1 အာယေရုဝ်ဘုဝ် ဟဲ့ ဘဲန် ခုန်ဒီခမ် အီ အိုပ် မိူင် အီဆာရေလ အာဒါ ဂိုဝ် ဒီ ဒါ ဆီနမ်။ ဒေါ အန် တီ အာဖီယ ဝီ ဘဲန် ခုန်ဒီခမ် အီ အိုပ် မိူင် ယူဒါ။

2 အန် ဝီ အိုပ် ကွယ် ခဲင် မိူင် ယေရူဆာလဲမ် အာဒါ အူယ် ဆီနမ်။ မာ အန် စိူဝ် နာင် မာခါ ဘော မုး ဂွန် အာအူရေအေန် အီ တး မိူင် ကာဘီယာ။ အာဖီယ အီ အိုပ် မိူင် ယူဒါ ဂါယ် အာယေရုဝ်ဘုဝ် အီ အိုပ် မိူင် အီဆာရေလ ယီ အွန် ဒီ လာယ် ကာဂုဝ်း ဆေဆေ။

3 အာဖီယ ဘော ရဝ်း ဒါ ဆိုက် အန် အီ ကျ ဒီ ကာဂုဝ်း အာဒါ ဖွုန် ဆဲန် ဝီ။ တဲး ဂေ ဟာဝ် ကာဂုဝ်း။ အာယေရုဝ်ဘုဝ် မိူဝ် ဝီ ရဲန် ဒါ ဆိုက် အန် အီ ကျ ဒီ ကာဂုဝ်း အာဒါ ဒါ ဆဲန် ဝီ။

4 အာဖီယ ဘော ဟာဝ် ကွယ် ဒီ နွန် စေမာရိမ် အီ ကွယ် ဒီ ကာတဲ နွန် အာအေဖာရိမ်။ အန် မိူဝ် တဝ်း၊ “အိုယ် အာယေရုဝ်ဘုဝ် ဘော ဘေ ဒူအီ အီဆာရေလ ဘောကာဂ့လျီတ်၊ တဲး ဘေ ထူမ် ဂြုဝ်း အုဝ်။ 5 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ဒွါ ကာဒိက် ဆတ်ဇာ ဒီ အာဒါဝိတ် အီ တူ နပ် ဒီ လိုဝ်၊ တူ နပ် ဒီ ကာပျာတ့်။ အန် ဇဝ် ဟဲ့ အာပ် တဲး အာဒါဝိတ် ဘော လှုက်လှာန် အန် ဘဲန် ခုန်ဒီခမ် အီ အိုပ် မိူင် အီဆာရေလ ဆေဆေ။ ဘေ ဟဲ့ လုဝ် လှုဝ်း လုဝ် နပ် လွင် အန် တီ။ 6 အာယေရုဝ်ဘုဝ် အီ မုး ဂွန် အာနေဘတ် အီ မုး ဒဲစေန့် အာဆာလုဝ်မုဝ် အီ မုး ဂွန် အာဒါဝိတ် အန် ဟဲ့ ဒွိုမ် ဘူင် ကာဘး ဒီ ဒါ ကာညာ အန်။ 7 ဂေ ဒူအီ တူ မွှိုမ် တူ မိုဝ်း ဒီခုဝ် ဂေ ဟဲ့ တး ကာဇု ဒူင် ကွယ် အန်၊ တဲး ဂေ ဝီ ကာဘး ဒီ အာရေဘူမ် အီ မုး ဂွန် ဒါ ကာညာ အန် အာဆာလုဝ်မုဝ်။ ဒေါ ဆီ နှိုမ် ဆီ ဒီတဲတ် အာရေဘူမ်၊ ဒေါ ညှမ် မိုဝ်း အန် ပ့လူမ် ဂေ ဟဲန့် ဘော ညှမ် နပ် ဒီ ခြဲ ဂေ၊ ဂေ ဟဲ့ ဘူင် ပါယ် တီ။

