1 ဝါယ် တီ အာဝ် ဘော လှေန့် ဒူအီ မုဝ်အာပ်၊ ဒူအီ အမ်မူန် ဘော ဒူအီ မောနီ မင် အီ၊ ဂေ ဝီ ဟာဝ် ကာဂုဝ်း ဒီ အာယောဆာဖာတ်။

2 န့ မိုဝ်း ဂေ ဒူအီ မင် အီ တး ကာလာင် ဒီ ခုန်ဒီခမ် အာယောဆာဖာတ် တဝ်း၊ “ဟဲ့ မိုဝ်း ဒါ ဆိုက် အီ ကိူန် ကာဆဝ် ဟဲ့ တး နာ မိူင် အေဒူမ်။ ဂေ ဒီ တး ကာဂုဝ်း ဒီ မဲ။ ဂေ မိူဝ် ဟဲ့ ဟွတ့် တး ဇမ် ခူပ် ဘာင် အိုမ် နမ်မုက်ဆာရာ ဘ့လာက် နာ ဒွယ်။ ဂေ မိူဝ် ဟဲ့ ဟွတ့် တး ကွယ် ခဲင် မိူင် ဟာဆူန်ထာမာ။” မိူင် တီ စိူဝ် ဘော အေန်ကေဒီ။

3 ပါယ် တီ အာယောဆာဖာတ် ဟဲ့ ယုဝ် ကာဆဝ်။ အန် မိူဝ် တဝ်း ဒီ ဒီမွှတ် ဇဝ်ဖြာ ဘော စ်ု ဂေ ဒူအီ ဘော မိူင် ယိူန် ပီ ဒီ ဟူမ်။ 4 ဂေ ဒူအီ အာယူဒါ မိူဝ် လေး ခဲင် မိူင် ဂေ၊ ဝီ ဟာဝ် မိူင် ယေရူဆာလဲမ်၊ တဲး ဂေ ပွိုန် ဒီ ဒီမွှတ် ဇဝ်ဖြာ၊ တဲး ဂေ နပ် ဇဝ်ဖြာ ဒီ ပါယ် မှဝ် ဒီ စွယ် ဂေ။

5 ဂေ ဒူအီ အာယူဒါ ဘော ဂေ ဒူအီ ခဲင် မိူင် ယေရူဆာလဲမ် ဂေ ဘော တး ကာဇု တူတ့် ခဲင် ဟုဝ် ဇဝ်ဖြာ။ ဂေ ကွယ် ဒီ အာတ့် ဝဲင် ကာမာယ်။ ခုန်ဒီခမ် အာယောဆာဖာတ် မိူဝ် စွင့် ကာတဲ ဂေ ဒူအီ ကိူန် တီ၊ ဝီ ဆာခိုဝ် ဒီ ဇဝ်ဖြာ။ 6 အန် တဝ်း၊ “အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဂုန့် ဒင် ယေ၊ မဲ မုး ဇဝ်ဖြာ အီ ကွယ် ခဲင် ဂါင်ဟြာဝ်။ မဲ ဘော အိုပ် မာန် မိူင် ဒူအီ ဒွန် ဇိုဝ် ဒွန် ခြိုဝ် ဒဲင် ကာဒါယ်။ မဲ ဇဝ် မိူဝ် မိုဝ်း အာဖုင် ဒင်ခုဝ် တာင်။ န့ မိူဝ် တူ မိုဝ်း အာဆေ အီ ပွိုန် ကာခဲန့် ဒီ မဲ ဇဝ်။ 7 မဲ ဘော မုး ဇဝ်ဖြာ ပီ ကြိုပ် ယေ။ ဒေါ ဒိုဝ်း တး မဲ ဂေ ဒူအီ အီဆာရေလ၊ တဲး ဂေ တး ကွယ် ခဲင် မိူင် နီ၊ မဲ ဇဝ် မိူဝ် ဟဲ့ ဟုဝ် တဝ် ဂေ ဒူအီ အီ ကွယ် ခဲင် မိူင် နီ၊ ဒိုဝ်း ကာဒါယ် ဂေ တီ၊ ဝီ အာပ် ဒွါ ဒီ ဂေ လှုက်လှာန် အာဘြာဟမ် အီ မုး ဂိုက် မဲ ဇဝ်၊ တဲး န့ ဘဲန် ဒူင် ကွယ် ဂေ ဆေဆေ။ 8 ဂေ ဟဲ့ ဟွတ့် ကွယ် ခဲင် မိူင် တီ။ ဂေ မိူဝ် ဝီ ဆမ် ဟုဝ် မဲ ဇဝ်ဖြာ၊ တဲး န့ ဘဲန် ဒူင် ဒီ ကြိုပ် ဂေ ဒီ မဲ ဇဝ်ဖြာ။ 9 ဂေ မိူဝ် ဟဲ့ ကာလာင် အုန် တဝ်း၊ ‘ဆေ န့ မိုဝ်း အာဖေ အာရေ တး ဒီ ယေ၊ ဘော မုး ဒါ ဆိုက် တး ကာဂုဝ်း ဒီ ယေ၊ ဘော မုး ဒုက် အေတ့် ပီ ဒီ ဟူမ်၊ ယေ ဒီ ကွယ် နာ အာတ့် ဟုဝ် ဇဝ်ဖြာ အီ မုး ဒူင် ဒီ ကြိုပ် ယေ ဒီ မဲ ဇဝ်ဖြာ။ ယေ ဒီ ဆာခိုဝ် ကာလာင် လွင် ဒုက် ညှာပ် ယေ တီ။ မဲ ဇဝ် မိူဝ် ဒီ ဘော ထူမ် ဂြုဝ်း ပီ ဆာခိုဝ် ယေ ဘော ဝီ စွယ် တဲး ယေ လွတ်။’

