1 ခုန်ဒီခမ် အာယောဆာဖာတ် အီ အိုပ် မာန် မိူင် ယူဒါ တွိုန် ဒေါ ဟဲ့ မိုဝ်း အန် ကြုဝ်ကြာမ်၊ မိုဝ်း ဘော အာဖုင် ဆာရေ၊ အန် ဝီ တဲး ဝေါဝဲ အန် ဝီ ခတ် ဒိုဝ်း ဝေါဝဲ ခုန်ဒီခမ် အာဟပ် အီ အိုပ် မိူင် အီဆာရေလ။ 2 ဟဲ့ ပွုန် ဟာဝ် အာ အူယ် ဆီနမ်၊ အန် ဝီ ဟာဝ် စ်ု ခုန်ဒီခမ် အာဟပ် ခဲင် မိူင် ဆာမာရီ။ အာဟပ် မိူဝ် ငဝ်း မာဘူ ဂေ မက် ကိူန် ကာဆဝ်၊ ဟျီင် လိုမ်လာ အန် ဘော ဂေ ဒူအီ အီ ဒူပ် အန်။ အာဟပ် ဘော ကာဆုး အန် ဟာဝ် တိုက် မိူင် ရာမူတ်ဂီလေအာတ်။

3 ခုန်ဒီခမ် အာဟပ် အီ အိုပ် မိူင် အီဆာရေလ ဝီ ဒီမွှတ် ခုန်ဒီခမ် အာယောဆာဖာတ် အီ အိုပ် မိူင် ယူဒါ။ အန် တဝ်း၊ “မဲ ဆီ ဟာဝ် ရိုမ် ဒူပ် အုဝ်၊ ဟာဝ် တိုက် မိူင် ရာမူတ်ဂီလေအာတ်။း” အာယောဆာဖာတ် ဝီ တဝ်း၊ “အိုဝ်၊ အာဝ် လိူက်။ အုဝ် ဟဲ့ ဘဲန် ပီ မဲ။ ဒူအီ အုဝ် မိူဝ် ဟဲ့ ပီ ဒူအီ မဲ။ မ့ပြွင့် အုဝ် ဟဲ့ ပီ မ့ပြွင့် မဲ။” 4 အာယောဆာဖာတ် ပီ ဝီ တဝ်း၊ “လွင် အန် တီ၊ န့ ယီ လုဝ် ဒီမွှတ် ဇဝ်ဖြာ ဒီ အာတ့်။”

5 ပါယ် တီ ခုန်ဒီခမ် အီဆာရေလ ဝီ ဒဲ့ ဂေ ဒူအီ အီ ဘျာန် ဂြုဝ်း ဇဝ်ဖြာ ကာဘက် ဖွုန် မာယဝ်း ဝီ။ အန် မိူဝ် ဒီမွှတ် ဂေ တဝ်း၊ “ဆေ ယေ ဟာဝ် ကာဂုဝ်း ဒီ မိူင် ရာမူတ်ဂီလေအာတ် တွိုန်၊ န့ ဒီ မွှိုမ် တူ မွှိုမ်။း” ဂေ မိူဝ် ဝီ ကာဖြူမ် ဒီ တဝ်း ဒီ အန်၊ “တဲး မဲ ဟာဝ်။ ဇဝ်ဖြာ ဒီ ဒွါ မိူင် တီ ဒီ မဲ။”

6 မာလဲ၊ အာယောဆာဖာတ် ဝီ ဒီမွှတ် တဝ်း၊ “အာဝ် ဟူ မိုဝ်း ဒူအီ အီ ဘျာန် ဂြုဝ်း ဇဝ်ဖြာ ပေါ အူ ဝီ၊ ပီ ကာအာပ် အေ ဒီမွှတ်။း”

7 အာဟပ် ဝီ တဝ်း၊ “န့ ဆီ မိုဝ်း အူ ဝီ အီ ပွိုန် ဒီမွှတ်။ အန် စိူဝ် အာမီခါယာ အီ မုး ဂွန် အာမီလ။ မာလဲ၊ အုဝ် ဇွင့် အန်။ ခုဝ်၊ အန် ကာလာင် မီ နာ တူ မွှိုမ် လွင် အုဝ်။ အန် တူ ဒွိုမ် ကာလာင် နာ မွှိုမ် ဒီ အုဝ်။” အာယောဆာဖာတ် ဝီ တဝ်း၊ “မဲ ခုန်ဒီခမ် တာင်၊ အာဝ် ကာအာပ် ကာလာင် ဂြုဝ်း ပါယ် တီ။”

