1 ဂေ ဒူအီ အာယူဒါ ဘောကာဂ့လျီတ် ဝီ ကာဖြူမ် ဒီ ရဝ်း အာအူဇီယာ အီ မုး ဂွန် အာမာဇီယာ တွိုန် တဲး အန် ဝီ ဘဲန် ခုန်ဒီခမ် အီ ပ့လု ဂုန့် အန်။ ဒေါ အန် တီ အာဆာက် အန် ဟဲ့ နုဝ့် ဂိုဝ် ဒီ ဒဝ် ဆီနမ်။ 2 ဝါယ် ဟဲ့ ဟွတ့် ယမ် ဂုန့် အန် အီ စိူဝ် အာမာဇီယာ တီ၊ အာအူဇီယာ ဘော ဝီ ကာဂုဝ်း ပွိုန် မိူင် အေလာတ်။ အန် ဘော ဝီ မ့ပြာယ် မိူင် တီ။

3 ဒေါ ဘဲန် အာအူဇီယာ ခုန်ဒီခမ် တီ၊ အာဆာက် အန် ဂိုဝ် ဒီ ဒဝ် ဆီနမ်။ အန် ဘော အိုပ် မာန် မိူင် ယူဒါ၊ ကွယ် ခဲင် မိူင် ယေရူဆာလဲမ် အာဒါ ဖန် ဂိုဝ် ဒီ အာ ဆီနမ်။ မာ အန် စိူဝ် နာင် ယေခေါလီ အီ ဒွိုမ် ကွယ် ခဲင် မိူင် ယေရူဆာလဲမ် ဆေဆေ။ 4 အာအူဇီယာ ဘော ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ပါယ် ဂုန့် အန် အီ စိူဝ် အာမာဇီယာ တွိုန်။ 5 န့ ဘော မုး စုဝ် အာစာခါရီယာ အီ မာနုဝ် အာအူဇီယာ၊ တဲး အန် နပ် ဒီ ရုဝ်ဆေ ဇဝ်ဖြာ။ ဇဝ်ဖြာ မိူဝ် မွင့်ကာရာ ဒွါ နာ ဘွတ် နာ မွှိုမ် ဒီ အန်။

6 အာအူဇီယာ ဘော ယဲတ့် ဒါ ဆိုက် အန် ဟုဝ့် ကာဂုဝ်း ဒီ ဂေ ဒူအီ ဖီလီထီ။ အန် ဘော ပျာတ့် ဝဲန် ရဲင် မိူင် အာဂထ၊ မိူင် ယာပါနီ ဘော မိူင် အာစုတ်။ အန် ဝီ ဒဲ မိူင် ကာမာယ် မင် မိူင် အီ ကွယ် ခူပ် မိူင် အာစုတ် ဘော ခဲင် မိူင် ဖီလီထီ ဘဲန် ပ့လုဝ့် ဘဲန် ပ့လုဝ့်။ 7 ဇဝ်ဖြာ မိူဝ် စွယ် အန်၊ တဲး အန် ကာဂုဝ်း ပဲ ဒူအီ ဖီလီထီ၊ ဒူအီ အာမျုဝ် အာရာပ် အီ ကွယ် ခဲင် မိူင် ဂူရဘာလ ဘော ဒူအီ အာမျုဝ် မောနီ။ 8 ဂေ ဒူအီ အမ်မူန် မိူဝ် ကာဒုး ဒီ ဟပ် စိုင် ဒီ အာအူဇီယာ။ အာဖုင် ဒင်ခုဝ် အန် မိူဝ် ကြဲ ဒီ တာင် ဘော လိုဝ်း ဟာဝ် ကော ဇမ် မိူင် အဲဂိုပ်။

9 ဒဲင် တီ၊ အာအူဇီယာ ဝီ ဆမ် ဟုဝ် စာ ဒီ ဒူင် စိူဝ် ဒီ မာလုဝ်း ကာတုဝ့်၊ ဘော ဒီ မာလုဝ်း အီ ကွယ် ဒူပ် ဒီလယ့် ဘော ဒီ ဂုဝ့် ရဲင် မိူင် ယေရူဆာလဲမ်။ အန် ဘော ဘူင် တဲး န့ မန် ဆီချာ၊ ကွဲ့ တဲး ရန်ဆူ ပွိုန် ဒီ လိုပ်။ 10 ခဲင် ပြဲ ကာဟဝ်း မိူဝ်၊ အန် ဘော ဆမ် ဟုဝ် စာ။ အန် ဘော ဂိုဝ်း အုန် အိုမ် ခိုမ် ကိူန်။ ခုဝ်၊ အန် မိုဝ်း ဖိုင် မာဘူ ဂေ ဖိုင် မာမက် ကိူန် ကာဆဝ် အီ ကွယ် ဒီ ဒင် နွန် ဘော ခဲင် ဂ့လင်။ အန် မိူဝ် ဝုဝ် လွင် ပီ ပိတ် ပီ ဆမ် ဘော ဇာင် အီ ရန့် မာန် ဂေ ဒူင် နာ အန်၊ ယွတ် မဲန် ဘော ဟေ မာငုန် အီ ကွယ် ဒီ နွန် ဘော ခဲင် မာန် ခဲင် နာ ဒူင် မုး ကာဒါယ် ဘွတ်။