10 ဒေါ တီ နီ ဂေ ဒူအီ အမ်မူန်၊ ဒူအီ မုဝ်အာပ် ဘော ဒူအီ အီ ကွယ် ဒီ နွန် ဆေအီ၊ ဂေ ဟဲ့ တး၊ တဝ်း ဒီ ကာဂုဝ်း ဒီ ယေ။ ဒေါ မုး စုဝ် ဂေ ဂုန့် ဒင် ယေ၊ ဒေါ လေး ဂေ ခဲင် မိူင် အဲဂိုပ် တွိုန်၊ မဲ ဇဝ် တူ တဲး ဂေ လိုပ် ခဲင် မိူင် ဂေ တီ။ မဲ ဇဝ် ဟဲ့ တဲး ဂေ ဂုန့် ဒင် ယေ ဝး မိူင် ဂေ တီ၊ တူ တဲး ဂေ ပျာတ့် ဒူအီ ဂေ တီ။ 11 တဲး မဲ ဝီ ယွတ် ပီ ဝီ ဘူင် ဝျီ့ ဂေ ဒီ ယေ ဒေါ တီ နီ။ န့ မုး ဂေ ဝီ တး တဝ်း ဒီ ညွန် လေး ယေ ခဲင် မိူင် ပဲ့ ဟဲ့ အာပ် မဲ ဇဝ်၊ တဲး န့ ဘဲန် ခါဂုန် ဒီ ယေ။ 12 မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ ယေ မှာန့် တဲး မဲ ဆုင်ဖျာတ် ဒမ် မှာပ် ဒီ ဂေ။ ခုဝ်၊ ဆေ န့ မုး မီ ခဲ့ ယေ၊ ယေ တူ နပ် ဒီ ပဲ ဒီ ခြဲ၊ ပဲ ဒီ ရဲ ဒါ ဆိုက် အီ ဟဲ့ ကိူန် ကာဆဝ် အီ တဝ်း ဒီ တး ကာဂုဝ်း ဒီ ယေ တီ။ ယေ အာဝ် ဟူ နပ် ပီ ဒီ ပါယ်၊ ယေ နှဝ့် န့ဒဝ့် မီ မဲ ဇဝ်ဖြာ ဒီ စွယ် ယေ။”

