1 ဒေါ ဟဲ့ နုဝ့် အာဆာက် အာခါတ် အာ ဂိုဝ် ဆီနမ် အန် ဟဲ့ ဘဲန် ခုန်ဒီခမ်။ အန် ဘော ကွယ် အိုပ် ခဲင် မိူင် ယေရူဆာလဲမ် အာဒါ ဂိုဝ် ဒီ ဒဝ် ဆီနမ်။ အန် ယီ တူ ဘူင် နာ ဘွတ် နာ မွှိုမ် ပီ ပီ ဘူင် ဒါ ဒါ အန် အီ မုး အာဒါဝိတ် တွိုန်။ အန် ဝီ ဘူင် ပီ တူ အိုင် ဇဝ်ဖြာ။ 2 အန် ဝီ ဘူင် ပီ ပီ ဘူင် ဂေ ခုန်ဒီခမ် အီဆာရေလ။ အန် ဘော လှုဝ် အာရိုပ် ဇဝ် ဘာလ ဘဲန် ကာဒင် ဘဲန် ကာဒင်၊ တဲး အန် ကြိုပ်။ 3 အန် ဝီ ဒုဝ့် လှူ ဆီနမ် အုး ငှုန် ခဲင် ဒီလယ့် ဘေန်ဟီနုမ်။ အန် ဘော လှူ ဂွန် အန် မင် အီ ဒီ ဇဝ် အာရိုပ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ အန် ဘူင် ဒူပ် ထုင်ဂျာမ် အီ မွှိုမ် ကာအိး ပီ ပဲ့ ဟဲ့ ဘူင် ဂေ ဒူအီ ပဲ့ ဟဲ့ ဒွိုမ် ညွန် ဝဲန် ဇဝ်ဖြာ အာတ့် လိုပ် ဂေ ဒူအီ အီဆာရေလ ခဲင် မိူင် တီ။ 4 အန် ဘော လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ အုး ငှုန် ဒီ ဒူင် စာ ဒွန် ပ့လုဝ့်၊ ဘော ဒဲင် နွန် ဒွန် နွန် ဘော ဒီ ဒင် ဟေ တာင် ဒွန် ကာဒင်။

5 ကူပ် ဘူင် ခုန်ဒီခမ် အာခါတ် အီ တူ မွှိုမ် တီ၊ ဇဝ်ဖြာ အီ မုး ဇဝ်ဖြာ ပီ ကြိုပ် အန် ဘော တဲး အန် စှိုမ် ဒီ ခုန်ဒီခမ် မိူင် အာရာမ်။ ဂေ ဘော ကာဂုဝ်း ပဲ ခုန်ဒီခမ် အာခါတ် ဘော မှေတ့် ဒူအီ အာယူဒါ ကိူန် ကာဆဝ်၊ ဝီ တိုယ် ဝေန့် ဂေ ခဲင် မိူင် ဒါမာခူ။ ဒေါ အန် တီ မိူဝ် ဇဝ်ဖြာ ဟဲ့ ဘူင် တဲး အာခါတ် စှိုမ် ဒီ ခုန်ဒီခမ် အီဆာရေလ အီ စိူဝ် အာဘေခါ အီ မုး ဂွန် အာရေမာလီ။ အန် ဘော ငဝ်း ယမ် ဒါ ဆိုက် ဒူအီ အာယူဒါ ကိူန် ကာဆဝ်။ 6 အူ ဆီငဲ အန် ဘော ပွိုန် ဒီ ငဝ်း ယမ် ဒါ ဆိုက် ဒူအီ အာယူဒါ အာဒါ အူ ဆဲန် ဒီ အာ မှိုန့် ဝီ။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ၊ အန် ဟဲ့ ဘူင် တဲး န့ ဘဲန် ပါယ် တီ ဒီ ဂေ ကူပ် ဟဲ့ ဝဲန် ဂေ ဒီ အန် ဇဝ်။ 7 ဒါ ဆိုက် ဒူအီ အာမျုဝ် အာအေဖာရိမ် အူ ဝီ အီ စိူဝ် အာဇီခါရီ၊ အန် ဘော ငဝ်း ယမ် အာမာဆေယာ အီ မုး ဂွန် ခုန်ဒီခမ် အာခါတ် ဘော အာဇာရီကမ် အီ မုး ဒါ တာင် အီ အိုပ် ခဲင် ဟုဝ် ခုန်ဒီခမ်။ အန် ဘော ငဝ်း ယမ် ဘော အာအေန်ခါနာ အီ မုး ဒါ ကာညာ အီ ဒါမ် ခုန်ဒီခမ်။ 8 ဂေ ဒူအီ အာယူဒါ ပီ ဘော ဟဲ့ မုး အူ ဘီနွင် အူ ခြိုဝ် ဒီ ဒူအီ အီဆာရေလ မိူဝ်၊ ဂေ ဒူအီ အီဆာရေလ ယီ ဝီ မှေတ့် ဘော ဂွန် အီဘိုန့် ဘော ဂွန် အီမာယ် ဂေ အာဒါ အာ ဆဲန် ဝီ၊ ဝီ တိုယ် ဝေန့် ဂေ ဒီ မိူင် ဆာမာရီ။ ဂေ ဒိုဝ်း ဟာဝ် ဘော ကြုဝ်ကြာမ် ဂေ ကိူန် ကာဆဝ်။

