အာယောဆာဖာတ် ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် ဒုဝ် ယမ် အန် ဒူပ် ဒါ ဒါ အန် ခဲင် မိူင် အာဒါဝိတ် တွိုန်။ ဂွန် အီမာယ် အန် အီ စိူဝ် အာယေဟုဝ်ရမ် ဘော ဝီ ပ့လု အန်၊ ဝီ အိုပ် မာန် မိူင် ဂုန့် အန်။

2 ဝါ အာယေဟုဝ်ရမ် အီ မုး ဂွန် ခုန်ဒီခမ် အာယောဆာဖာတ်၊ ဂေ ဘော စိူဝ် အာဇာရီယာ၊ အာယေဟီလာ၊ အာစာခါရီယာ၊ အာစာရီဟူ၊ အာမီခီလာ ဘော အာဆေဖာဒီ။ ဂေ ဘောကာဂ့လျီတ် မုး တူတ့် ဂွန် အာယောဆာဖာတ် အီ မုး ခုန်ဒီခမ် အီ အိုပ် ဒူအီ အီဆာရေလ ခဲင် မိူင် ယူဒါ။ 3 ဂုန့် ဂေ မိူဝ် ဟဲ့ ကာဆာင် ဒွါ ခေါဆွင် ဒီ ဂေ ဘော ရွိုန် ဘော ခြိဝ် ဘော ကြုဝ်ကြာမ် အီ ငဝ်း တာင် ကာဆဝ်။ အန် ဘော တဲး ဂေ အိုပ် မိူင် အီ မိုဝ်း ရဲင် အီ ကွယ် ခဲင် ကာဒါယ် မိူင် ယူဒါ။ အီ မုး အာယေဟုဝ်ရမ်၊ ကူပ် မုး အန် ဂွန် ဂိန့်၊ အာယောဆာဖာတ် ဝီ တဲး အန် ဘဲန် ခုန်ဒီခမ် ဝီ ပ့လု အန်။

4 အာယေဟုဝ်ရမ် ဟဲ့ ဟွတ့် ပွိုန် ဒီ အိုပ် ဆီချာ မာန် မိူင် အန်၊ အန် ဝီ ငဝ်း ဝဲန် ဝါ အန် ဒွန် အီ ဒူပ် ဂေ ဒါ ကာညာ မင် အီ အီ ယဲတ့် ဂေ ဒူအီ အီဆာရေလ၊ တဲး ဂေ ယမ် ဒီ မာပွါ့ လာင်။ 5 အာယေဟုဝ်ရမ် ဟဲ့ ဘဲန် ခုန်ဒီခမ် ဒေါ နုဝ့် အာဆာက် အန် အူယ် ဂိုဝ် ဒီ အာ ဆီနမ်။ အန် မိူဝ် အိုပ် ကွယ် ခဲင် မိူင် ယေရူဆာလဲမ် အာဒါ ဒါ ဆီနမ်။ 6 အန် မိူဝ် ဘူင် နာ ဟာယ် နာ မိူက် ပီ ပဲ့ ဟဲ့ ဘူင် ခုန်ဒီခမ် အာဟပ် ဘော ပဲ့ ဟဲ့ ဘူင် ဂေ ခုန်ဒီခမ် အီ အိုပ် မိူင် အီဆာရေလ။ အန် ဘူင် ပါယ် တီ ကူပ် ဟဲ့ ခတ် ဒိုဝ်း အန် ဂွန် ဒီဘျာ ခုန်ဒီခမ် အာဟပ်။ အန် မိူဝ် ဘူင် အီ တူ မွှိုမ်၊ အီ တူ လဝ့် နဝ်း ဇဝ်ဖြာ။ 7 ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ တူ မိုဝ်း နဝ်း ဆီ ပျာတ့် ဝဲန် ခြိုဝ် ခုန်ဒီခမ် အာဒါဝိတ် ကူပ် ဟဲ့ ဒွိုမ် ကာဆဲန့် အန် ဒီ ခုန်ဒီခမ် အာဒါဝိတ်။ အန် ဇဝ် ဟဲ့ ကာဆဲန့် ဒီ တဲး လှုက်လှာန် အာဒါဝိတ် အိုပ် မိူင် ဆေဆေ၊ တဲး န့ ပီ ငဝ် အွမ် အီ ဘ့လာင် ဆေဆေ။

