1 ဒေါ ဝီ ဘဲန် အာမာဇီယာ ခုန်ဒီခမ် အီ အိုပ် မိူင် ယူဒါ၊ အာဆာက် အန် ဟဲ့ နုဝ့် အာ ဂိုဝ် ဒီ ဖန် ဆီနမ်။ အန် မိူဝ် အိုပ် ခဲင် မိူင် ယေရူဆာလဲမ် အာဒါ အာ ဂိုဝ် ဒီ ဒိမ် ဆီနမ်။ မာ အန် စိူဝ် နာင် ယေဟူအတ် အီ ဒွိုမ် ကွယ် ခဲင် မိူင် ယေရူဆာလဲမ် ဆေဆေ။ 2 အာမာဇီယာ တီ အန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ မာလဲ၊ န့ ယီ တူ လေး ခဲင် နဝ်း အန် ပါယ် ခါခ်ု။ 3 ဒေါ ဟဲ့ ဝီ မိုဝ်း အန် ပွုန်၊ ပွိုန် ဒီ အိုပ် ဆီချာ မာန် မိူင်၊ အန် ဝီ ငဝ်း ယမ် ဂါယ် အာမူ အာမာတ် အီ ဟဲ့ ငဝ်း ယမ် ဂုန့် အန်။ 4 မာလဲ၊ အန် မိူဝ် တူ ငဝ်း ယမ် ဂွန် ဂါယ်။ အန် ဘူင် ဒူပ် ဒါရာ ပဲ့ ဟဲ့ ဒွါ ဇဝ်ဖြာ ဒီ အာမုဝ်ဆဲ အီ တဝ်း၊ “ဂုန့် တူ လုဝ် ယမ် ကာဒါင် ဂွန်။ ဂွန် တူ လုဝ် ယမ် ကာဒါင် ဂုန့်။ ဒွန် အီ လုဝ် ယမ် ကူပ် မှာပ် ပီ ဘူင် အန်။”

5 ခုန်ဒီခမ် အာမာဇီယာ ဘော ဒဲ့ ကာဇု ဂေ ဒူအီ အာယူဒါ ဘော ဒူအီ အာဘေန်ယာမ် ဘောကာဂ့လျီတ် ဒူပ် ဖိုင် ဂေ န့ဟူမ် မှဝ် န့ဟူမ် အန်။ အန် ဘော ဒါင် တဲး န့ မိုဝ်း ဒါ တာင် အီ အိုပ် ဒါ ဆိုက် အူ ဟြဲန့် ဝီ ဘော အူ မာယဝ်း ဝီ။ ဒါ ဆိုက် ဂေ တီ၊ စုး အာဆာက် အာ ဂိုဝ် ဟုဝ့် နာ ဒဲင်၊ ဂေ ဘောကာဂ့လျီတ် ကွယ် အူယ် ဆဲန် ဝီ။ ဒူအီ ဂေ တီ ဟဲ့ ဖြူမ် ဒီ ကာဂုဝ်း၊ ဟဲ့ နပ် ဒီ ဂူင့် ဘ့လာ လျီး ဂေ မင် ဂွင့်။ 6 ဒဲင် တီ အန် ဝီ ဇာင် ဘော ဒါ ဆိုက် ဒူအီ အီဆာရေလ အူ ဆဲန် ဝီ။ ရွိုန် ရုး ဇာင် အန် မုး ရွိုန် အူ မာယဝ်း ထာလေန်။

