1 ဒေါ အာဆာက် အာယုဝ်အာတ် ဟဲ့ နုဝ့် ဘူ ဆီနမ်၊ အန် ဟဲ့ ဘဲန် ခုန်ဒီခမ် အီ အိုပ် ကာဒါယ် မိူင် ယူဒါ။ အန် ဘော အိုပ် ကွယ် ခဲင် မိူင် ယေရူဆာလဲမ် အာဒါ ဖွုန် ဂိုဝ် ဆီနမ်။ မာ အန် စိူဝ် နာင် ဆီဘီယာ အီ တး မိူင် ဘီရာဆေဘာ။ 2 အာယုဝ်အာတ် မိူဝ် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ ဒေါ မုး စုဝ် ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ။ 3 အာယေဟောယာဒါ ဘော ရဝ်း အီဘိုန့် အာ ဝီ၊ ဒွါ ဒီ အာယုဝ်အာတ်၊ တဲး ဂါယ် ဘဲန် အီဘိုန့် အန်။ အာယုဝ်အာတ် ဘော မိုဝ်း ဂွန် အီဘိုန့် ဘော ဂွန် အီမာယ်။

4 ဝါယ် ဟဲ့ ဘဲန် အာယုဝ်အာတ် ခုန်ဒီခမ်၊ အာဝ် ဘော လှေန့် အန် ဝီ ခြာမ် ဒီ မ့ပြာယ် ဟုဝ် ဇဝ်ဖြာ။ 5 အန် ဝီ စ်ု ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ၊ တဲး ဂေ ဟာဝ် ဝိန် ဒီလဲ ဒွန် မိူင် ခဲင် ကာဒါယ် မိူင် ယူဒါ၊ တဲး ဂေ ဟာဝ် ဂဲပ် ရွိုန် ပီ လုဝ် ဒွါ ဂေ ဒွန် ဆီနမ် ဒွန် ဆီနမ်၊ တဲး ဂေ ပွိုန် ဒီ မ့ပြာယ် ဟုဝ် ဇဝ်ဖြာ။ မာလဲ၊ ဂေ ဒူအီ အာမျုဝ် အာလေဝီ ယီ တူ ဘူင် ဒူပ် အူ ဇေန့်။

6 ခုဝ်၊ အန် ဝီ ဒဲ့ တး အာယေဟောယာဒါ အီ မုး ဒါ တာင် ဂေ ဒူအီ အီ လှူ ဒီ ဇဝ်ဖြာ။ အန် ဝီ တဝ်း ဒီ အာယေဟောယာဒါ၊ “မှဝ် န့ ပါယ် ပီ တူ ယွတ် မဲန် မဲ ဂေ ဒူအီ အာမျုဝ် အာလေဝီ အီ လုဝ် ဂဲပ် ရွိုန် စိုင် ဒီ ဒူအီ အာယူဒါ ဘော ဒီ ဂေ ဒူအီ ခဲင် မိူင် ယေရူဆာလဲမ်၊ တဲး န့ ပီ အာမုဝ်ဆဲ အီ မုး ဒဲစေန့် ဇဝ်ဖြာ ဘော ဂေ ဒူအီ အီဆာရေလ ဟဲ့ ဒွိုမ် ဂဲပ် ဒီ ဒူအီ ဂေ တီ။ န့ ဘော မုး ရွိုန် ပီ ဒွိုမ် ဟပ် ဂေ၊ တဲး ဂေ ပွိုန် ဒီ ဘူင် ထိုပ် ဘိက် ဘွတ်။”

7 ဂေ ဂွန် နာင် အေထာလီ အီ မုး အီဘိုန့် အီ မိူက် ကာဆဝ် တွိုန်၊ ဂေ ဟဲ့ ပြာ ဒီ လိုပ် ခဲင် ဟုဝ် ဇဝ်ဖြာ၊ ဟဲ့ ဒိုဝ်း ဟာဝ် ကြုဝ် အီ ဆီငါ ဘွတ် ကိူန် ကာဆဝ် အီ ကွယ် ခဲင် ဟုဝ် ဇဝ်ဖြာ။ ဂေ ဝီ ဒိုဝ်း တာ ဒေါ လှူ ဂေ ဒီ ဇဝ် ဘာလ။