9 ဒေါ အန် တီ န့ ဝီ မိုဝ်း ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအုဝ်ဒီ။ အန် ကွယ် ခဲင် မိူင် ဆာမာရီ ဘော ဝီ ဟာဝ် ဘ်ု ဒီ ရွုး န့တေန့် ဂေ ဒါ ဆိုက် ဒူအီ အီဆာရေလ။ ဂေ ဟဲ့ ရိန် ဒီ တး လိုပ် ခဲင် မိူင်၊ အန် ဝီ ကာလာင် ဒီ ဂေ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဟဲ့ ရူ ဒီ ဂေ ဒူအီ အာယူဒါ၊ ဟဲ့ တဲး ဘေ ကာဂုဝ်း ပဲ ဂေ။ မာလဲ၊ အန် ဇဝ် ဟဲ့ ဝီ ယိုဝ် ဘော ပီ ပါယ် ဒေါဆ ဘေ ဒီ ဟဲန့် ဘော လွင် ဟဲ့ ငဝ်း ယမ် ကိူန် ကာဆဝ် ဘေ ဒီ ဂေ။ 10 ဒေါ တီ နီ၊ ဘေ ဝီ ခြာမ် ဒီ ဒိုဝ်း ဘော အီဘိုန့် အီမာယ် အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ၊ တဲး ဂေ ဘဲန် မှာယ် ဘေ။ ဘေ ယီ ဟဲ့ ဟွတ့် လုတ့် ဇဝ်ဖြာ၊ ဟဲ့ ဟွတ့် မိုဝ်း မှာပ်။ 11 တဲး ဘေ ထူမ် ဂြုဝ်း အုဝ်။ ဒူအီ ပီ မှေတ့် တး ဘေ ဂေ တီ၊ ဂေ မုး ဘီနွင် ဝေါဝဲ ဘေ။ တဲး ဘေ ဝီ ဘ့လေး ဝေန့် ဂေ၊ ယုဝ် ဇဝ်ဖြာ ရူ ဒီ ဘေ၊ ဒီ ဘော ဒမ် မှာပ် ဒီ ဘေ။”

12 န့ မိုဝ်း ဒါ တာင် မင် အီ ဂေ အီ အိုပ် ခဲင် ကာဒါယ် မိူင် အာအေဖာရိမ်။ ဂေ စိူဝ် အာဇာရီယာ အီ မုး ဂွန် အာယေဟုဝ်နန်၊ အာဘေရေက် အီ မုး ဂွန် အာမေဆီလာမုတ်၊ အာဟေစကီ အီ မုး ဂွန် အာဆာလူမ် ဘော အာမာဆာ အီ မုး ဂွန် အာဟာတာလီ မိူဝ် ခြဲ ပီ ဘူင် ဂေ ဒါ ဆိုက် အီ ဟဲ့ ဝီ တး ဂေ တီ။ 13 ဂေ မိူဝ် ကာလာင် ဒီ ဒါ ဆိုက် ဂေ တီ တဝ်း၊ “ကွဲ့ တဲး ဒူအီ ပီ မှေတ့် တး ဘေ တး လိုပ် ခဲင် မိူင်။ အေ ဟဲ့ ဟွတ့် လုတ့် ဇဝ်ဖြာ၊ ဟဲ့ ဟွတ့် မိုဝ်း မှာပ်။ ဇဝ်ဖြာ ဟဲ့ ဟွတ့် ရူ ကာဆဝ် ဒီ အေ။ ကွဲ့ ဘူင် တဲး မှာပ် အေ ဝဲ ကိူန် ကာပွါ။ ကွဲ့ တဲး အေ ဝဲ လုဝ် ခမ် ပေါ မ့ပွါ။”