7 မာလဲ၊ ဒူအီ အီ ဘျာန် ဂြုဝ်း ဇဝ်ဖြာ အူ ဝီ တး ကာလာင် ဒီ အန် တဝ်း၊ “အိုယ် မဲ ခုန်ဒီခမ် တာင်၊ မဲ ကွဲ့ တဲး ဒါ ဆိုက် ဂေ ဒူအီ အီဆာရေလ ဟာဝ် ရိုမ် ဒူပ် မဲ။ ဇဝ်ဖြာ တူ ကွယ် ရိုမ် ဒူပ် ဂေ ဒူအီ အီဆာရေလ အီ မုး အာမျုဝ် အာအေဖာရိမ် ဘောကာဂ့လျီတ်။ 8 ဆေ မဲ ဒဲ့ ဂေ၊ မဲ ပီ ဘော ကျ ဒီ ကာဂုဝ်း မိူဝ်၊ ဇဝ်ဖြာ ပီ ကြိုပ် အေ၊ အန် ယီ မိုဝ်း ပွုန် ဒီ တဲး အီ ပဲ၊ တဲး အီ စှိုမ်။ အန် ဒီ ဘူင် တဲး မဲ စှိုမ် ဒီ ရန်ဆူ ဂေ တီ။”

9 အာမာဇီယာ ဝီ ဒီမွှတ် ဒါ အီ ဘျာန် ဂြုဝ်း ဇဝ်ဖြာ တီ တဝ်း၊ “ရွိုန် ပဲ့ ဟဲ့ ဟွတ့် ဒွါ အုဝ် ဒီ ဂေ တွိုန်၊ မှဝ် ဒီ ဝီ ပါယ်။း” ဒါ အီ ဘျာန် ဂြုဝ်း ဇဝ်ဖြာ တီ ဝီ တဝ်း၊ “ဇဝ်ဖြာ ပွိုန် ဝီ ဒွါ ဒီ မဲ၊ တဲး န့ ကိူန် လွှိုမ် တီ။”

10 ပါယ် တီ အာမာဇီယာ ဘော ဝီ တဲး ဂေ ဒါ ဆိုက် ပဲ့ ဟဲ့ ဇာင် အန်၊ ဝီ ဝေန့် ဒူင် ကွယ် ဂေ ရာင် အာဆေ ရာင် အန်။ ဂေ ဘော ရူ ကာဆဝ် ဒီ ဂေ ဒူအီ အာယူဒါ။

11 အာမာဇီယာ မိူဝ် ပီကျ အန်၊ ယဲတ့် ဒါ ဆိုက် အန် ဟုဝ့် ဒီ ဒီလယ့် အီ စိူဝ် ဒီလယ့် ဆယ့်။ ဒူင် ကာဂုဝ်း ဂေ တီ၊ ဂေ ဘော ပွိုန် ဒီ ငဝ်း ယမ် ဒါ ဆိုက် အာမျုဝ် ဆေအီ အူ မှိုန့် ဝီ။ 12 ဂေ ဘော ပွိုန် ဒီ မှေတ့် အိမ် ဒူအီ ဂေ အူ မှိုန့် ဝီ။ ဂေ ဘော ဒိုဝ်း ဒူအီ ပီ မှေတ့် ဂေ တီ ဟုဝ့် ဒဲင် နွန် ဒါအာင် မာဝ် ဘော ဇုန် ဘျွာ ဒူအီ ဂေ တီ၊ တဲး ဂေ စုဝ်း ယမ် ဒဲင် ဒါအာင် မာဝ် ဘော ကာဘွာ့ ကာဘက် လိုဝ် တူတ့်။

13 ဒေါ အန် တီ ဂေ ဒါ ဆိုက် ဒူအီ အီဆာရေလ ပီ တူ တဲး အာမာဇီယာ ဂေ ဟာဝ် ကာဂုဝ်း ဒူပ် အန် တွိုန်၊ ဂေ ဝီ ဇူန် ခဲင် မိူင် ယူဒါ ဘဲန် မိူင် ဘဲန် မိူင်။ ဂေ ဘူင် ပါယ် တီ စုး ဒီ မိူင် ဆာမာရီ ကော ဝီ ဇမ် ဒီ မိူင် ဘေတ်ဟုဝ်ရုန်။ ဂေ ဘော ငဝ်း ယမ် ဒူအီ အူယ် ဟြဲန့် ဝီ၊ ဒိုဝ်း ဟာဝ် ဘော ကြုဝ်ကြာမ် ဂေ ကိူန် ကာဆဝ်။

