1 အာရေဘူမ် တွိုန် ဘော ဟာဝ် ဒီ မိူင် ဆေခေမ်။ ခုဝ်၊ ဂေ ဒူအီ အီဆာရေလ မိူဝ် ဟဲ့ ဟာဝ် ဒီ မိူင် ဆေခေမ်၊ တဲး ဂေ ပွိုန် ဒီ စုဝ့် အန် ဘဲန် ခုန်ဒီခမ်။ 2 ဒေါ အန် တီ အာယေရုဝ်ဘုဝ် အီ မုး ဂွန် အာနေဘတ် အီ ဟဲ့ တဝ် အာဆာလုဝ်မုဝ်၊ ဝီ ဟာဝ် ချြီင် ခဲင် မိူင် အဲဂိုပ်၊ အန် ဘော ယိုဝ် လွင် အန် တီ ဘော ဝီ ဝေန့်။ 3 ဂေ ဘော ဒဲ့ တး အန်။ ဘော အန် ဘော ဂေ ဒူအီ အီဆာရေလ တး ဒူင် ကွယ် အာရေဘူမ်။ ဂေ မိူဝ် ကာလာင် ဒီ အန် တဝ်း၊

4 “ဂုန့် မဲ ဟဲ့ တဲး န့ ညှာပ် ကာဆဝ် ဒီ ယေ၊ ဟဲ့ ပီ ယေ ဟဲ့ စှိုပ် အဲ့မဝ် အီ စန် ကာဆဝ်။ ယေ ဝီ မှာန့် ဒီ မဲ၊ ကွဲ့ တဲး န့ ညှာပ် ခဲ့ တီ ဒီ ယေ။ ဆေ မဲ ဘူင် ပါယ် တီ ယေ ဒီ ဘဲန် ဒဲစေန့် မဲ၊ တဲး မဲ အိုပ် ယေ။”

5 အာရေဘူမ် ဝီ တဝ်း ဒီ ဂေ၊ “တဲး ဘေ ဝီ ဝေန့်။ ဟီ ပွိုန် အူယ် ဆီငဲ၊ ဘေ ဘော ဝီ တး။ အုဝ် ဒီ ကာလာင် တဲး ဘေ နပ်။” ပါယ် တီ ဒူအီ ဂေ တွိုန် ဘော ဝီ ဝေန့်။

6 ဝါယ် အန် တီ၊ ခုန်ဒီခမ် အာရေဘူမ် ဘော ဝီ ကာမွုန် ဒီ ဂေ ဒူအီ ကတ် ဒူအီ ဂဲ အီ ဟဲ့ ဒွိုမ် ကွယ် ရိုမ် ဒူပ် အာဆာလုဝ်မုဝ် အာတ့် ယမ် အန်။ အန် ဒီမွှတ် ဂေ တဝ်း၊ “ဘေ ဒီ တဲး အာကျာမ် အာငျာန် ပါယ် မှဝ် ဒီ အုဝ်၊ တဲး အုဝ် ပွိုန် ဒီ ဝီ ကာလာင် ဒီ ဒူအီ အီဆာရေလ ဂေ တွိုန်။း”

7 ဂေ ဝီ တဝ်း ဒီ အန်၊ “ဆေ မဲ ခမ် ဒီ ဂေဇူ ဂေ အာတိုဝ် နီ၊ ဆေ မဲ ဖြူမ် ပီ မှာန့် ဂေ၊ ကာလာင် ဂြုဝ်း ဒါခိုယ် ဂြုဝ်း မွှိုမ် ဒီ ဂေ၊ ဂေ ဒီ ဝီ ဘဲန် မှာယ် မဲ ဆေဆေ။”

8 အန် ယီ တူ ဒူပ် အာကျာမ် အာငျာန် ပီ ကာလာင် ဒူအီ ကတ် ဒူအီ ဂဲ ဂေ တီ။ အန် ဝီ ဟာဝ် ဆင်ချာင် ကာမွုန် ဒီ ဂေ ဒူအီ နှိုမ်၊ အီ မုး ဂိုက် အန်၊ အီ ကွယ် ရိုမ် ဒူပ် အန် ဘော စွယ် အန်။ 9 အန် တဝ်း ဒီ ဂေ၊ “ဘေ ဒီ တဲး အာကျာမ် အာငျာန် ပါယ် မှဝ်၊ တဲး အုဝ် ပွိုန် ဒီ ဝီ ကာလာင် ဒီ ဂေ အီ ဟဲ့ တဝ်း ဒီ အုဝ်၊ ‘ကွဲ့ တဲး န့ ညှာပ် ခဲ့ ပီ စ်ု ဂုန့် မဲ ယေ ဘူင်။း’”

10 ဂိုက် အန် အီ ဟဲ့ ကွယ် ရိုမ် ဒူပ် အန် ဆိန့် ဒီတဲတ်၊ ဂေ ဝီ တဝ်း ဒီ အန်၊ “တဲး မဲ ဝီ ကာလာင် ဒီ ဂေ ဒူအီ အီ တး မှာန့် ဒီ မဲ တဝ်း၊ ‘ဂုန့် မဲ ဟဲ့ တဲး န့ ညှာပ် ကာဆဝ် ဒီ ယေ၊ ဟဲ့ ပီ ယေ ဟဲ့ စှိုပ် အဲ့မဝ် အီ စန် ကာဆဝ်။ ယေ ဝီ မှာန့်၊ တဲး န့ ဝီ န့စိုဝ်’။ မဲ လုဝ် ဝီ တဝ်း ဒီ ဂေ၊ ‘န့ ပီ ကာနူ ဝဲတ် အုဝ် ဆီ တာင် လွှိုမ် ညွယ် ဂုန့် အုဝ်။ 11 ဂုန့် အုဝ် ဟဲ့ စ်ု ကာဆဝ် ဘေ။ အုဝ် ဒီ ဝီ စ်ု ဘေ၊ တဲး န့ ကာဆဝ် လွှိုမ် တီ။ ဂုန့် အုဝ် ဟဲ့ တာ မ့ဖျီ့ ဆီဘျြီ့ ဘေ။ အုဝ် ဒီ ဝီ တဲး တမ် ဒီ ဘေ တာ မာ မဲင်ငဝ်၊ တဲး ဂေ ဒွက် ဘေ။’”

