1 ခုန်ဒီခမ် အာဖီယ ဟဲ့ ဟွတ့် ယမ် ဟာဝ် ဒူပ် ဒါ ဒါ အန်၊ ဂေ ဘော ဒိပ် အန် ခဲင် မိူင် အာဒါဝိတ် တွိုန်။ ဂွန် အီမာယ် အန် အီ စိူဝ် အာဆာ ဘော ဝီ ပ့လု အန်။ ဒေါ မုး စုဝ် ဘာန် အာဆာ တီ မာန် မိူင် ဘော ယေန် ဒါခိုယ် ကော နုဝ့် ဂိုဝ် ဆီနမ်။

2 အာဆာ တီ အန် မိူဝ် ဘူင် နာ ဘွတ် ဘော ဘူင် ဆိူဝ် ဆိူဝ် မှာန် မှာန်၊ တဲး န့ လဝ့် နဝ်း ဇဝ်ဖြာ အီ မုး ဇဝ်ဖြာ ပီ ကြိုပ် အန်။ 3 အန် ဘော ပျာတ့် ဝဲန် ကာစှူင့် လှူ ဂေ ဒူအီ အာမျုဝ် ဟဝ် ဘော ဒူင် စာ ဒူင် ကြိုပ် ဂေ ဇဝ် ဘဲန် ကာဒင် ဘဲန် ကာဒင်။ အန် မိူဝ် ပျာတ့် ဝဲန် ရွင့် ပီ ကြိုပ် ဂေ၊ ဂ်ု ကေး ဘော ရွင့် စာ ဒူင် ကြိုပ် ဂေ နာင် ကာနမ် အီ စိူဝ် အေဆူရာ။ 4 အန် မိူဝ် စ်ု ဂေ၊ တဲး ဂေ ဒူအီ အာယူဒါ ဘောကာဂ့လျီတ် ခတ် နဝ်း ဒီ ဘူင် ပီ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ၊ တဲး ဂေ ဘူင် ဒူပ် ဒါရာ ဘော ဂြုဝ်း ပီ ဒမ် အုန် အန် ဇဝ်။ 5 အန် ဟဲ့ ပျာတ့် ဝဲန် ဒူင် စာ ဘော ကာစှူင့် ဒူင် ဒုဝ့် ဂေ န့ကြိုဝ်း အုး ငှုန် ခဲင် ကာဒါယ် ယူဒါ ဒွန် မိူင်။ ပါယ် တီ ဒေါ မုး စုဝ် ဘာန် အန် တီ၊ မာန် မိူင် မိူဝ် ယေန် ဒါခိုယ်။ 6 ကူပ် ဟဲ့ ယေန် ဒါခိုယ် မာန် မိူင်၊ အန် ဝီ မ့ပြာယ် မိူင် အီ မိုဝ်း ရဲင် ခဲင် ကာဒါယ် ယူဒါ၊ တဲး န့ မန် ဆီချာ။ ဒေါ မုး စုဝ် ဘာန် အန် တီ၊ အာဝ် မိုဝ်း အီ လာယ် ကာဂုဝ်း ဒီ ဂေ။ ခုဝ်၊ ဇဝ်ဖြာ ဟဲ့ ဒွါ တဲး အန် ကွယ် ယေန် ဒါခိုယ်။

7 အန် ဟဲ့ ကာလာင် ဒီ ဂေ ဒူအီ အာယူဒါ တဝ်း၊ “တဲး အေ ဝီ မ့ပြာယ် မာန် မိူင် ဂေ တီ၊ အေ ဘူင် တဲး ရဲင် မိူင် ဝီ မန် ဆီချာ။ ဘူင် ဟုဝ် စာ၊ ဘူင် ဘော မာလုဝ်း မိူင် ဘော ဆဲ အန်။ အေ ပွိုန် ဒီ အိုပ် မာန် မိူင် ပီ အိုပ် ဇဝ်ဖြာ မိူဝ်၊ ကူပ် ဂျုဝ်ဂျာ အေ ဒီ ဘူင် ပီ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် အေ။ အန် ဇဝ် မိူဝ် ဟဲ့ ရဲ ဟဲ့ ဂွင့် အေ ဒွန် ဘ့လာက်၊ တဲး အေ ကွယ် ဒါခိုယ် ဂတ် ဂျီတ်။” အန် ဟဲ့ ဟွတ့် ကာလာင် ပါယ် တီ ဂေ မိူဝ် ကာဖြူမ် ဒီ ဘူင် ဘော ကွယ် ဒါခိုယ် ဂျာမ်ဆာ ဒွန် အီ။

8 ခုန်ဒီခမ် အာဆာ တီ မိုဝ်း ဒါ ဆိုက် ဒူအီ အာယူဒါ အီ ဂူင့် မင် ဂွင့် တာင် ဘော ဘ့လာ လျီး အာဒါ အူယ် ဆဲန် ဝီ၊ ပီ ဝီ မိုဝ်း ဘော ဒါ ဆိုက် ဒူအီ အာဘေန်ယာမ် အီ ဂူင့် မင် ဂွင့် ဒီတဲတ် ဘော အ အာဒါ အာ ဆဲန် ဒီ ဒါ မှိုန့် ဝီ။ ဂေ ဘောကာဂ့လျီတ် မုး တူတ့် ဒါ ဆိုက် အီ ကျ၊ အီ ဟဲ့ လှဲဝ် ဒီ ကာဂုဝ်း။