13 ဒေါ အန် တီ ခဲ့ ကွယ် ဂေ ဒူအီ အာယူဒါ ဘောကာဂ့လျီတ် ဘော အီဘိုန့် ဂေ ဂွန်၊ ဂေ ကွယ် တူတ့် နာ အာတ့် ဇဝ်ဖြာ။

14 ပါယ် တီ န့ ဘော မိုဝ်း နဝ်း ဖွိုမ် ဇဝ်ဖြာ တး လူင် ဒီ အာယာဟာဇေလာ။ အန် ဘော မုး ဂွန် အာဆာခါရာ။ အာဆာခါရာ ဘော မုး ဂွန် အာဘီနာယာ။ အာဘီနာယာ ဘော မုး ဂွန် အာယေယီလာ။ အာယေယီလာ ဘော မုး ဂွန် အာမာထာနီ။ အာမာထာနီ ဘော မုး ခြိုဝ် အာလေဝီ အီ မုး လှုက်လှာန် အာဆာပ်။ အာယာဟာဇေလာ တီ ဘော စွင့် ကာတဲ ဂေ ဒူအီ ကိူန်။

15 အန် တဝ်း၊ “အိုယ် မဲ ခုန်ဒီခမ် တာင် ဘော ဘေ ဒူအီ အာယူဒါ ဘော ဘေ ဒူအီ ခဲင် မိူင် ယေရူဆာလဲမ် ဘောကာဂ့လျီတ်၊ တဲး ဘေ ထူမ်။ ဇဝ်ဖြာ ဟဲ့ တဝ်း၊ ‘အာဝ် လုဝ် ယုဝ်၊ အာဝ် လုဝ် နဝ်း တျီ့ ကူပ် ဖိုင် ဒါ ဆိုက် အီ ကိူန် ဂေ တီ။ အာဝ် မုး ဘေ အီ ဒီ လာယ် ကာဂုဝ်း ဒီ ဂေ။ န့ မုး ဇဝ်ဖြာ။ 16 ခဲညှာ တဲး ဘေ လေး ဟာဝ် ဒူင် ကွယ် ဂေ။ ဂေ ဒီ ဘော တး ဟုဝ့် ဒူပ် န့တေန့် ဒီ ငွတ် ဒူင် စိူဝ် ဇီဇာ။ ဘေ ဒီ ဘော ကာတုန့် ဂေ ဒီ ကာတဲ ငွတ် အီ ဟာဝ် ဆိူဝ် ခဲင် ပြဲ ကာဟဝ်း ဒူင် စိူဝ် ယေရူလာ။ 17 ဘေ တူ လုဝ် ကာဂုဝ်း ဒီ ဂေ။ တဲး ဘေ ဒွန် အီ ကွယ် ဒူင် ကွယ် ဘေ ဘော ဘ်ု ဒီ ယွတ်။ ဘေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ်၊ ဘေ ဒီ ဘော ယိုဝ် ပီ ပါယ် ဇဝ်ဖြာ ဒီ ပဲ ဒီ အွင် ဒူအီ ဂေ တီ။ ပါယ် တီ ကွဲ့ တဲး ဘေ ယုဝ်။ ကွဲ့ တဲး နဝ်း ဘေ လိုဝ်။ ခဲညှာ တဲး ဘေ ဟာဝ် ကာတုန့် ဂေ။ ဇဝ်ဖြာ မိူဝ် ဒီ ကွယ် ရိုမ် ဒူပ် ဘေ။’”

18 ဟဲ့ ဟွတ့် ပါယ် တီ ခုန်ဒီခမ် အာယောဆာဖာတ် မိူဝ် ခြိုပ်ခြဝ် မုတ် ဂိုပ် ဒီ ကာဒါယ်၊ ကြိုပ် ဇဝ်ဖြာ။ ဂေ ဒူအီ ကိူန် မိူဝ် ဝီ မုတ် ဂိုပ် ဒီ ကာဒါယ် ပီ အန်။ 19 ဒူအီ အာမျုဝ် အာခုဝ်ဟာတ် ဘော ဒူအီ အာမျုဝ် အာခုဝ်ရာ အီ မုး ဒူအီ ခြိုဝ် အာလေဝီ၊ ဂေ မိူဝ် ကာဖြူမ် ဒီ ယိတ့် စွင့်၊ ဒတ် တာင်၊ အိူပ် မျုက် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။

