1 ဒေါ ဘဲန် အာယုဝ်ထာမ် ခုန်ဒီခမ်၊ အာဆာက် အန် ဟဲ့ ပွိုန် အာ ဂိုဝ် ဒီ ဖန် ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ ဒဝ် ဆီနမ်။ မာ အန် စိူဝ် နာင် ယေရူဆာ အီ မုး ဂွန် အာဇာဒူက်။ 2 အန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ပါယ် ဂုန့် အန် အီ စိူဝ် အာအူဇီယာ တွိုန်။ န့ မိုဝ်း မီ အူ မျုဝ် ပီ တူ ဘူင် အန်။ အန် တူ လိုပ် ခဲင် ဟုဝ် ဇဝ်ဖြာ ဘူင် မှာပ် ဘော ဒုဝ့် လှူ ဆီနမ် အုး ငှုန် ပီ ဂုန့် အန်။ မာလဲ၊ ဂေ ဒူအီ ရဝ် ဒူအီ ကာင် ယီ နဲ့ ဆီ ဘူင် မှာပ်။ 3 အာယုဝ်ထာမ် ဘော မ့ပြာယ် မာလုဝ်း ဟုဝ် ဇဝ်ဖြာ အီ ကွယ် ဘ့လာက် နာ ကွာ။ အန် ဘော ဝီ ဂုဝ်၊ ဝီ မ့ပြာယ် ရဲင် မိူင် ယေရူဆာလဲမ် ဒူင် စိူဝ် အောဖဲလ။ ဒူင် ဝီ မ့ပြာယ် အန် ဟဲ့ ကိူန် ကာဆဝ် ဒီ တီ။ 4 အန် ဘော ဝီ ဒဲ မိူင် ဒဲင် နွန် ခဲင် ကာဒါယ် မိူင် ယူဒါ၊ ဝီ ဆမ် ဒူင် ချြီင် ဒါ ဆိုက် ဘော ဟုဝ် စာ ခဲင် ပြဲ။

5 အာယုဝ်ထာမ် ဘော ယဲတ့် ဒါ ဆိုက် အန်၊ တဲး ဂေ ဟာဝ် ကာဂုဝ်း ပဲ ခုန်ဒီခမ် ဒူအီ အမ်မူန်။ အန် ဝီ တဲး ဂေ ဒူအီ အမ်မူန် ဟပ် စိုင် ဒီ အန်။ ဆီနမ် ကာဂုဝ်း ဂေ တီ၊ ဂေ လုဝ် ဟပ် ရွိုန် အူ မာယဝ်း ထာလေန်။ ဂေ လုဝ် ဟပ် ဘော ခဝ်ချုင် အူ မှိုန့် ကောရ ဘော ခဝ်ဘာလီ အူ မှိုန့် ကောရ။ ဂေ လုဝ် ဟပ် စိုင် တီ ဒီ အန်၊ တဲး န့ ကော နုဝ့် အူယ် ဆီနမ်။

6 ပါယ် တီ ပွုန် ဂေ အာဖုင် ဒင်ခုဝ် အာယုဝ်ထာမ် ဘော ကြဲ ဒီ တာင် ကူပ် မိုဝ်း အန် နဝ်း ဆိူဝ် နဝ်း မှာန် ဒီ ထူမ် ဒူပ် ဇဝ်ဖြာ အီ မုး ဇဝ်ဖြာ ပီ ကြိုပ် အန်။

7 လွင် ပီ ပါယ် အာယုဝ်ထာမ် ဒီ အိုပ် ဒါ ဆိုက် ဘော ပီ ပါယ် အန် ဒီ ကာဂုဝ်း ဘော လွင် ဟဲ့ အိုပ် အန် မာန် မိူင်၊ န့ ဟဲ့ ဒဲမ် အုန် ခဲင် ဘပ် ဘိူန် ခုန်ဒီခမ် အီဆာရေလ ဘော ခုန်ဒီခမ် ယူဒါ။ 8 ဒေါ ဘဲန် အာယုဝ်ထာမ် ခုန်ဒီခမ်၊ အာဆာက် အန် ဟဲ့ ပွိုန် အာ ဂိုဝ် ဒီ ဖန် ဆီနမ်။ အန် ဘော ကွယ် အိုပ် ခဲင် မိူင် ယေရူဆာလဲမ် အာဒါ ဂိုဝ် ဒီ ဒဝ် ဆီနမ်။ 9 အန် ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် ဒုဝ် ဘူင့် အန် ခဲင် မိူင် အာဒါဝိတ် ဒူပ် ဒါ ဒါ အန် ဂေ တွိုန်။ ဂွန် အီမာယ် အန် အီ စိူဝ် အာခါတ် ဘော ဝီ ဘဲန် ခုန်ဒီခမ် ဝီ ပ့လု အန်။