1 အာယောဆာဖာတ် ဝီ ဘဲန် ခုန်ဒီခမ် အီ အိုပ် မိူင် ယူဒါ၊ ပ့လု အာဆာ အီ မုး ဂုန့် အန်။ အန် မိူဝ် ဘူင် တဲး မာန် မိူင် အန် မိုဝ်း ပ့လူမ် မိုဝ်း ဟဲန့်၊ တဲး ဂေ ပဲ ဒီ ရဲ ဒါ ဆိုက် ဒူအီ အီဆာရေလ။ 2 အန် မိူဝ် ဒိုဝ်း ဒါ ဆိုက် အန်၊ အုန် ခဲင် မိူင် အီ မန် ဆီချာ အီ မိုဝ်း ရဲင်၊ အီ ကွယ် ခဲင် ကာဒါယ် မိူင် ယူဒါ တွိုန်။ အန် မိူဝ် တဲး ဂေ ဒါ ဆိုက် အန် ဘ်ု မိူင် ဂေ အီ ကွယ် ခဲင် ကာဒါယ် မိူင် အာအေဖာရိမ် အီ မုး မိူင် ပဲ့ ဟဲ့ တိုက် ပွိုန် အာဆာ အီ မုး ဂုန့် အန်။

3 ဇဝ်ဖြာ မိူဝ် ကွယ် ရိုမ် ဒူပ် အာယောဆာဖာတ်။ ခုဝ်၊ ဒေါ ဆီ နှိုမ် အန်၊ အန် ဟဲ့ ဘူင် ပီ ပီ ဘူင် အာဒါဝိတ် အီ မုး ဒါ ဒါ အန်။ အန် မိူဝ် တူ ကြိုပ် ဇဝ် ဘာလ။ 4 အန် ကြိုပ် မီ ဇဝ်ဖြာ ပီ ကြိုပ် ဂုန့် အန် ဘော ဘူင် ဒူပ် ဒါရာ ဇဝ်ဖြာ။ အန် မိူဝ် တူ ဘူင် ပီ ပီ ဘူင် ဂေ ဒူအီ အာမျုဝ် အီဆာရေလ။ 5 ခုဝ် အန် တီ ဇဝ်ဖြာ မွင့်ကာရာ ဒွါ မာန် မိူင် ပီ အိုပ် အန် တဲး န့ မန် ဆီချာ။ ဂေ ဒူအီ အာယူဒါ မိူဝ် အာပ် ဒွါ ခေါဆွင် ဒီ အန်။ ပါယ် တီ အန် ကော ခြမ် ကာဆဝ်။ အာဖုင် ဆာရေ အန် မိူဝ် ကြဲ ဒီ တာင်။ 6 အန် မိုဝ်း နဝ်း အီ ကာဒိုက် ကာဒဝ့် ဒီ ဇဝ်ဖြာ ဘော ပျာတ့် ဝဲန် ဒူင် စာ ဘော ရွင့် နာင် ကာနမ် အီ စိူဝ် အေဆူရာ ဘောကာဂ့လျီတ် အီ ကွယ် ခဲင် ကာဒါယ် မိူင် ယူဒါ။

7 အန် ဟဲ့ အိုပ် မာန် မိူင် အာဒါ အူယ် ဆီနမ်။ ဒေါ မုး ဆီနမ် ဟာအူယ် တီ၊ အန် ဝီ စ်ု ဂေ အာမူ အာမာတ် အန် အီ စိူဝ် အာဘေန်ဟေလာ၊ အာအောဘာဒီ၊ အာဆာခါရာ၊ အာနေထာနေလာ ဘော အာမီခါယာ၊ တဲး ဂေ ဟာဝ် ကာလာင်၊ ဟာဝ် မာနုဝ် ဒူအီ ဒွန် ရဝ် ဒွန် မိူင်။ 8 ဂေ ဒူအီ ခြိုဝ် အာလေဝီ အီ စိူဝ် အာဆေမာယာ၊ အာနေထာနီ၊ အာဇေဘာဒီ၊ အာဆာဟေလ၊ အာဆေမီရာမူတ်၊ အာယုဝ်နာထာန်၊ အာတောနီယာ၊ အာတောဖီယာ ဘော အာတောဘာထုဝ်နီယာ။ ဂေ ဘော ဟာဝ် ဒူပ် အာမူ အာမာတ် ခုန်ဒီခမ် ဂေ တွိုန်။ ဘော ဒါ အီ လှူ ဒီ ဇဝ်ဖြာ အီ စိူဝ် အာအေလီဆာမာ ဘော အာယေယုဝ်ရမ် မိူဝ် ဟာဝ် ဒူပ်။ 9 ဂေ မိူဝ် ဂူင့် ဟာဝ် ဘော ဘပ် ဒါရာ ဇဝ်ဖြာ၊ ဟာဝ် မာနုဝ် ဒူအီ ခဲင် ရဝ် ခဲင် မိူင် ယူဒါ၊ တဲး န့ ကော ကာလတ့် တူတ့် ဒွန် ပ့လုဝ့်။