9 န့ ဝီ မိုဝ်း ဒူအီ အီ တး မိူင် ကူဆာ အူ ဝီ၊ အန် စိူဝ် အာဇေန်ရာ။ အန် ဘော ယဲတ့် ဒါ ဆိုက် အီ ကိူန် ကာဆဝ် တဝ်း ဒီ တး ကာဂုဝ်း ဒီ ဒူအီ အာယူဒါ။ န့ မိုဝ်း ဘော လက်လဝ် မ့ပြွင့် အူယ် မာယဝ်း လှာင် တး ဇမ် ဒီ မိူင် မာရေဆာ။ 10 အာဆာ မိူဝ် ယူင့် ဟာဝ် ဒါ ဆိုက် အန် ဘ်ု ဒီ ကာဂုဝ်း ဒီ ဂေ။ ဂေ ဘော အာ ဘ့လာက် ဘော ကွယ် လာယ် ကာဆိူဝ် ခြိုင် ဒီ ကာဂုဝ်း ခဲင် ဒီလယ့် ဇေဘာဆာ အီ ကွယ် ခူပ် မိူင် မာရေဆာ တွိုန်။

11 အာဆာ မိူဝ် ဝီ ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အန် တဝ်း၊ “အိုယ် မဲ ဇဝ်ဖြာ၊ အာဝ် မိုဝ်း ပေါ အူ ကာဒင် အီ ပီ မဲ ဇဝ်၊ အီ ပွိုန် စွယ် ဒူအီ အီ မိုဝ်း ပ့လူမ် ဂေ ဟဲန့် ကိူန်၊ စွယ် ဘော ဒူအီ အီ မိုဝ်း ပ့လူမ် ဂေ ဟဲန့် ပြေတ့်။ ဒေါ တီ နီ၊ ယေ မှာန့် တဲး မဲ ဇဝ် စွယ် ယေ။ မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ ယေ ဘိုင် ပွုန် မဲ။ ခုဝ်၊ ယေ ယ ဟာဝ် ကာဂုဝ်း ဒီ ဒါ ဆိုက် အီ ဟဲ့ ကိူန် ကာဆဝ်။ မဲ ဇဝ်ဖြာ မုး ဇဝ်ဖြာ ပီ ကြိုပ် ယေ။ ကွဲ့ တဲး န့ မိုဝ်း အာဆေ အီ ပွိုန် ပဲ မဲ ဇဝ်။”

12 ဇဝ်ဖြာ တဲး အာဆာ ဘော ဂေ ဒူအီ အာယူဒါ ပဲ ဒူအီ မိူင် ကူဆာ ဂေ တီ။ ဂေ ဒူအီ မိူင် ကူဆာ ဘော ကာဒုး ဒီ တဝ်။ 13 အာဆာ ဂေ ဒါ ဆိုက် အန် ဘော ခုင်ခြး ဂေ ကော ဇမ် ဒီ မိူင် ဂီရာတ်။ ဒူအီ မိူင် ကူဆာ ဟဲ့ ယမ် ကိူန် ကာဆဝ်၊ ဂေ မိူဝ် အာဝ် ဟူ ပွိုန် ကာဂုဝ်း ဒေါ မှဝ်။ ခုဝ်၊ ဇဝ်ဖြာ ဘော ဒါ ဆိုက် အန် ဟဲ့ ပျာတ့် ဂေ။ ဂေ ဒါ ဆိုက် အန် ဇဝ် တီ ဘော ဖာတ် ဒိုဝ်း ကြုဝ်ကြာမ် ဂေ ကိူန် ကာဆဝ်။ 14 ဒေါ အန် တီ ဂေ ဘော ကာဂုဝ်း ဘော ပျာတ့် ဝဲန် ဒွန် ရဝ် အီ ကွယ် ခူပ် မိူင် ဂီရာတ်။ ခုဝ်၊ ဒူအီ ခဲင် ရဝ် ဂေ တီ ဟဲ့ ယုဝ် ကာဆဝ် ဇဝ်ဖြာ။ ပါယ် တီ ဂေ ဒါ ဆိုက် ပီ အိုပ် ဇဝ်ဖြာ ဟဲ့ ဟွတ့် ပျာတ့် ဝဲန် မိူင် ဘော ရဝ် ဂေ တီ။ ကြုဝ်ကြာမ် ခဲင် ရဝ် ဂေ တီ ဟဲ့ ကိူန် ကာဆဝ်။ ခုဝ်၊ ဂေ ဘော ပွိုန် ဖာတ် ဒိုဝ်း ဟာဝ် ဒီ ဂေ။ 15 ဂေ ဝီ ဟာဝ် တိုက် ဘော ဒူင် မိုဝ်း ကာပိုမ် မာဘူ။ ဂေ မိူဝ် ဟဲ့ ပွိုန် ဒိုဝ်း တး မာဘူ ဂေ မာပဲ ဘော မင်ပြွင့် ကာဟာတ့် ကိူန် ကာဆဝ်။ ဟဲ့ ဟွတ့် ပါယ် တီ ဂေ ဝီ တး ဒီ မိူင် ယေရူဆာလဲမ်။