ဝါယ် ဟဲ့ ဟွတ့် ပွုန် ဒဝ် ဆီနမ်၊ ဟဲ့ ဝီ ဇမ် ဆီနမ် မ့ဘူ၊ ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ ပီယ နဝ်း အန် ဘော ပီကာလဝ့် ဒီ ဂေ ဒါ တာင် အီ အိုပ် ဒါ ဆိုက် အူ မာယဝ်း။ န့ ဘော မုး အာဇာရီယာ အီ မုး ဂွန် အာယေရုဝ်ဟမ်၊ အာဆာမာန် အီ မုး ဂွန် အာယေဟုဝ်နန်၊ အာဇာရီယာ အီ မုး ဂွန် အာအုဝ်ဘေတ်၊ အာမာဆေယာ အီ မုး ဂွန် အာတာယာ ဘော အာအေလီဆာဖာတ် အီ မုး ဂွန် အာဇီခါရီ။ 2 ဂေ မိူဝ် ဟာဝ် လဲ လဲပ် ဒီ ယွတ် ခဲင် မိူင် ဒွန် မိူင် အီ ကွယ် ခဲင် ကာဒါယ် မိူင် ယူဒါ၊ တဲး ဂေ ဒဲ့ ဒူအီ ခြိုဝ် အာလေဝီ ဘော ဂေ ဒါ တာင် အီ အိုပ် အီ ယဲတ့် ခဲင် န့ဟူမ် ဂေ၊ တဲး ဂေ ဘောကာဂ့လျီတ် တး ကာဇု ဒီ မိူင် ယေရူဆာလဲမ်။ 3 ဒူအီ ဂေ တီ မိူဝ် တး ကာဇု ခဲင် ဟုဝ် ဇဝ်ဖြာ၊ တဲး ဂေ ဒွါ ကာဒိက် ဆတ်ဇာ ဒီ အာယုဝ်အာတ် အီ မုး ဂွန် ခုန်ဒီခမ် တွိုန်။ အာယေဟောယာဒါ မိူဝ် ကာလာင် ဒီ ဂေ တဝ်း၊ “ဂွန် ခုန်ဒီခမ် ဝီ တျီ့ တီ ဟဲ့ ကွယ် ဒီ နီ။ ဒေါ တီ နီ အန် ဟဲ့ ကာအာပ် ဘဲန် ခုန်ဒီခမ်၊ တဲး န့ ဒူပ် ဂြုဝ်း ကာဒိက် ဆတ်ဇာ ပီ ကာလာင် အုန် ဇဝ်ဖြာ လွင် လှုက်လှာန် အာဒါဝိတ် အူ ဝီ ဒီ အိုပ် မိူင် ဆေဆေ။

