ဟွတ့် ကာလာင် ဂြုဝ်း တီ၊ အန် ဘော တး စွင့် နာ အာတ့် ကာစှူင့် လှူ၊ တဲး ဂေ ဒူအီ အီဆာရေလ ဘောကာဂ့လျီတ် ယိုဝ် အန်။ အန် မိူဝ် စုဝ့် ဆူင့် ဒဲ အန် ဘော အာ ဘ့လာက်။ 13 အာဆာလုဝ်မုဝ် ဟဲ့ ဘူင် အုန် ကာစှူင့် ဘွင့် ဒေန့် အီ တူင့် ဖန် ကာနိး ဘော တာင် ဖန် ကာနိး။ နာ စာ အန် အူယ် ကာနိး။ အန် ဟဲ့ ဘူင် အုန် ခဲင် ဝဲင် ဟုဝ် ဇဝ်ဖြာ တီ။ အန် မိူဝ် ခြိုပ်ခြဝ် ဒဲင် ကာစှူင့် တီ၊ တဲး ဒူအီ ဒွန် အီ ပွိုန် ဒီ ယိုဝ် အန်။ အန် မိူဝ် စုဝ့် ဆူင့် ဒဲ အန် ဟုဝ့် ခဲင် ဂါင်ဟြာဝ် ဘော ဆာခိုဝ် တဝ်း၊

14 “အိုယ် မဲ ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ။ ဘော ခဲင် ဂါင်ဟြာဝ် ဘော ဒဲင် ကာဒါယ် အာဝ် မိုဝ်း ဇဝ်ဖြာ ပေါ အူ ကာဒင် အီ ခမ် ဒီ ဒူပ် ကာဒိက် ဆတ်ဇာ ပီ ကာဆဲန့် အန်၊ အီ မိုဝ်း နဝ်း ရွက့် ကာဝေ ဂေ ဒူအီ အီ ဒူပ် ဆီချာ အန်။ 15 အာဒါဝိတ် အီ မုး ဂုန့် အုဝ်၊ မဲ ဇဝ် မိူဝ် ဟဲ့ ဘူင် ဒူပ် ပီ ကာဆဲန့် မဲ ဒီ အန်။ န့ ဟဲ့ ဘဲန်၊ ဟဲ့ ဇေ့ဇုင် တူတ့် ဒွန် ဒဲ ဒေါ တီ နီ။

16 အိုယ် မဲ ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ၊ အာတိုဝ် နီ မိူဝ် အုဝ် မှာန့်၊ တဲး န့ ဘဲန် ပီ ပီ ဒွိုမ် ဒွါ မဲ ကာဒိက် ဆတ်ဇာ ဒီ ဂုန့် အုဝ်။ မဲ ဟဲ့ တဝ်း၊ ‘ဆေ ဂေ လှုက်လှာန် မဲ ဘော ဘူင် ဒူပ် ဆီချာ ဆီချာ ပီ အိုင် အုဝ်၊ ဂေ ဒီ ပွိုန် ဒီ ဘဲန် ခုန်ဒီခမ် အီ အိုပ် ဒူအီ အီဆာရေလ ဆေဆေ။’ 17 ခုဝ် အန် တီ၊ မဲ ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ၊ အုဝ် မှာန့်၊ ဂြုဝ်း ကာဒိက် ဆတ်ဇာ ပီ ကာလာင် မဲ ဒီ အာဒါဝိတ် အီ မုး ဒဲစေန့် မဲ ဇဝ်၊ တဲး န့ ဘုဝ် ဘဲန် တူတ့် ဒွန် မျုဝ်။

