1 နဝ်း ဖွိုမ် ဇဝ်ဖြာ ဝီ ကာလာင် ဒီ အာဇာရီယာ အီ မုး ဂွန် အာအုဝ်ဒီ။ 2 အန် ဇဝ် တဲး အန် ဟာဝ် ဘ်ု ဒီ ရွုး အာဆာ ဘော ကာလာင် ဒီ အန် တဝ်း၊ “အိုယ် မဲ ခုန်ဒီခမ် အာဆာ ဘော ဘေ ဒူအီ အာမျုဝ် ယူဒါ ဘော ဒူအီ အာဘေန်ယာမ် ဘောကာဂ့လျီတ်၊ တဲး ဘေ ထူမ် ဂြုဝ်း အုဝ်။ ဇဝ်ဖြာ မိူဝ် ကွယ် ရိုမ် ဒူပ် ဘေ၊ ဘေ မိူဝ် ကွယ် ရိုမ် ဒူပ် အန် ဇဝ်။ ဆေ ဘေ ဟြေတ့် အန်၊ အန် မိူဝ် ဒီ တဲး ဘေ ကာတုန့် အန်။ ဆေ ဘေ ယီ ဝဲန် အန်၊ အန် မိူဝ် ဒီ ဝဲန် ဘေ။ 3 ဟဲ့ လှေန့် ကာဆဝ် ဒူအီ အီဆာရေလ တူ ဒူပ် ဇဝ်ဖြာ အီ မုး ဇဝ်ဖြာ အာခါခ်ု။ ဘော ဒါ အီ လှူ ဒီ ဇဝ်ဖြာ အီ ဒီ မာနုဝ် ဒါရာ ဇဝ်ဖြာ ဘော ဒါရာ ဇဝ်ဖြာ ဂေ အာဝ် ဟူ မိုဝ်း။ 4 မာလဲ၊ ဒေါ မိုဝ်း ဂေ ဒုက် ညှာပ်၊ ဂေ ဝီ ဟြေတ့် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ ဂေ မိူဝ် ဟဲ့ ကာတုန့် အန် ဇဝ်။ 5 ဒေါ အန် တီ ဂေ အီ ဆီ လေး ဟာဝ် ဘော ဂေ အီ ဆီ တး လိုပ် အာဝ် မိုဝ်း အီ ဒါခိုယ် ဂျာမ်ဆာ။ ခုဝ်၊ ဇဝ်ဖြာ ဟဲ့ တဲး ဒူအီ ခဲင် ရဝ် ခဲင် ကာင် ဘောကာဂ့လျီတ် ခမ် ဒုက် ဘဲန် မျုဝ် ဘဲန် မျုဝ်။ 6 ဒူအီ အူ မျုဝ် ဝီ ကာဂုဝ်း ဒီ ဒူအီ ပေါ အူ မျုဝ်။ ဒူအီ အူ မိူင် ဟဲ့ ဝီ ကာဂုဝ်း ဒီ ဒူအီ ပေါ အူ မိူင်။ ခုဝ်၊ ဇဝ်ဖြာ ဟဲ့ တဲး န့ မိုဝ်း အာဖေ အာရေ ဒွန် မျုဝ်၊ တဲး န့ ဘဲန် ဒုက် ဒီ ဂေ။ 7 အီ မုး ဘေ၊ တဲး ဘေ ယီ မိုဝ်း နဝ်း ယ၊ ကွဲ့ တဲး ဘေ ဘ့လေး ဝဲန် ဂါန် ပီ လုဝ် ဘူင် ဘေ။ ဘေ မိူဝ် ဒီ ပွိုန် အာဂျိုဝ် ခဲ့ ပီ ဘူင် ဘေ တီ။”

8 ဒေါ ယိုဝ် အာဆာ ဂြုဝ်း ပီ ကာလာင် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဇာရီယာ အီ မုး ဂွန် အာအုဝ်ဒီ၊ န့ ဝီ ဘဲန် ပ့လူမ် ဘဲန် ဟဲန့် ဒီ နဝ်း အန်။ အန် ဘော ပျာတ့် ဝဲန် အာရိုပ် ရာင် အီ ကွယ် ခဲင် ကာဒါယ် မိူင် ယူဒါ ဘော ခဲင် ကာဒါယ် မိူင် အာဘေန်ယာမ် ဒွန် နာ ဒွန် ပ့လုဝ့်။ ဒဲင် တီ ဘော အာရိုပ် ရာင် ခဲင် မိူင် ပဲ့ ဟဲ့ ကာဂုဝ်း ပဲ အန် အီ ကွယ် ဒီ နွန် အာအေဖာရိမ် တွိုန်၊ အန် ဟဲ့ ပျာတ့် ဝဲန်။ အန် မိူဝ် ဝီ မ့ပြာယ် ဝီ ဘူင် ကာစှူင့် လှူ ဒီ ဇဝ်ဖြာ အီ ကွယ် ခဲင် ဝဲင် ဒီ အာတ့် ဟုဝ် ဇဝ်ဖြာ။

9 န့ ဘော မိုဝ်း ဒူအီ ကိူန်၊ ဂေ ဟဲ့ လေး ခဲင် ဒူအီ အာမျုဝ် အာအေဖာရိမ်၊ အာမျုဝ် အာမာနာဆေ ဘော ခဲင် ဒူအီ အာမျုဝ် အမ်မူန် ဝီ တး ကွယ် ခဲင် မာန် မိူင် ပီ အိုပ် အာဆာ။ ခုဝ်၊ ဂေ ဟဲ့ နပ် ဇဝ်ဖြာ ကွယ် ရိုမ် ဒူပ် အန်။ အာဆာ မိူဝ် ဒဲ့ ဂေ ဘောကာဂ့လျီတ် ဘော ဒူအီ အာမျုဝ် ယူဒါ ဘော ဒူအီ အာမျုဝ် အာဘေန်ယာမ်။