8 ခုန်ဒီခမ် ဝီ ဘ့လေး အာမိင်၊ တဲး ဂေ ဒူအီ အာမျုဝ် အာလေဝီ ဘူင် ဇီဒိူက် ရွိုန် လှူ၊ ဝီ ဘ့လေး အုန် ဒီ ဘာင် မာလုဝ်း ဟုဝ် ဇဝ်ဖြာ။ 9 ဂေ မိူဝ် ဒဲ့ ကာလာင် ခဲင် မိူင် ယေရူဆာလဲမ် ဘော ခဲင် မိူင် ယူဒါ ဘော မိူင်၊ တဲး ဒူအီ ဒွန် အီ ဒိုဝ်း ရွိုန် စိုင် ပီ လုဝ် ဟပ် ဂေ ဒီ ဇဝ်ဖြာ။ န့ မုး ရွိုန် ပဲ့ ဟဲ့ ဒွိုမ် ဂဲပ် အာမုဝ်ဆဲ အီ မုး ဒဲစေန့် ဇဝ်ဖြာ ဒေါ ကွယ် ဂေ ခဲင် ပြဲ ကာဟဝ်း တွိုန်။ 10 ဂေ ဒါ ကာညာ အီ အိုပ် မိူင် ဘော ဂေ ဒူအီ ရဝ် ဒူအီ ကာင် ဂေ ဘောကာဂ့လျီတ် ဘော မိုဝ်း နဝ်း ခူယ် ဒါခိုယ်၊ ကာဖြူမ် ဒီ တး ဟပ် ရွိုန် လှူ တီ ခဲင် ဇီဒိူက်၊ တဲး န့ ကော နုဝ့်။ 11 ဂေ ဒူအီ ခြိုဝ် အာလေဝီ မိူဝ် ဒိုဝ်း တး ဇီဒိူက် ရွိုန် လှူ တီ၊ ဒူင် ကွယ် ဒါ ကာညာ အီ အိုပ် ရွိုန် လှူ။ ဒေါ ဟဲ့ နုဝ့် ရွိုန် ခဲင် ဇီဒိူက် တီ ဒွန် ဇေန့်၊ ဒါ စာရေ ခုန်ဒီခမ် ဘော ဒါ စာရေ ဒါ အီ လှူ ဒီ ဇဝ်ဖြာ မိူဝ် ဟုး လေး ရွိုန် တီ။ ဇီဒိူက် တီ ဂေ ပီ ဝီ အုန် ဒူင် ကွယ် ဘြိမ် အန် တွိုန်။ ဂေ ဘူင် ပါယ် တီ ဘဲန် ဇေန့် ဘဲန် ဇေန့် ဘော ကာဇု အုန် ရွိုန် ကိူန် ကာဆဝ်။ 12 ခုန်ဒီခမ် ဂါယ် အာယေဟောယာဒါ ဘော ဒိုဝ်း ရွိုန် တီ၊ ဝီ အာပ် ဒွါ ဒီ ဂေ ဒူအီ အီ ဘူင် ဂါန် အီ မ့ပြာယ် ဟုဝ် ဇဝ်ဖြာ။ ဂေ မိူဝ် ဝီ ဇာင် ဒါ လာက် အီ နပ် ဒီ ဂုဝ် မာဝ်၊ အီ နပ် ဒီ တာ ဟေ ဘော ဟိန် ဂေ ဘွင့်၊ တဲး ဂေ ဝီ မ့ပြာယ် ဟုဝ် ဇဝ်ဖြာ။

13 ဂေ ဒူအီ အီ ဘူင် ဂါန် တီ မိူဝ် ဂျုဝ်ဂျာ ဒီ ဘူင် တဲး န့ စေဝ် ဟွတ့် ဘော တဲး န့ မန် ဆီချာ ပီ ဘြိမ်။ 14 ဒေါ ဟဲ့ ဟွတ့် မ့ပြာယ် ဂေ ဟုဝ် ဇဝ်ဖြာ၊ ဟဲ့ ဆီချာ တူတ့် ဒွန် မျုဝ်၊ ရွိုန် အီ ကာလူယ် ဂေ ဝီ အာပ် ဝိဝ် ဒီ ခုန်ဒီခမ် ဂါယ် အာယေဟောယာဒါ။ ဂေ မိူဝ် ဘူင် ခြိုင် တာ ဒေါ လှူ ဂေ ပီ ဒီ လှူ အီ ဒုဝ့် ဒီ ငဝ်။ ဂေ မိူဝ် ဒိုဝ်း ရွိုန် ဂေ ခြိဝ်၊ ဘူင် ဆီလယ့် ဂေ ကွက့် ပီ ဒီ တာ ခဲင် ဟုဝ် ဇဝ်ဖြာ။ စုဝ် ကွယ် အာယေဟောယာဒါ၊ ဂေ လှူ ပီ ဒီ လှူ အီ ဒုဝ့် ဒီ ငဝ် ခဲင် ဟုဝ် ဇဝ်ဖြာ ဆေဆေ။

