1 အာဆာလုဝ်မုဝ် ဟဲ့ ဆမ် ဟုဝ် ဇဝ်ဖြာ ဘော ဟုဝ် အန် ကော တူတ့် အာ ဂိုဝ် ဆီနမ်။ 2 ဟဲ့ ဟွတ့်၊ အန် ဝီ မ့ပြာယ် ရဝ် ဘဲန် ရဝ် ဘဲန် ရဝ် ပဲ့ ဟဲ့ အာပ် ဒွါ အာဟီရမ် ဒီ အန်၊ ဝီ တဲး ဂေ ဒူအီ အီဆာရေလ ဝီ ကွယ် ခဲင် ရဝ် ဂေ တီ။ 3 အန် ဝီ ကာဂုဝ်း ပွိုန် ဘော မိူင် ဟာမာတ်စောဖ။ 4 အန် ဝီ ဒဲ မိူင် ဒါမော အီ ကွယ် ခဲင် ပြဲ ကာဟဝ်း၊ ဝီ မ့ပြာယ် ဘော မိူင် ဒူင် အုန် အန် ကြုဝ်ကြာမ် အန် အီ ကွယ် ခဲင် ကာဒါယ် မိူင် ဟာမာတ် တွိုန်။ 5 အန် ဟဲ့ မ့ပြာယ် မိူင် ဘေတ်ဟုဝ်ရုန် ဘ့လာက် နာ ကွာ၊ ဘော မိူင် ဘေတ်ဟုဝ်ရူန် အီ ကွယ် ဘ့လာက် နာ တေတ့်။ ဂေ ဘော ဘဲန် မိူင် အီ မန် ဆီချာ၊ မိုဝ်း ဘော ရဲင် ဘော မာလုဝ်း ဘော ဒူင် ဘ်ု။ 6 ဟဲ့ မ့ပြာယ် ဘော မိူင် ဘာလာတ် ဘော မိူင် ဒူင် အုန် အန် ကြုဝ်ကြာမ် အန်၊ အုန် မ့ပြွင့် ဘော လက်လဝ် ပီ ပဝ့် ဒါ ဆိုက် အန်။ ခဲင် မိူင် ပီ အိုပ် အန် ဒွန် နာ ဒွန် ပ့လုဝ့် ဘော မုး မိူင် ယေရူဆာလဲမ် ဘော နွန် လေဘာနုန်။ အန် မိူဝ် ဟဲ့ ဘူင် ခဲ့ ပီ ဆီ ဘူင် အန်။

7 ခဲ့ ကွယ် ဂေ ဒူအီ အာမျုဝ် ဟဝ် အီ တူ မုး ဒူအီ အီဆာရေလ၊ အာဆာလုဝ်မုဝ် ဝီ တဲး ဂေ ဘဲန် မှာယ် အန် ကော ဇမ် အာတိုဝ် နီ။ န့ ဘော မုး ဒူအီ ဟေထိတ်၊ ဒူအီ အာမုဝ်ရိတ်၊ ဒူအီ ဖေရေဆိတ်၊ ဒူအီ ဟီဝိတ် ဘော ဒူအီ ယေဘူဆိတ် အီ ဆီ ဂိူတ် ဆီ ကွယ်။ 8 န့ ဘော မုး လှုက်လှာန် ဂေ ဒူအီ ပီ တူ ဒွိုမ် ဟုဝ် တဝ် ဂေ ဒူအီ အီဆာရေလ ဒေါ မွိုန်၊ အာဆာလုဝ်မုဝ် ဝီ ဒိုဝ်း ဂေ ဘောကာဂ့လျီတ် ဘဲန် မှာယ် အန်။ 9 အီ မုး ဒူအီ အီဆာရေလ၊ အာဆာလုဝ်မုဝ် တူ တဲး ဂေ ဘဲန် မှာယ် အန်။ အန် တဲး ဂေ ဘဲန် ဒါ ဆိုက်၊ တဲး ဂေ ဘဲန် ဒဲစေန့် အန်၊ ဘဲန် အာမူ အာမာတ် အန် ဘော ဒါ တာင် အီ အိုပ် ဒါ ဆိုက် အန်၊ အီ အိုပ် ဖိုင် ဂေ အီ ပဝ့် လက်လဝ် ဘော မ့ပြွင့် အန်။ 10 ဂေ အီ မုး အာမူ အာမာတ် အီ တာင်၊ အီ အိုပ် ဂါန် ပီ လုဝ် ဘူင် ဒွန် မျုဝ်၊ ဂေ ကွယ် အာ မာယဝ်း ဒီ ဖန် ဂိုဝ် ဝီ။

11 အီ မုး ဂွန် အီဘိုန့် ခုန်ဒီခမ် ဖာရုဝ် တွိုန်၊ အာဆာလုဝ်မုဝ် ဘော ဒိုဝ်း လေး အန် ခဲင် မိူင် အာဒါဝိတ်၊ တဲး အန် ဝီ ကွယ် ခဲင် ဟုဝ် ပီ ဘူင် အုန် အာဆာလုဝ်မုဝ် အာဒါ အန်။ အာဆာလုဝ်မုဝ် ဝီ တဝ်း၊ “အီဘိုန့် အုဝ် နီ၊ အန် တူ ကာအာပ် ကွယ် ခဲင် ဟုဝ် ခုန်ဒီခမ် အာဒါဝိတ် အီ ဟဲ့ ဒွိုမ် အိုပ် မိူင် အီဆာရေလ နီ။ န့ မုး ဒူင် တး အုန် ဂေ ဇီဒိူက် ဇဝ်ဖြာ။ ခုဝ်၊ န့ မုး ဒူင် ဆီငါ ဘွတ်။”