20 ပါ ခဲညှာ ဆိန့် ဆိန့်ဝး စေဝ်၊ ဂေ မိူဝ် ယိတ့် ဟာဝ် ခဲင် ပြဲ ကာဟဝ်း ဒူင် စိူဝ် ဒေကော။ ဒေါ ကာစုး ဂေ ဒီ ဟာဝ်၊ ခုန်ဒီခမ် အာယောဆာဖာတ် မိူဝ် ဝီ တဝ်း၊ “အိုယ် ဘေ ဒူအီ အာယူဒါ ဘော ဒူအီ မိူင် ယေရူဆာလဲမ်၊ တဲး ဘေ ညှိုမ် ဘိုင် ဇဝ်ဖြာ ပီ ကြိုပ် ဘေ။ ဘေ ဒီ ဘော ပွိုန် ဒီ ကွယ် မန် ဆီချာ။ တဲး ဘေ ညှိုမ် ဂြုဝ်း ပီ ကာလာင် ဒါ အီ ဘျာန် ဂြုဝ်း ဇဝ်ဖြာ ဒီ ဘေ။ န့ ဒီ တဲး ဘေ အွင်။” 21 ဝါယ် ဟဲ့ ဟွတ့် ကာမွုန် ဆင်ချာင် ခုန်ဒီခမ် အာယောဆာဖာတ် ဒီ ဂေ ဒူအီ ကိူန် တီ၊ အန် ဝီ ကာလာင် ဒီ ဂေ ဒူအီ အီ တဝ်း မှုဝ် မင် အီ၊ တဲး ဂေ အိူပ် မျုက် ဇဝ်ဖြာ၊ ကာလာင် ဘော ခဲ့ တာင် အာဖုင် ဒင်ခုဝ် ဇဝ်ဖြာ ဘော ခဲ့ ဆီငါ ဘွတ် အန် ဇဝ်။ ဒေါ ယဲတ့် ဂေ ဒါ ဆိုက်၊ ဂေ ဘော တဝ်း၊ “တဲး အေ ဒါင် ဂုင် ဂေဇူ ဒီ ဇဝ်ဖြာ။ ခုဝ်၊ နဝ်း ရွက့် ကာဝေ အန် ဇဝ် ကွယ် ဆေဆေ။”

22 ဒေါ တဝ်း ဂေ မှုဝ် ဘော အိူပ် ဘော ကာလာင် ဂုင် ဂေဇူ ဒီ ဇဝ်ဖြာ တီ၊ ဇဝ်ဖြာ မိူဝ် ဘူင် တဲး ဒါ ဆိုက် ပေါ အူ ဖိုင် ဝီ တး နာ ပန်၊ ဝီ ကာဂုဝ်း ဒီ ဒူအီ အမ်မူန်၊ ဒူအီ မုဝ်အာပ် ဘော ဂေ ဒူအီ အီ ကွယ် ဒီ နွန် ဆေအီ၊ အီ ဟဲ့ တဝ်း ဒီ တး ကာဂုဝ်း ဒီ ဒူအီ အာယူဒါ။ ပါယ် တီ ဇဝ်ဖြာ မိူဝ် ဘူင် တဲး ဂေ စှိုမ် တူတ့်။ 23 ဒါ ဆိုက် ဒူအီ အမ်မူန် ဘော ဒါ ဆိုက် ဒူအီ မုဝ်အာပ်၊ ဂေ ဟဲ့ ဝီ ကာဖြူမ် ဒီ ကာဂုဝ်း ဒီ ဒါ ဆိုက် အီ တး ဒီ နွန် ဆေအီ၊ တဲး ဂေ ကော ယမ် တူတ့်။ ဝါယ် ဟဲ့ ဟွတ့် ငဝ်း ယမ် တူတ့် ဂေ ဒူအီ အာမျုဝ် ဆေအီ တီ၊ ဂေ ပီ ဝီ လာယ် ကာဂုဝ်း လာယ် ကာငဝ်း ရာင် ဂေ၊ တဲး ဂေ ကော ယမ် တူတ့် ဒွန် အီ။

