1 ပါယ် တီ န့ ဝီ မိုဝ်း နာင် ဟောခမ် အီ အိုပ် မိူင် ဆေဘာ။ အန် ဟဲ့ ယိုဝ် အီ မွှိုမ် အာမ် ကာဆဝ် လွင် အာဆာလုဝ်မုဝ်။ အန် ဘော တး ဒူင် ကွယ် အာဆာလုဝ်မုဝ်၊ တဲး အန် ပွိုန် ဒီ ထေဝ် အာငျာန် အာဆာလုဝ်မုဝ် ဘော ဒီမွှတ် အီ ညှာပ် အီ ခိုက်ခမ် ကာဆဝ်။ န့ ဘော မိုဝ်း ဒူအီ ကိူန် တး ဒူပ် အန်။ အန် ဒိုဝ်း တး ဘော မ့ပြွင့် ကာဟာတ့် အီ ဒါင် န့ကြိုဝ်း အုး ငှုန် ဘော ခြိဝ် ဘော ဆဲန့် အီ ငဝ်း တာင် ကာဆဝ်။ နာင် တွိုန် ဘော ယိုဝ် အာဆာလုဝ်မုဝ်၊ အန် ဘော ဒီမွှတ် ဒွန် မျုဝ် လွင် ပီ ဆီ ဒီမွှတ် ပီ ဆီ ကာမွုန် အန်။ 2 အာဆာလုဝ်မုဝ် ဘော နပ် ဒီ ကာလာင် လွင် ပီ ဒီမွှတ် အန် တီ ဒွန် မျုဝ်။ အာဝ် မိုဝ်း ခေါ အူ မျုဝ် ပီ တူ နပ် အာဆာလုဝ်မုဝ် ဒီ ကာလာင် ဒီ ဘျာတ်။ 3 နာင် ဟောခမ် အီ တး မိူင် ဆေဘာ တီ ဘော ယိုဝ် ပီ ပါယ် အာငျာန် အာဆာလုဝ်မုဝ်၊ ယိုဝ် ဘော ဟုဝ် ပဲ့ ဟဲ့ ဘူင် အန်။ 4 အန် ယိုဝ် ဘော ပီ ဒီ ဟူမ် ပီ ဘ့လေး ဂေ ခဲင် ဟုဝ် အန်၊ ယိုဝ် ဘော ပီ ပါယ် ဂေ အာမူ အာမာတ် အန် ဒီ တုတ့် ဒီ ကွယ်။ အန် ယိုဝ် ဘော ဂေ ဒဲစေန့် အန် အီ ဟဲ့ စှိုပ် ခြိုင် စှိတ်၊ လိုမ်လာ ဂေ ဒူအီ အီ ဟူမ် ရိုမ် ဘော ဂေ အီ ဒွါ ပီ ဒီ ဒျီင် ဒီ အန်။ အန် ယိုဝ် ဘော ခြိုင် တာ ပီ စှိုပ် ဂေ၊ ဘော ပီ လှူ အီ ဒုဝ့် ဒီ ငဝ် ခဲင် ဟုဝ် ဇဝ်ဖြာ။ န့ ဘော တဲး အန် အာမ် ကာဆဝ် ကော ဟူ နပ် ပီ ဘော ပါယ်။

5 အန် ဝီ ကာလာင် ဒီ ခုန်ဒီခမ် တဝ်း၊ “ဒေါ ကွယ် အုဝ် မိူင် အုဝ်၊ ဂြုဝ်း ပဲ့ ဟဲ့ ယိုဝ် အုဝ် လွင် ပဲ့ ဟဲ့ ဘူင် မဲ ဘော လွင် အာငျာန် မဲ၊ န့ ဟဲ့ မုး ဟဲ့ မှာန် တူတ့် ဒွန် မျုဝ်။ 6 မာလဲ၊ အာတ့် တး ဇမ် အုဝ်၊ အာတ့် ယိုဝ် အုဝ် ဒီ ငါယ် အုဝ်၊ အုဝ် တူ ညှိုမ် ဂြုဝ်း တီ။ ပီ ခဲ အီ ဒီ အုဝ် အာဝ် မုး ခေါ အူ ကာတဲ။ အာဖုင် ဒင်ခုဝ် မဲ ဘော အာငျာန် မဲ ဟဲ့ ဝီ လွှိုမ် ခဲ့ ပီ ခဲ ဂေ ဒီ အုဝ်။ 7 ဂေ အာမူ အာမာတ် မဲ အီ ကွယ် ရိုမ် ဒူပ် မဲ ဘော ဂေ အီ ဟဲ့ ပွိုန် ဒီ ထူမ် အာငျာန် မဲ ဆေဆေ ဂေ ဟဲ့ ဒါခိုယ် အာခ်ု မှာန်။ 8 အုဝ် အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ ခုဝ်၊ မဲ ဟဲ့ လဝ့် နဝ်း အန်၊ တဲး အန် တဲး မဲ ဘဲန် ခုန်ဒီခမ် အီ အိုပ် ဒူအီ အီဆာရေလ အာဒါ အန် ဇဝ်။ ကူပ် ရွက့် ဇဝ်ဖြာ ဒီ ဒူအီ အီဆာရေလ ဘော မိုဝ်း နဝ်း ဆီ ဂေဇူ ဂေ ဆေဆေ၊ အန် ဟဲ့ တဲး မဲ ဘဲန် ခုန်ဒီခမ်၊ တဲး မဲ ဆုင်ဖျာတ် အာမူ ဂေ ဆိူဝ် ဆိူဝ် မှာန် မှာန် ဒွန် မျုဝ်။”