14 ဝါယ် ဟဲ့ ဟွတ့် ကာဂုဝ်း အာမာဇီယာ ဒီ ဒူအီ အေဒူမ် ဂေ တွိုန်၊ ဒေါ ဝီ တး အန်၊ အန် ဝီ ဒိုဝ်း တး ဘော အာရိုပ် ရာင် ပီ ကြိုပ် ဒူအီ အာမျုဝ် ဆေအီ။ အန် ဝီ တး ဘ့လေး အုန် အာရိုပ် တီ ဒီ ဒူင် ကွယ် အန်၊ တဲး န့ ဘဲန် ဇဝ်ဖြာ ပီ ကြိုပ် အန်။ အန် ဝီ မုတ် ဂိုပ် ကြိုပ် အာရိုပ် ရာင် ဂေ တီ ဘော လှူ ဒီ ဂေ။ 15 ကူပ် ဘူင် အန် ပါယ် တီ ဇဝ်ဖြာ မိူဝ် ရူ ကာဆဝ် ဒီ အန်၊ ဝီ စ်ု ဒါ အီ ဘျာန် ဂြုဝ်း ဇဝ်ဖြာ အူ ဝီ ဟာဝ် ဒူင် ကွယ် အန်။ ဒါ အီ ဘျာန် ဂြုဝ်း တီ မိူဝ် တဝ်း၊ “မှဝ် န့ ပါယ် ပီ ဝီ ကြိုပ် မဲ ဇဝ် ပီ ကြိုပ် ဒူအီ ဟဝ် အီ တူ ပွိုန် စွယ် ဒူအီ ဂေ၊ တဲး ဂေ လွတ် ယမ် ဒီ မဲ။း”

16 ဒေါ ဆီငျာ ကာလာင် ဒါ အီ ဘျာန် ဂြုဝ်း ဇဝ်ဖြာ ဂြုဝ်း တီ၊ အာမာဇီယာ ဘျတ် ဝဲန် ဂြုဝ်း အန် ဝီ တဝ်း၊ “အာဆေ ဟဲ့ တဲး မဲ ဘဲန် အာမူ အာမာတ် အီ ဒွါ အာကျာမ် အာငျာန် ဒီ ခုန်ဒီခမ်။း စူ ခဲ့ တီ။ မှဝ် န့ ပါယ် ပီ ဆီ ယမ် မဲ။း” ဒါ အီ ဘျာန် ဂြုဝ်း ဇဝ်ဖြာ မိူဝ် စူ ခဲ့ တီ။ မာလဲ၊ အန် ယီ ဝီ တဝ်း၊ “အုဝ် ဟဲ့ နပ်၊ ဇဝ်ဖြာ ဟဲ့ ဟွတ့် ဆုင်ဖျာတ် ဒီ ပျာတ့် ဝဲန် မဲ ခုန်ဒီခမ် ကူပ် ဟဲ့ ဘူင် မဲ ပါယ် တီ ဘော ကူပ် ဟဲ့ ဝဲန် မဲ အာကျာမ် အာငျာန် ပီ ဒွါ အုဝ် နီ။”

17 ဝါယ် အန် တီ အာမာဇီယာ အီ မုး ခုန်ဒီခမ် အီ အိုပ် မိူင် ယူဒါ ဘော ဂေ ဒါ တာင် အီ ဒွါ အာကျာမ် အာငျာန် ဒီ အန်၊ ဂေ ဝီ လာယ် ဖြူမ် ဒီ စ်ု ဒါလာမ် ဂေ ဟာဝ် ဒီ မိူင် အီဆာရေလ ဒူင် ကွယ် ခုန်ဒီခမ် အာယေဟုဝ်အာတ် အီ မုး ဂွန် အာယောခတ် ဘော မုး လှာန် အာယေဟူ။ အန် ကာလာင် ဒီ ဒါလာမ် တီ တဝ်း၊ “တဲး မဲ ဒဲ့ ခုန်ဒီခမ် ဒူအီ အီဆာရေလ တး လဲ ဒီ အုဝ်၊ တဲး ယာယ် လာယ် ကာတုန့်။”