4 ဘေ ယီ လုဝ် ဘူင် ပါယ် နီ။ ဆေ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ တး ဘူင် ဂါန် ဂေ ဒေါ မုး ဆီငဲ ဒီလှဝ်၊ ဘေ လုဝ် ကာယဝ်း ဘဲန် အူယ် ဖိုင်။ အူ ဖိုင် အာဒါ အူယ် ဘုန် အူ ဘုန် လုဝ် ဘ်ု ဘာင် မာလုဝ်း ဟုဝ် ဇဝ်ဖြာ။ 5 အာဒါ ပေါ အူယ် ဘုန် အူ ဘုန် လုဝ် ဘ်ု ဟုဝ် ခုန်ဒီခမ်။ ဂေ အီ ဆီ ဂိတ် အာဒါ ပေါ အူယ် ဘုန် အူ ဘုန်၊ ဂေ လုဝ် ဘ်ု ဒီ မာလုဝ်း အီ စိူဝ် မာလုဝ်း စေန့် ရွင့်။ ဂေ ဒူအီ ကိူန် လုဝ် တး ကာဇု တူတ့် ခဲင် ဝဲင် ဟုဝ် ဇဝ်ဖြာ။ 6 ဒဲင် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ အီ လုဝ် ဘူင် ဂါန် ဂေ၊ အာဝ် ပွိုန် တဲး အာဆေ လိုပ် ခဲင် ဟုဝ် ဇဝ်ဖြာ။ ခုဝ်၊ ဂေ ဒါ အီ လှူ ဒီ ဇဝ်ဖြာ အီ ပွိုန် ဒီ လိုပ် ဂေ ဟဲ့ ဟွတ့် ဆီငါ။ အီ မုး ဂေ ဒူအီ ဟဝ်၊ ဂေ လုဝ် ကွယ် ဘ်ု ဒူင် ပဲ့ ဟဲ့ ကာလာင် အုန် ဇဝ်ဖြာ ဒီ ဂေ။ 7 ဂေ ဒူအီ အာမျုဝ် အာလေဝီ၊ ဂေ လုဝ် ဘ်ု ရူပ် ခုန်ဒီခမ်။ ဂေ လုဝ် ထွတ် အုန် မာပွါ့ လာင် ဂေ ဘော ခြိုင် ဒီ ဒဲပ်၊ ယွတ် ဘော နာ ဒီ ဝဝ့် ခုန်ဒီခမ်။ ဝီ မှဝ် အာဝ် တဝ်း၊ ဆေ အန် ဟီ တး လိုပ် ခဲင် ဟုဝ် ဇဝ်ဖြာ နီ၊ လုဝ် ငဝ်း ဝဲန်။”

8 ဟဲ့ ဟွတ့် ပါယ် တီ၊ ခဲ့ ကွယ် ဂေ ဒူအီ အာမျုဝ် အာလေဝီ ဘော ဂေ ဒူအီ အာယူဒါ ဘောကာဂ့လျီတ်၊ ဂေ မိူဝ် ဘူင် ဒူပ် ပီ ကာလာင် ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ တီ။ ဂေ မိူဝ် ဒဲ့ တး တူတ့် ဂေ ဒူအီ အီ လုဝ် တး ဘူင် ဂါန် ဆီငဲ ဒီလှဝ် ဘော ဂေ ဒူအီ အီ ဟဲ့ ဟွတ့် ဘူင် ဂါန်၊ အီ ဟဲ့ ပွိုန် လေး ဆီငဲ ဒီလှဝ်။ ခုဝ်၊ ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ တူ ဘ့လေး ဖိုင် မှဝ် တဲး ဂေ ဝေန့်။ 9 အာယေဟောယာဒါ မိူဝ် ဒိုဝ်း ဘ့လာ လျီး ဘော မင် ဂွင့် ဘော အီ တျီ့ အီ တာင် အီ ဟဲ့ ဒွိုမ် မုး ကြုဝ် ခုန်ဒီခမ် အာဒါဝိတ် ပဲ့ ဟဲ့ အုန် ဂေ ခဲင် ဟုဝ် ဇဝ်ဖြာ။ အန် ဝီ ဒွါ ခြိုင် ကာဂုဝ်း တီ ဒီ ဂေ အီ မုး ဒါ တာင် အီ အိုပ် အီ ယဲတ့် ဂေ ဘောကာဂ့လျီတ်။ 10 အန် ဝီ တဲး ဂေ ဒူအီ အီ ဂူင့် ခြိုင် ကာဂုဝ်း ဂေ တီ ကွယ် ရူပ် ခုန်ဒီခမ်။ တဲး ဂေ ကွယ် ဘော ခူပ် ကာစှူင့် လှူ ဘော ဒီ ဘာင် မာလုဝ်း ဟုဝ် ဇဝ်ဖြာ ဘ့လာက် နာ ကွာ ဘော ဘ့လာက် နာ တေတ့်။