8 ဒေါ မုး စုဝ် ဘာန် အာယေဟုဝ်ရမ် တီ၊ ဒူအီ ခဲင် မိူင် အေဒူမ် ဝီ ကာဘး ဒီ ခုန်ဒီခမ် ယူဒါ။ ဂေ ဝီ စုဝ့် မျုက် ဒူအီ အူ ဝီ၊ တဲး အန် ဘဲန် ခုန်ဒီခမ် ဂေ။ 9 ပါယ် တီ အာယေဟုဝ်ရမ် ဘော ဂေ ဒါ တာင် အီ ယဲတ့် ဒါ ဆိုက် အန် ဘော လက်လဝ် အန် ဘောကာဂ့လျီတ် ဟုဝ့် ကာဂုဝ်း ဒီ ဒူအီ မိူင် အေဒူမ်။ ဒါ ဆိုက် ဒူအီ အေဒူမ် ဟဲ့ တး ဝဲင် ရူပ် အာယေဟုဝ်ရမ် ဘော ဂေ ဒါ တာင် အီ အိုပ် လက်လဝ် အန်။ မာလဲ၊ ဂေ ဝီ ကာဂုဝ်း ခဲင် မှိုဝ်၊ တဲး ဂေ ပွိုန် ဒီ တဝ် လေး။ 10 ဒူအီ မိူင် အေဒူမ် ဘော ကာဘး ဒီ ခုန်ဒီခမ် ဒူအီ အာယူဒါ ကော ဇမ် ဒေါ တီ နီ။ ဒေါ အန် တီ ဒူအီ မိူင် လီပါနာ မိူဝ် ဝီ ကာဂုဝ်း ဒီ အာယေဟုဝ်ရမ် ကူပ် ဟဲ့ ဝဲန် အန် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် အန်။ 11 အန် ဝီ ဘူင် ဒူင် စာ၊ ဒူင် ဒီ ကြိုပ် ဇဝ် ပေါ ကာဒင် ဒဲင် နွန် ခဲင် ကာဒါယ် မိူင် ယူဒါ တွိုန်။ အန် ဝီ ယဲတ့် ဒူအီ ခဲင် မိူင် ယေရူဆာလဲမ် ဘူင် လုတ့် ဇဝ်ဖြာ၊ တဲး န့ ပီ ပီ ဘူင် ယာ မာလမ်။ အန် ဘော ယဲတ့် ဂေ ဒူအီ အာယူဒါ တဲး ဂေ ဘူင် ကာလိုပ်။

12 ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအေလီယာ ဝီ ဒဲမ် ပဲ့ တိုယ် ဒီ အာယေဟုဝ်ရမ် တဝ်း၊ “ဇဝ်ဖြာ ပီ ကြိုပ် ဒါ မဲ အီ မုး အာဒါဝိတ် တွိုန် တဝ်း၊ မဲ တူ ဘူင် ဒူပ် ပီ ပီ ဘူင် ဂုန့် မဲ အီ မုး ခုန်ဒီခမ် အာယောဆာဖာတ် ဘော ဒါ မဲ အီ မုး ခုန်ဒီခမ် အာဆာ တွိုန်။ 13 မဲ ယီ ဝီ ဘူင် ဒူပ် ပီ ဘူင် ဂေ ခုန်ဒီခမ် မိူင် အီဆာရေလ။ မဲ ဟဲ့ ဝီ ယဲတ့် ဒူအီ အာယူဒါ ဘော ဒူအီ မိူင် ယေရူဆာလဲမ်၊ ကွဲ့ တဲး ဂေ မိုဝ်း နဝ်း ဆိူဝ် နဝ်း မှာန် ဒီ ဇဝ်ဖြာ။ မဲ ဘူင် တဲး န့ ပီ ပီ ဘူင် အာဟပ် ဘော ဒူအီ အန်။ မဲ မိူဝ် ဟဲ့ ငဝ်း ယမ် ဝါ အာရာင် မဲ အီ မုး ဂွန် ဂုန့် မဲ၊ အီ ဟဲ့ မွှိုမ် လွှိုမ် မဲ။ 14 ခုဝ် အန် တီ၊ ဇဝ်ဖြာ ဒီ ဒွါ ဒုက် အီ တာင် ကာဆဝ် ဒီ ဂေ ဒူအီ ပီ အိုပ် မဲ ဘော ဂွန် မဲ၊ ဒီ ဂေ အီဘိုန့် မဲ ဘော ဒီ ကြုဝ်ကြာမ် မဲ ဒွန် မျုဝ်။ 15 အီ မုး ဒုဝ် မဲ၊ မဲ လုဝ် ခမ် ဒုက် ဒီ ဆဝ် ရောဂါ အီ ဘဲန် ဝတ့် ဆဝ် ဒီ မဲ။ ဆဝ် မဲ တီ န့ ဒီ ကြဲ ဒီ ဆဝ် ကာဆဝ်၊ တဲး န့ ကော ဇမ် ဆီငဲ ဒီ လေး ညွင့် ဝတ့် မဲ။”

