1 အာဆာလုဝ်မုဝ် ဟဲ့ ဟွတ့် ဆာခိုဝ် ပါယ် တီ န့ ဘော မိုဝ်း ငဝ် အီ လေး လူင် ခဲင် ဂါင်ဟြာဝ်၊ တး ကာဆိုမ် ပီ လှူ ဂေ တွိုန်။ အာဖုင် ဒင်ခုဝ် ဇဝ်ဖြာ မိူဝ် ဟဲ့ နုဝ့် ခဲင် ဟုဝ် ဇဝ်ဖြာ။ 2 ဂေ ဒါ အီ လှူ ဒီ ဇဝ်ဖြာ ကော ဟူ ပွိုန် လိုပ် ခဲင် ဟုဝ် ဇဝ်ဖြာ ကူပ် ဟဲ့ နုဝ့် အာဖုင် ဒင်ခုဝ် ဇဝ်ဖြာ ခဲင် ဟုဝ် ဇဝ်ဖြာ တီ။ 3 ဒေါ ယိုဝ် ဂေ ဒူအီ အီဆာရေလ ငဝ် ဟဲ့ စုဝ်း လူင် ခဲင် ဂါင်ဟြာဝ် ဘော အာဖုင် ဒင်ခုဝ် ဇဝ်ဖြာ ဟဲ့ နုဝ့် ခဲင် ဟုဝ် ဇဝ်ဖြာ တီ၊ ဂေ မိူဝ် ဝီ မုတ် ဂိုပ် ဒဲင် မာဝ် ပီ ဒ ဂေ တွိုန်။^a ဂေ ဝီ အိူပ် မျုက် ဇဝ်ဖြာ ဘော ကာလာင် ဂုင် ဂေဇူ ဒီ အန် ဇဝ် တဝ်း၊ “တဲး အေ အိူပ် မျုက် ဇဝ်ဖြာ ကူပ် ဟဲ့ ဘွတ် မျာတ် ကာဆဝ် အန် ဇဝ်။ အန် ဇဝ် မိူဝ် မိုဝ်း နဝ်း ရွက့် ကာဝေ ဆေဆေ။” 4 ဝါယ် အန် တီ အာဆာလုဝ်မုဝ် ဘော ဂေ ဒူအီ အီဆာရေလ ဘောကာဂ့လျီတ် ဝီ ဒိုဝ်း ပီ ဒီ လှူ ဂေ ဘော လှူ ဒီ ဇဝ်ဖြာ။ 5 အာဆာလုဝ်မုဝ် ဘော ဒိုဝ်း မက် အာ မှိုန့် ဒီ အာ ဟြဲန့် ဒုဝ်၊ မာဘူ အူ ဆဲန် ဒီ အာ မှိုန့် ဒုဝ်၊ တဲး န့ ဘဲန် ပီ ဒီ လှူ အီ ကွယ် ကာဇု ဟူမ် ရိုမ်။ ပါယ် တီ ခုန်ဒီခမ် ဘော ဂေ ဒူအီ အီဆာရေလ ဘောကာဂ့လျီတ် ဘော ကာဖြူမ် ဒီ လှူ ဟုဝ် ဇဝ်ဖြာ၊ တဲး န့ ဘဲန် ဒူင် ဆီငါ ဘွတ်။ 6 ဂေ ဒါ အီ လှူ ဒီ ဇဝ်ဖြာ မိူဝ် ဟဲ့ စွင့် ဒူင် ဟဲ့ ရဲန် အီ ဟဝ် အာဒါ ဂေ။ ဂေ ဒူအီ အာမျုဝ် အာလေဝီ ဘော ဝီ စွင့် နာ အာတ့် ဂေ တီ၊ ဝီ ဂူင့် ဘော အာမျုဝ် ပီ ဒွယ် ပီ ဘး အီ မုး ပီ ဘူင် အုန် အာဒါဝိတ်၊ တဲး ဂေ ကြိုပ် ဇဝ်ဖြာ။ ဂေ မိူဝ် ပါက် မှုဝ် တဝ်း၊ “နဝ်း ရွက့် ဇဝ်ဖြာ ကွယ် ဆေဆေ။” ဂေ မိူဝ် တဝ်း ဒူပ် ပီ ဘူင် အုန် အာဒါဝိတ် တွိုန်။ ဂေ ဒါ အီ လှူ ဒီ ဇဝ်ဖြာ မိူဝ် ဘုတ် ဝဝ်။ ဂေ ဘော စွင့် လာယ် ကာဆိူဝ် ဒီ ဂေ ဒူအီ အာလေဝီ။ ဘော ဂေ ဒူအီ အီဆာရေလ ဘောကာဂ့လျီတ် ဟဲ့ စွင့်။