11 ပန် တီ ဘော အာယေဟောယာဒါ ဘော ဂေ ဂွန် အီမာယ် အန်၊ ဂေ မိူဝ် ဒိုဝ်း လေး အာယုဝ်အာတ် နာ ရေတ့်၊ စှိုပ် မင်ဂိုမ် ဒီ ဂိန့် အန်၊ အာပ် ဒွါ ဘော ပဲ့ လွင် ဘဲန် အန် ခုန်ဒီခမ်။ ဂေ မိူဝ် ဖဝ်း နာမန် ဒီ ဂိန့် အန် ဘော ဒဲ့ တဝ်း၊ “တဲး ခုန်ဒီခမ် မိုဝ်း အာဆာက် တူင့်။”

12 နာင် အေထာလီ ဘော ယိုဝ် ပီ ခူယ် ဆီနန် ဆီနိူင် ဒူအီ ကိူန် ဘော အိူပ် ခုန်ဒီခမ်၊ အန် မိူဝ် ပီခြန် အန် ဒီ ဟာဝ် ဒီ ဟုဝ် ဇဝ်ဖြာ ဒူင် ကွယ် ကာဇု ဒူအီ ကိူန် ဂေ တီ။ 13 အန် မိူဝ် ဝီ ယိုဝ် ခုန်ဒီခမ် ကာဒင် ကာမာယ် ဟဲ့ စွင့် ဒီ ဘာင် မာလုဝ်း ဟုဝ် ဇဝ်ဖြာ တွိုန်။ ဂေ ဒါ ဆိုက် ဘော ဂေ ဒူအီ အီ ဘုတ် ဝဝ် နိုင် ပဲ မိူဝ် ဟဲ့ စွင့် ခူပ် ခုန်ဒီခမ် ဒီ တီ။ ဂေ ဒူအီ မိူဝ် ဟဲ့ ကာဖြူမ် ဒီ ခူယ် ဒါခိုယ် ဘော ဒတ် ဆီနန် ဆီနိူင်။ ဂေ ဒူအီ အီ ဘုတ် ဝဝ်၊ ဒူအီ အီ ဒွယ် အီ ဘး ဘဲန် မျုဝ် ဘဲန် မျုဝ်၊ ဂေ ဘော တဝ်း မှုဝ် အီ အိူပ် မျုက် ဇဝ်ဖြာ။ ဒေါ အန် တီ နာင် အေထာလီ တွိုန် မိူဝ် ကာယာတ့် ခြိုင် အန် ဘော ဒတ် တဝ်း၊ “ဟဲ့ လာယ် ကာဘး၊ ဟဲ့ လာယ် ကာဘး။”

14 အာယေဟောယာဒါ တူ ဆီ ငဝ်း တဲး နာင် အေထာလီ ယမ် ခဲင် ဟုဝ် ဇဝ်ဖြာ။ အန် ဝီ ဒဲ့ တး ဒါ တာင် အီ အိုပ် ဒါ ဆိုက် အူ မာယဝ်း ဘော ကာလာင် ဒီ ဂေ တဝ်း၊ “တဲး ဘေ ဒိုဝ်း လေး အန် ခဲင် မ့ပြဲင် ဒါ ဆိုက်။ ဆေ န့ မိုဝ်း အီ ဆီ ဒူပ် အန်၊ တဲး ဘေ ငဝ်း ယမ် ဘော ဒူအီ ဝီ တီ။” ခုဝ်၊ ဒါ အီ လှူ ဒီ ဇဝ်ဖြာ ဟဲ့ ဟွတ့် ကာလာင်၊ ကွဲ့ ငဝ်း ယမ် အန် ခဲင် ဟုဝ် ဇဝ်ဖြာ။ 15 ပါယ် တီ ဂေ မိူဝ် မှေတ့် လေး အန် ဒူင် ကွယ် ဟုဝ် ခုန်ဒီခမ်၊ ဝီ ဟာဝ် ငဝ်း ဝဲန် အန် ဒီ ဘာင် မာလုဝ်း အီ စိူဝ် မာလုဝ်း မ့ပြွင့်။

