1 ခုန်ဒီခမ် အာဆာ ဟဲ့ ဘဲန် ခုန်ဒီခမ် အီ အိုပ် ဒူအီ အာယူဒါ အာဒါ အူယ် ဂိုဝ် ဒီ ဒဝ် ဆီနမ်။ ဒေါ အန် တီ ခုန်ဒီခမ် အာဘာဆာ အီ အိုပ် ဒူအီ အီဆာရေလ ဘော ရဲန် ဒါ ဆိုက်၊ အန် တဝ်း ဒီ ဟာဝ် ကာဂုဝ်း ဒီ မိူင် ယူဒါ။ အန် ဘော ဘူင် ရဲင် ဒီ မိူင် ရာမာ၊ တဲး န့ မန် ဆီချာ၊ ကွဲ့ တဲး ဒူအီ ပီ အိုပ် ခုန်ဒီခမ် အာဆာ ပွိုန် ဒီ လိုပ် ဒီ လေး ခဲင် မိူင် တီ။

2 ပါယ် တီ ခုန်ဒီခမ် အာဆာ ဝီ ဒိုဝ်း ခဲ့ ကွယ် ရွိုန် ဂေ ခြိဝ် ပီ အုန် ဂေ ခဲင် ဟုဝ် ဇဝ်ဖြာ ဘော အီ ကွယ် ခဲင် ဟုဝ် အန်။ အန် တဲး အာမူ အာမာတ် အန် ဝီ ဟာဝ် တိုယ် ဒီ အာဘေန်ဟာဒါတ် အီ မုး ခုန်ဒီခမ် အီ အိုပ် ဒူအီ အာရာမ် အီ ကွယ် မိူင် ဒါမာခူ။ 3 အန် ဝီ တဝ်း ဒီ ခုန်ဒီခမ် အာဘေန်ဟာဒါတ်၊ “တဲး အာယ် ဝီ လာယ် ကာဆဲန့်၊ ဘဲန် အူ ဂိုက်။ တဲး န့ ပီ ဂုန့် အာယ် ဟဲ့ ဒွိုမ် လာယ် ကာဆဲန့် ပါယ် တီ။ အုဝ် မိူဝ် ဟဲ့ ဒိုဝ်း ရွိုန် ဂေ ခြိဝ်၊ တိုယ် ဒီ မဲ။ အုဝ် မှာန့်၊ ကွဲ့ တဲး မဲ ဘူင် ဒူပ် ပဲ့ ဟဲ့ ကာဆဲန့် မဲ ဒီ အာဘာဆာ အီ မုး ခုန်ဒီခမ် ဒူအီ အီဆာရေလ တွိုန်၊ တဲး အန် ဝီ လေး ဟာဝ် ဒူင် ကွယ် အုဝ်။”

4 ဟဲ့ ဟွတ့် မှာန့် ပါယ် တီ အာဘေန်ဟာဒါတ် ဘော ထူမ် ဂြုဝ်း ပီ တဝ်း ခုန်ဒီခမ် အာဆာ။ အန် ဝီ စ်ု ဒါ ဘုဝ် အန် ဂေ ဒါ ဆိုက် အန် ဟာဝ် ဒီ မိူင် အီဆာရေလ။ ဂေ ဘော ကာဂုဝ်း ပွိုန် မိူင် အီယူန် ဘော မိူင် ဒါန်၊ မိူင် ဘေန်ဘေတ်မာခါ ဘော မိူင် ဒူင် အုန် ဂေ ကြုဝ်ကြာမ် အီ ကွယ် ခဲင် ကာဒါယ် မိူင် ဒူအီ အာနာပ်ထာလီ။ 5 ဒေါ ဝီ ယိုဝ် အာဘာဆာ လွင် အန် တီ၊ အန် ဘော စူ၊ အာဝ် ဟူ ဘူင် တဲး န့ ဟွတ့် ရဲင် မိူင် ရာမာ တွိုန်။ 6 ပန် တီ ခုန်ဒီခမ် အာဆာ ဝီ ဒဲ့ ခဲ့ ကွယ် အီမာယ် ခဲင် မိူင် ယူဒါ ဒွန် နာ ဒွန် ပ့လုဝ့်၊ ဝီ စ်ု ဂေ ဟာဝ် ဒိုဝ်း တး မာဝ် ဂေ ဟေ ပီ ဘ့လေး အုန် အာဘာဆာ ဒီ မိူင် ရာမာ တွိုန်။ အန် ဝီ ဒိုဝ်း မာဝ် ဘော ဟေ ဂေ တီ၊ ဝီ မ့ပြာယ်၊ ဝီ ပီလေး ပီဝဝ်း မိူင် ဂီဘာ ဘော မိူင် မီဇာဖာ။