8 ပါယ် တီ ခုန်ဒီခမ် အာဟပ် မိူဝ် ဒဲ့ တး ဒါ တာင် အီ အိုပ် ဒါ ဆိုက် အူ ဝီ ဘော တဝ်း၊ “မဲ ဟာဝ် ဒဲ့ အာမီခါယာ အီ မုး ဂွန် အာမီလ တွိုန်၊ တဲး အန် တး ခြန် ခြန်။”

9 ဒေါ အန် တီ ခုန်ဒီခမ် အီဆာရေလ ဘော ခုန်ဒီခမ် ယူဒါ တွိုန် ဂါယ် ဟဲ့ စှိုပ် ခြိုင် ခုန်ဒီခမ်၊ တုတ့် ဒဲင် မာလာင် ဂါယ် ရာင် အာဆေ ရာင် အန်။ ဒူင် ကွယ် ဂေ တီ ဘော မုး ခဲင် ဂ့လင် ဘာင် မာလုဝ်း မိူင် ဆာမာရီ။ ခဲ့ ကွယ် ဂေ ဒူအီ အီ ဘျာန် ဂြုဝ်း ဇဝ်ဖြာ မိူဝ် ကာလာင် တဲး ဂါယ် ထူမ်။ 10 ယီ မုး အာဇေဒေကီ အီ မုး ဂွန် အာခေနာနာ၊ အန် ဘော ဒိုဝ်း ဟိန် ဘတ့် ဘူင် ဘဲန် နိုင် အန်၊ ဘော ကာလာင် ဂြုဝ်း တဝ်း၊ “ဇဝ်ဖြာ ဟဲ့ ကာလာင် တဝ်း၊ ‘မဲ ခုန်ဒီခမ် ဒီ ဘော ဒိုဝ်း နိုင် ဘတ့် နီ၊ ဘ့လုး ဂေ ဒူအီ အာရာမ်၊ တဲး ဂေ ကော စှိုမ် တူတ့်။’”

11 ခဲ့ ကွယ် ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ဒွန် အီ ကာဖြူမ် ဒီ တဝ်း၊ “မဲ ခုန်ဒီခမ် တာင်၊ တဲး မဲ ရဲန် ဆိုက် မဲ၊ ဟာဝ် ဒီ မိူင် ရာမူတ်ဂီလေအာတ် တီ။ မဲ ဒီ ပဲ ဂေ။ ဇဝ်ဖြာ ဒီ အာပ် ဒွါ ဂေ ဒီ မဲ။”

12 ဒါ တာင် ပီ စ်ု ခုန်ဒီခမ် ဟာဝ် ဒဲ့ အာမီခါယာ တွိုန်၊ အန် ဝီ ကာလာင် ဒီ အာမီခါယာ တဝ်း၊ “ဒူအီ အီ ဘျာန် ဂြုဝ်း ဇဝ်ဖြာ ဂေ နီ၊ ဂေ ကာလာင် မီ ဂြုဝ်း မွှိုမ် ဒီ ခုန်ဒီခမ်။ မဲ မိူဝ် လုဝ် ကာလာင် ဂြုဝ်း မွှိုမ်၊ တဲး န့ ပီ ပီ ကာလာင် ဂေ တီ။”

13 အာမီခါယာ ယီ ဝီ တဝ်း ဒီ အန်၊ “အုဝ် တဝ်း အာခ်ု ဒီ မဲ၊ အုဝ် ဒီ ကာလာင် မီ ခဲ့ ပီ တဝ်း ဇဝ်ဖြာ။”

14 အန် ဘော တး ဇမ် ဒူင် ကွယ် ခုန်ဒီခမ် အာဟပ်၊ ခုန်ဒီခမ် ဘော ဒီမွှတ် အန် တဝ်း၊ “အိုယ် အာမီခါယာ၊ ဆေ ဘော အုဝ် ဘော အာယောဆာဖာတ် ဟာဝ် တိုက် မိူင် ရာမူတ်ဂီလေအာတ် တွိုန်၊ န့ မွှိုမ် တူ မွှိုမ်။း” အာမီခါယာ ဝီ တဝ်း ဒီ အန်၊ “ဟဲ့ ပွိုန် ဟာဝ်။ မဲ ဒီ ဘော ပဲ ဂေ။ ဇဝ်ဖြာ ဒီ အာပ် ဒွါ ဂေ ဒီ မဲ ခုန်ဒီခမ် တာင်။”