16 အာယေဟောယာဒါ ဘော ယဲတ့် ဂေ ဒူအီ ဒွါ ကာဒိက် ဆတ်ဇာ၊ တဲး ဘော အန် ဘော ခုန်ဒီခမ် ဘော ဂေ ဒူအီ ကိူန် ဘဲန် ဒူအီ ပီ အိုပ် ဇဝ်ဖြာ။ 17 ပါယ် တီ ဂေ ဘော ကာဖြူမ် ဒီ ဟာဝ် ဒီ ဟုဝ် ဒူင် ကြိုပ် ဂေ ဇဝ် ဘာလ ဘော ပျာတ့် ဝဲန် ဟုဝ် တီ။ ဂေ ဘော ပျာတ့် ဝဲန် ဘော ကာစှူင့် လှူ ဘော အာရိုပ် ရာင် ဘောကာဂ့လျီတ်။ ဂေ ဘော ငဝ်း ယမ် ဘော ဒါ အီ လှူ ဒီ ဇဝ် ဘာလ အီ စိူဝ် အာမာဒါန် ဒေါ ဆီ ကွယ် အန် နာ အာတ့် ကာစှူင့် လှူ တွိုန်။

18 အာယေဟောယာဒါ ဘော ဝီ တဲး ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ ဘူင် ဂါန် ခဲင် ဟုဝ် ဇဝ်ဖြာ တီ။ ဂေ လုဝ် ဘူင် ခဲ့ ပီ ကာလာင် အုန် ခုန်ဒီခမ် အာဒါဝိတ်။ ဂေ လုဝ် လှူ ပီ ဒီ လှူ အီ ဒုဝ့် ဒီ ငဝ် ဒီ ဇဝ်ဖြာ၊ တဲး န့ ဒူပ် ဒါရာ ပီ ဒမ် အုန် အာမုဝ်ဆဲ တွိုန်။ ဂေ လုဝ် ဘူင် တဲး န့ ဘျုဝ် ဒါခိုယ် ဘော တဝ်း မှုဝ်၊ တဲး န့ ဒူပ် ပီ ဒမ် အုန် အာဒါဝိတ် တွိုန်။ 19 အန် ဝီ ဘ့လေး အုန် ဒူအီ အီ ဘ်ု မာလုဝ်း ဟုဝ် ဇဝ်ဖြာ၊ တဲး ဂေ ခြဲ ဒူအီ အီ တူ ဆီငါ အီ ဆီ လိုပ်။

20 အာယေဟောယာဒါ မိူဝ် ယဲတ့် ဂေ ဒါ တာင် အီ အိုပ် ဒါ ဆိုက် အူ မာယဝ်း ဘော ဂေ ဒါ တာင် အီ အိုပ် ခဲင် ရဝ်၊ ဂေ ဒါ ကာညာ အီ အိုပ် မာန် မိူင် ဘော ဂေ ဒူအီ ရဝ် ဒူအီ ကာင် ဘောကာဂ့လျီတ်၊ တဲး ဂေ ကာဖြူမ် ဒီ ဘာင် ခုန်ဒီခမ် လေး ခဲင် ဟုဝ် ဇဝ်ဖြာ၊ တဲး အန် ဝီ ဟာဝ် ဒီ ဟုဝ် ခုန်ဒီခမ်၊ လိုပ် ဒီ မာလုဝ်း တာင် တွိုန်။ ဟဲ့ ဟွတ့်၊ ဂေ မိူဝ် တဲး ခုန်ဒီခမ် တုတ့် ဒဲင် မာလာင် အန်။ 21 ဒူအီ ဘော ရဝ် ဘော ကာင် ဒွန် အီ ဘော ခူယ် ဒါခိုယ်။ မိူင် ဘော မိူင် ဘော ယေန် ဒါခိုယ် တူတ့်။ ခုဝ်၊ ဂေ ဟဲ့ ဟွတ့် ငဝ်း ယမ် နာင် အေထာလီ တွိုန်။