8 ဒေါ တီ နီ မိူဝ်၊ ဘေ ယီ ဆီ ကာခဲန့် ဒီ မာန် မိူင် ပဲ့ ဟဲ့ အာပ် ဇဝ်ဖြာ ဒီ လှုက်လှာန် အာဒါဝိတ်။ ဘေ မိူဝ် ဟဲ့ ဘဲန် ဖိုင် ကိူန် ဖိုင် တာင်၊ ဟဲ့ မိုဝ်း ဘော အာရိုပ် မက် ခြိဝ် ပဲ့ ဟဲ့ ဘူင် အာယေရုဝ်ဘုဝ်၊ တဲး န့ ဘဲန် ဇဝ်ဖြာ ပီ ကြိုပ် ဘေ။ 9 ဘေ မိူဝ် ဟဲ့ ကာဖြူမ် ဒီ ဟုဝ် တဝ် ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန် ဘော ဂေ ဒူအီ ခြိုဝ် အာလေဝီ။ ဘေ မိူဝ် ဟဲ့ ဝီ ဒါင် ဒူအီ ဟဝ် ဘဲန် ဒါ အီ လှူ ဒီ ဇဝ်ဖြာ၊ တဲး န့ ကာဒါင် ခြိုဝ် အာလေဝီ တီ၊ တဲး န့ ဒူပ် ထုင်ဂျာမ် ဒူအီ အာမျုဝ် ဟဝ်။ အာဆေ အာဝ် တဝ်း၊ ဆေ အန် တး လှူ ဒုဝ် အန်၊ လှူ ဘော ဂွန် မက် ဒီတဲတ် အူ ဒုဝ်၊ ဘော မာဘူ ဘူ ဒုဝ်၊ အန် ဟဲ့ ပွိုန် ဒီ ဘဲန် ဒါ အီ လှူ ဒီ ဇဝ် ဘဲန် ကာဒင် ဘဲန် ကာဒင် အီ တူ မုး ဇဝ်ဖြာ အာခါခ်ု။

10 အီ မုး ယေ၊ ဇဝ်ဖြာ မုး ဇဝ်ဖြာ ပီ ကြိုပ် ယေ။ ယေ မိူဝ် တူ ဝဲန် အန် ဇဝ်။ ဒါ အီ လှူ ဒီ ဇဝ်ဖြာ မုး လှုက်လှာန် အာရူန်။ ဂေ ဒူအီ ခြိုဝ် အာလေဝီ ဘော စွယ် ဂေ။ 11 ဂေ မိူဝ် လှူ ပီ ဒီ လှူ န့ကြိုဝ်း အုး ငှုန် ဘော ပီ ဒီ လှူ အီ ဒုဝ့် ဒီ ငဝ် ဒွန် မှိုဝ် ဒွန် ညှာ။ ဂေ ဘော ဘ့လေး ဘော ခါမုန် ဒဲင် ကာစှူင့် အီ ဆီငါ ဘွတ်။ ဒွန် မှိုဝ် ဂေ ဘော ပီဒဝ့် ငဝ် အွမ် အီ ကွယ် ဒဲင် ဒင် ငဝ် အွမ် ခြိဝ်။ ပါယ် တီ ယေ မိူဝ် ဘူင် ဒူပ် ပဲ့ ဟဲ့ ဒမ် အုန် ဇဝ်ဖြာ။ အီ မုး ဘေ၊ ဘေ ယီ ဟဲ့ ဝဲန် အန် ဇဝ်။ 12 ဇဝ်ဖြာ တီ ကွယ် ရိုမ် ဒူပ် ယေ ဘော ယဲတ့် ယေ။ ဂေ ဒါ အီ လှူ ဒီ အန် ဇဝ် မိူဝ်၊ ဟဲ့ ဂူင့် ဝဝ်၊ ဘ်ု ဒီ ဘုတ်၊ တဲး န့ ဒဲ့ ယေ ကာဂုဝ်း ဒီ ဘေ။ အိုယ် ဘေ ဒူအီ အီဆာရေလ၊ ကွဲ့ တဲး ဘေ ကာခဲန့် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဂုန့် ဒင် ဘေ။ ဘေ ဒိူန် တူ နပ် ဒီ ပဲ ဒေါ မှဝ်။” 13 ဒေါ အန် တီ အာယေရုဝ်ဘုဝ် အီ အိုပ် မိူင် အီဆာရေလ ဟဲ့ စ်ု ဒါ ဆိုက် အန် မင် ကာလဝ့်၊ တဲး ဂေ ဝီ ဟာဝ် ဘ့လာက် နာ ပန်၊ တဲး ဂေ ဒူအီ အန် ကွယ် ဘော နာ အာတ့် ဘော နာ ပန်။ 14 ဂေ ဒူအီ အာယူဒါ ဘော ယိုဝ် အီ ဟဲ့ တး ကာဂုဝ်း ဒီ ဂေ ဘော နာ အာတ့် ဘော နာ ပန်၊ ဂေ ဘော ကာဖြူမ် ဒီ ကြိုပ် ဆာခိုဝ် ဇဝ်ဖြာ။ ဂေ ဒါ အီ လှူ ဒီ ဇဝ်ဖြာ မိူဝ် ဘုတ် ဝဝ် ဂေ။ 15 ဂေ ဒူအီ အာယူဒါ မိူဝ် ကာဖြူမ် ဒီ ဒတ် လာယ် ဒဲ့။ ဒေါ ဒတ် လာယ် ဒဲ့ ဒူအီ အာယူဒါ ဂေ တီ၊ ဇဝ်ဖြာ ဘော ဒမ် မှာပ် ဒီ အာယေရုဝ်ဘုဝ် ဘော ဂေ ဒူအီ အီဆာရေလ ဘောကာဂ့လျီတ်၊ တဲး ဂေ စှိုမ် ဒီ အာဖီယ ဘော ဒီ ဂေ ဒူအီ အာယူဒါ။ 16 ဂေ ဒူအီ အီဆာရေလ ဘော ကာဒုး ဒီ တဝ် ဒူအီ အာယူဒါ။ ဇဝ်ဖြာ မိူဝ် တဲး ဒူအီ အာယူဒါ ပဲ ဂေ။ 17 အာဖီယ ဂေ ဒါ ဆိုက် အန် မိူဝ် ဟဲ့ ပွိုန် ဒီ ငဝ်း ယမ် ကိူန် ကာဆဝ် ဂေ။ ဂေ ဒူအီ အီဆာရေလ အီ ကျ ဒီ ကာဂုဝ်း ဟဲ့ ယမ် ဖန် ဆဲန် ဝီ။ 18 ပါယ် တီ ဂေ ဒူအီ အာယူဒါ ဟဲ့ ပဲ ဟဲ့ အွင် ဒူအီ အီဆာရေလ ကူပ် ညှိုမ် ဘိုင် ဂေ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။