7 ဒေါ အန် တီ ဒူအီ အီ နပ် အီ ယိုဝ် အီ စိူဝ် အာဟာနာနီ ဝီ တး ဒူင် ကွယ် ခုန်ဒီခမ် အာဆာ၊ ဝီ ကာလာင် ဒီ အန် တဝ်း၊ “မဲ ဟဲ့ ဝီ ဘိုင် ခုန်ဒီခမ် မိူင် အာရာမ်၊ အာဝ် ဟူ ဝီ ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ ခုဝ်၊ ဒါ ဆိုက် ခုန်ဒီခမ် အာရာမ် ဟဲ့ ဟွတ့် လွတ် လေး ဒီ မဲ။ 8 ဂေ ဒူအီ အာမျုဝ် ကူဆာ ဘော ဒူအီ အာမျုဝ် လီဘီယာ တွိုန်၊ ဂေ မုး ဒါ ဆိုက် အီ ကိူန် ကာဆဝ်။ ဂေ မိူဝ် ဟဲ့ မိုဝ်း ဒါ ဆိုက် အီ ပဝ့် လက်လဝ် မ့ပြွင့် ဘော ဒါ ဆိုက် အီ ပဝ့် မင်ပြွင့် အီ ဟဲ့ ကိူန် ကာဆဝ်။ ဂေ ပီ ဘော ဟဲ့ ကိူန် ပါယ် တီ မိူဝ်၊ ကူပ် ဟဲ့ ဘိုင် မဲ ဇဝ်ဖြာ၊ အန် ဇဝ် မိူဝ် တဲး မဲ အွင် မဲ ပဲ ဂေ။ မှဝ် မ့ပါယ် ပီ တူ လှုဝ်း မဲ လွင် အန် တီ။း 9 ဇဝ်ဖြာ ဘော ယွတ် ဝိဝ် ယွတ် ဝေန့်၊ ဒဲင် ကာဒါယ် ဒွန် ပ့လုဝ့်၊ တဲး အန် ဒွါ ပ့လူမ် ဂေ ဟဲန့် ဒီ ဂေ အီ ဟဲ့ တဲး ဇဝ်ဖြာ အိုပ် ဂေ အာခါခ်ု။ လွင် အန် တီ၊ ပဲ့ ဟဲ့ ဘူင် မဲ ဟဲ့ ရိုဝ်၊ အာဝ် မိုဝ်း အာငျာန် ဘွတ်။ ခုဝ်၊ ဆိန့် အာတိုဝ် နီ ဟာဝ်၊ န့ ဒီ ဝီ မိုဝ်း ဒါ ဆိုက် အီ ကာဂုဝ်း ဒီ မဲ ဆေဆေ။”

10 ပါယ် တီ အာဆာ ဘော ရူ ကာဆဝ် ဒီ ဒူအီ တီ အီ နပ် အီ ယိုဝ်၊ ဝီ ခြွင့် အန် ခဲင် ကာပိုမ်။ ဒေါ အန် တီ အာဆာ ဝီ ခါနှာပ် ဘော ဒူအီ ရဝ် ဒူအီ ကာင် မင် အီ။

11 လွင် စုဝ် ခုန်ဒီခမ် အာဆာ စုး ဆိန့် ဒေါ ဂုဝ် ကော ဇမ် ကာဒဲ့ ဟဲ့ ဒဲမ် အုန် ခဲင် ဘပ် လွင် ခုန်ဒီခမ် မိူင် ယူဒါ ဘော ခုန်ဒီခမ် မိူင် အီဆာရေလ။ 12 အာဆာ ဟဲ့ အိုပ် မာန် မိူင် ပွိုန် အူယ် ဂိုဝ် ဒီ ဒိမ် ဆီနမ်၊ အန် ဘော မိုဝ်း ဆဝ် ဒီ ပ့လဝ် အန်။ ဆဝ် အန် ပီ ဘော ဟဲ့ ကာဆဝ် မိူဝ်၊ အန် ယီ တူ ဟြေတ့် တူ ဘိုင် ဇဝ်ဖြာ။ အန် ဘိုင် မီ ဆာရာ ဆီနမ်။ 13 ဝါယ် ဟဲ့ အိုပ် အာဆာ မာန် မိူင် ဖွုန် ဂိုဝ် ဒီ အူ ဆီနမ်၊ အန် ဘော ယမ် ဟာဝ် ဒူပ် ဒါ ဒါ အန်။ 14 ဂေ ဘော ဒိုဝ်း ဒုဝ် ဘူင့် အန် ဟာဝ် ဘ့လေး အုန် ခဲင် ကာဒဝ် ဘာရေဝ် ပဲ့ ဟဲ့ ရဲန် အုန် အန် အာဒါ အန်။ န့ ကွယ် ခဲင် မိူင် အာဒါဝိတ် တွိုန်။ အာတ့် အန် တီ ဂေ ဘော ဒိုဝ်း ဒုဝ် ယမ် အန် ဝီ ဘ့လေး ဒဲင် ကာဘဲး ပဲ့ ဟဲ့ ဟပ် ဂေ ဆီနမ် အုး ငှုန် ဘဲန် မျုဝ် ဘဲန် မျုဝ် အီ ဟဲ့ ကိူန် ကာဆဝ်။ ဂေ ဘော ဒုဝ့် ငဝ် တဲး န့ ကုး တာင် ကာဆဝ်၊ တဲး န့ ဘျ ခဲ့ ရုဝ်ဆေ ဂေ ဒီ အန်။