1 ဂေ ဒူအီ အာမျုဝ် အာရာပ် ဟဲ့ ယဲတ့် အီ ဟဝ် တး ကာဂုဝ်း ဒီ မိူင် ယူဒါ၊ ဂေ ဟဲ့ ငဝ်း ယမ် တူတ့် ဂွန် အာယေဟုဝ်ရမ်။ ဟဲ့ ဂိတ် မီ ဂွန် တျီ့ အန် အီ စိူဝ် အာဟာဇီယာ။^a ခုဝ်၊ ဂေ ဒူအီ မိူင် ယေရူဆာလဲမ် ဘော ဝီ ဒိုဝ်း အာဟာဇီယာ တီ၊ တဲး အန် ဝီ ဘဲန် ခုန်ဒီခမ် ပ့လု ဂုန့် အန်။ ပါယ် တီ အာဟာဇီယာ မိူဝ် စုး ဒီ အိုပ် မာန် မိူင် ယူဒါ။

2 ဒေါ အန် တီ အာဆာက် အန် ဟဲ့ နုဝ့် ဖွုန် ဂိုဝ် ဒီ အာ ဆီနမ်။ အန် ဘော ကွယ် အိုပ် ခဲင် မိူင် ယေရူဆာလဲမ် အာဒါ အူ ဆီနမ်။ မာ အန် စိူဝ် နာင် အေထာလီ၊ အီ မုး လှာန် အာအုဝ်မာရီ။

3 အာဟာဇီယာ တီ ယီ ဘူင် ဒူပ် ပီ ပဲ့ ဟဲ့ ဘူင် န့ကြိုဝ်း ခုန်ဒီခမ် အာဟပ် တွိုန်။ ခုဝ်၊ မာ အန် ဟဲ့ ဒွါ အာကျာမ် အာငျာန် အီ တူ မွှိုမ် ဒီ အန်။ 4 အာဟာဇီယာ ဝီ ဘူင် အီ တူ မွှိုမ် အီ တူ လဝ့် နဝ်း ဇဝ်ဖြာ ပီ ပဲ့ ဟဲ့ ဘူင် ဂေ န့ကြိုဝ်း အာဟပ် တွိုန်။ ဝါယ် ဟဲ့ ယမ် ဂုန့် အန် တီ၊ ဒူအီ ဂေ တီ ဝီ ဒွါ အာကျာမ် အာငျာန် အီ တူ မွှိုမ်၊ ဘူင် တဲး အန် စှိုမ်။ 5 အန် မိူဝ် ဘူင် ဒူပ် အာကျာမ် အာငျာန် ပီ ဒွါ ဂေ တီ။ ဘော အန် ဘော ဒါ ဆိုက် အန် ဝီ ဟာဝ် ဒူပ် ခုန်ဒီခမ် အာယုဝ်ရမ် အီ အိုပ် မိူင် အီဆာရေလ၊ တဲး ဂေ ဟာဝ် ကာဂုဝ်း ဒီ ခုန်ဒီခမ် အာဟာစေလ အီ အိုပ် မိူင် အာရာမ်။ ဂေ ဒါ ဆိုက် ဘော အာ ဘ့လာက် ဘော လာယ် ကာတုန့် ဒီ မိူင် ရာမူတ်ဂီလေအာတ်။ ဒါ ဆိုက် ဒူအီ အာရာမ် ဟဲ့ ဘူင် တဲး အာယုဝ်ရမ် ပါ့ ဒူင် ကာဂုဝ်း ဂေ တီ။ 6 ခုဝ်၊ အန် မိူဝ် ဝီ ဝေန့် ဒီ မိူင် ယေစာရေလ၊ တဲး အန် ပွိုန် ဒီ ဆီနမ် ဒိမ် အန် ပဲ့ ဟဲ့ ပါ့ တး အန် ဒီ မိူင် ရာမူတ်ဂီလေအာတ် ဒေါ ကာဂုဝ်း ဂေ ဒီ အာဟာစေလ အီ မုး ခုန်ဒီခမ် အီ အိုပ် ဒူအီ အာရာမ်။ ဝါယ် အန် တီ အာဟာဇီယာ မိူဝ် ဝီ ဟာဝ် စ်ု ဂွန် ခုန်ဒီခမ် အာဟပ် အီ မုး အာယုဝ်ရမ်၊ ကူပ် ဟဲ့ ပါ့ အန် တီ။