15 မာလဲ၊ ခုန်ဒီခမ် အာဟပ် ဝီ တဝ်း ဒီ အန်၊ “အုဝ် ဟဲ့ ဒွိုမ် တဲး မဲ ခမ် ကာဒိက် ဆတ်ဇာ ဒီ အာတ့် ဇဝ်ဖြာ၊ တဲး မဲ ကာလာင် ဂြုဝ်း အီ မှာန် အာခါခ်ု ဒီ အုဝ်။ ဘော ဒေါ တီ နီ၊ အုဝ် ဆီ တဲး မဲ ကာလာင် မီ ဂြုဝ်း ဇဝ်ဖြာ။”

16 အာမီခါယာ ပီ ဝီ တဝ်း၊ “အုဝ် ဟဲ့ ယိုဝ် ဂေ ဒူအီ အီဆာရေလ ဘောကာဂ့လျီတ် အီ ကွယ် ဒီ နွန် တီ။ ဂေ ဟဲ့ လာယ် ကာယဝ်း ကာရေး၊ ဟဲ့ ပီ မာဘူ အီ တူ မိုဝ်း ဒါ ကာညာ အီ ဟျီင် အီ ယွတ် မဲန် ဂေ။ ဇဝ်ဖြာ မိူဝ် ဟဲ့ တဝ်း၊ ‘ဒူအီ အီ တူ မိုဝ်း ဒါ ကာညာ ဂေ နီ၊ တဲး ဂေ ဒွန် အီ ဝီ ဝေန့် ဒီ ကာင် ဂေ ဘော ကွယ် ဒါခိုယ်။’”

17 ပန် တီ အာဟပ် ဝီ ကာလာင် ဒီ အာယောဆာဖာတ် တဝ်း၊ “အုဝ် ဟဲ့ တဝ်း ဒီ မဲ၊ အန် တူ ဒွိုမ် ကာလာင် ဂြုဝ်း နာ မွှိုမ် ခေါ အူ ဇေန့် ဒီ အုဝ်။ အန် ကာလာင် မီ ဂြုဝ်း နာ တူ မွှိုမ်။”

18 အာမီခါယာ ဝီ ကာလာင် ဟာဝ် ပွါ တဝ်း၊ “ခုဝ် န့ ပါယ် တီ တဲး မဲ ဝီ ထူမ် ဂြုဝ်း ဇဝ်ဖြာ။ အုဝ် ဟဲ့ ယိုဝ် ဇဝ်ဖြာ ကွယ် ဒဲင် မာလာင် အန်။ ဂေ အာမူ အာမာတ် အန် မိူဝ် ဟဲ့ ကွယ် ဘ့လာက် အာအး ဘော ဘ့လာက် အာဂ အန်။ 19 ဇဝ်ဖြာ မိူဝ် ဟဲ့ ဒီမွှတ် တဝ်း၊ ‘အာဆေ ဒီ ကာဆုး ခုန်ဒီခမ် အာဟပ်၊ တဲး အန် ဟာဝ် ကာဂုဝ်း ဒီ မိူင် ရာမူတ်ဂီလေအာတ်၊ တဲး အန် ဟာဝ် ယမ် ဒီ တီ။း’ ဂေ အာမူ အာမာတ် ဇဝ်ဖြာ၊ ဂေ ဘော တဝ်း အူ ဝီ အူ မျုဝ်။ 20 ပန် တီ န့ ဝီ မိုဝ်း ဝီညာန် အူ ကာဒင် ဝီ တး ချြီ့ ဒီ အာတ့် ဇဝ်ဖြာ ဝီ တဝ်း၊ ‘အုဝ် အီ ဒီ ကာဆုး အန်။’ ဇဝ်ဖြာ ဝီ ဒီမွှတ် အန် တဝ်း၊ ‘မဲ ဒီ ပါယ် မှဝ် ဒီ ကာဆုး အန်။း’

