1 ခုန်ဒီခမ် အာယောဆာဖာတ် အီ အိုပ် မိူင် ယူဒါ ဝီ ဝေန့် ဒါခိုယ် ဒါခိုယ် ခဲင် ဟုဝ် အန် အီ ကွယ် ခဲင် မိူင် ယေရူဆာလဲမ်။ 2 ဒါ အီ နပ် ဒီ ယိုဝ် အီ စိူဝ် အာယေဟူ အီ မုး ဂွန် အာဟာနာနီ ဘော တး ဘ်ု ဒီ ရွုး ခုန်ဒီခမ် အာယောဆာဖာတ်။ အန် ဘော ကာလာင် ဒီ အန် တဝ်း၊ “မဲ ခုန်ဒီခမ် တာင်၊ မှဝ် မဲ ထာင် ဟဲ့ မုး နာ မွှိုမ် လွင် ဟာဝ် စွယ် မဲ ဒူအီ တူ မွှိုမ်။း မှဝ် မဲ ထာင် ဟဲ့ ကာအာပ် ဘဲန် အူ ဂိုက် ဒီ ဂေ အီ ဇွင့် ဇဝ်ဖြာ။း ပဲ့ ဟဲ့ ဘူင် မဲ ခုန်ဒီခမ် ပါယ် တီ ဟဲ့ တဲး ဇဝ်ဖြာ ရူ ဒီ မဲ။ 3 မာလဲ၊ ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ ဟဲ့ ယိုဝ် နာ ဘွတ် နာ မွှိုမ် ပီ ဘူင် မဲ။ ခုဝ်၊ မဲ ဟဲ့ ပျာတ့် ဝဲန် ရွင့် နာင် ကာနမ် အေဆူရာ ခဲင် မိူင် ဘော မိူင်။ မဲ မိူဝ် မိုဝ်း နဝ်း ဆီ ဟြေတ့် ဇဝ်ဖြာ။”

4 အာယောဆာဖာတ် ပီ ဘော ကွယ် ခဲင် ဟုဝ် အန် ဒီ မိူင် ယေရူဆာလဲမ် မိူဝ်၊ အန် ယီ ဟာဝ် ဝိန် ဒီလဲ ဒူင် ကွယ် ဂေ ဒူအီ ရဝ် ဒူအီ ကာင် အန်၊ စုး ဒီ မိူင် ဘီရာဆေဘာ ကော ဝီ ဇမ် ဒီ မိူင် ကာဒါယ် အာအေဖာရိမ် အီ မိုဝ်း နွန်။ အန် စ်ု ဒူအီ ဂေ တီ ဝီ တး ကြိုပ် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။ 5 အန် ဘော အုန် တဲး န့ မိုဝ်း ဒါ တာင် အီ ဆုင်ဖျာတ် အာမူ ဒူအီ၊ တဲး ဂေ ကွယ် ခဲင် မိူင် ဒွန် မိူင် အီ မိုဝ်း ရဲင်၊ အီ ကွယ် ခဲင် ကာဒါယ် မိူင် ယူဒါ။ အန် ဘော မာနုဝ် ဂေ တဝ်း၊ 6 “တဲး ဘေ ဆာဒိက် လွင် ပီ ဆုင်ဖျာတ် ဘေ အာမူ အီ။ အာဝ် မုး ဘေ ဘူင် ဒူပ် အာမိင် ဒူအီ။ ဘေ လုဝ် ဘူင် ဒူပ် အာမိင် ဇဝ်ဖြာ။ ဒေါ ဆုင်ဖျာတ် ဘေ အာမူ တီ၊ ဇဝ်ဖြာ မိူဝ် ကွယ် ရိုမ် ဒူပ် ဘေ။ 7 တဲး ဘေ ယီ ရုဝ်ဆေ ဇဝ်ဖြာ ဘော ဆာဒိက် ပီ ဆုင်ဖျာတ် ဘေ။ ခုဝ်၊ ဇဝ်ဖြာ ပီ ကြိုပ် အေ၊ အန် တူ ခမ် အီ ဘူင် တူ ဒူပ် ဒါရာ ဘော မိုဝ်း ဒူင် ရွက့် ဒူင် ဇွင့် ဘော ဒိုဝ်း ဒီ ဟူမ် ခေါဆွင် ပီ ဒွါ အီ ဟဝ်။”