12 ဝါယ် ဟဲ့ ပွိုန် အူယ် ဆီငဲ၊ အာယေရုဝ်ဘုဝ် ဘော ဂေ ဒူအီ အီဆာရေလ တွိုန် ဘော ဝီ တး ဒူင် ကွယ် ခုန်ဒီခမ် အာရေဘူမ်၊ ဒူပ် ခဲ့ ပီ ဒမ် အန် တဝ်း၊ ‘အူယ် ဆီငဲ၊ တဲး ဘေ ဝီ တး။’ 13 ခုန်ဒီခမ် ဘော ကာလာင် ဂြုဝ်း ကာဆဝ် ဒီ ဂေ၊ ဝဲန် အာကျာမ် အာငျာန် ပီ ကာလာင် ဒူအီ ကတ် ဒူအီ ဂဲ ဂေ တွိုန်။ 14 အန် ဝီ ဒူပ် အာကျာမ် အာငျာန် ပီ ကာလာင် ဒူအီ နှိုမ်။ အန် ဝီ တဝ်း ဒီ ဂေ၊ “ဂုန့် အုဝ် ဟဲ့ တဲး န့ ညှာပ် ကာဆဝ် ဒီ ဘေ၊ အုဝ် ယီ ဝီ တဲး န့ ညှာပ် လွှိုမ် တီ။ ဂုန့် အုဝ် ဟဲ့ တာ မ့ဖျီ့ ဆီဘျြီ့ ဘေ။ အုဝ် ဒီ ဝီ တဲး တမ် ဒီ ဘေ တာ မာ မဲင်ငဝ်၊ တဲး ဂေ ဒွက် ဘေ။” 15 ပါယ် တီ ခုန်ဒီခမ် တူ ထူမ် ဂြုဝ်း ဒါ တာင် ဂေ တွိုန်။ ခုဝ်၊ ဇဝ်ဖြာ တဲး န့ ဘဲန် ပီ ကာလာင် အန် ဒီ အာဟီယာ အီ ကွယ် မိူင် ဆီလုဝ်၊ တဲး အာဟီယာ ဝီ ကာလာင် ဒီ အာယေရုဝ်ဘုဝ် အီ မုး ဂွန် အာနေဘတ် တွိုန်။

16 ဒူအီ အီဆာရေလ ဂေ ဘော နပ်၊ ခုန်ဒီခမ် အာရေဘူမ် တူ ထူမ်၊ တူ ဒူပ် ဂြုဝ်း ဂေ၊ ဂေ ဝီ ကာလာင် ဒီ အန် တဝ်း၊ “ယေ နီ ယေ တူ လာယ် ဘာ့ ဒီ အာဒါဝိတ်၊ ယေ တူ မုး လှုက်လှာန် အာယေဆေ။ အိုယ် ဘေ ဒူအီ အီဆာရေလ၊ တဲး အေ ဟာဝ်၊ ဝီ ဝေန့် ဒူင် ကွယ် ထိုပ် ဘိက် အေ။ အိုယ် ဘေ ဒူအီ အာဒါဝိတ်၊ တဲး ဘေ ယွတ် လိုမ်လာ အာမျုဝ် ဘေ ရာင် ဘေ။” ဂေ ဟဲ့ ဟွတ့် တဝ်း ပါယ် တီ ဂေ ဒူအီ အီဆာရေလ ဘော ဝေန့် ဒူင် ကွယ် ဂေ။ 17 န့ ယီ မုး ဂေ ဒူအီ အီဆာရေလ အီ ဆီ ကွယ် ခဲင် အိူင် ယူဒါ တွိုန်၊ အာရေဘူမ် ဆီ အိုပ် ဂေ။

18 ဝါယ် အန် တီ ခုန်ဒီခမ် အာရေဘူမ် ဝီ စ်ု အာဟာဒူမ် အီ မုး ဒါ တာင် အီ အိုပ် မှာယ် ခုန်ဒီခမ်၊ တဲး အန် ဟာဝ် ဒူင် ကွယ် ဂေ ဒူအီ အီဆာရေလ။ ဂေ ယီ ဝီ ကာဖြူမ် ဒီ ဒိုဝ်း မာဝ် ဝိုန့်၊ တဲး အန် ကော ယမ်။ ခုန်ဒီခမ် အာရေဘူမ် ဘော ဝီ ပီခြန် ဒီ ပဝ့် လက်လဝ် အန်၊ ဝီ တဝ် ဝေန့် ခဲင် မိူင် ယေရူဆာလဲမ်။ 19 ကူပ် ပါယ် တီ ဒူအီ အီဆာရေလ လာယ် ကာဘး ဒီ ဒူအီ အာဒါဝိတ်၊ ကော ဇမ် အာတိုဝ် နီ။