9 နာင် ဟောခမ် တွိုန် ဟဲ့ ဟွတ့် ကာလာင် ပါယ် တီ အန် ဝီ ဒိုဝ်း ခြိဝ် အူ မာယဝ်း ဒီ အာ ဂိုဝ် ထာလေန်၊ န့ကြိုဝ်း အုး ငှုန် ကိူန် ကာဆဝ် ဘော ဆဲန့် ဘွတ် အီ ငဝ်း တာင်၊ ဝီ အာပ် ဒွါ ဒီ အာဆာလုဝ်မုဝ်။ န့ကြိုဝ်း အုး ငှုန် အီ ဆီ ဒီ ဘွတ် ဒီ မွှိုမ် လွှိုမ် န့ကြိုဝ်း အုး ငှုန် ပီ ဒိုဝ်း တး ဒွါ နာင် အီ အိုပ် မိူင် ဆေဘာ ဒီ အာဆာလုဝ်မုဝ် တီ တူ ဒွိုမ် မိုဝ်း။

10 ဂေ ဒဲစေန့် ခုန်ဒီခမ် အာဟီရမ် ဘော ဒဲစေန့် ခုန်ဒီခမ် အာဆာလုဝ်မုဝ် အီ ဟာဝ် ဒိုဝ်း တး ခြိဝ် ဒီ မိူင် အုဝ်ဖီ တွိုန်၊ ဂေ ဘော ဒိုဝ်း တး ဘော ဟေ နမ်ဆာ ဘော ဆဲန့် ဘွတ် ကိူန် ကာဆဝ်။ 11 ခုန်ဒီခမ် အာဆာလုဝ်မုဝ် ဘော ဒိုဝ်း ဟေ နမ်ဆာ တီ၊ ဝီ ဘူင် ဘဲန် ဘ့လဝ့် န့တဲင် ခဲင် ဟုဝ် ဇဝ်ဖြာ ဘော ခဲင် ဟုဝ် အန်။ အန် ဘူင် ဘော ဒိင် ဘော ဒိင် ဒီရဝ်၊ ဒွါ ဒီ ဂေ အီ တဝ်း မှုဝ်။ ကြုဝ် ဇိုဝ် တီ တူ ဒွိုမ် ယိုဝ် ခဲင် မိူင် ယူဒါ ဒေါ မှဝ်။

12 ခုန်ဒီခမ် မိူဝ် ဝီ ဒွါ ခဲ့ ပီ ဆီ ပွိုန် ခဲ့ ပီ မှာန့် နာင် ဟောခမ် တွိုန် ဒီ အန်။ ပီ ဝီ ဒွါ ခုန်ဒီခမ် ဒီ နာင် အီ အိုပ် မိူင် ဆေဘာ တီ ဟဲ့ ဝီ ကိူန် လွှိုမ် ပီ ဒိုဝ်း တး ဒွါ အန် ဒီ ခုန်ဒီခမ် အာဆာလုဝ်မုဝ်။ ဟဲ့ ဟွတ့်၊ နာင် ဟောခမ် ဘော ဂေ အီ ဒူပ် တး အန်၊ ဂေ ဘော ဝီ ဝိဝ် ဒီ မိူင် ဒူင် ကွယ် ဂေ။

13 အူ ဆီနမ် ခုန်ဒီခမ် အာဆာလုဝ်မုဝ် ဘော ပွိုန် ခြိဝ် အာဒါ ဒဝ် မာယဝ်း ဒီ ဒဝ် ဂိုဝ် ဒီ ဒဝ် ထာလေန်။ 14 ဒဲင် တီ၊ ပီ ဝီ မိုဝ်း ခြိဝ် စိုင် ပီ လုဝ် ဒွါ ဂေ ဒူအီ အီ ကာစိုဝ်း ကာယွင့်။ ဘော ဂေ ခုန်ဒီခမ် အာမျုဝ် ဟဝ် ဘော ဂေ ဒါ တာင် အီ အိုပ် မိူင် ဟဝ် ပီ ဝီ ဒွါ ခြိဝ် ဂေ ရွိုန် ဒီ အာဆာလုဝ်မုဝ်။