7 အာဆာလုဝ်မုဝ် ဘော ဘူင် တဲး ဝဲင် အီ ကွယ် နာ အာတ့် ဟုဝ် ဇဝ်ဖြာ ဘဲန် ဒူင် ဆီငါ ဘွတ်။ အန် ဘော လှူ ဒုဝ် ပီ ဒီ လှူ အီ ဒုဝ့် ဒီ ငဝ်၊ ဘော ဘျြီင် အီ လေး ဒီ ပီ ဒီ လှူ အီ ကွယ် ကာဇု ဟူမ် ရိုမ်။ အန် ဘူင် ပါယ် တီ ခုဝ်၊ ကာစှူင့် ဘွင့် ဒေန့် ပဲ့ ဟဲ့ ဘူင် အုန် အန် တွိုန်၊ န့ ဒီတဲတ်၊ အာဝ် ကူပ် ပွိုန် ဘ့လေး တူတ့် ကြုဝ် ပီ ဒီ လှူ ဂေ ဘောကာဂ့လျီတ်၊ အီ မုး ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်။

8 ပါယ် တီ အာဆာလုဝ်မုဝ် ဘော ဂေ ဒူအီ အီဆာရေလ ဘောကာဂ့လျီတ် ဘူင် ဘ့လွယ် အာဒါ ဘူ ဆီငဲ။ ဂေ မိူဝ် ဟဲ့ တး ကာဇု စုး ဒီ န့တေန့် အီ ဟာဝ် ဒီ မိူင် လေဘုဝ်ဟာမာတ် ကော ဝီ ဇမ် ဒီ ကာအုန် ကာဒါယ် မိူင် အဲဂိုပ် ဘ့လာက် နာ တေတ့်။ ဟဲ့ မိုဝ်း ဒူအီ ကိူန် ကာဆဝ် အီ တး လိုပ် ဘ့လွယ် ဇဝ်ဖြာ။ 9 ဂေ ဟဲ့ ဘူင် ဘ့လွယ် တီ ဟဲ့ နုဝ့် ဘူ ဆီငဲ၊ ဂေ ပီ ဝီ ဘူင် ဟာဝ် အာဒါ ပေါ ဘူ ဆီငဲ။ ဘော နုဝ့် ဆီငဲ န့ဒါ၊ ဂေ ဝီ တး ကာဇု ဘူင် ဘ့လွယ် လှူ ကာစှူင့် လှူ။ 10 ဘော ဇမ် ဆီငဲ အာ ဂိုဝ် ဒီ ဟာအူယ်၊ မာဂျီန် န့ ဘူ၊ အာဆာလုဝ်မုဝ် မိူဝ် ဝီ စ်ု ဒူအီ ဂေ တွိုန်၊ တဲး ဂေ ဝေန့် ကာင် ဂေ ရာင် အာဆေ ရာင် အန်။ ဂေ မိူဝ် ဟဲ့ ခူယ် ဒါခိုယ် ကူပ် ဟဲ့ မွင့်ကာရာ ဒွါ ဇဝ်ဖြာ ဒီ ဒူအီ အီဆာရေလ၊ ဘော ဒီ အာဒါဝိတ် ဘော ဒီ အာဆာလုဝ်မုဝ်။

11 အာဆာလုဝ်မုဝ် ဟဲ့ ဟွတ့် ဘူင် ဟုဝ် ဇဝ်ဖြာ ဘော ဟုဝ် အန်၊ ဟဲ့ ဟွတ့် တူတ့် ဒွန် မျုဝ် ခဲ့ ဆီ ဘူင် အန် ခဲင် ဟုဝ် ဇဝ်ဖြာ ဘော ခဲင် ဟုဝ် အန်။ 12 ဝါယ် အန် တီ၊ ဇဝ်ဖြာ ဝီ တး ကာပ့လုး ဒီ အန် ခဲင် မှိုဝ် ဘော ကာလာင် ဒီ အန် တဝ်း၊ “အုဝ် ဟဲ့ ဟွတ့် ယိုဝ် ဂြုဝ်း ပီ ဆာခိုဝ် မဲ။ အုဝ် မိူဝ် ဟဲ့ ရဝ်း ဟုဝ် နီ၊ တဲး န့ ဘဲန် ဒူင် ဒီ တး လှူ အီ ဒီ အုဝ်။

13 နာ အာတ့် ဟာဝ် အုဝ် ဒီ ဘော ဘူင် ကွဲ့ တဲး ဂ့လာယ် စုဝ်း။ အုဝ် မိူဝ် ဝီ စ်ု မာ အာမူင့် တး ဟူမ် ပီ ဆမ် ပီ ပိတ် ဘေ ဘော တဲး ဂေ ဒူအီ ပီ အိုပ် အုဝ် မိုဝ်း ဆဝ် ရောဂါ။ 14 ဆေ ဂေ ဒူအီ ပီ အိုပ် အုဝ် အီ ဟဲ့ ခမ် ဒီ ဒူပ် အုဝ် ယီ ဝီ လှုဝ်း ပီ ကာလိုပ် ဂေ၊ ဝီ ဝဲန် ပီ ဘူင် ဂေ တီ၊ ဝီ ဂူမ် ဒီ အာတ့် အုဝ် ဘော ဆာခိုဝ် ဒီ အုဝ်၊ အုဝ် အီ ကွယ် ခဲင် ဂါင်ဟြာဝ် အုဝ် ဒီ ထူမ် ဂြုဝ်း ဂေ။ အုဝ် ဒီ ဘော ဂဝ်း ဝဲန် မှာပ် ဂေ၊ ဝီ တဲး မာန် မိူင် ဂေ ဒါခိုယ် ဆီချာ ပီ ဘြိမ်။ 15 အုဝ် မိူဝ် ဘ်ု ဒီ ယွတ် ဟုဝ် နီ ဆေဆေ၊ ဘော ထူမ် ဂြုဝ်း ပီ ဆာခိုဝ် ဆာဒူင် ဂေ ဒီ နီ။ 16 အုဝ် မိူဝ် ဟဲ့ ရဝ်း ဟုဝ် နီ၊ တဲး န့ ဘဲန် ဒူင် ဆီငါ ဘွတ်။ အုဝ် မိူဝ် ဒီ ကွယ် ဒီ နီ ဆေဆေ။ ငါယ် အုဝ် မိူဝ် ဒီ ယွတ် ဟုဝ် နီ ဘော နဝ်း အုဝ် ဒီ ရွက့် ဟုဝ် နီ ဆေဆေ။

