1 အာရေဘူမ် ဟဲ့ ဘဲန် ခုန်ဒီခမ်၊ မာန် မိူင် ပီ အိုပ် အန် မိူဝ် ဟဲ့ မန် ဆီချာ။ အာဖုင် ဒင်ခုဝ် အန် မိူဝ် ဟဲ့ ကြဲ ဒီ တာင်။ ဟဲ့ ဟွတ့် ပါယ် တီ ဘော အန် ဘော ဂေ ဒူအီ အီဆာရေလ^a ဘောကာဂ့လျီတ် ဝီ ဝဲန် ဒါရာ ဇဝ်ဖြာ။ 2 ကူပ် ဟဲ့ ဘူင် လုတ့် ဂေ ဇဝ်ဖြာ၊ ခုန်ဒီခမ် အာဆီဆက် အီ အိုပ် မိူင် အဲဂိုပ် မိူဝ် တး ကာဂုဝ်း ဒီ မိူင် ယေရူဆာလဲမ်။ ဒေါ အန် တီ ခုန်ဒီခမ် အာရေဘူမ် ဟဲ့ အိုပ် မိူင် အာဒါ ဖန် ဆီနမ်။ 3 ခုန်ဒီခမ် အာဆီဆက် ဘော ရဲန် တး လက်လဝ် မ့ပြွင့် ပီ ပဝ့် ဒါ ဆိုက် အာဒါ အူ ဟြဲန့် ဒီ အာ မာယဝ်း လှာင်၊ ဘော ဒါ ဆိုက် အီ ပဝ့် မ့ပြွင့် အာဒါ ဒဝ် မှိုန့် ဝီ။ ဒဲင် တီ ဘော မိုဝ်း ဘော ဒါ ဆိုက် အီ ဟဲ့ ကိူန် ကာဆဝ် ကော ဟူ ပဲ ဒီ တိး။ န့ ဘော မုး ဒါ ဆိုက် မိူင် လီဘီယာ၊ ဒါ ဆိုက် မိူင် ဆူကီ ဘော ဒါ ဆိုက် မိူင် ကူဆာ။ ဂေ ဟဲ့ ကာဖြူမ် ဒီ ဟုဝ့် မိူင် ယေရူဆာလဲမ်။ 4 ဂေ ဟဲ့ ဟွတ့် ကာဂုဝ်း ပွိုန် တူတ့် မိူင် အီ မိုဝ်း ရဲင် အီ မန် ဆီချာ အီ ကွယ် ခဲင် အိူင် ယူဒါ။ ဟဲ့ ဟွတ့် ဂေ ဝီ ဟာဝ် ဇမ် မိူင် ယေရူဆာလဲမ်။

5 ပန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆေမာယာ ဘော ဝီ တး ဒူင် ကွယ် ခုန်ဒီခမ် အာရေဘူမ် ဘော ဂေ ဒါ ကာညာ အီ အိုပ် ကာဒါယ် မိူင် ယူဒါ၊ အီ ဟဲ့ တး ကွယ် ကာဇု ခဲင် မိူင် ယေရူဆာလဲမ် ကူပ် ယုဝ် ဂေ ခုန်ဒီခမ် အာဆီဆက် တွိုန်။ အန် ဝီ ကာလာင် ဒီ ဂေ တဝ်း၊ “ဇဝ်ဖြာ ဟဲ့ တဝ်း၊ ‘ဘေ ဟဲ့ ဝဲန် အုဝ်။ ခုဝ်၊ ဒေါ တီ နီ၊ အုဝ် ဒီ အာပ် ဘေ ဒီ အာဆီဆက်။’”

6 ဟဲ့ ဟွတ့်၊ ခုန်ဒီခမ် ဘော ဂေ ဒါ ကာညာ အီ အိုပ် ဒူအီ အီဆာရေလ၊ ဂေ ဘော ဝီ ပီတျီမ် နဝ်း ဂေ ဒီ ဇဝ်ဖြာ တဝ်း၊ “ပဲ့ ဟဲ့ ခြာမ် ဇဝ်ဖြာ ဒီ ဘူင် တီ၊ ဟဲ့ မုး ဟဲ့ မှာန်။”

7 ဒေါ ယိုဝ် ဇဝ်ဖြာ လွင် အန် တီ၊ အန် ဘော ဝီ ကာလာင် ဒီ အာဆေမာယာ ပေါ အူ ဇေန့် တဝ်း၊ “ဂေ ဟဲ့ ဟွတ့် ဝီ ပီတျီမ် နဝ်း ဂေ။ ခုဝ်၊ အုဝ် အာဝ် ဟူ ဝီ ပျာတ့် ဝဲန် တူတ့် ဂေ။ ခုန်ဒီခမ် အာဆီဆက် ပီ ဘော တး ကာဂုဝ်း ဒီ ဂေ မိူဝ်၊ အုဝ် တူ တဲး အန် ဘူင် ဒီ ဂေ ဒူအီ ခဲင် မိူင် ယေရူဆာလဲမ် ခဲ့ ပီရူ အုဝ် ဒီ ဂေ။ 8 မာလဲ၊ အာဆီဆက် ယီ ဒီ အွင် ဒီ ပဲ ဂေ။ ဂေ ဒီ ဘဲန် မှာယ် အန်၊ တဲး ဂေ နပ် လွင် ပီ လုဝ် ဘူင် ဂေ ဂါန် အာဒါ အုဝ်၊ ဘော ပီ လုဝ် ဘူင် ဂေ ဂါန် အာဒါ ခုန်ဒီခမ် ဒဲင် ကာဒါယ် နီ ဟဲ့ လာယ် ဘ့လိူင် ခဲ့ မှဝ်။”