15 ခုန်ဒီခမ် အာဆာလုဝ်မုဝ် ဘော ဒိုဝ်း ခြိဝ် တီ၊ စိုမ် ဘဲန် မင် ဂွင့် အီ တာင် အာဒါ အာ မာယဝ်း ဘူင့်။ အူ ဘူင့် အန် ဒိုဝ်း ခြိဝ် ဒဝ် မာယဝ်း ဆေခေန်။ 16 မင် ဂွင့် အီ ဒီတဲတ်၊ အန် ဘော ဘူင် အူယ် မာယဝ်း ဘူင့်။ အူ ဘူင့် အန် တာ ခြိဝ် အူယ် မာယဝ်း ဆေခေန်။ ခုန်ဒီခမ် ဘော အုန် ကြုဝ် တီ ခဲင် ဟုဝ် အန် အီ စိူဝ် ပြဲ လေဘာနုန်။

17 ခုန်ဒီခမ် ဝီ ဘူင် ဘော မာလာင်။ အန် ဒိုဝ်း ပ့လဲ့ မာဆာင်၊ ဟပ် တဲး န့ စှိတ်။ အန် ဝီ ဒိုဝ်း ခြိဝ် ဇဲတ်၊ ပိတ် နာ ရေတ့်။ 18 မာလာင် တီ မိုဝ်း န့တဲင် ဒဝ် ဘ့လဝ့်၊ မိုဝ်း ဘော ကာစှူင့် ဒီ ညဲတ့် အီ မုး ခြိဝ်၊ အီ ဟဲ့ ကာဒိုက် ဒီ မာလာင် တီ။ ဒီ အာ ဘ့လာက် ဒူင် ဒီ တုတ့် ဝီ မိုဝ်း ဒူင် ဒီ ဘ့လေး ဒဲ၊ မိုဝ်း ဘော အာရိုပ် မာခြင်ဆီ အီ စွင့် ခူပ် ဒူင် ဒီ ဘ့လေး ဒဲ ဘော အာ ဘ့လာက်။ 19 န့ ဝီ မိုဝ်း ရာင် မာခြင်ဆီ ဂိုဝ် ဒီ အာ ဒုဝ် ဝီ စွင့် ဒီ န့တဲင် တွိုန် ဒွန် ဘ့လဝ့်၊ အူ ဘ့လဝ့် အာ ဒုဝ်။ ခဲင် မာန် မိူင် အီ ဟဝ်၊ န့ တူ မိုဝ်း မာလာင် အီ ပီ မာလာင် တီ။ 20 ကွက့် ပီ ဒျီင် ခုန်ဒီခမ် အာဆာလုဝ်မုဝ် ဘော ဆီလယ့် ပီ တာ အန် ခဲင် ဟုဝ် အန် အီ စိူဝ် ပြဲ လေဘာနုန် တွိုန်၊ န့ မုး တူတ့် ခြိဝ် ဒီလူယ်၊ အာဝ် မိုဝ်း ကြုဝ် အီ မုး ရွိုန်။ ခုဝ်၊ ဒေါ မုး စုဝ် ဘာန် ခုန်ဒီခမ် အာဆာလုဝ်မုဝ် တီ၊ ရွိုန် တူ ကူပ် မိုဝ်း ဒီငဝ်း ဒီခန်။ 21 အာဆာလုဝ်မုဝ် ဘော မိုဝ်း ဘော ရိုဝ် ဆင်ဖုဝ် ဘဲန် လှာင် ဘဲန် လှာင် အီ ကွယ် ဒီ ဘာင် အိုမ် နမ်မုက်ဆာရာ။ ဂေ ဒဲစေန့် အာဟီရမ် ဘော ဘဲန် အီ ဘတ် ရိုဝ် တီ။ အူယ် ဆီနမ် အူ ဇေန့် ဂေ ဒိုဝ်း တး ခြိဝ် ဂေ ရွိုန်၊ ပ့လဲ့ မာဆာင် ဘော မာဝှါ ဘော မာပြ။