17 န့ ယီ မုး မဲ၊ မဲ လုဝ် မိုဝ်း နဝ်း ဆိူဝ် ဘော ဘူင် နာ ဘွတ် ပီ ပီ ဒွိုမ် ဘူင် အာဒါဝိတ် အီ မုး ဂုန့် မဲ။ မဲ ဘော လုဝ် ထူမ် ပဲ့ ဟဲ့ ကာလာင် အုန် အုဝ် ဘော ဒူပ် ဒါရာ ဂေ အာကျာမ် အာငျာန် အုဝ်။ 18 ဆေ မဲ ဘော ဘူင် ပါယ် တီ၊ အုဝ် မိူဝ် ဒီ တဲး လှုက်လှာန် မဲ ဘဲန် ခုန်ဒီခမ် ဆေဆေ။ န့ ဒီ ဘော ဒူပ် ဂြုဝ်း ကာဒိက် ဆတ်ဇာ ပီ ဒွိုမ် ကာလာင် အုန် အုဝ် ဒီ ဂုန့် မဲ အီ မုး အာဒါဝိတ်။ အုဝ် ဟဲ့ ဒွိုမ် တဝ်း ဒီ အန်၊ ‘ခြိုဝ် လှုက်လှာန် မဲ ဒီ ပွိုန် ဒီ အိုပ် မိူင် အီဆာရေလ ဆေဆေ။’

19 မာလဲ၊ ဆေ မဲ ဘော ဂေ ဒူအီ ပီ အိုပ် မဲ ဝီ ဘူင် လုတ့် ဒါရာ အုဝ် ဘော တူ ဝီ ဒူပ် ဂြုဝ်း ပီ ကာလာင် အုန် အုဝ်၊ ဝီ ကြိုပ် ဇဝ် ပေါ ကာဒင်၊ အုဝ် မိူဝ် တူ ဘူင် ဒူပ် ကာဒိက် ဆတ်ဇာ တီ။ 20 အုဝ် ဒီ ဝဲန် ဂေ ဒူအီ အီဆာရေလ၊ တူ တဲး ဂေ ကွယ် ခဲင် မိူင် ပီ ဒွါ အုဝ် ဒီ ဂေ။ ဘော ဟုဝ် ပဲ့ ဟဲ့ တဲး အုဝ် ဘဲန် ဟုဝ် ဘွတ် နီ၊ အုဝ် ဒီ ဝဲန်၊ တဲး န့ ဘဲန် ပီ နဲန ပီ ကာညး ဂေ ဒူအီ ဟဝ်။ 21 ဟုဝ် တာင် အီ ဟဲ့ စာ ဟဲ့ စှိတ် ကာဆဝ် နီ မိူဝ်၊ ဆေ အီ ဟာဝ် ဒူပ် န့တေန့် ကာလုဝ်း ဒီ နီ၊ ဂေ ဒီ ဘော အာမ် ကာဆဝ် တဝ်း၊ ‘ကူပ် မာဆေ ဇဝ်ဖြာ ဟဲ့ ဘူင် တဲး ဘော မိူင် ဘော ဟုဝ် နီ စှိုမ် ပါယ် နီ။း’ 22 ဂေ အီ ဟဝ် ပီ ဒီ ဝီ ဝျီ့ တဝ်း၊ ‘ဇဝ်ဖြာ ဟဲ့ ဒမ် မှာပ် ဒီ ဂေ ကူပ် ဟဲ့ ဝဲန် ဂေ ဇဝ်ဖြာ အီ ဟဲ့ ဒိုဝ်း လေး ဒါ ဒါ ဂေ ခဲင် မိူင် အဲဂိုပ် တွိုန်။ ဂေ ဟဲ့ ဝီ ဟာဝ် ကြိုပ် ဘိုင် ဇဝ် ပေါ ကာဒင်။’” ခဲ့ တီ ဇဝ်ဖြာ ဟဲ့ ကာလာင် ဒီ အာဆာလုဝ်မုဝ်။