11 အာအူဇီယာ ဘော မိုဝ်း ဖိုင် ဒါ ဆိုက် အီ ဟဲ့ ဟွတ့် ဖိုက်၊ ဟဲ့ ဟွတ့် လှဲဝ် ဒီ ကာဂုဝ်း။ အာဟာနာနီယာ အီ မုး ဒါ ဘုဝ် အီ အိုပ် ဒါ ဆိုက် ခုန်ဒီခမ်၊ အန် ဘော ယဲတ့် ဒါ စာရေ အန် အီ စိူဝ် အာယေယီလာ ဘော အာမာအာဆေယာ အီ ဟဲ့ ဒိုဝ်း ဇာရာင် ဒါ ဆိုက် ဂေ တီ၊ တဲး ဂေ ဒါ ဆိုက် ဖိုင် မှဝ် ဖိုင် အန် ခြိုင် ဒီ ကာဂုဝ်း။ 12 ဂေ ဒါ တာင် အီ အိုပ် အီ ယဲတ့် ဒူအီ ခဲင် န့ဟူမ် ဂေ မိုဝ်း ဒါ ဆိုက် အာ ဟြဲန့် ဒီ ဒဝ် မာယဝ်း ဝီ။ 13 ဂေ ဘော အိုပ် ဒါ ဆိုက် အာဒါ အူယ် ဆဲန် ဒီ ဘူ ဟြဲန့် ဒီ ဖန် မာယဝ်း ဝီ။ ဂေ ဘောကာဂ့လျီတ် ဟဲ့ ဟွတ့် ဖိုက်၊ ဟဲ့ ဟွတ့် လှဲဝ် ဒီ ကာဂုဝ်း။ ဂေ ဘော ပွိုန် စွယ် ခုန်ဒီခမ် ကာဂုဝ်း ဒီ ရန်ဆူ အန်။ 14 အာအူဇီယာ ဘော ဘူင် မင် ဂွင့်၊ ဘူင် ဘ့လာ လျီး၊ မာဂိန့် ဟိန်၊ ဆီတုဝ် ဟိန် ဘော အ ဂေ ဝန် ဝိုန့် မာဝ်၊ ဒွါ ဒီ ဒါ ဆိုက် အန် ဒွန် အီ။ 15 ခဲင် မိူင် ယေရူဆာလဲမ် ဂေ ဒူအီ အန် အီ မိုဝ်း အာငျာန်၊ ဂေ အီ နပ် ဒီ ဘူင် အာမျုဝ် အီ ကာမာယ်၊ ဂေ မိူဝ် ဘူင် စာက် အီ နပ် ဒီ ဝိုန့် အီ ဟဝ် ဘော စာက် အီ နပ် ဒီ ဒိုဝ်း မာဝ် တာင် ဝိုန့်။ ဂေ ဝီ အုန် ဒဲင် ကာစှူင့် စာ၊ အုန် ဘော ဒီ ကာတုဝ့် ရဲင် မိူင်၊ တဲး ဂေ ဂွင့် ရဲ မိူင်။ ပါယ် တီ အာဖုင် ဂေ ဆာရေ အာအူဇီယာ ဘော လိုဝ်း ဟာဝ် ဒွန် နာ ဒွန် ပ့လုဝ့်။ ခုဝ်၊ ဇဝ်ဖြာ အီ စွယ် အန်၊ အန် မိုဝ်း ပွုန် မိုဝ်း ဘော အာဖုင် ဒင်ခုဝ် တာင်။