18 မာလဲ၊ မဲ ဟဲ့ ဒွိုမ် တဝ်း ဒီ ဂုန့် အုဝ်၊ ‘မဲ ထာင် ဟဲ့ မှာန် အုဝ် ဒီ ကွယ် ရိုမ် ဒူပ် ဒူအီ ဒဲင် ကာဒါယ် နီ။း’ အုဝ် ယီ ဟဲ့ နပ်၊ ဘ့လေန့် ဂေ ဂါင်ဟြာဝ် ဟဲ့ စာ ကာဆဝ်၊ ယီ တူ ဂ့လိုမ် တဲး မဲ ဇဝ် ကွယ်။ ဟုဝ် ပဲ့ ဟဲ့ ဆမ် ဟဲ့ ဘူင် အုဝ် နီ၊ န့ ဟဲ့ ဝဲ တူ ဂ့လိုမ်၊ တဲး မဲ ဇဝ် ကွယ်။ 19 အိုယ် မဲ ဇဝ်ဖြာ အီ မုး ဇဝ်ဖြာ အီ အိုပ် အုဝ်၊ အုဝ် အီ မုး ဒဲစေန့် မဲ ဇဝ်၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်၊ တဲး မဲ ကာဝေ အုဝ် ဘော ဒွါ ခဲ့ ပီ မှာန့် အုဝ်။ 20 တဲး မဲ ဇဝ် ဘော ဘ်ု ယွတ် မဲန် ဟုဝ် မဲ ဇဝ်ဖြာ ဒွန် မှိုဝ် ဒွန် ညှာ။ မဲ ဇဝ် မိူဝ် ဟဲ့ ဟွတ့် ကာလာင် အုန် လွင် ဒူင် တီ၊ န့ ဒီ ဘဲန် ဒူင် ကွယ် မဲ ဇဝ်။ ဒေါ ဆာခိုဝ် မာငး ယွတ် အုဝ် နာ ကွယ် ဟုဝ် မဲ ဇဝ် တီ၊ မှာန့် တဲး မဲ ဇဝ် ထူမ် ဂြုဝ်း အုဝ်။ 21 အုဝ် ဒဲစေန့် မဲ ဇဝ် ဘော ဂေ ဒူအီ အီဆာရေလ အီ မုး ဒူအီ ပီ အိုပ် မဲ၊ ဒေါ ဝီ မာငး ယွတ် ယေ ဒီ ဟုဝ် နီ ဘော ဆာခိုဝ် မှာန့် ဒီ မဲ ဇဝ်၊ တဲး မဲ ထူမ် ဂြုဝ်း ပီ ဆာခိုဝ် ယေ ဒဲစေန့် မဲ ဇဝ်။ မဲ ဇဝ် အီ ကွယ် ခဲင် ဂါင်ဟြာဝ်၊ တဲး မဲ ထူမ် ဂြုဝ်း ယေ ဘော ဂဝ်း ဝဲန် မှာပ် ယေ။

22 ဆေ န့ မိုဝ်း ဒူအီ အီ ဟဲ့ လာယ် ကာလုတ့် ဒီ ဂိုက် အန်၊ ဆေ အန် ဘော တး ဒီ ကာစှူင့် လှူ အီ ကွယ် ခဲင် ဟုဝ် နီ ဘော တး ဒိူင် လွင် တူ မိုဝ်း အန် မှာပ်၊ 23 မှာန့်၊ တဲး မဲ ဇဝ်ဖြာ အီ ကွယ် ခဲင် ဂါင်ဟြာဝ် ဘော ထူမ် ဂြုဝ်း အန်၊ တဲး မဲ ဇဝ် ဆုင်ဖျာတ် အာမူ ဂေ တီ။ တဲး မဲ ဇဝ် ဘော ဒမ် မှာပ် ဒီ ဝီ အီ မိုဝ်း မှာပ် တီ။ တဲး ဒုဝ် အန် ဝီ ခမ် ခဲ့ ပီ ဘူင် အန် ဒီ အီ ဟဝ်။ ဝီ အီ တူ မိုဝ်း မှာပ်၊ တဲး မဲ ဇဝ် ဆုင်ဖျာတ်၊ တဲး ဒွန် အီ ကော နပ် လွင် တူ မိုဝ်း အန် မှာပ်။

24 ဆေ ဂေ ဒူအီ အီဆာရေလ အီ မုး ဒူအီ ပီ အိုပ် မဲ ဇဝ် ဟဲ့ စှိုမ် ဒီ ရန်ဆူ ဂေ ကူပ် ဟဲ့ ကာလိုပ် ဂေ ဒီ ဝဲန် မဲ ဇဝ်၊ ဆေ ဂေ ဘော ဝီ တး ဒီ ဟုဝ် နီ ဘော မိုဝ်း နဝ်း ဂူမ် နဝ်း တျီမ် ဒီ အာတ့် မဲ၊ ဝီ ဆာခိုဝ် မှာန့်၊ တဲး မဲ ဇဝ် ဂဝ်း ဝဲန် မှာပ် ဂေ တီ၊ 25 အုဝ် မှာန့်၊ မဲ ဇဝ် အီ ကွယ် ခဲင် ဂါင်ဟြာဝ်၊ တဲး မဲ ဇဝ် ထူမ် ဂြုဝ်း ဂေ။ တဲး မဲ ဇဝ် ဘော ဂဝ်း ဝဲန် မှာပ် ဂေ ဒူအီ ပီ အိုပ် မဲ တီ ဘော ဝီ ဒိုဝ်း တး ဂေ ခဲင် မိူင် ဂေ အီ မုး မိူင် ပဲ့ ဟဲ့ ဒွါ မဲ ဒီ ဂေ ဘော ဒီ ဂုန့် ဒင် ဂေ။