12 ဟဲ့ ဟွတ့် ပါယ် တီ အာဆာလုဝ်မုဝ် မိူဝ် လှူ ပီ ဒီ လှူ ဒဲင် ကာစှူင့် လှူ ပီ ဘ့လေး အုန် အန် ဒီ အာတ့် ဟုဝ် ဇဝ်ဖြာ တွိုန်။ 13 အန် မိူဝ် လှူ ပီ ဒီ လှူ အီ ဒုဝ့် ဒီ ငဝ်၊ တဲး န့ ဒူပ် ခဲ့ ပီ ကာလာင် အုန် အာမုဝ်ဆဲ အာဒါ ဆီငဲ ဒီလှဝ်၊ ဆီငဲ လိူန်မူန် ဘော ဆီငဲ ဘ့လွယ် ပီ ဒွိုမ် ဘူင် ဂေ အူ ဆီနမ် အူယ် မျုဝ်။ န့ ဘော မုး ဘ့လွယ် ဟူမ် ခါမုန် တူ ဟပ် ဆီနမ် ဘြး၊ ဘ့လွယ် လှူ ငှုဝ် ကာမာယ် ဘော ဘ့လွယ် ကွယ် ခဲင် ထိုပ်။ 14 အာဆာလုဝ်မုဝ် မိူဝ် ခါန် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ၊ တဲး ဂေ စွယ် ဒါ အီ လှူ ဒီ ဇဝ်ဖြာ ဘော ယဲတ့် ဂေ တဝ်း မှုဝ် အီ အိူပ် ဇဝ်ဖြာ။ အန် တဲး ဂေ ဘူင် ဂါန် ပီ လုဝ် ဘူင် ဂေ ဒွန် ဆီငဲ ရာင် အာဆေ ရာင် အန်။ အန် မိူဝ် ခါန် ဒူအီ ဘ်ု ဟုဝ် ဇဝ်ဖြာ၊ တဲး န့ မိုဝ်း ဖိုင် မှဝ် ဖိုင် အန်၊ တဲး ဂေ ဘ်ု ဒေါ ဟဲ့ စုဝ်း အာခြာဝ် ဂေ။ အန် ဘူင် တဲး န့ ဒူပ် ပဲ့ ဟဲ့ ဒွိုမ် စ်ု အာဒါဝိတ် အီ မုး ဒူအီ ပီ အိုပ် ဇဝ်ဖြာ တွိုန်။ 15 ဂေ မိူဝ် တူ ဝး တူ ဝဲန် ခဲ့ ပီ ကာလာင် အုန် ခုန်ဒီခမ် ဒီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ လွင် ဒူင် ဒီ အုန် ဂေ ကြုဝ်ကြာမ် ဘော လွင် ဂါန် ဒွန် မျုဝ်။

16 ပါယ် တီ ဂါန် ပီ လုဝ် ဘူင် အာဆာလုဝ်မုဝ် ဟဲ့ ဟွတ့် ဟွတ့် တူတ့်။ အူ ဆိန့် ဆီငဲ ကာစုး အန် ဒီ ဆမ် စေန့် ရွင့် ဟုဝ် ဇဝ်ဖြာ ကော ဝီ ဇမ် ဆီငဲ ဟွတ့် တူတ့်။ ဂါန် ပီ ဘူင် အန် တီ ဟဲ့ အွင် ဟဲ့ ကျ တူတ့် ဒွန် မျုဝ်။

17 ဝါယ် အန် တီ၊ အာဆာလုဝ်မုဝ် ဘော ဝီ ဟာဝ် ဒီ မိူင် အေစာယူန်ကာဘာ ဘော ဒီ မိူင် အေလာတ် ခူပ် အိုမ် နမ်မုက်ဆာရာ ခဲင် ကာဒါယ် မိူင် အေဒူမ်။ 18 ခုန်ဒီခမ် အာဟီရမ် မိူဝ် တိုယ် ရိုဝ် ဆင်ဖုဝ် အန် ဘော ဒူအီ အန် အီ နပ် ဒီ ပဝ့် ရိုဝ်၊ အီ နပ် ဘော ပီ ပါယ် အိုမ် တာင်၊ တဲး ဂေ ပဝ့် ရိုဝ် ဆင်ဖုဝ် ဒူပ် ဒူအီ အာဆာလုဝ်မုဝ် ဂေ တီ။ ဂေ ဘော ဟာဝ် ဒီ မိူင် အုဝ်ဖီ ဘော ဒိုဝ်း တး ခြိဝ် ဖွုန် မာယဝ်း ဒီ ဖန် ဂိုဝ် ထာလေန်၊ တး အာပ် ဒွါ ဒီ အာဆာလုဝ်မုဝ်။