9 ပါယ် တီ ခုန်ဒီခမ် အာဆီဆက် မိူဝ် တး ကာဂုဝ်း ဒီ မိူင် ယေရူဆာလဲမ်။ အန် ဘော ဒိုဝ်း ဟာဝ် ကြုဝ်ကြာမ် အီ ကွယ် ခဲင် ဟုဝ် ဇဝ်ဖြာ ဘော ကြုဝ်ကြာမ် အီ ကွယ် ခဲင် ဟုဝ် ခုန်ဒီခမ်။ အန် ဘော ဒိုဝ်း ဟာဝ် တူတ့် ဒွန် မျုဝ် ဘော မင် ဂွင့် ခြိဝ် ပီ ဘူင် အုန် ခုန်ဒီခမ် အာဆာလုဝ်မုဝ် တွိုန်။ 10 ခုန်ဒီခမ် အာရေဘူမ် ယီ ဝီ ဘူင် မင် ဂွင့် ဘွင့် ဒေန့်၊ တဲး န့ ဝီ ကာဒါင် မင် ဂွင့် ခြိဝ်၊ ဝီ အာပ် ဒီ ဒါ ဘုဝ် အီ အိုပ် ဒါ ဆိုက် အီ ဘ်ု မာလုဝ်း ခဲင် ဟုဝ် အန်။ 11 ဒွန် ဇေန့် ဒေါ ဟာဝ် ခုန်ဒီခမ် ဒီ ဟုဝ် ဇဝ်ဖြာ၊ ဂေ အီ ဘ်ု ဟုဝ် အန် ဘော ဂူင့် မင် ဂွင့် တီ၊ ဟာဝ် ဒူပ် အန်။ ဟဲ့ ဟွတ့်၊ ဂေ ပီ ဝီ တး အုန် ခဲင် ဟူင် ဒူင် ဘ်ု ဂေ တွိုန်။

12 ကူပ် ခုန်ဒီခမ် အာရေဘူမ် ဟဲ့ ဝီ ပီတျီမ် နဝ်း အန် ဒီ ဇဝ်ဖြာ၊ ဇဝ်ဖြာ မိူဝ် အာဝ် ဟူ ဘူင် တဲး အန် စှိုမ် တူတ့် ဘောကာဂ့လျီတ် ကူပ် ဟဲ့ ရူ ဇဝ်ဖြာ ဒီ အန်။ ခဲင် ကာဒါယ် မိူင် ယူဒါ ဆီ မိုဝ်း အီ ဘွတ် အီ မွှိုမ်။

13 ခုန်ဒီခမ် အာရေဘူမ် မိူဝ် ဟဲ့ အိုပ် မိူင် ယေရူဆာလဲမ်၊ ဟဲ့ မိုဝ်း အာယာ၊ မိုဝ်း အာဖုင် ဒင်ခုဝ် ဘော တဲး မိူင် အန် ဘဲန် မိူင် အီ မန် ဆီချာ။ ဒေါ ကာစုး အန် ဒီ အိုပ် ခဲင် ဟုဝ် တီ၊ အာဆာက် အန် ဟဲ့ ပွိုန် ဖွုန် ဂိုဝ် ဒီ အူ ဆီနမ်။ အန် ဘော အိုပ် ခဲင် မိူင် ယေရူဆာလဲမ် အာဒါ ဂိုဝ် ဒီ ဘူ ဆီနမ်။ မိူင် တီ ဘော မုး မိူင် ပီ ရဝ်း ဇဝ်ဖြာ ကာတဲ မိူင် ဒူအီ အီဆာရေလ ဘောကာဂ့လျီတ်၊ တဲး န့ ဘဲန် ဒူင် ကွယ် အန် ဆေဆေ။ မာ အာရေဘူမ် ဘော စိူဝ် နာင် နာမာ အီ မုး ဒူအီ အာမျုဝ် အမ်မူန်။ 14 အာရေဘူမ် တီ ယီ ဘူင် နာ တူ မွှိုမ်။ ခုဝ်၊ အန် တူ မိုဝ်း နဝ်း ဆီ ဟြေတ့် ဒီ ဘူင် ပီ အိုင် ဇဝ်ဖြာ။

15 လွင် ပီ ဘူင် အာရေဘူမ် စုး ဆိန့် ဒေါ ဂုဝ် ကော ဇမ် ကာဒဲ့၊ ဟဲ့ ဒဲမ် အုန် ခဲင် ဘပ် ဘိူန် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆေမာယာ၊ ဘော ခဲင် ဘပ် အာအီတော အီ မုး ဒူအီ အီ နပ် ဒီ ယိုဝ်။ အာရေဘူမ် အီ အိုပ် မိူင် ယူဒါ ဂါယ် အာယေရုဝ်ဘုဝ် အီ အိုပ် မိူင် အီဆာရေလ ဘော လာယ် ကာဂုဝ်း ဆေဆေ။ 16 အာရေဘူမ် ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် အန် ခဲင် မိူင် အာဒါဝိတ် တွိုန်။ ဂွန် အီမာယ် အန် အီ စိူဝ် အာဖီယ ဘော ဝီ ဘဲန် ခုန်ဒီခမ် ပ့လု အန်။