26 ဆေ မဲ ဇဝ် တူ တဲး ဂ့လာယ် စုဝ်း ခဲင် ဂါင်ဟြာဝ် ကူပ် မှာပ် ပီ လုတ့် ဂေ ဒီ မဲ ဇဝ်၊ ဆေ ဂေ ဘော ဝဲန် မှာပ် ပဲ့ ဟဲ့ ကာလိုပ် ဂေ တီ၊ ဝီ တး ဒီ ဟုဝ် မဲ ဇဝ်ဖြာ နီ ဘော ဝီ မိုဝ်း နဝ်း ဂူမ် နဝ်း တျီမ်၊ ဝီ ဆာခိုဝ် ဒီ မဲ ဇဝ်၊ 27 မဲ ဇဝ်ဖြာ အီ ကွယ် ဂါင်ဟြာဝ်၊ မှာန့် တဲး မဲ ဝီ ထူမ် ဂြုဝ်း ဂေ ဘော ဂဝ်း ဝဲန် မှာပ် ဂေ ဒဲစေန့် မဲ အီ မုး ဒူအီ အီဆာရေလ။ တဲး မဲ ဝီ မာနုဝ် ဂေ၊ တဲး ဂေ ဝီ နပ် ဒီ ဘူင် နာ ဘွတ် နာ မွှိုမ်။ တဲး ဂ့လာယ် မိူဝ် ဝီ စုဝ်း ဒဲင် ကာဒါယ် ပဲ့ ဟဲ့ အာပ် မဲ ဒီ ဘဲန် ခါဂုန် ဒီ ဂေ ဒူအီ ပီ အိုပ် မဲ ဇဝ် ဂေ တီ။

28 ခဲင် မိူင် ပဲ့ ဟဲ့ ဒွါ မဲ ဇဝ် ဒီ ဂေ တီ၊ ဆေ ဘော မိုဝ်း အာခြာဝ် အေတ့် ပီ ဒီ ဟူမ်၊ မိုဝ်း လဲင် စုဝ်း၊ ဂဝ် ငှုဝ် ဂေ ကာယူင့် ငှုဝ် မိူဝ် ဟဲ့ လိုဝ် စှိုမ်၊ ဘော မာဝ ဂေ မာအာမူင့် ဟဲ့ ဟူမ်၊ ဆေ ဂေ ဒူအီ ပီ အိုပ် မဲ ဇဝ် တီ မိူဝ် ဟဲ့ ကာဒုး အာဖေ အာရေ ကူပ် ဟဲ့ တး ကာဂုဝ်း ရန်ဆူ ဂေ ဒီ ဂေ ဘော မုး ဆဝ် ရောဂါ မျုဝ် မှဝ်၊ 29 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် ဂေ။ ဆေ ဂေ ဒူအီ အီဆာရေလ အီ မုး ဒူအီ ပီ အိုပ် မဲ ဇဝ် တီ ဘော လှုဝ်း ဒုက် ပဲ့ ဟဲ့ ခမ် ဂေ ရာင် အာဆေ ရာင် အန်၊ ဆေ ဂေ ဘော ဝီ တး ဆာခိုဝ် ဆာဒူင် ခဲင် ဟုဝ် မဲ ဇဝ်ဖြာ နီ၊ 30 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် ဂေ။ မဲ ဇဝ် အီ ကွယ် ခဲင် ဂါင်ဟြာဝ် အီ မုး ဒူင် ကွယ် မဲ၊ တဲး မဲ ဝီ ထူမ် ဂြုဝ်း ဂေ ဘော ဂဝ်း ဝဲန် ဘော မှာပ် ဂေ တီ ဘော ဘူင် ဒီ ဂေ၊ တဲး န့ ကာဒါန် ဒီ ပဲ့ ဟဲ့ ဘူင် ဂေ။ ခုဝ်၊ မဲ ဇဝ် မိူဝ် နပ် တူတ့် ပီ ပါယ် ခဲင် နဝ်း ဂေ။ 31 ဆေ န့ ပါယ် တီ ဂေ ဒူအီ ပီ အိုပ် မဲ ဇဝ် ဂေ ဒီ ဘော ရုဝ်ဆေ မဲ ဇဝ် ဘော ဘူင် ဒူပ် ဒါရာ မဲ ဇဝ် ဒေါ ကွယ် ဂေ ခဲင် မိူင် ပဲ့ ဟဲ့ ဒွါ မဲ ဒီ ဂေ ဘော ဒီ ဂုန့် ဒင် ဂေ အီ မုး ဒဲစေန့် မဲ ဇဝ်။