21 အန် ဝီ တဝ်း၊ ‘အုဝ် ဒီ ဘဲန် ဝီညာန် အီ ဆီမာ ကာလုဝ် ဘော ကာဆုး ဂေ ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ဒူပ် အာဟပ် တီ၊ တဲး ဂေ ဝီ ကာလာင် မီ ဂြုဝ်း တူ မှာန်။’ ဇဝ်ဖြာ ဝီ တဝ်း၊ ‘တဲး မဲ ဟာဝ် ဘူင် ပီ တဝ်း မဲ တီ။ ပီ ဒီ ဘူင် မဲ တီ န့ ဒီ အွင်။’

22 ခုဝ် အန် တီ ဇဝ်ဖြာ မိူဝ် စ်ု ဝီညာန် အီ ဆီမာ ကာလုဝ်၊ တဲး အန် ကွယ် ခဲင် မူတ့် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဇဝ်ဖြာ ဟဲ့ ဟွတ့် ဆုင်ဖျာတ်၊ တဲး မဲ ဇမ် ဒုက်။”

23 ဒေါ အန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဇေဒေကီ အီ မုး ဂွန် အာခေနာနာ၊ အန် ဝီ တး ကွယ် ချြီ့ အာမီခါယာ၊ ဝီ ကာထ ကာလာ အန် တဝ်း၊ “ဆေ နဝ်း ဖွိုမ် ဇဝ်ဖြာ ဟဲ့ လေး ဒီ အုဝ်၊ ဝီ ဟာဝ် ကာလာင် ဒီ မဲ၊ န့တေန့် မှဝ် အန် ဝဝ့်။း”

24 အာမီခါယာ ဝီ တဝ်း ဒီ အန်၊ “လွင် အန် တီ မဲ ဒီ နပ် ပန် ဒီ ဟာဝ် ချြီင် မဲ ခဲင် ဟူင် အီ ကွယ် နာ ခဲင်။”

25 ပန် တီ ခုန်ဒီခမ် အီ အိုပ် မိူင် အီဆာရေလ ဝီ တဝ်း၊ “တဲး ဘေ ဒိုဝ်း အာမီခါယာ၊ ဝီ တိုယ် ဟာဝ် အန် ဒူင် ကွယ် အာမူန် အီ အိုပ် မိူင် နီ ဘော ဒီ အာယုဝ်အာတ် အီ မုး ဂွန် ခုန်ဒီခမ်။ 26 တဲး ဘေ ကာလာင် ဒီ ဒါ ကာညာ၊ ခုန်ဒီခမ် ဟဲ့ စ်ု မဲ တဲး မဲ ခြွင့် ဒူအီ ဝီ နီ ခဲင် ကာပိုမ်၊ တဲး အန် ဟူမ် မီ ခါမုန် ဂါယ် ဒျီင် အိုမ်၊ တဲး န့ ကော ဇမ် ပန် ဒီ ဝီ တး ဒါခိုယ် အုဝ်။”

27 အာမီခါယာ ပီ ဝီ တဝ်း၊ “ဆေ မဲ ဘော ပွိုန် ဒီ ဝီ တး ဒါခိုယ်၊ ဂြုဝ်း ပီ ကာလာင် အုဝ်၊ အာဝ် မုး ဂြုဝ်း ဇဝ်ဖြာ။” အန် ဟဲ့ ဟွတ့် ကာလာင် ပါယ် တီ အန် ဝီ တဝ်း၊ “အိုယ် ဘေ ဒူအီ ဘောကာဂ့လျီတ်၊ တဲး ဘေ နုဝ် ဆီချာ ဂြုဝ်း တီ။”

28 ပန် တီ ခုန်ဒီခမ် အီဆာရေလ ဂါယ် ခုန်ဒီခမ် အာယောဆာဖာတ် အီ အိုပ် မိူင် ယူဒါ၊ ဂါယ် ဘော ဟာဝ် ဒီ မိူင် ရာမူတ်ဂီလေအာတ် တွိုန်။ 29 ခုန်ဒီခမ် အာဟပ် ဝီ ကာလာင် ဒီ အာယောဆာဖာတ် တဝ်း၊ “အုဝ် တူ စှိုပ် ခြိုင် ပီ တာ ခုန်ဒီခမ်၊ ကွဲ့ တဲး ဂေ နုဝ် အုဝ် ဒေါ ဟာဝ် ကာဂုဝ်း အုဝ် ဒီ ရန်ဆူ တီ။ အီ မုး မဲ၊ တဲး မဲ စှိုပ် ခြိုင် ခုန်ဒီခမ် မဲ။” ဟဲ့ ဟွတ့်၊ ခုန်ဒီခမ် အီဆာရေလ တွိုန် ဘော ကာပ့လု ခြိုင် အန်။ ဟဲ့ ဟွတ့်၊ ဂါယ် ဘော ဟာဝ် ကာဂုဝ်း ဒီ ရန်ဆူ အူ ဇေန့်။