22 ခုန်ဒီခမ် အာဆာလုဝ်မုဝ် တီ၊ အန် ဟဲ့ မိုဝ်း ကြုဝ်ကြာမ် ဂေ အာငျာန် ကိူန် လွှိုမ် ခုန်ဒီခမ် ဒွန် ကာဒင် ဒဲင် ကာဒါယ် နီ။ 23 ခဲ့ ကွယ် ခုန်ဒီခမ် ဘော ကာဒါယ် နီ၊ ဂေ ဘော တး ဒူင် ကွယ် ခုန်ဒီခမ် အာဆာလုဝ်မုဝ်၊ တဲး ဂေ ထူမ် အာငျာန် ပဲ့ ဟဲ့ ဒွါ ဇဝ်ဖြာ ဒီ အန်။ 24 ဒွန် ဆီနမ် ဒွန် ဆီနမ် ဂေ ဒူအီ အီ တး တီ၊ ဂေ ဘော ဒိုဝ်း တး ခေါဆွင်။ န့ မုး ဆီလယ့် ခြိဝ်၊ ဆီလယ့် ရွိုန်၊ ခြိုင် တာ၊ ခြိုင် ကာဂုဝ်း ဒါ ဆိုက်၊ န့ကြိုဝ်း အုး ငှုန် ဘော မ့ပြွင့် ဂေ မာလုဝ်။ ဂေ ဘော အာပ် ကြုဝ် တီ ဒီ ခုန်ဒီခမ် အာဆာလုဝ်မုဝ်။

25 ခုန်ဒီခမ် အာဆာလုဝ်မုဝ် ဘော မိုဝ်း ထိုပ် ဖွုန် ဟြဲန့် ထိုပ် အာဒါ မင်ပြွင့် ဘော လက်လဝ် အန်။ အန် မိုဝ်း မ့ပြွင့် အူ မှိုန့် ဒီ အာ ဟြဲန့် ဒုဝ်။ အန် တဲး ဂေ ကွယ် ခဲင် မိူင် အီ လုဝ် ယွတ် လိုမ်လာ အန် ဘော ဒူင် ကွယ် ကာတတ် အန် ခဲင် မိူင် ယေရူဆာလဲမ်။ 26 အန် ဘော အိုပ် ဂေ ခုန်ဒီခမ် ဘောကာဂ့လျီတ်၊ စုး ဒီ ဘ့လဲင် အိုမ် ကော ဝီ ဇမ် မိူင် ဖီလီထီ၊ ဇမ် ဘော ဒီ ကာအုန် ကာဒါယ် မိူင် အဲဂိုပ်။ 27 ခုန်ဒီခမ် အာဆာလုဝ်မုဝ် တူ တဲး ရွိုန် မိုဝ်း ဒီငဝ်း ဒီခန်။ ခဲင် မိူင် ယေရူဆာလဲမ် ရွိုန် ဘော ခြေ ပီ မာဝ်။ ဟေ အာရိတ် မိူဝ် ဟဲ့ ကိူန် ကာဆဝ် ဘော ခြေ ပီ ဟေ ဒီပူ ပြဲ အီ ကွယ် ဒီ ဒင် နွန်။ 28 အာဆာလုဝ်မုဝ် ဘော စိုဝ်း မ့ပြွင့် ခဲင် မိူင် အဲဂိုပ် ဘော ခဲင် မိူင် ဟဝ် ဒွန် နာ ဒွန် ပ့လုဝ့်။

29 လွင် ပီ ပါယ် စုဝ် ဘာန် အာဆာလုဝ်မုဝ် အီ ညှမ် ဒွိုမ် ကာလာင်၊ စုး ဆိန့် ဒေါ ဂုဝ် ကော ဇမ် ကာဒဲ့၊ ဟဲ့ ဒဲမ် အုန် ခဲင် ဘပ် ပေါ မျုဝ်။ န့ ဟဲ့ ဒဲမ် ခဲင် ဘပ် အီ ကာလာင် လွင် ဒါ အီ လှူ ဒီ ဇဝ်ဖြာ အီ စိူဝ် အာနာထာန် ဘော ခဲင် ဘပ် ဒါ အီ လှူ ဒီ ဇဝ်ဖြာ အီ စိူဝ် အာဟီယာ အီ တး မိူင် ဆီလုဝ်။ န့ ဟဲ့ ဒဲမ် ဘော ခဲင် ဘပ် လွင် ပီ ဘျ ဇဝ်ဖြာ ဒီ အာအီတော အီ မုး ဒူအီ အီ ယိုဝ်၊ အီ ကာလာင် လွင် အာယေရုဝ်ဘုဝ် အီ မုး ဂွန် အာနေဘတ်။ 30 အာဆာလုဝ်မုဝ် ကွယ် ခဲင် မိူင် ယေရူဆာလဲမ်၊ အိုပ် ဘိုင် မိူင် ဒူအီ အီဆာရေလ ဘောကာဂ့လျီတ် အာဒါ ဖွုန် ဂိုဝ် ဆီနမ်။ 31 အန် ဘော ယမ် ဟာဝ် ပီ ဒါ ဒါ အန်။ ဂေ ဘော ဒိပ် အန် ခဲင် မိူင် အာဒါဝိတ် အီ မုး မိူင် ဂုန့် အန်။ ဂွန် အန် အီ စိူဝ် အာရေဘူမ် ဘော ဝီ ပ့လု အန်။