32 ဒဲင် တီ ဘော ဒူအီ အာမျုဝ် ဟဝ် အီ တး မိူင် တူင့် အီ တူ မုး ဒူအီ အာမျုဝ် အီဆာရေလ၊ ဆေ အန် ယိုဝ် ပီ ပါယ် ပွုန် မဲ ဇဝ် ဘော လွင် အီ အာရေ တာင် ပဲ့ ဟဲ့ ဘူင် မဲ ဇဝ် ဒီ ဂေ ဒူအီ အီ မုး ဒူအီ ပီ အိုပ် မဲ၊ ဆေ အန် ဝီ တး ကြိုပ်၊ တး ဆာခိုဝ် ဒီ မဲ ဇဝ် ခဲင် ဟုဝ် နီ၊ 33 တဲး မဲ ဇဝ် ဘော ထူမ် ဂြုဝ်း ပီ ဆာခိုဝ် အန် တီ။ မဲ ဇဝ် အီ ကွယ် ခဲင် ဂါင်ဟြာဝ် အီ မုး ဒူင် ကွယ် မဲ၊ တဲး မဲ ထူမ် ပီ ဆာခိုဝ် အန် ဘော ဒွါ ခဲ့ ပီ မှာန့် အန်။ ဆေ မဲ ဇဝ် ဘူင် ပါယ် တီ၊ ဂေ ဒူအီ ဒဲင် ကာဒါယ် ဘောကာဂ့လျီတ် ဒီ ဘော နပ် လွင် မဲ ဇဝ်။ ဂေ ဒီ ဘော ရုဝ်ဆေ မဲ ဇဝ် ပီ ဂေ ဒူအီ အီဆာရေလ ဟဲ့ ရုဝ်ဆေ မဲ ဇဝ်။ တဲး ဂေ နပ် ဘော ဟုဝ် မဲ ဇဝ်ဖြာ ပဲ့ ဟဲ့ ဆမ် အုဝ် နီ န့ မုး ဒူင် ဒီ ကြိုပ် မဲ ဇဝ်ဖြာ။

34 ဒေါ ဟာဝ် ကာဂုဝ်း ဂေ ဒူအီ ပီ အိုပ် မဲ ဇဝ် ဒီ ရန်ဆူ ဂေ ဘော မုး နာ မှဝ် အာဝ် တဝ်း၊ ဒူင် စ်ု မဲ ဇဝ် ဂေ ဟာဝ်၊ ဆေ ဂေ ဘော ဝီ မာငး ယွတ် နာ ကွယ် မိူင် ပဲ့ ဟဲ့ ရဝ်း မဲ ဇဝ် နီ ဘော ဝီ ဆာခိုဝ် မာငး ယွတ် ဟုဝ် ပဲ့ ဟဲ့ ဆမ် အုဝ် အာဒါ မဲ ဇဝ် နီ၊ 35 တဲး မဲ ဇဝ် ထူမ် ဂြုဝ်း ပီ ဆာခိုဝ် ဂေ။ တဲး မဲ ဇဝ် အီ ကွယ် ဂါင်ဟြာဝ် ထူမ် ဂြုဝ်း ဂေ ဘော ဝီ ကာဝေ ဂေ၊ တဲး ဂေ ဘော ဝီ ပဲ ရန်ဆူ ဂေ။