30 ခုန်ဒီခမ် အီ အိုပ် မိူင် အာရာမ် ယီ ဟဲ့ ဟွတ့် ကာလာင် အုန် ဒီ ဂေ ဒါ ဘုဝ် အန် ဘော ဂေ အီ အိုပ် ဒါ ဆိုက် အီ ပဝ့် လက်လဝ်။ အန် တဝ်း၊ “ဘော မုး ဒါ တာင် ဘော မုး ဆိုက် ဒီရွယ်၊ အာဝ် လုဝ် ကာဂုဝ်း။ တဲး ဘေ ယွတ် မီ ခုန်ဒီခမ် အီဆာရေလ တွိုန်။” 31 ပန် တီ ဒါ ဘုဝ် တာင် အီ အိုပ် ဒါ ဆိုက် အီ ပဝ့် လက်လဝ်၊ အန် ယိုဝ် အာယောဆာဖာတ် တွိုန်။ အန် ဝီ တဝ်း၊ “အီ ဒွယ် ဟဲ့ မုး ခုန်ဒီခမ် အီဆာရေလ မှာန် အာခါခ်ု။” ဂေ ဘော ကာဖြူမ် ဒီ တး တဝ်း ဒီ ကာဂုဝ်း ဒီ အန်။ အာယောဆာဖာတ် ဘော ဒတ် တာင်။ ဇဝ်ဖြာ အီ မုး ဇဝ်ဖြာ ပီ ကြိုပ် အန် ဘော စွယ် အန်၊ တဲး ဂေ ဝီ ဝး အန်။ 32 ဒေါ အန် တီ ဂေ ဒါ ဘုဝ် အီ အိုပ် ဒါ ဆိုက် အီ ပဝ့် လက်လဝ်၊ ဂေ ဘော ဝီ ယိုဝ်၊ အာဝ် မုး ခုန်ဒီခမ် အီဆာရေလ၊ ဂေ အာဝ် ဟူ ကာဂုဝ်း ဒီ အန်။ ဂေ ဘော ဝီ ဝး အန်။

33 န့ ယီ မိုဝ်း ဒါ ဆိုက် အူ ဝီ၊ အန် ဘော ဒိုဝ်း အ အန် လာမ် ဘန့် ပါယ် တီ။ ဘ့လာ အ အန် ဘော ဟာဝ် လဝ့် ခုန်ဒီခမ် အီဆာရေလ ဒီ ကာတဲ ဆီတုဝ် ဟိန် အန်။ ဟဲ့ ဟွတ့်၊ ခုန်ဒီခမ် အာဟပ် ဘော ဝီ ဒဲ့ ဒီဘဲ အန် အီ ပဝ့် လက်လဝ် အန် တဝ်း၊ “ဒိုဝ်း လေး လက်လဝ် ဒူင် ကာဂုဝ်း အေ နီ။ အုဝ် ဟဲ့ ယိုဝ် ဆဝ် ကာဆဝ်။” 34 ဆီငဲ တီ၊ ဂေ ဘော ဝဲ ကာဂုဝ်း ကိူန်၊ ဂေ ကာဘန့် လွှိုမ် အာတ့် တီ။ ခုန်ဒီခမ် တွိုန် ဘော အိတ် နေ ဒဲင် လက်လဝ် အန်၊ ဝီ မာငး ဟာဝ် နာ ကွယ် ဒူအီ အာရာမ် ဂေ တွိုန်။ အန် ဘော ကွယ် ဇမ် ဘာ ဒီ အပ်။ ဘာင် ဒီ ဂေတ့် ဆီငဲ ဖွိုမ် အန် ဘော တူတ့်။