10 ဂေ မိူဝ် ဝီ တး ကာဇု တူတ့် ခဲင် မိူင် ယေရူဆာလဲမ်။ ဒေါ အန် တီ ဘော မုး မာဂျီန် ဟာအူယ်။ အာဆာ ဟဲ့ အိုပ် မိူင် အာဒါ ဂိုဝ် ဒီ ဖန် ဆီနမ်။ 11 ဆီငဲ တီ၊ ဂေ ဝီ ဒိုဝ်း ဒုဝ် ဆတ်ဒါဝါ ပဲ့ ဟဲ့ ဖာတ် ဟဲ့ ပွိုန် ဂေ ဒီ အီ ဟဝ်၊ ဝီ လှူ ဒီ ဇဝ်ဖြာ။ န့ မုး မာမက် ဘူ မာယဝ်း ဒုဝ် ဘော မာဘူ ဘူ ဟြဲန့် ဒုဝ်။ 12 ဂေ မိူဝ် လာယ် ဖြူမ် ဒီ ဒွါ ကာဒိက် ဆတ်ဇာ ဒီ ဇဝ်ဖြာ၊ တဲး ဘော နဝ်း ဘော ဖွိုမ် ဂေ ကြိုပ် မီ ဇဝ်ဖြာ အူ ကာဒင် ပီ ကြိုပ် ဂုန့် ဒင် ဂေ။ 13 ဘော မုး အီ တျီ့ အီ တာင်၊ အီဘိုန့် အီမာယ်၊ အာဆေ တူ ကြိုပ် မီ အန် ဇဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် လုဝ် ခမ် အီ ငဝ်း ယမ် အန်။ 14 ဂေ မိူဝ် ဒတ် ကာလာင် ဂြုဝ်း တာင် ကာဆဝ်၊ ဘုတ် ဘော ဝဝ် နိုင် ပဲ ဘော ဂါဝ် ပွုန် ဇဝ်ဖြာ ကာဆဲန့် ဒိူင်။ 15 ခဲ့ ကွယ် ဂေ ဒူအီ အာယူဒါ ဘောကာဂ့လျီတ် မိူဝ် ခူယ် ကူပ် ဟဲ့ ခမ် ဂေ ဂြုဝ်း ကာဆဲန့်၊ ဂြုဝ်း ဒိူင် အီ ဟဲ့ လေး ခဲင် နဝ်း ခဲင် ဖွိုမ် ဂေ။ ဂေ မိူဝ် ဂျုဝ်ဂျာ ဒီ ဒူပ် ဇဝ်ဖြာ။ ဇဝ်ဖြာ မိူဝ် ဘူင် တဲး ဂေ ကာတုန့် အန်။ အန် မိူဝ် ဘူင် တဲး န့ ယေန် ဒွန် ဘ့လာက်၊ အာဝ် ဟူ မိုဝ်း အီ လာယ် ကာဂုဝ်း။

16 ခုန်ဒီခမ် အာဆာ တီ၊ အန် ဘော ဘ့လွာ့ ဝဲန် အာယာ နာင် မာခါ အီ မုး မာ အန်၊ ကွဲ့ တဲး အီ ရုဝ်ဆေ အန် ကူပ် မုး အန် မာ ခုန်ဒီခမ်။ ခုဝ်၊ နာင် တီ ဟဲ့ ဝီ ဆမ် ရွင့် ဒူင် ကြိုပ် ဂေ နာင် ကာနမ် အီ စိူဝ် အေဆူရာ အီ မွှိုမ် ကာအိး ကာဆဝ်။ ခုန်ဒီခမ် အာဆာ မိူဝ် ဂ်ု ကေး ရွင့် ဒူင် ကြိုပ် ဂေ နာင် ကာနမ် တီ၊ ဝီ ကာဒဲပ်၊ ဝီ ဟာဝ် ဒုဝ့် ကာဆိုမ် ခဲင် ငဝ် ခဲင် ဒီလယ့် ခီဒါရူန်။ 17 အန် ပီ ဆ ဒိုဝ်း ဝဲန် တူတ့် ဒူင် စာ ခဲင် မိူင် အီဆာရေလ မိူဝ်၊ အန် ယီ ဒူပ် ဆီချာ ဇဝ်ဖြာ ဘော စုဝ် အန်။ 18 အန် ဝီ ဒိုဝ်း ကြုဝ်ကြာမ် ပီ လှူ ဂုန့် အန် အီ စိူဝ် အာဖီယ ဘော ကြုဝ်ကြာမ် ပီ လှူ အန် အီ မုး ခြိဝ် ဂေ ရွိုန်၊ ဝီ ဟာဝ် အုန် တူတ့် ခဲင် ဟုဝ် ဇဝ်ဖြာ။

19 ဝါယ် အန် တီ၊ အာဝ် ဟူ မိုဝ်း ဒါ ဆိုက် အီ လာယ် ကာဂုဝ်း အာဒါ အူယ် ဂိုဝ် ဒီ ဖန် ဆီနမ် ဒေါ အိုပ် အန် မာန် မိူင် တီ။