7 ဒေါ ဟာဝ် အာဟာဇီယာ ဒူင် ကွယ် အာယုဝ်ရမ် တီ၊ ဇဝ်ဖြာ ဟဲ့ ဟွတ့် ဆုင်ဖျာတ် အုန် ဒီ တဲး အန် စှိုမ်။ ဒေါ ဟဲ့ ဟွတ့် ဇမ် အန်၊ အန် ဘော ဒူပ် အာယုဝ်ရမ် ဟာဝ် ဘ်ု ဒီ ရွုး အာယေဟူ အီ မုး ဂွန် အာနိမ်ဆီ ပဲ့ ဟဲ့ ရဝ်း ဇဝ်ဖြာ၊ တဲး အန် ဘဲန် အီ ပျာတ့် ဝဲန် ဒူအီ န့ကြိုဝ်း အာဟပ်။ 8 အာယေဟူ ဘော ဒမ် မှာပ် ဒီ န့ကြိုဝ်း အာဟပ်။ ဒေါ အန် တီ အန် ဘော ဝီ ကာတုန့် ဘော ဂေ ဒါ ကာညာ အီ အိုပ် ခဲင် မိူင် ယူဒါ ဘော ဂေ လှုက်လှာန် အာဟာဇီယာ အီ ဟဲ့ ဘဲန် ဒဲစေန့် အာဟာဇီယာ၊ အန် ဘော ငဝ်း ယမ် တူတ့် ဂေ။ 9 ဝါယ် အန် တီ အာယေဟူ ဘော ဝီ ဟြေတ့် အာဟာဇီယာ။ ဂေ ဒူအီ အန် ဘော ယိုဝ် အာဟာဇီယာ ကွယ် ဒီ မိူင် ဆာမာရီ ဒီ ဒူင် ချြီင် အန်။ ဂေ မိူဝ် ဒိုဝ်း တး အန် ဒူင် ကွယ် အာယေဟူ ဘော ငဝ်း ယမ် အန်။ ဂေ မိူဝ် ဒိပ် ဒုဝ် ယမ် အန် ကူပ် ရုဝ်ဆေ ဂေ ဒါ အန် အီ မုး ခုန်ဒီခမ် အာယောဆာဖာတ် အီ ဟဲ့ ဂျုဝ်ဂျာ ဒီ ဒူပ် ဇဝ်ဖြာ။ ဝါယ် အန် တီ ခဲင် န့ကြိုဝ်း အာဟာဇီယာ၊ အာဝ် မိုဝ်း အီ ဒီ ဝီ ပ့လု အန် ကူပ် တူ မိုဝ်း အီ ဒီ ပွိုန် ဒီ အိုပ် မာန် မိူင် ဂေ တီ။

10 ဝါယ် အန် တီ နာင် အေထာလီ အီ မုး မာ အာဟာဇီယာ တွိုန်၊ အန် ဘော ဝီ နပ်၊ ဂွန် အန် ဟဲ့ ဟွတ့် ယမ်၊ အန် ဘော ဝီ ဘ့လေး အာမိင်၊ တဲး ဂေ ငဝ်း ယမ် တူတ့် ခဲ့ ကွယ် န့ကြိုဝ်း ခုန်ဒီခမ် မိူင် ယူဒါ။ 11 မာလဲ၊ နာင် ယောဆေဖ အီ မုး ဂွန် အာယေဟုဝ်ရမ်၊ အန် ဘော ဝီ ပြာ ဒီ ဒိုဝ်း ချြီင် အာယုဝ်အာတ် အီ မုး ဂွန် ခုန်ဒီခမ် အာဟာဇီယာ၊ ကွဲ့ တဲး အန် ကွယ် ရိုမ် ဒူပ် ဂေ ဂွန် ခုန်ဒီခမ် အီ ဒီ ကာဒုး ဒီ ယမ်။ အန် ဘော ဝီ ဒိုဝ်း အာယုဝ်အာတ်၊ တဲး ဘော အန် ဘော အီ ရတ့် အန် ဟာဝ် ကွယ် ခဲင် ဟူင် အိတ် နာ ခဲင်၊ ကွဲ့ တဲး နာင် အေထာလီ ပွိုန် ဒီ ငဝ်း ယမ် အန်။ နာင် ယောဆေဖ တီ၊ အန် မုး ဂွန် ခုန်ဒီခမ် အာယေဟုဝ်ရမ် ဘော မုး အီဘိုန့် ဒါ အီ လှူ ဒီ ဇဝ်ဖြာ အီ စိူဝ် အာယေဟုဝ်ျာဒါ၊ မုး ဘော ဝါ အာဟာဇီယာ။ ခုဝ်၊ အန် ဒိုဝ်း ချြီင် ဂွန် ဝီ တီ၊ ကွဲ့ တဲး နာင် အေထာလီ ပွိုန် ဒီ ငဝ်း ယမ်။ 12 ဝါယ် တီ၊ အာယုဝ်အာတ် ဘော ကွယ် ဒူပ် အီ ရတ့် အန်၊ ကွယ် ချြီင် ခဲင် ဟုဝ် ဇဝ်ဖြာ ကော နုဝ့် ဒဝ် ဆီနမ်။ ဒေါ အန် တီ န့ မုး နာင် အေထာလီ အီ ဘဲန် နာင် ဟောခမ် အီ အိုပ် မိူင်။