10 ဇဝ်ဖြာ မိူဝ် ဘူင် ဒီ ဒူအီ အာမျုဝ် ဟဝ် အီ ကွယ် ခဲင် ရဝ် ခဲင် မိူင် အီ ကွယ် ရူပ် ကာဒါယ် မိူင် ဒူအီ အာယူဒါ၊ တဲး ဂေ ယုဝ် ကာဆဝ်။ ခုဝ်၊ ဂေ တူ ယ တး ကာဂုဝ်း ဒီ ခုန်ဒီခမ် အာယောဆာဖာတ်။ 11 ဂေ ဒူအီ ဖီလီထီ မင် အီ ဘော ဒိုဝ်း ခေါဆွင် ဘော ရွိုန် စိုင်၊ ဝီ အာပ် ဒွါ ဒီ အာယောဆာဖာတ်။ ဒူအီ အာမျုဝ် အာရာပ် မိူဝ် ဒိုဝ်း မာဘူ ဘူ ဟြဲန့် ဒီ ဘူ မာယဝ်း ဒုဝ် ဘော မာပဲ ဘူ ဟြဲန့် ဒီ ဘူ မာယဝ်း ဒုဝ်၊ ဝီ အာပ် ဒွါ ဒီ အန်။

12 ကူပ် န့ ပါယ် တီ အာယောဆာဖာတ် မိူဝ် ဟဲ့ ကြဲ ဒီ မိုဝ်း ပွုန် ဂေ ဟဲန့် ကာပွါ။ အန် ဝီ ဘူင် ဒူင် ဒီ ကွယ် ဒါ ဆိုက် အီ မန် ဆီချာ။ အန် ဘော ဒဲ မိူင် တဲး အန် ဘ့လေး အုန် ကြုဝ်ကြာမ် အန်။ 13 ဘော ခဲင် မိူင် ဘဲန် မိူင် ဘဲန် မိူင် အီ ကွယ် ခဲင် ကာဒါယ် မိူင် ယူဒါ အန် ဟဲ့ ပွိုန် ဒီ အုန် ကြုဝ်ကြာမ် ဘော ပီ ဒီ ဟူမ် ပီ ဒီ တာ ဘဲန် မျုဝ် ဘဲန် မျုဝ် အီ ကိူန် ကာဆဝ်။ အန် ဘော ဒဲ့ ဒါ ဆိုက် အီ ကျ ဒီ ကာဂုဝ်း၊ တဲး ဂေ ကွယ် ခဲင် မိူင် ယေရူဆာလဲမ်။

14 ဇာရာင် ဂေ ဟဲ့ ဒဲမ် အုန် ပါယ် နီ။ ဒါ တာင် အီ အိုပ် ဘဲန် ဖိုင် ဘဲန် ဖိုင် ဒါ ဆိုက် အီ မုး အူ ဖိုင် အူ ဟြဲန့် ဝီ၊ ခဲင် ခြိုဝ် အာယူဒါ ဘော မုး အာတာနာဟာ။ ဒါ ဆိုက် ပီ အိုပ် အန် ကွယ် အူယ် ဆဲန် ဝီ။ 15 အီ ဒါမ် အန် တီ ဘော မုး အာယေဟုဝ်နန်။ အန် ယဲတ့် ဒါ ဆိုက် အာ ဆဲန် ဒီ ဒါ မှိုန့် ဝီ။ 16 အီ ဒါမ် ပေါ အူ ဝီ ဘော မုး အာမာဆီ အီ မုး ဂွန် အာဇီခါရီ။ ဒါ ဆိုက် ပီ အိုပ် အန် ကွယ် အာ ဆဲန် ဝီ။ အာမာဆီ တီ ဟဲ့ အုန် နဝ်း ဒီ ဘူင် မီ ဂါန် ဇဝ်ဖြာ။

17 ခဲင် ခြိုဝ် အာဘေန်ယာမ် ဒါ တာင် အီ အိုပ် ဒါ ဆိုက် ဘော မုး အာလေဒ။ အန် ဘော မုး ဒါ ဘုဝ် အီ ကျ ဒီ ကာဂုဝ်း ဘော ယဲတ့် ဒါ ဆိုက် အာ ဆဲန် ဝီ အီ ဂူင့် အ ဘော မင် ဂွင့်။ 18 အီ ဒါမ် အန် တီ ဘော မုး အာယေဟုဝ်ဇာဘာတ်။ အန် ဘော အိုပ် ဒါ ဆိုက် အူ ဆဲန် ဒီ ဒါ မှိုန့် ဝီ အီ ဟဲ့ ဖြူမ် ဒီ ကာဂုဝ်း။

19 ဒူအီ ဂေ တီ ဂေ ဘူင် ဂါန် ခုန်ဒီခမ်။ ခုဝ် အန် တီ ခုန်ဒီခမ် ပီ ဝီ တဲး ဂေ ကွယ် ခဲင် မိူင် အီ မိုဝ်း ရဲင်၊ အီ ကွယ် ခဲင် ကာဒါယ် မိူင် ယူဒါ ဒွန် နာ ဒွန် ပ့လုဝ့်။