8 ဒဲင် တီ၊ ခဲင် မိူင် ယေရူဆာလဲမ် မိူဝ်၊ အာယောဆာဖာတ် ဟဲ့ အုန် ဒူအီ ခြိုဝ် အာလေဝီ၊ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ အီ မုး ဒါ တာင် အီ အိုပ် ခဲင် ခြိုဝ် ဂေ တဲး ဂေ ဘူင် ဒူပ် ဒါရာ ဇဝ်ဖြာ၊ ဘော ဆုင်ဖျာတ် အာမူ ဂေ ဒူအီ အီ တူ လာယ် ဖြူမ်။ ဒူအီ ဂေ တီ ဘော ကွယ် အိုပ် ခဲင် မိူင် ယေရူဆာလဲမ်။ 9 အန် မိူဝ် ဒမ် ဂေ တဝ်း၊ “တဲး ဘေ ရုဝ်ဆေ ဇဝ်ဖြာ၊ တဲး ဘော နဝ်း ဘော ဖွိုမ် ဘေ ဘူင် ဂါန် ပီ လုဝ် ဘူင် ဘေ။ 10 ဒေါ မိုဝ်း အာမူ ကာတဲ ဒူအီ ရဝ် ဒူအီ ကာင် ဘေ၊ ဘော မုး ဒူအီ အီ ကွယ် ခဲင် မိူင် ဘေ ဘဲန် မိူင် ဘဲန် မိူင်၊ ဘော မုး အာမူ ငဝ်း ယမ် အီ၊ အာမူ လှိုဝ် ဒါရာ ဇဝ်ဖြာ၊ အာမူ ဘူင် လုတ့် ဒါရာ ဇဝ်ဖြာ၊ အာမူ လွင် ပီ ဒမ် ဇဝ်ဖြာ ဘော လွင် ဟိတ် ဘေ။ ဆေ ဂေ ဝီ တး ဒါင် ဇမ် ဘေ၊ ဘေ လုဝ် ဒမ် ဆာဒိက် ဆီချာ ဒီ ဂေ၊ ကွဲ့ တဲး ဂေ လုတ့် ဇဝ်ဖြာ။ ကွဲ့ တဲး အန် ဇဝ် လုဝ် ဝီ ရူ စာဝ် ဒီ ဘေ ဘော ဒီ ဘီနွင် ဝေါဝဲ ဘေ။ ဆေ ဘေ ဘူင် ပါယ် တီ၊ န့ တူ ဘဲန် မှာပ် ဒီ ဘေ။

11 ဆေ န့ မုး အာမူ ဒွန် မျုဝ် လွင် ဇဝ်ဖြာ၊ အာမာရီယာ အီ မုး ဒါ တာင် အီ လှူ ဒီ ဇဝ်ဖြာ၊ အန် ဒီ အိုပ် တူတ့် လွင် အန် တီ။ ဆေ န့ မုး အာမူ ဒွန် မျုဝ် လွင် ခုန်ဒီခမ်၊ အာဇေဘာဒီ အီ မုး ဂွန် အာဆာမာန် ဘော မုး ဒါ တာင် အီ အိုပ် ခဲင် ခြိုဝ် အာယူဒါ၊ အန် ဒီ အိုပ် တူတ့် လွင် အန် တီ ဒွန် မျုဝ်။ ဂေ ဒူအီ အာမျုဝ် အာလေဝီ ဂေ ဒီ စွယ် ဘေ။ တဲး ဘေ ယ ဆုင်ဖျာတ် ပါယ် တီ။ ဇဝ်ဖြာ မိူဝ် ဒီ ကွယ် ရိုမ် ဒူပ် ဂေ အီ ဘူင် နာ ဘွတ် နာ မွှိုမ်။”