24 ဒေါ ဝီ တး ဇမ် ဂေ ဒူအီ အာယူဒါ ဒူင် ပွိုန် ဝီ ယွတ် လူင် နာ ပြဲ ကာဟဝ်း တွိုန်၊ ဂေ ဝီ ယွတ် ရန်ဆူ ဂေ တီ၊ ဝီ ယိုဝ် မီ ဒုဝ် ယမ် ဟဲ့ ကိူန် ကာဆဝ်။ အာဝ် မိုဝ်း အီ လွတ် ယမ် ခေါ အူ ဝီ။ 25 အာယောဆာဖာတ် ဂေ ဒါ ဆိုက် အန်၊ ဂေ မိူဝ် ဝီ ဟာဝ် ဒိုဝ်း ကြုဝ်ကြာမ် ဂေ။ ဂေ ဘော ယိုဝ် ဘော ဒုဝ် ဆတ်ဒါဝါ ဟဲ့ ကိူန် ကာဆဝ်။ ဟဲ့ မိုဝ်း ဘော ပီ ဒီ ဟူမ် ပီ ဒီ တာ၊ မိုဝ်း ဘော ကြုဝ်ကြာမ် အီ မိုဝ်း ဒီငဝ်း ဒီခန် အီ ကိူန် ကာဆဝ်။ ဂေ ကော ဟူ ပဲ ဒီ ဂွတ် ဟာဝ် တူတ့်။ ဂေ မိူဝ် ဒိုဝ်း အုန်၊ ဂဲပ် အုန် ကြုဝ်ကြာမ် ဂေ တီ၊ န့ ကော နုဝ့် အူယ် ဆီငဲ။ 26 န့ ဘော ဇမ် ဆီငဲ မ့ဖွုန်၊ ဂေ မိူဝ် ဝီ တး ကွယ် ကာဇု ခဲင် ဒီလယ့် ဘီရာခါ၊ ဝီ အိူပ် မျုက် ဇဝ်ဖြာ ကူပ် ပဲ့ ဟဲ့ ဘူင် အန်။ ခုဝ် အန် တီ၊ ဒီလယ့် တီ ဂေ ဘော ဒါင် တဲး န့ စိူဝ် ဒီလယ့် ဘီရာခါ ကော ဇမ် အာတိုဝ် နီ။^a

27 ကူပ် ဟဲ့ တဲး ဇဝ်ဖြာ ဂေ အွင် ရန်ဆူ ဂေ တီ၊ အာယောဆာဖာတ် မိူဝ် ဝီ ယဲတ့် ဝေန့် ဂေ ဒါ ဆိုက် အန် ဒီ မိူင် ယေရူဆာလဲမ်။ ဂေ ဘော ခူယ် ဒါခိုယ် ကာဆဝ်။ 28 ဒေါ တး ဇမ် ဂေ ခဲင် မိူင် တီ၊ ဂေ မိူဝ် ဘုတ် ဝဝ်၊ ဘး ဒိင် ဒီရဝ် ဘော ဒွယ် အီ ဟမ် ဒါခိုယ် ဘဲန် မျုဝ် ဘဲန် မျုဝ်၊ ဟာဝ် ဒီ ဟုဝ် ဇဝ်ဖြာ။

29 ဒူအီ အာမျုဝ် ဟဝ် ဒွန် မာန် ဒွန် မိူင် အီ ဟဲ့ ယိုဝ် လွင် ဇဝ်ဖြာ ဟဲ့ ပျာတ့် ဝဲန် ရန်ဆူ ဒူအီ အီဆာရေလ ဂေ တီ၊ ဂေ ဘော ယုဝ် ကာဆဝ် ဇဝ်ဖြာ။ 30 ပါယ် တီ အာယောဆာဖာတ် ဘော ပွိုန် ဒီ အိုပ် ဒါခိုယ် ဒါခိုယ် မာန် မိူင် အန်။ ခုဝ်၊ ဇဝ်ဖြာ ဟဲ့ ဘူင် တဲး န့ ယေန် တူတ့် ဒွန် ဘ့လာက်။