14 ပါယ် တီ ဒါ ဆိုက် ဂေ တွိုန် ဘော ဝီ ဒိုဝ်း ဒူအီ ပီ မှေတ့် တး ဂေ ဘော ကြုဝ်ကြာမ် ပဲ့ ဟဲ့ ဖာတ် တး ဂေ၊ ဝီ ဘ့လေး အုန် ဒူအီ ဂေ တီ ဘော ကြုဝ်ကြာမ် ဂေ၊ တဲး ဘော ဒူအီ ကိူန် ဘော ဒါ ကာညာ အီ အိုပ် မိူင် ယိုဝ်။ 15 ဂေ မိူဝ် အာပ် ဒွါ ဒီ ဂေ ဒါ ကာညာ ဖွုန် ဝီ တွိုန်၊ တဲး ဂေ ဒိုဝ်း ခြိုင် တာ ပဲ့ ဟဲ့ ဖာတ် တး ဂေ၊ ဝီ ကာဆာင် ဒွါ ဒီ ဂေ ဒူအီ ပီ မှေတ့် တး ဂေ။ ဂေ ဒါ တာင် ဖွုန် ဝီ၊ ဂေ မိူဝ် ဒိုဝ်း ခြိုင် တာ ဘော မုး ဆီတုဝ် ဘော ခ့လဲပ်၊ ဝီ ဒွါ ဒီ ဂေ အီ တူ မိုဝ်း၊ တဲး ဂေ စှိုပ်။ ဂေ မိူဝ် ဒိုဝ်း ဘော ပီ ဒီ ဟူမ် ဟျီင် ဂေ၊ ဒိုဝ်း ဘော နာမန် ဖဝ်း ဒီ ဒိမ် ဂေ။ ဒူအီ အီ တူ စာဝ် ဟာဝ်၊ ဂေ ဘော တဲး ဂေ ပဝ့် မာလာ။ ဂေ ဝီ တိုယ် ဒူအီ ဂေ တီ ဘောကာဂ့လျီတ်၊ တဲး ဂေ ဝီ ဝေန့် ခဲင် မိူင် ယေရီခုဝ် အီ ကွယ် ခဲင် ကာဒါယ် မိူင် ယူဒါ။ န့ မုး မိူင် အီ မိုဝ်း ဟေ စိုက်။ ဟဲ့ ဟွတ့်၊ ဂေ ဒူအီ အီဆာရေလ မိူဝ် ဝီ ဝေန့် ဒီ မိူင် ဆာမာရီ။

16 ဒေါ အန် တီ ခုန်ဒီခမ် အာခါတ် ဝီ စ်ု ဒါလာမ် အန် ဟာဝ် ဒူင် ကွယ် ခုန်ဒီခမ် အီ အိုပ် မိူင် အာဆူရာ၊ ဒဲ့ တဲး အန် တး စွယ် အန်။ 17 ခုဝ်၊ ဂေ ဒူအီ မိူင် အေဒူမ် ဟဲ့ ဝီ တး တိုက် ဒူအီ အာယူဒါ ပေါ အူ ဇေန့်။ ဂေ မိူဝ် ဟဲ့ မှေတ့် ဟာဝ် ဘော ဂေ ဒူအီ အာယူဒါ မင် အီ။ 18 ဒေါ ကာဂုဝ်း ဂေ တီ၊ ဂေ ဒူအီ ဖီလီထီ ဟဲ့ ဝီ တး လိုပ် ခဲင် မိူင် မင် မိူင် အီ ကွယ် ချြီ့ ဒီ ဒင် နွန် နာ လေး ဆီငဲ ဘော ဘ့လာက် နာ တေတ့် ကာဒါယ် မိူင် ယူဒါ တွိုန်။ ဂေ မိူဝ် ဟဲ့ ပွိုန် မိူင် ဘေတ်ဆေမေတ်၊ မိူင် အာစာလုန်၊ မိူင် ကေတာရုတ် ဘော မိူင် ဆေခေါ၊ မိူင် ထီမာနာ ဘော မိူင် ဂီမာဆော ဘော ရဝ် အီ ကွယ် ရူပ် မိူင် ဂေ တီ။ ဟဲ့ ဟွတ့်၊ ဂေ မိူဝ် ချ ကွယ် ခဲင် မိူင် ဂေ တီ။ 19 ခုဝ်၊ ဇဝ်ဖြာ မိူဝ် တဲး မိူင် ယူဒါ စုဝ်း တျီမ် ကာဆဝ် ကူပ် ခုန်ဒီခမ် အာခါတ်။ အန် မိူဝ် ဟဲ့ ကာဆုး ဒူအီ အာယူဒါ ဘူင် အီ ဟာယ် ကာဆဝ်။ အန် မိူဝ် ဟဲ့ လုတ့် ကာဆဝ် ဇဝ်ဖြာ။ 20 အာတီကာလာတ်ဘီလေဆာ အီ မုး ခုန်ဒီခမ် အီ အိုပ် မိူင် အာဆူရာ၊ ပီ ဘော ဟဲ့ တး ဒူင် ကွယ် ခုန်ဒီခမ် အာခါတ် မိူဝ်၊ ဝီ ဒွါ ဒုက် ဒီ အန် ဘော တူ စွယ် မာဆေ။ 21 ပါယ် တီ ခုန်ဒီခမ် အာခါတ် မိူဝ် ဟဲ့ ဒိုဝ်း ခြိဝ် အီ ကွယ် ခဲင် ဟုဝ် ဇဝ်ဖြာ ဘော အီ ကွယ် ခဲင် ဟုဝ် ခုန်ဒီခမ် ဘော ခဲင် ကာင် ဂေ အာမူ အာမာတ် အန်၊ ဝီ ဒွါ ဒီ ခုန်ဒီခမ် အာဆူရာ။ န့ ယီ တူ စွယ် မာဆေ ဒီ အန်။