19 အာဖီယ ဘော ခုင်ခြး ဒါ ဆိုက် အာယေရုဝ်ဘုဝ် ဘော ပဲ ဂေ ဘော ပွိုန် မာန် မိူင် ဂေ မင် ပ့လုဝ့်။ န့ ဘော မုး မိူင် ဘေဒါအေန်၊ မိူင် ယေဆာနာ ဘော မိူင် အာဖေရူန် ဘော ရဝ် အီ ကွယ် နာ ရေတ့် မိူင် ဂေ တီ။ 20 စုဝ် ဘာန် အာဖီယ တီ၊ အာယေရုဝ်ဘုဝ် အာဝ် ဟူ နပ် ဒီ ဝီ ပွိုန် ဝိဝ် ပွုန် ဂေ အာဖုင် ဒင်ခုဝ် အန် ဒေါ မှဝ်။ ဟဲ့ ဟွတ့်၊ ဇဝ်ဖြာ ဘော တဲး အာဘြဲတ် ဒီ အန်၊ အန် ဘော ယမ်။

21 အီ မုး အာဖီယ၊ အာဖုင် ဒင်ခုဝ် အန် ဘော ဝဲ တာင်။ အန် ဘော မိုဝ်း အီဘိုန့် ဂိုဝ် ဒီ ဖွုန် ဝီ၊ မိုဝ်း ဂွန် အီမာယ် အာ ဂိုဝ် ဒီ အာ ဝီ၊ ဂွန် အီဘိုန့် ဂိုဝ် ဒီ ဒဝ် ဝီ။

22 လွင် ပီ ဘူင် အာဖီယ အီ ညှမ် ဒွိုမ် ကာလာင် ဘော လွင် ပီ ကာလာင် အန် န့ ဟဲ့ ဒဲမ် အုန် ခဲင် ဘပ် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအီတော။