အာရေဘူမ် ဟဲ့ ဟွတ့် ဝီ တး ဇမ် ခဲင် မိူင် ယေရူဆာလဲမ်၊ အန် ဝီ ရဝ်း ဒါ ဆိုက် ခဲင် ခြိုဝ် ယူဒါ ဘော ခဲင် ခြိုဝ် အာဘေန်ယာမ် အာဒါ အူ ဆဲန် ဒီ ဒါ မှိုန့် ဝီ၊ တဲး ဂေ ဟာဝ် ကာဂုဝ်း ဒီ ဒူအီ အီဆာရေလ၊ တဲး အန် ဝီ ပွိုန် ဒီ အိုပ် ဂေ။

2 မာလဲ၊ ဇဝ်ဖြာ ယီ ဝီ ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆေမာယာ။ 3 အန် လုဝ် ဝီ ဟာဝ် ကာလာင် ဂြုဝ်း ဒီ ခုန်ဒီခမ် အာရေဘူမ် ဘော ဒီ ဂေ ဒူအီ ခြိုဝ် ယူဒါ ဘော ခြိုဝ် အာဘေန်ယာမ်။ 4 ဇဝ်ဖြာ တဲး အန် တဝ်း၊ “အာဝ် လုဝ် တဲး ဘေ ဟာဝ် ကာဂုဝ်း ဒီ ဒူအီ အီဆာရေလ အီ မုး ဘီနွင် ဝေါဝဲ ဘေ။ တဲး ဘေ ဝီ ဝေန့် ဒီ ကာင် ဘေ ရာင် အာဆေ ရာင် အန်။ ခုဝ်၊ န့ မုး အုဝ် အီ ဟဲ့ ဘူင် တဲး န့ ဘဲန် ပါယ် တီ။” ဇဝ်ဖြာ ဟဲ့ ဟွတ့် ကာလာင် ပါယ် တီ ဂေ မိူဝ် ထူမ် ဂြုဝ်း ဇဝ်ဖြာ တီ၊ အာဝ် ဟူ ဟာဝ် ကာဂုဝ်း။ ဂေ ဘော ဝီ ဝေန့် ဒီ ကာင် ဂေ။

5 အာရေဘူမ် ဘော ကွယ် ခဲင် မိူင် ယေရူဆာလဲမ် ဘော ဝီ မ့ပြာယ် မာန် မိူင်၊ တဲး န့ မန် ဆီချာ။ န့ ဘော မုး ခဲင် ကာဒါယ် မိူင် ယူဒါ ဘော ခဲင် ကာဒါယ် မိူင် အာဘေန်ယာမ်။ 6 မိူင် ပီ ဝီ ဂုဝ် ဝီ မ့ပြာယ် အန် ဘော မုး မိူင် ဘေတ်လဲမ်၊ မိူင် အေထာမ်၊ မိူင် ဒေကော။ 7 န့ မုး ဘော မိူင် ဘေတ်ဇူရာ၊ မိူင် ဆေခေါ၊ မိူင် အာတူလမ်၊ 8 မိူင် အာဂထ၊ မိူင် မာရေဆာ၊ မိူင် စီဖ၊ 9 မိူင် အာတောရမ်၊ မိူင် လာခိတ် ဘော မိူင် အာစေကာ၊ 10 မိူင် ဇုဝ်ရာ၊ မိူင် အာစာလုန် ဘော မိူင် ဟေဘြုဝ်။ 11 အန် ဟဲ့ ဟွတ့် ဘူင် တဲး မိူင် ဂေ တီ မန် ဆီချာ၊ အန် ဝီ ဒါင် တဲး န့ မိုဝ်း ဒါ တာင် အီ အိုပ် ခဲင် မိူင် ဂေ တီ။ အန် ဝီ အုန် ပီ ဒီ ဟူမ် ဘော နာမန် ဘော အိုမ် မာငုန်။ 12 အန် ဝီ ဒိုဝ်း မင် ဂွင့် ဘော ဘ့လာ လျီး၊ ဝီ အုန် ခဲင် မိူင် ဂေ တီ ဒွန် မိူင်၊ တဲး န့ မန် ဆီချာ။ ပါယ် တီ အန် မိူဝ် အိုပ် ဂေ ဒူအီ အာယူဒါ ဘော ဒူအီ အာဘေန်ယာမ်။