22 ဒေါ ဒုက် တာင် ဟဲ့ ဝဲ ကာဆဝ် ဒီ ခုန်ဒီခမ် အာခါတ် တီ၊ အန် မိူဝ် ဝီ ဝဲ ဘူင် လုတ့် ဇဝ်ဖြာ လွှိုမ် အာတ့် နီ။ 23 အန် ဝီ လှူ ပီ ဒီ လှူ ဒီ ဇဝ် ပီ ကြိုပ် ဂေ ဒူအီ ခဲင် မိူင် ဒါမာခူ အီ ဟဲ့ ဘူင် တဲး အန် လိုဝ် စှိုမ် တွိုန်။ အန် မိူဝ် တဝ်း၊ “ဇဝ် ဘဲန် ကာဒင် ဘဲန် ကာဒင် ပီ ကြိုပ် ဂေ ဒူအီ မိူင် ဒါမာခူ နီ ဟဲ့ စွယ် ခုန်ဒီခမ် ဂေ။ ပါယ် တီ အုဝ် မိူဝ် ဘူင် ဒီ လှူ ဒီ ဇဝ် ဂေ တီ၊ ယုဝ် ဂေ ဆော စွယ် ဘော အုဝ်။” မာလဲ၊ ဇဝ် ဂေ တီ၊ ယီ ဝီ ဘူင် တဲး အန် လိုဝ် စှိုမ် ကိူန် ကာဆဝ်၊ တဲး ဘော ဒူအီ ခဲင် မာန် မိူင် ပီ အိုပ် အန် လိုဝ် စှိုမ်။

24 ခုန်ဒီခမ် အာခါတ် ပီ ဝီ ဒိုဝ်း ကာဇု ဘော ကြုဝ်ကြာမ် ပီ စ်ု ပီ တာ ဂေ အီ ကွယ် ခဲင် ဟုဝ် ဇဝ်ဖြာ၊ ဝီ ဒိုဝ်း လေး တူတ့်။ အန် ဝီ ကာဒဲပ် ဘဲန် ပွတ် ဘဲန် ပွတ်။ အန် ဝီ ကာဘိတ် မာလုဝ်း ဟုဝ် ဇဝ်ဖြာ၊ ဝီ ဘူင် ကာစှူင့် လှူ ဒီ ကာတုဝ့် မိူင် ယေရူဆာလဲမ် ဒွန် ကာတုဝ့်။ 25 အန် ဘူင် ကာစှူင့် လှူ ဂေ ဒူင် စာ ခဲင် မိူင် ဒွန် မိူင် အီ ကွယ် ခဲင် ကာဒါယ် မိူင် ယူဒါ၊ တဲး ဂေ ပွိုန် ဒီ ဒုဝ့် လှူ ဆီနမ် အုး ငှုန် ဒီ ဇဝ် ပီ ကြိုပ် ဒူအီ အာမျုဝ် ဟဝ်။ ပါယ် တီ အန် ဘူင် တဲး ဇဝ်ဖြာ ပီ ကြိုပ် ဂုန့် ဒင် အန် ဝဲ ရူ ကာဆဝ် ဒီ အန်။

26 လွင် ပီ ဘူင် ခုန်ဒီခမ် အာခါတ် ဘော ဒွန် မျုဝ် စုး ဆိန့် ဒေါ ဂုဝ် ကော ဇမ် ကာဒဲ့ ဟဲ့ ဒဲမ် အုန် ခဲင် ဘပ် ဘိူန် ခုန်ဒီခမ် ယူဒါ ဘော ဘိူန် ခုန်ဒီခမ် မိူင် အီဆာရေလ။ 27 ခုန်ဒီခမ် အာခါတ် တီ အန် ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် ဒုဝ် ဘူင့် အန် ခဲင် မိူင် အာဒါဝိတ်၊ ယီ တူ မုး ခဲင် ဘာရေဝ် ဂေ ခုန်ဒီခမ်။ ဂွန် အီမာယ် အန် အီ စိူဝ် အာဟေစကီ ဘော ဝီ ပ့လု အန်။