36 ဆေ ဂေ ဒူအီ ပီ အိုပ် မဲ ဇဝ် ဘော ဟဲ့ ကာလိုပ် ဒီ ဘူင် မှာပ် ဒီ အာတ့် မဲ ဇဝ် ခုဝ်၊ န့ တူ မိုဝ်း ဒူအီ ခေါ အူ ဝီ အီ ဒီ လွတ် ကာလိုပ်၊ မဲ ဇဝ် မိူဝ် ဒီ ရူ ဒီ ဂေ၊ တဲး ရန်ဆူ ဂေ ဝီ ပဲ ဂေ၊ ဝီ ဒိုဝ်း ဟာဝ် ဂေ၊ တဲး ဂေ ဟာဝ် ခမ် ဒုက် ခဲင် မိူင် ပေါ အူ မိူင် ဘော မုး မိူင် အီ ကွယ် ကာတတ် အီ ကွယ် ကာတူင့်၊ အုဝ် မှာန့်၊ တဲး မဲ ဇဝ် ဝီ ထူမ် ဂြုဝ်း ပီ ဆာခိုဝ် ဂေ ဒူအီ ပီ အိုပ် မဲ ဇဝ်။ 37 ဒေါ ကွယ် ဂေ ခဲင် မိူင် အီ ဟဝ် တီ၊ ဆေ ဂေ ဝီ လှုဝ်း မှာပ် ဂေ၊ ဝီ ကာလာင် မှာပ် ပဲ့ ဟဲ့ ဘူင် ဂေ အီ ဟဲ့ ဟာယ် ဟဲ့ မိူက် ကာဆဝ် တီ၊ ဆေ ဂေ ဘော ဝီ ဆာခိုဝ် ဒီ မဲ ဇဝ်၊ အုဝ် မှာန့်၊ တဲး မဲ ဇဝ် ဝီ ထူမ် ဂြုဝ်း ပီ ဆာခိုဝ် ဂေ။ 38 ဒေါ ကွယ် ဂေ ခဲင် မိူင် အီ ဟဝ် တီ၊ ဆေ ဂေ ဟဲ့ ဘျွင် နဝ်း ဂေ မှာန် အာခါခ်ု ဘော ဝီ ညှိုမ် ဘိုင် မဲ ဇဝ် ဒေါ ဆီ အိုပ် ရန်ဆူ ဒီ ဂေ တီ၊ ဆေ ဂေ ဘော ဝီ ဆာခိုဝ်၊ ဝီ မာငး ယွတ် မိူင် ပဲ့ ဟဲ့ အာပ် ဒွါ မဲ ဇဝ် ဒီ ဂုန့် ဒင် ဂေ အီ မုး မိူင် ပီ ရဝ်း မဲ၊ ဆေ ဂေ ဝီ မာငး ယွတ် ဘော ဟုဝ် ပဲ့ ဟဲ့ ဆမ် အုဝ် အာဒါ မဲ ဇဝ် နီ၊ 39 တဲး မဲ ဇဝ် ဝီ ထူမ် ဂြုဝ်း ပီ ဆာခိုဝ် ပီ မှာန့် ဂေ တီ။ မဲ ဇဝ် အီ ကွယ် ဂါင်ဟြာဝ်၊ တဲး မဲ ဘော ကာဝေ ဂေ၊ ဝီ ထူမ် ဂြုဝ်း ဂေ။ တဲး မဲ ဝီ ဂဝ်း ဝဲန် မှာပ် ပဲ့ ဟဲ့ ဘူင် ကာလိုပ် ဂေ တီ။

40 အိုယ် မဲ ဇဝ်ဖြာ အီ မုး ဇဝ်ဖြာ အီ အိုပ် အုဝ်၊ အုဝ် မှာန့်၊ တဲး မဲ ဇဝ် ယွတ် ယေ ဘော ထူမ် ဂြုဝ်း ပီ ဆာခိုဝ် ပီ မှာန့် ယေ ဒေါ ကွယ် ယေ ဒီ နီ။

41 တဲး မဲ ဇဝ်ဖြာ တး ဒူပ် ဇီဒိူက် ဇဝ်ဖြာ အီ ဘျ ပွုန် မဲ ဇဝ်။ တဲး မဲ ဇဝ် တး ဘော ကွယ် ခဲင် ဟုဝ် နီ ဆေဆေ။ တဲး မဲ ဇဝ် ချွတ် ဂေ ဒါ အီ လှူ ဒီ ဇဝ်ဖြာ၊ တဲး န့ ပီ ဂေ စှိုပ် ခြိုင် ကာမာယ်။ တဲး မဲ ဘော ဂေဇူ ဂေ ဒူအီ အီ ဆီငါ ဘွတ်၊ တဲး ဂေ ဘျုဝ် ဒါခိုယ်။

42 အိုယ် မဲ ဇဝ်ဖြာ၊ အုဝ် မှာန့် ကွဲ့ တဲး မဲ ဇဝ် ဝဲန် ခုန်ဒီခမ် ပဲ့ ဟဲ့ ဖဝ်း မဲ ဇဝ် နာမန် ဒီ ဂိန့် အန်။ တဲး မဲ ဇဝ် ဝီ လှုဝ်း ဆေဆေ ခဲ့ ရွက့် ကာဝေ မဲ ဒီ အာဒါဝိတ် အီ မုး ဒဲစေန့် မဲ ဇဝ်။”