16 အာအူဇီယာ ဟဲ့ မိုဝ်း ပွုန်၊ မိုဝ်း အာဖုင် ဒင်ခုဝ် တာင် ပါယ် တီ အန် ဝီ ပီခိုက် နဝ်း အန် ဘူင် တဲး အန် လိုဝ် စှိုမ်။ အန် ဘူင် လုတ့် ဇဝ်ဖြာ အီ မုး ဇဝ်ဖြာ ပီ ကြိုပ် အန်။ အန် ဟဲ့ လိုပ် ခဲင် ဟုဝ် ဇဝ်ဖြာ၊ တဝ်း ဒီ ဒုဝ့် လှူ ဆီနမ် အုး ငှုန် ဒီ ကာစှူင့် လှူ ဆီနမ် အုး ငှုန်။ 17 ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာဇာရီယာ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ အီ မိုဝ်း ဟဲန့်၊ မိုဝ်း နဝ်း ယ၊ ဂေ ဒါ ဂိုဝ် ဝီ ဟာဝ် ဒူပ် ခုန်ဒီခမ်။ 18 ဂေ မိူဝ် ခြဲ အန် တဝ်း၊ “အိုယ် မဲ ခုန်ဒီခမ် အာအူဇီယာ၊ မဲ တူ ပွိုန် ဒုဝ့် လှူ ဆီနမ် အုး ငှုန် ဒီ ဇဝ်ဖြာ။ န့ မိုဝ်း မီ ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန်၊ ဂေ အီ ပွိုန် ဒုဝ့် လှူ ဆီနမ် အုး ငှုန်။ မှာန့်၊ တဲး မဲ လေး ခဲင် ဒူင် ဆီငါ ဘွတ် နီ။ ခုဝ်၊ မဲ ဟဲ့ လုတ့် ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ အန် ဇဝ် တူ တဲး မဲ ဝီ မိုဝ်း ဆာရေ။”

19 အာအူဇီယာ တွိုန် ယီ ဆီ စွင့် ခဲင် ဟုဝ် ဇဝ်ဖြာ ခူပ် ကာစှူင့် လှူ ဆီနမ် အုး ငှုန်၊ အန် မိူဝ် ဟဲ့ ဂူင့် ဘော ဆီလယ့် ငဝ် ဒူင် ဒီ ဒုဝ့် အန် ဆီနမ် အုး ငှုန် တီ။ အန် မိူဝ် ဟဲ့ ရူ ကာဆဝ် ဒီ ဂေ ဒါ အီ လှူ ဒီ ဇဝ်ဖြာ တွိုန်။ ဒေါ အန် တီ ဆဝ် ဒု ဘော ဘုဝ် လေး ဒီ ကာတဝ်း အန် အူ ဇေန့်။ 20 အာဇာရီယာ ဘော ဂေ ဒါ အီ လှူ ဒီ ဇဝ်ဖြာ၊ ဂေ ဝီ ယိုဝ် ဆဝ် ဒု ဒီ ကာတဝ်း ခုန်ဒီခမ်၊ ဂေ ဝီ ဇုန် လေး ခုန်ဒီခမ် ခဲင် ဟုဝ် ဇဝ်ဖြာ အူ ဇေန့်။ အန် မိူဝ် ဝီ ပီခြန် အန် ဒီ လေး ခုဝ်၊ ဇဝ်ဖြာ ဟဲ့ ဒွါ ဒုက် ဒီ အန်။

21 ပါယ် တီ ခုန်ဒီခမ် အာအူဇီယာ အာဝ် ဟူ ဆီငါ ဘွတ် ကူပ် ဆဝ် ဒု တီ။ အန် ဘော ကာဒုး ဒီ ကွယ် ခဲင် ဟုဝ် အူ ပ့လုဝ့် ရာင် အန် ကော ဇမ် ယမ် အန်။ အန် မိူဝ် အာဝ် ဟူ ပွိုန် ဝီ လိုပ် ခဲင် ဟုဝ် ဇဝ်ဖြာ ဒေါ မှဝ်။ ဂွန် အီမာယ် အန် အီ စိူဝ် အာယုဝ်ထာမ် ဘော ဝီ ကာဒါင် အန်၊ ဝီ အိုပ် မာန် မိူင် ဘော ကွယ် ခဲင် ဟုဝ် ခုန်ဒီခမ်။

22 ခဲ့ ကွယ် လွင် အာအူဇီယာ အီ ညှမ် ဒွိုမ် ကာလာင် ဘော မုး လွင် အိုပ် အန် မာန် မိူင်၊ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆီယာ အီ မုး ဂွန် အာမူတ် ဟဲ့ ဒဲမ် အုန်။ 23 အာအူဇီယာ တီ ဘော ယမ် ဟာဝ် ဒူပ် ဒါ ဒါ အန်။ ဂေ ယီ တူ ဒိပ် ရိုမ် အန် ဒူပ် ဒါ ဒါ အန်။ ဂေ ဒိပ် အန် မီ ဒူင် မုး ကာဒါယ် ဘာရေဝ် ပီ စိုဝ်း ခုန်ဒီခမ်။ ခုဝ်၊ ဂေ တဝ်း အန် မိုဝ်း ဆဝ် ဒု။ ဂွန် အီမာယ် အန် အီ စိူဝ် အာယုဝ်ထာမ် ဘော ဝီ ဘဲန် ခုန်ဒီခမ်၊ ဝီ ပ့လု အန်။