15 ဒေါ ဟဲ့ ကတ် ကာဆဝ် အာယေဟောယာဒါ၊ ဒေါ အာဆာက် အန် ဟဲ့ နုဝ့် အူ မာယဝ်း ဒီ အူယ် ဂိုဝ် ဆီနမ်၊ အန် ဘော ယမ်။ 16 ကူပ် ဟဲ့ ဘူင် အန် နာ ဘွတ် နာ မွှိုမ်၊ ဂေ ဘော ဒိပ် ဒုဝ် ယမ် အန် ခဲင် မိူင် ခုန်ဒီခမ် အာဒါဝိတ် ဒူင် ဒိပ် ဂေ ခုန်ဒီခမ်။ အန် ဟဲ့ ဘူင် နာ ဘွတ် နာ မွှိုမ် ခဲင် မိူင် အီဆာရေလ အာဒါ ဇဝ်ဖြာ ဘော အာဒါ ကာင် ဇဝ်ဖြာ။

17 မာလဲ၊ ဝါယ် ယမ် အာယေဟောယာဒါ၊ ဂေ ဒါ တာင် ယူဒါ ဘော ဝီ တး ဂူမ်၊ တး ကြိုပ် ခုန်ဒီခမ် အာယုဝ်အာတ်။ အန် မိူဝ် ထူမ် ဂြုဝ်း ဂေ။ 18 ဂေ ဒူအီ ကိူန် ဘော ဝဲန် ဟုဝ် ဇဝ်ဖြာ၊ အာဝ် ဟူ မိုဝ်း အီ တး ကြိုပ်၊ တး ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။ ဂေ ဘော ဝီ ကြိုပ် ရွင့် နာင် ကာနမ် အီ စိူဝ် အေဆူရာ။ ကူပ် မှာပ် ပီ ဘူင် ဂေ တီ၊ ဇဝ်ဖြာ မိူဝ် ရူ ကာဆဝ် ဒီ ဂေ ဒူအီ အာယူဒါ ဘော ဂေ ဒူအီ ခဲင် မိူင် ယေရူဆာလဲမ်။ 19 ဇဝ်ဖြာ ဝီ စ်ု ဂေ ဒူအီ အီ ဘျာန် ဂြုဝ်း ဇဝ်ဖြာ ဟာဝ် ကာလာင်၊ ဟာဝ် ဒမ် ဆာဒိက် ဒီ ဂေ၊ တဲး ဂေ ဝီ လှုဝ်း ဇဝ်ဖြာ။ ဂေ မိူဝ် ဝီ ဝဲန် ဂြုဝ်း ပီ ကာလာင် ဒူအီ အီ ဘျာန် ဂြုဝ်း ဇဝ်ဖြာ ဂေ တီ။

20 ပါယ် တီ နဝ်း ဖွိုမ် ဇဝ်ဖြာ ဟဲ့ အိုပ် အာဆာခါရာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ တွိုန်။ အန် မိူဝ် စွင့် ဒူင် စာ ကာတဲ ဂေ ဒူအီ ကိူန် ဘော ကာလာင် ဒီ ဂေ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် အေ ဟဲ့ တဝ်း၊ ‘မှဝ် န့ ပါယ် ပီ တူ ထူမ် ဘေ ဂြုဝ်း ဇဝ်ဖြာ။း ပီ ဒီ ဘူင် ဘေ တဲး ဘေ လိုဝ် စှိုမ်၊ တူ တဲး န့ ဘဲန် အာဂျိုဝ် ဒီ ဘေ။ ကူပ် ဟဲ့ ဝဲန် ဘေ ဇဝ်ဖြာ၊ ဇဝ်ဖြာ မိူဝ် ဟဲ့ ဝဲန် ဘေ။’”

21 ပါယ် တီ ဂေ ဝီ ဆီ ဘူင် နာ တူ မွှိုမ် ဒီ အန်။ ဂေ ဝီ ဘူင် ဒူပ် ဂြုဝ်း ပီ စ်ု ခုန်ဒီခမ် ဒီ ဂေ။ ဂေ ဝီ ကာဖြူမ် ဒီ ဒိုဝ်း မာဝ်၊ ဝိုန့် ယမ် အန် ခဲင် ဝဲင် ဟုဝ် ဇဝ်ဖြာ တွိုန်။ 22 ခုန်ဒီခမ် အာယုဝ်အာတ် ဟဲ့ ပိဝ် ပီ ဂေဇူ အာယေဟောယာဒါ ဒီ အန် အီ မုး ဂုန့် အာဆာခါရာ တီ။ ခုဝ်၊ အန် တဲး ဂေ ငဝ်း ယမ် အာဆာခါရာ။ ဒေါ ဖွိုမ် အာဆာခါရာ ဟဲ့ ရိန် ဒီ တူတ့်၊ အန် ဝီ တဝ်း၊ “တဲး ဇဝ်ဖြာ ယိုဝ် လွင် ပီ ဘူင် ဘေ နီ။ တဲး အန် ဇဝ် ဆုင်ဖျာတ် အာမူ တီ။”