18 အာယေဟုဝ်အာတ် မိူဝ် ဝီ ဝျီ့ ဂြုဝ်း တီ တဝ်း၊ “န့ ဒွိုမ် မိုဝ်း ဟေ မာအာတ့် အီ ကွယ် ဒီ နွန် လေဘာနုန်၊ ဟဲ့ စ်ု အီ ဟာဝ် ကာလာင် ဂြုဝ်း ဒီ ဟေ အာရိတ် အီ ကွယ် ဒီ နွန် လေဘာနုန် တဝ်း၊ ‘ဒိုဝ်း ဂွန် အီဘိုန့် မဲ၊ တဲး အန် ဝီ ခတ် ဒိုဝ်း ဂွန် အီမာယ် အုဝ်။’ ဟဲ့ ဟွတ့်၊ မာဒုဝ် ပြဲ ဟာယ် အီ ကွယ် ဒီ နွန် လေဘာနုန် အူ ဒုဝ် ဘော ညဲတ့် ကေး ယမ် ဟေ မာအာတ့် တီ။ 19 အိုယ် အာမာဇီယာ၊ ဒေါ တီ နီ မဲ ဟဲ့ ပီခိုက် ပီဖုင် ကာဆဝ် ဒုဝ် ဘြိမ် မဲ ကူပ် ဟဲ့ ကာဂုဝ်း ပဲ မဲ ဂေ ဒူအီ မိူင် အေဒူမ်။ အုဝ် ကာလာင် ဒီ မဲ၊ တဲး မဲ ကွယ် ဒီ ကာင် မဲ။ ကွဲ့ ဘူင် တဲး မဲ ဇမ် ဒုက် တာင်။ ကွဲ့ တဲး ဘော မဲ ဘော ဒူအီ အာယူဒါ ဘော မိူင် စှိုမ် တူတ့်။”