13 ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခဲင် ခြိုဝ် အာလေဝီ ဝီ လေး ခဲင် မိူင် အီဆာရေလ ဒွန် နာ ဒွန် ပ့လုဝ့်၊ ဝီ တး ဒူင် ကွယ် အာရေဘူမ်။ 14 ဂေ ဒူအီ အာမျုဝ် အာလေဝီ ဝဲန် ကာဒါယ် ဒူင် ကွယ် ဂေ ဘော အူင့် ပေတ့် အီ ကွယ် နာ ရေတ့် မိူင် ဂေ တီ၊ ဝီ တဝ် ဟာဝ် ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ်။ ခုဝ်၊ ခုန်ဒီခမ် အာယေရုဝ်ဘုဝ် ဘော ဂွန် အန်၊ ဂေ ဟဲ့ ဘ့လွာ့ ဝဲန် ဒါ အီ လှူ ဒီ ဇဝ်ဖြာ၊ အာဝ် ဟူ တဲး ဂေ လှူ ဒီ ဇဝ်ဖြာ။ 15 အာယေရုဝ်ဘုဝ် ဝီ ဒါင် ဂေ ဒူအီ အီ မုး ဒူအီ ပီ ရဝ်း အန်၊ တဲး ဂေ ဝီ ဘူင် ဂါန် ဒါ အီ လှူ ဒီ ဇဝ် ပီ ကြိုပ် အီ ဟဝ် ဒီ ဒူင် စာ။ အန် တဲး ဂေ လိုမ်လာ ဘော အာရိုပ် မက် ဂေ မာပဲ ပဲ့ ဟဲ့ ဘူင် အုန် အန်။ 16 ခဲ့ ကွယ် ဂေ ဒူအီ အီဆာရေလ ဒွန် ခြိုဝ်၊ ဂေ အီ မိုဝ်း နဝ်း ဆီ ဟြေတ့် ဇဝ်ဖြာ ပီ ကြိုပ် ဂေ ဒူအီ အီဆာရေလ၊ ဂေ ဘော ဝီ ကာဖြူမ် ဒီ ဟာဝ် မိူင် ယေရူဆာလဲမ် ဒူပ် ဂေ ဒူအီ အာလေဝီ၊ တဲး ဂေ ပွိုန် ဒီ လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။ 17 ပါယ် တီ န့ ဝီ တဲး မာန် မိူင် ဂေ ဒူအီ အာယူဒါ ဝဲ မိုဝ်း ပ့လူမ် ဂေ ဟဲန့်။ ဂေ မိူဝ် ဝီ စွယ် အာရေဘူမ် အီ မုး ဂွန် အာဆာလုဝ်မုဝ် တွိုန် ကော နုဝ့် အူယ် ဆီနမ်။ ခုဝ်၊ ဂေ မိူဝ် ဒူပ် ဆီချာ ပီ ဒမ် အုန် အာဒါဝိတ် ဘော အာဆာလုဝ်မုဝ် ဒေါ မုး စုဝ် ဂေ တီ။

18 အာရေဘူမ် ဘော ခတ် ဒိုဝ်း နာင် မာဟာလာတ်။ နာင် မာဟာလာတ် မုး ဂွန် ဒီဘျာ အာယေရီမုတ်။ အာယေရီမုတ် ဝီ မုး ဂွန် အာဒါဝိတ် တွိုန်။ မာ အန် ဘော စိူဝ် နာင် အေဖီဟေလာ အီ မုး ဂွန် ဒီဘျာ အာအေလီအာပ်။ အာအေလီအာပ် ဝီ မုး ဂွန် အာယေဆေ။ 19 အာရေဘူမ် ဘော မိုဝ်း ဂွန် အီမာယ် အူယ် ဝီ ဘော စိူဝ် အာယေအုတ်၊ အာဆေမာရီ ဘော အာစာဟမ်။ 20 ဝါယ် အန် တီ အန် ပီ ဝီ ခတ် ဒိုဝ်း နာင် မာခါ အီ မုး ဂွန် အာဘာဆာလူမ်။ အန် ဝီ မိုဝ်း ဂွန် အီမာယ် အီ စိူဝ် အာဖီယ၊ အာထယ်၊ အာဇီဆာ ဘော အာဆေလောမိတ်။ 21 အီဘိုန့် အာရေဘူမ် တီ ဘောကာဂ့လျီတ် ကွယ် ဂိုဝ် ဒီ ဒါ ဝီ။ ဂေ အီ မုး ဇိူင် နာင် အန် ကွယ် ဒဝ် ဂိုဝ် ဝီ။ ဂွန် အီမာယ် အန် ဘောကာဂ့လျီတ် ကွယ် အာ ဂိုဝ် ဒီ ဒါ ဝီ။ ဂွန် အီဘိုန့် အန် ကွယ် ဒဝ် ဂိုဝ် ဝီ။ ခဲ့ ကွယ် အီဘိုန့် အန် ဘော ဂေ ဇိူင် နာင် အန် ဘောကာဂ့လျီတ်၊ ပီ ရွက့် ကာဆဝ် အန် လွှိုမ် ဝီ ဟဝ် ဟဲ့ မုး နာင် မာခါ တွိုန်။ 22 အာရေဘူမ် ဘော စုဝ့် မျုက် အာဖီယ အီ မုး ဂွန် နာင် မာခါ၊ တဲး အန် တာင် လွှိုမ် ဂေ အီကတ် ဝါ အန် ဒွန် အီ၊ တဲး အန် ဘဲန် ခုန်ဒီခမ်။ 23 အာရေဘူမ် မိူဝ် မိုဝ်း အာငျာန် ဘော လွှက့် ကာဆဝ် ဒီ စ်ု ဂွန် အန်။ အန် ဘော တဲး ဂေ ကွယ် ကာယဝ်း ခဲင် မိူင် အီ မန် ဆီချာ ခဲင် ကာဒါယ် မိူင် ယူဒါ ဘော ခဲင် ကာဒါယ် မိူင် အာဘေန်ယာမ်။ အန် တဲး ဂေ ကွယ် ခဲင် မိူင် ဒွန် မိူင် အီ မိုဝ်း ရဲင်။ အန် မိူဝ် ဒွါ ပီ ဒီ ဟူမ် ပီ ဒီ တာ ကိူန် ကာဆဝ် ဒီ ဂေ၊ ဝီ ဟြေတ့် ဘော အီဘိုန့်၊ ဒွါ ဒီ ဂေ ဘဲန် ဝီ ဘဲန် ဝီ။