16 ဇဝ်ဖြာ မိူဝ် ဝီ ကာဆုး ဒူအီ ဖီလီထီ ဘော ဒူအီ အာရာပ် အီ ကွယ် ကာတတ် မိူင် ကူဆာ၊ တဲး ဂေ ဘဲန် ရန်ဆူ အာယေဟုဝ်ရမ်။ 17 ဒူအီ ဂေ တီ ဘော ကာဂုဝ်း ဘော ပျာတ့် မိူင် ယူဒါ။ ဂေ ဘော လိုပ် ခဲင် မိူင် ယူဒါ ဘော ဒိုဝ်း ဟာဝ် ကြုဝ်ကြာမ် အီ ကွယ် ခဲင် ဟုဝ် ခုန်ဒီခမ်၊ ဒိုဝ်း ဟာဝ် ဘော ဂွန် အန် ဂေ အီဘိုန့် အန် ဘောကာဂ့လျီတ်။ န့ ဂိတ် မီ ဂွန် တျီ့ အန် အူ ဝီ အီ စိူဝ် အာယောခတ်။ ဒဲင် တီ အာဝ် ဟူ မိုဝ်း ခေါ အူ ဝီ။

18 ဝါယ် ဟဲ့ ဟွတ့် ဘဲန် တူတ့် ဇိုဝ် တီ၊ ဇဝ်ဖြာ ဝီ ဒမ် မှာပ် ဒီ အာယေဟုဝ်ရမ်၊ ဝီ တဲး အန် မိုဝ်း ဝတ့် ဆဝ် အီ တူ နပ် ဒီ ဟြာယ်။ 19 န့ ကော ရိန် ဒီ နုဝ့် အာ ဆီနမ်၊ ဆဝ် ရောဂါ အန် တီ ဘော ဝဲ ဆဝ် ကာဆဝ်၊ တဲး ညွင့် ဝတ့် အန် ကော လေး။ အန် ဘော ခမ် ဒုက် တာင် တီ ဘော ယမ်။ မှာယ် အန် ဂေ ဒူအီ ပီ အိုပ် အန်၊ ဂေ ယီ တူ ဘုတ် ငဝ်၊ တဲး န့ ဘျ ဂေ ရုဝ်ဆေ အန်။ န့ တူ ပီ ပီ ဒွိုမ် ဘူင် ဂေ ဒီ ဂုန့် ဒါ အန်။

20 ဒေါ ဘဲန် အာယေဟုဝ်ရမ် ခုန်ဒီခမ်၊ အာဆာက် အန် ဟဲ့ ပွိုန် အူယ် ဂိုဝ် ဒီ အာ ဆီနမ်။ အန် ဘော အိုပ် ခဲင် မိူင် ယေရူဆာလဲမ် အာဒါ ဒါ ဆီနမ်။ အန် ဘော ယမ် ဟာဝ် မိူဝ်၊ အာဝ် မိုဝ်း အာဆေ အီ လှယ့် အန် ခေါ အူ ဝီ။ ဂေ ဒိပ် ဒုဝ် ယမ် အန် ခဲင် ဘာရေဝ် ခဲင် မိူင် အာဒါဝိတ်။ ဂေ ယီ တူ ဒိပ် ခဲင် ဘာရေဝ် ခုန်ဒီခမ်။