31 ဒေါ ဟဲ့ နုဝ့် အာဆာက် အာယောဆာဖာတ် အူယ် ဂိုဝ် ဒီ ဖန် ဆီနမ်၊ အန် ဟဲ့ ဘဲန် ခုန်ဒီခမ် အိုပ် မိူင် ယူဒါ။ အန် ကွယ် ခဲင် မိူင် ယေရူဆာလဲမ်၊ အိုပ် မာန် မိူင် အာဒါ အာ ဂိုဝ် ဒီ ဖန် ဆီနမ်။ မာ အန် စိူဝ် နာင် အေစူဖ ဘော မုး ဂွန် အီဘိုန့် အာဆီလဝီ။ 32 အန် မိူဝ် ဘူင် ဒွန် မျုဝ် တဲး န့ ပီ ပီ ဘူင် ဂုန့် အန် အီ စိူဝ် အာဆာ တွိုန်။ အန် မိူဝ် ဘူင် အီ ဘွတ် အီ မွှိုမ်၊ တဲး န့ လဝ့် နဝ်း ဇဝ်ဖြာ။ 33 မာလဲ၊ အန် ယီ တူ ပျာတ့် ဝဲန် ဒူင် ကြိုပ် ဂေ ဒူင် စာ ဒွန် ပ့လုဝ့်။ ဂေ ဒူအီ ပီ အိုပ် အန် တူ မိုဝ်း နဝ်း ဆီ ညှိုမ် ဆီချာ ဇဝ်ဖြာ ပီ ကြိုပ် ဂုန့် ဒင် ဂေ။

34 လွင် ပဲ့ ဟဲ့ ဘူင် အာယောဆာဖာတ် စုး ဆိန့် ဒေါ ဂုဝ် ကော ဇမ် ကာဒဲ့ ဟဲ့ ဒဲမ် အုန် ခဲင် ဘပ် ပီ ဒဲမ် အာယေဟူ အီ မုး ဂွန် အာဟာနာနီ။ န့ ဟဲ့ ဒဲမ် အုန် ဘော ခဲင် ဘပ် ခုန်ဒီခမ် အီ အိုပ် မိူင် အီဆာရေလ။

35 ဝါယ် အန် တီ အာယောဆာဖာတ် ဘော ဝီ လာယ် ဘဲန် ဂိုက် ကာလဝ့် ဒီ ခုန်ဒီခမ် အာဟာဇီယာ အီ အိုပ် မိူင် အီဆာရေလ အီ ဘူင် နာ ဟာယ် နာ မိူက်။ 36 ဂါယ် ဘော လာယ် ဖြူမ် ဒီ ဘူင် ရိုဝ် ဆင်ဖုဝ်၊ တဲး ဂေ ပွိုန် ဒီ ကာလုဝ်း အိုမ် နမ်မုက်ဆာရာ။ ဂေ ဘူင် ရိုဝ် ဆင်ဖုဝ် တီ ဒီ ဒူင် စိူဝ် အေစာယူန်ကာဘာ။ 37 မာလဲ၊ အာအေလီအေဇာ အီ မုး ဂွန် အာတောတာဝါဟူ အီ တး မိူင် မာရေဆာ၊ အန် ဘျာန် ဂြုဝ်း ဇဝ်ဖြာ။ အန် ဝီ ကာလာင် ဒီ အာယောဆာဖာတ် တဝ်း၊ “ကူပ် ဟဲ့ ဝီ လာယ် ကာဂိုက် မဲ ဒီ အာဟာဇီယာ၊ ဇဝ်ဖြာ ဒီ ပျာတ့် ဝဲန် တူတ့် ပဲ့ ဟဲ့ ဘူင် မဲ ဒွန် မျုဝ်။” ခုဝ် အန် တီ၊ ရိုဝ် ဆင်ဖုဝ် ပဲ့ ဟဲ့ ဘူင် ဂေ ဘော ကာပျာတ့် လိုဝ် တူတ့်၊ အာဝ် ဟူ ပွိုန် ပဝ့် ဟာဝ် နာ မှဝ်။