20 မာလဲ၊ အာမာဇီယာ ယီ တူ ထူမ် ဂြုဝ်း အန် တီ။ ခုဝ် ဇဝ်ဖြာ ဟဲ့ ဆီ တဲး အန် လိုဝ် စှိုမ် ကူပ် ဟဲ့ ဝီ ကြိုပ် အန် ဇဝ် ပီ ကြိုပ် ဂေ ဒူအီ အေဒူမ် တွိုန်။ 21 ပါယ် တီ ခုန်ဒီခမ် အာယေဟုဝ်အာတ် အီ အိုပ် မိူင် အီဆာရေလ ဘော ယဲတ့် ဒါ ဆိုက် အန် တး ကာဂုဝ်း ဒီ ခုန်ဒီခမ် အာမာဇီယာ အီ အိုပ် မိူင် ယူဒါ။ ဂါယ် ဘော လာယ် ကာတုန့် ခဲင် ဂ့လင် ဒီ မိူင် ဘေတ်ဆေမေတ် အီ ကွယ် ခဲင် ကာဒါယ် မိူင် ယူဒါ။ 22 ဂေ ဒူအီ အာယူဒါ ဘော စှိုမ် ဒီ ဂေ ဒူအီ အီဆာရေလ။ ဂေ ဘော ဝီ တဝ် ဝေန့် ဒီ ကာင် ဂေ ဒွန် အီ။ 23 အာယေဟုဝ်အာတ် အီ မုး ခုန်ဒီခမ် မိူင် အီဆာရေလ ဘော မှေတ့် အာမာဇီယာ အီ မုး ခုန်ဒီခမ် အီ အိုပ် မိူင် ယူဒါ အီ မုး ဂွန် အာယုဝ်အာတ်။ အာယုဝ်အာတ် ဘော မုး ဂွန် အာယေဟုဝ်ဟာတ်။ ဂေ ဘော မှေတ့် အန် ဒီ မိူင် ဘေတ်ဆေမေတ် ဘော ဝီ ဒိုဝ်း ဟာဝ် အန် ဒီ မိူင် ယေရူဆာလဲမ်။ အာယေဟုဝ်အာတ် ဘော ပျာတ့် ဝဲန် ရဲင် မိူင် အာဒါ ဖွုန် မာယဝ်း ကာနိး၊ စုး ဒီ မာလုဝ်း အာအေဖာရိမ် ကော ဝီ ဇမ် ဒီ မာလုဝ်း အီ ကွယ် ဒီ ကာတုဝ့် မိူင်။ 24 အန် ဘော ဒိုဝ်း တူတ့် ရွိုန် ခြိဝ် ဘော ခြိုင် တာ ခဲ့ ပီ ယိုဝ် ဂေ ခဲင် ဟုဝ် ဇဝ်ဖြာ ပီ ယွတ် မဲန် အာအုဝ်ဘေန်အေဒူမ်။ အန် ဒိုဝ်း ဘော ကြုဝ်ကြာမ် အီ ကွယ် ခဲင် ဟုဝ် ခုန်ဒီခမ်။ အန် ဘော မှေတ့် ဘော ဒူအီ မင် အီ၊ ဒိုဝ်း ဘော ကြုဝ်ကြာမ် ဘော ဒူအီ ဂေ တီ၊ ဝေန့် ဒူပ် အန် ခဲင် မိူင် ဆာမာရီ။

25 ခုန်ဒီခမ် အာမာဇီယာ အီ မုး ဂွန် အာယုဝ်အာတ် အီ အိုပ် မိူင် ယူဒါ တွိုန်၊ အာဆာက် အန် တူင့် လွှိုမ် ခုန်ဒီခမ် အာယေဟုဝ်အာတ် အီ အိုပ် မိူင် အီဆာရေလ အာဒါ ဂိုဝ် ဒီ ဖန် ဆီနမ်။ 26 လွင် ပီ ဘူင် အာမာဇီယာ အီ ဆီ ဂိတ် ဆီ ကွယ်၊ စုး ဆိန့် ဒေါ ဂုဝ် ကော ဇမ် ကာဒဲ့၊ န့ ဟဲ့ ဒဲမ် အုန် ခဲင် ဘပ် ဘိူန် ခုန်ဒီခမ် ယူဒါ ဘော ခုန်ဒီခမ် အီဆာရေလ။ 27 စုး ဆိန့် ဒေါ ဝး ဒေါ တူ ဒူပ် အာမာဇီယာ ဇဝ်ဖြာ တွိုန်၊ ဂေ ဒူအီ ခဲင် မိူင် ယေရူဆာလဲမ် ဘော ဘူင် ကာဘး ဒီ အန်။ ဒီ ကာဒဲ့ အန်၊ အန် ပီ ဘော ဟဲ့ တဝ် ဟာဝ် ဒီ မိူင် လာခိတ် မိူဝ်၊ ဂေ ဘော ဒူပ် ဟာဝ် ငဝ်း ယမ် အန် ဒူင် တီ။ 28 ဒုဝ် ယမ် အန် ဂေ ဝီ ဒါင် ဒဲင် မ့ပြွင့်၊ ဝီ ဒိုဝ်း တး ဒီ မိူင် ယေရူဆာလဲမ်။ ဂေ ဝီ ဒိပ် အန် ခဲင် ဘာရေဝ် ဒါ ဒါ အန် အီ ကွယ် ခဲင် မိူင် အာဒါဝိတ်။