23 ဘော ဝီ ဇမ် ပန် ဒီ တူတ့် ဆီနမ် တီ၊ ဒါ ဆိုက် အာမျုဝ် အာရာမ်၊ ဂေ ဘော တး ကာဂုဝ်း ဒီ မိူင် ယူဒါ။ ဂေ ဘော ပွိုန် မိူင် ယူဒါ ဘော မိူင် ယေရူဆာလဲမ်။ ဂေ မိူဝ် ငဝ်း ဝဲန် တူတ့် အာမူ အာမာတ် ဂေ ဒါ ကာညာ အီ အိုပ် မိူင်။ ဂေ မိူဝ် ဖာတ် ဒိုဝ်း ကြုဝ်ကြာမ် ဂေ ကိူန် ကာဆဝ်၊ ဝီ ဒိုဝ်း ဟာဝ် ဒီ မိူင် ဒါမာခူ။ 24 ဒါ ဆိုက် အာရာမ် ပီ ဘော ပြေတ့် မိူဝ်၊ ဇဝ်ဖြာ ယီ တဲး ဂေ ပဲ ဒူအီ အာယူဒါ အီ ဟဲ့ ကိူန် လွှိုမ် ဂေ။ ခုဝ်၊ ဂေ ဒူအီ ဘောကာဂ့လျီတ် ဟဲ့ ဝဲန် အန် ဇဝ် အီ မုး ဇဝ်ဖြာ ပီ ကြိုပ် ဂုန့် ဒင် ဂေ။ ပါယ် တီ ခုန်ဒီခမ် အာယုဝ်အာတ် မိူဝ် လုဝ် ခမ် မှာပ် အန်။ 25 အန် မိူဝ် ဟဲ့ ပါ့၊ ဟဲ့ မိုဝ်း ဒိမ် တာင်။ ဒေါ ဟဲ့ ဟွတ့် ဝီ ဝေန့် ရန်ဆူ ဂေ တွိုန်၊ ဒါ ဘုဝ် အီ အိုပ် ဒါ ဆိုက် အန် အာ ဝီ ဝီ ဘူင် ကာဘး ဒီ အန်။ ဂါယ် ဝီ ငဝ်း ယမ် အန် ဒဲင် ကာစှူင့် အိတ် အန်။ ဂါယ် ဝီ ဘူင် ဝျီ့ ပဲ့ ဟဲ့ ဘူင် အန် ဒီ ဂွန် အာယေဟောယာဒါ အီ မုး ဒါ အီ လှူ ဒီ ဇဝ်ဖြာ တွိုန်။ ဂေ မိူဝ် ဒိပ် အန် ခဲင် မိူင် အာဒါဝိတ်။ မာလဲ၊ အာဝ် ဒိပ် ခဲင် ဘာရေဝ် ခုန်ဒီခမ်။

26 ဂါယ် အီ ငဝ်း အာယုဝ်အာတ် တီ ဘော မုး အာဇာဘာတ် အီ မုး ဂွန် နာင် ဆီမာတ် အီ မုး ဒူအီ အာမျုဝ် အမ်မူန် ဘော အာယေဟုဝ်ဇာဘာတ် အီ မုး ဂွန် နာင် ဆုဝ်မေရာ အီ မုး ဒူအီ အာမျုဝ် မုဝ်အာပ်။ 27 လွင် ဂေ ဂွန် ခုန်ဒီခမ် တီ ဘော လွင် ပီ ကာလာင် အီ ဟဝ် လွင် အန် ဘော လွင် ပဲ့ ဟဲ့ ဂျုဝ်ဂျာ အန် ဒီ မ့ပြာယ် ဟုဝ် ဇဝ်ဖြာ၊ န့ ဟဲ့ ဒဲမ် အုန် ခဲင် ဘပ် ပဲ့ လွင် ဘိူန် ခုန်ဒီခမ်။ ဂွန် အီမာယ် အန် အီ စိူဝ် အာမာဇီယာ ဘော ဝီ ပ့လု အန်၊ ဝီ ဘဲန် ခုန်ဒီခမ်။